Jehova “Nguupa [Bulumbu] Kuli-baabo Bamuyandaula”

“Woonse muntu uuswena kulinguwe uleelede kuzumina kuti Leza mpali akuti nguupa [bulumbu] kulibaabo bamuyandaula.”—BA-HEBRAYO 11:6.

1, 2. Nkaambo nzi babelesi ba Jehova bamwi ncobakonzya kupenga amizeezo iityompya?

BARBARA wakaamba cakutasisa kuti: “Ndali Kamboni wa Jehova kwamyaka iitandila ku 30, pele kunyina buzuba nondakalimvwa kweelela kwiitwa boobo. Nokuba kuti ndali kucita bupainiya alimwi ndalijisi zyoolwe zinji zilibedelede, kunyina akati kazintu eezyi icakonzya kundipa kusyoma mumoyo wangu kuti ndileelela kwiitwa kuti Kamboni.” Keith awalo wakaamba majwi aakozyenye. Wakati: “Zimwi ziindi ndakali kulimvwa kutyompwa akaambo kakuti babelesi ba Jehova balijisi twaambo tunji tubapa kukkomana, pele mebo ndakanyina lukkomano. Eeci cakandipa kulimvwa kuba amulandu calo cakapa buyo kuti zintu ziindile kubija.” *

² Babelesi ba Jehova banji kaindi alimwi amazubaano bali kulimvwa mbubonya oobo. Sena mbomulimvwa oobo zimwi ziindi? Mapenzi alakonzya kumusikila cakutobelana, kakuli basyominyoko balibonya kuti zintu zibeendela kabotu, banyina mapenzi alimwi balikkomene. Akaambo kaako, mulakonzya kulimvwa mbuli kuti tamukkomanini Jehova naa kuti tamweeleli kubikkilwa maano anguwe. Mutafwambaani kuyeeya kuti mbocibede oobo. Ibbaibbele litusyomezya kuti: “[Jehova] tasampauli na kusesemwa mapenzi aauupengede.  Tasisi busyu bwakwe kulinguwe pe, waswiilila kulila kwakwe.” (Intembauzyo 22:24) Majwi aayo aabusinsimi ajatikizya Mesiya atondezya kuti Jehova tabaswiilili buyo bantu bakwe basyomeka, pele alimwi ulabapa bulumbu.

3. Nkaambo nzi ncotutakwabilidwe kumapenzi aamunyika eeyi?

³ Kunyina uukwabilidwe kumapenzi aaliko mubukkale oobu, nobaba bantu ba Jehova. Tuli munyika yeendelezyegwa asinkondonyina Jehova, Saatani Diabolosi. (2 Ba-Korinto 4:4; 1 Johane 5:19) Muciindi cakukwabililwa munzila yamaleele, babelesi ba Jehova mbakanzide buya kulwana Saatani. (Jobu 1:7-12; Ciyubunuzyo 2:10) Aboobo kusikila ciindi ncabikkide Leza, tweelede ‘kukakatila nikuba kuciindi camapenzi’ alimwi “akujatisya kukomba,” katujisi lusyomo lwakuti Jehova ulatulanganya. (Ba-Roma 12:12) Tatweelede kulekela mapenzi aamunyika eeyi kutupa kuyeeya kuti tatuyandwi a Leza wesu Jehova!

Bantu Bakaindi Ibakaliyumya

4. Amupe zikozyanyo zyababelesi ba Jehova bakaindi ibakaliyumya mubukkale butyompya.

⁴ Babelesi ba Jehova banji bakaindi bakaliyumya mubukkale butyompya. Mucikozyanyo, Hana ‘wakaciswa mumoyo’ akaambo kakuti tanaakali kuzyala, ibukkale mbwaakabona kuti bwakeelene buyo akuti wakalubwa a Leza. (1 Samuele 1:9-11) Eliya naakali kuyandaulwa a Mwami mukaintu Jezebeli mujayi, wakayoowa akupaila kuli Jehova kuti: “Cazulila. Kondinyanzya buumi bwangu, O Jehova, nkaambo nsili mubotu kwiinda bamatata.” (1 Bami 19:4) Alimwi mwaapostolo Paulo weelede kuti wakatyompwa kapati kujatikizya kutalondoka kwakwe naakazumina kuti: “Ciindi ncinjanda kucita kabotu, nceciindi nciconya ncetuli aco cibi.” Wakayungizya kuti: “Maawe! ndi muntu uusampaukide ncobeni!”—Ba-Roma 7:21-24.

5. (a) Mbuti ba Hana, Eliya a Paulo mbobakalongezyegwa? (b) Ino nduumbulizyo nzi ndotukonzya kujana ku Jwi lya Leza ikuti katulimvwa kutyompwa mumizeezo?

⁵ Mubwini, tulizyi kuti Hana, Eliya alimwi a Paulo bakaliyumya kumwi kababelekela Jehova, aboobo wakabalongezya kapati. (1 Samuele 1:20; 2:21; 1 Bami 19:5-18; 2 Timoteo 4:8) Nokuba boobo, bakapenga kapati kuzintu zinji zinyonganya mizeezo, kubikkilizya akuusa, kutyompwa alimwi akuyoowa. Aboobo taceelede kutugambya ikuti naa zimwi ziindi katulimva kutyompwa. Nokuba boobo, ino ncinzi ncomukonzya kucita ikuti naa kulibilikka zintu zyamubuumi kwamupa kudooneka kuti naa mulayandwa ncobeni a Jehova? Mulakonzya kujana luumbulizyo ku Jwi lya Leza. Mucikozyanyo, mucibalo cainda, twakabandika majwi aa Jesu aakuti Jehova wakaabala ‘masusu aali amitwe yesu.’ (Matayo 10:30) Majwi aayo aakulwaizya, atondezya kuti Jehova ulibikkilide maano kapati kumubelesi wakwe aumwi. Alimwi amuyeeye cikozyanyo ca Jesu catutiiti. Ikuti naa Jehova ulabona nokaba kayuni komwe aako kawida ansi, nkaambo nzi ncakonzya kwaalilwa kubona mapenzi aanu?

6. Mbuti Bbaibbele mbolikonzya kubaumbulizya aabo ibatyompedwe?

⁶ Sena cikonzyeka ncobeni kulindiswe tobantu batalondokede kuba bayandisi mumeso aa Mulengi singuzuzyoonse, Jehova Leza? Inzya! Alimwi buya kuli zibalo zinji zyamu Bbaibbele zitusyomezya kujatikizya makani aaya. Kwiinda mukuziyeeya mumoyo, tulakonzya kwaamba majwi aasintembauzyo aakuti: “Miyeeyo minji iikataazya na yaata mumoyo wangu, kuumbulizyigwa kwako nkokundikondezya.” (Intembauzyo 94:19) Atulange-lange tumwi twatwaambo ootu tuumbulizya kuzwa mu Jwi lya Leza ituyootugwasya  kumvwisya kapati kuti tulabikkilwa maano a Leza akuti uyootuumbulizya mbotuzumanana kucita kuyanda kwakwe.

“Lubono Luyandisi” lwa Jehova

7. Ino mbusinsimi nzi bukulwaizya oobo Jehova mbwaakapa kumusyobo uunyongene kwiinda muli Malaki?

⁷ Kwakaba bukkale buusisya akati kaba Juda mumwaanda wamyaka wasanu B.C.E. Bapaizi bakali kutambula banyama bateeleli alimwi akubatuula kazili zipaizyo acipaililo ca Jehova. Babetesi bakali kusalulula. Kusonda, kubeja, bumpelenge akucita bwaamu zyakali vwulide. (Malaki 1:8; 2:9; 3:5) Kuluzubo oolu lunyongene, Malaki wakaamba businsimi bukankamanisya. Mukuya kwaciindi, Jehova wakali kuyoobapilusya bantu bakwe mubukkale buli kabotu. Tubala kuti: “Bayooba bangu, mbwaamba Jehova wamakamu, mubuzuba obo mbwenti bunge lubono luyandisi. Njoobafwida insoni mbubonya mbuli muntu mbwafwida mwanaakwe uumumanina milimo insoni.”—Malaki 3:17.

8. Nkaambo nzi njiisyo iili kulugwalo lwa Malaki 3:17, ncoikonzya kubelesyegwa kunkamu impati?

⁸ Businsimi bwa Malaki bulazuzikizyigwa mazubaano kujatikizya Banakristo bananikidwe amuuya, aabo ibali ncibeela camusyobo wakumuuya waba 144,000. Musyobo ooyu masimpe ‘ndubono luyandisi’ antela “[m]bantu bavubidwe” kuli Jehova. (1 Petro 2:9) Alimwi businsimi bwa Malaki bulakonzya kukulwaizya ku “nkamu impati,” balo ‘ibaimvwi kunembo lyacuuno cabwami akunembo lya Mwanaambele, balisamide zikobela zituba.’ (Ciyubunuzyo 7:4, 9) Aaba balaba itanga lyomwe antoomwe abananike, mubweendelezi bwa Mweembezi omwe, Jesu Kristo.—Johane 10:16.

9. Nkaambo nzi bantu ba Jehova ncobali “lubono luyandisi” kulinguwe?

⁹ Ino Jehova ubabona buti aabo ibasala kumubelekela? Kweelana ambotwabona kuli Malaki 3:17, ubabona munzila njiyona usyi siluyando mbwabona mwanaakwe. Alimwi amubone majwi aakulwaizya ngabelesya kupandulula bantu bakwe—“lubono luyandisi.” Busanduluzi bumbi busandulula kaambo aako kuti “bantu bangu kundigama,” “bantu bangu mbondiyandisya kapati,” alimwi akuti “mabwe aangu mayandisi.” Nkaambo nzi Jehova ncabona aabo ibamubelekela kuba bayandisi? Ikaambo kamwi nkakuti, ngu Leza uulumba. (Ba-Hebrayo 6:10) Ulaba mulongwe mwini-mwini alimwi akubabona kuti mbayandisi aabo ibamubelekela kuzwa ansi amoyo.

10. Mbuti Jehova mbwakwabilila bantu bakwe?

¹⁰ Sena kuli cintu cimwi ncomujisi ncomubona kuti nciyandisi? Sena tamusolekesyi kucikwabilila? Jehova ulacita mbubonya ku “lubono luyandisi” ilwakwe. Masimpe, tabakwabilili bantu bakwe kumasukusyo woonse alimwi akumapenzi. (Mukambausi 9:11) Pele Jehova ulakonzya, alimwi uyoobakwabilila kumuuya babelesi bakwe basyomeka. Ulabapa nguzu nzyobayandika kutegwa baliyumye mumusunko uuli woonse. (1 Ba-Korinto 10:13) Aboobo, Musa wakaambila bantu ba Leza bakaindi, bana Israyeli kuti: ‘Amuyume mube basicamba. . . . Jehova Leza wanu ngumuli awe. Taakwe nayoomusia nanka kumulekelezya.’ (Deuteronomo 31:6) Jehova ulabeendelezya kabotu bantu bakwe. Ubabona kuti ‘ndubono luyandisi.’

Jehova ‘Nguupa Bulumbu’

11, 12. Mbuti kutondezya kulumba kuli Jehova akaambo kalubazu lwakwe mbwali Sikutupa Bulumbu mbokutugwasya kuzunda kulidooneka?

¹¹ Bumboni bumbi butondezya kuti Jehova ulababikkila maano babelesi bakwe mbwakuti ulabapa bulumbu. Wakaambila bana Israyeli kuti: “Amundisole obo, mbwaamba Jehova wamakamu. Munoobona kuti njoomujalwida zipulo zyakujulu akumutilila coolwe cakufwasuka loko.” (Malaki 3:10) Kumbele, Jehova uya kubapa bulumbu babelesi bakwe bwabuumi butamani. (Johane 5:24; Ciyubunuzyo 21:4) Bulumbu oobu butalikomeneni buyubununa mboluli lunji luyando abwaabi bwa Jehova. Alimwi butondezya kuti masimpe ulababikkila maano aabo ibasala kumubelekela. Ikwiiya kubona Jehova kuba yooyo Uutupa Bulumbu cabwaabi kulakonzya kutugwasya kuzunda kufwumbwa kudooneka nkotukonzya kuba  ankuko kujatikizya mbwatubona Leza. Alimwi buya, Jehova utukulwaizya kumubona kuba Sikupa Bulumbu! Paulo wakalemba kuti: “Woonse muntu uuswena kulinguwe uleelede kuzumina kuti Leza mpali akuti nguupa [bulumbu] kulibaabo bamuyandaula.”—Ba-Hebrayo 11:6.

¹² Masimpe, tulamubelekela Jehova akaambo kakuti tulamuyanda, ikutali buyo akaambo kakuti utusyomezya kuyootupa bulumbu. Pele, ikubukkomanina bulangizi oobo bwabulumbu tacilubide pe alimwi tacitondezyi kuliyanda. (Ba-Kolose 3:23, 24) Akaambo kakuti ulabayanda alimwi akubabikkila maano kapati, Jehova ulabweza ntaamu akubapa bulumbu aabo bamuyandaula cakusinizya.

13. Nkaambo nzi bubambe bwacinunuzyo ncobuli bumboni butalikkomeneni bwaluyando lwa Jehova kulindiswe?

¹³ Bumboni bupati bwacitondezyo cakuti bantu balayandika mumeso aa Jehova mbubambe bwa cinunuzyo. Imwaapostolo Johane wakalemba kuti: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Ibubambe bwa cinunuzyo cacipaizyo ca Jesu Kristo tabweendelani pe amuzeezo wakuti tunyina mpindu antela kuti tatuyandwi mumeso aa Jehova. Masimpe, mbwaanga Jehova wakatubbadelela muulo uutalikkomeni kapati, nkokuti kupa Mwanaakwe simuzyalwa alikke, weelede kuti ulatuyanda citaambiki.

14. Ino Paulo wakacibona buti cinunuzyo?

¹⁴ Aboobo, nomwatyompwa, amuzinzibale kuyeeya acinunuzyo. Ee, cipego eeci amucibone kuba cintu cimugemi kuzwa kuli Jehova. Eeco ncaakacita mwaapostolo Paulo. Amuyeeye kuti wakati: “Maawe! ndi muntu uusampaukide ncobeni!” Pele wakazumanana ulaamba: “Ngu-Leza. Ndamulumba kuli-Jesu Kristo Mwami wesu.” Paulo wakati, “nguwe wakandiyanda akulyaaba nkaambo kangu.” (Ba-Roma 7:24, 25; Ba-Galatiya 2:20) Kwiinda mukwaamba boobu, Paulo tanaakali kulisumpula buya. Wakajisi buyo lusyomo lwakuti Jehova wakali kumubikkila maano lwakwe kumugama. Mbuli Paulo, anywebo cinunuzyo mweelede kucibona kuba cipego cimugeme kuzwa kuli Leza. Jehova tali buyo Mufwutuli singuzu, pele alimwi ngu Sikupa Bulumbu siluyando.

Amubucenjelele Bucenjezu bwa Saatani

15-17. (a) Mbuti Diabolosi mbwakubelesya kutyompokelwa? (b) Ino nkukulwaizyigwa kuli buti nkotukonzya kujana kuli ceeco cakamucitikila Jobu?

¹⁵ Pele cilakonzya kumuyumina kusyoma kuti luumbulizyo lwakasololelwa amuuya ilujanika mu Jwi lya Leza lubeleka ncobeni kulindinywe. Mulakonzya kuyeeya kuti bulumbu bwakupona kukabe kutamani munyika mpya ya Leza ncintu cimwi eeco bambi ncobakonzya kujana, pele nywebo tacimweelede. Ikuti naa mbomulimvwa oobo, ino ncinzi ncomukonzya kucita?

¹⁶ Cakutadooneka muliluzyi lulayo lwa Paulo kubana Efeso lwakuti: “Amusame zilwanyo zyoonse zya-Leza, kuti mukonzye kwiima mumeneeno aa-Diabolosi.” (Ba-Efeso 6:11) Twayeeya tukole ntwabelesya Saatani kucenga bantu, zintu mbuli kuyandisya lubono alimwi akutalilemeka cakufwambaana zilakonzya kuboola mumizeezo yesu alimwi eeci cilalangilwa. Bantu ba Leza banji bakaindi alimwi abamumazuba eesu bacegwa amisunko eeyi. Nokuba boobo, tatweelede kuuyumbila ambila mucito aumwi wabucenjezu bwa Saatani—kupa bantu kuyeeya kuti tabayandwi a Jehova Leza.

¹⁷ Diabolosi ulaaluzyibo mukubelesya kulimvwa kuli boobo mukusoleka kuzandula bantu kuzwa kuli Leza. Amuyeeye majwi aa Bilidadi ngaakaambila Jobu kuti: “Ino muntu inga ulalilomya buti kunembo lya-Leza? Inga ulasalala buti muntu uuzyedwe kumwanakazi? Langa, mumeso aakwe tamukwe mumuni wamwezi, azyalo nyenyeezi zilasisigwa. Ino muntu, oyo muuli mumvunyu uinda buti, muntunsi oyo muyanda waansi, ulaindilila buti!” (Jobu 25:4-6; Johane 8:44) Sena inga mweezeezya mbwaakali kutyompya majwi aayo? Aboobo mutamulekeli Saatani kumutyompya. Kulubazu lumbi, amubucenjelele bucenjezu bwa Saatani kutegwa mube acamba alimwi anguzu kutegwa  mulwane canguzu mukucita ciluleme. (2 Ba-Korinto 2:11) Kujatikizya Jobu, nokuba kuti wakeelede kululamikwa, Jehova wakamupa bulumbu akaambo kalukakatilo lwakwe kwiinda mukupilusya akuyungizya ziindi zyobilo zyoonse nzyaakasweekelwa.—Jobu 42:10.

Jehova “Mupati Kwiinda Myoyo Yesu”

18, 19. Mbuti Leza mbwali “mupati kwiinda myoyo yesu,” alimwi muunzila nzi ‘mwazyi zintu zyoonse’?

¹⁸ Masimpe, nciyumu kapati kukuzunda kulimvwa kutyompokelwa ikuti naa kulitunjide kapati. Pele, muuya wa Jehova ulakonzya kumugwasya buce-buce kuzwisya ‘mampangala mayumu . . . aalwisya luzibo lwa Leza.’ (2 Ba-Korinto 10:4, 5) Ikuti naa miyeeyo iityompya iyanda kumuzunda, amuzinzibale kuyeeya majwi amwaapostolo Johane aakuti: “Mbuboobu mbutuzi kuti tuli basilusinizyo, alimwi tuzootontozya myoyo yesu kunembo lyakwe, kufumbwa kumakani ngiitupa mulandu myoyo yesu. Nkaambo Leza mupati kwiinda myoyo yesu, alimwi ulizi zintu zyoonse.”—1 Johane 3:19, 20.

¹⁹ Ino kaamba nzi kaambo kakuti “Leza mupati kwiinda myoyo yesu”? Zimwi ziindi, myoyo yesu ilakonzya kutupa mulandu, ikapati notwakuzyiba kapati kutalondoka kwesu alimwi akulubizya kwesu. Antela cilakonzya kuba kuti akaambo kambotwakakomena, tulijisi cilengwa cakulibona munzila iityompya, mbuli kuti kunyina ncotukonzya kucita icikonzya kutambulwa kuli Jehova. Majwi aamwaapostolo Johane atusyomezya kuti Jehova mupati kwiinda ceeco! Tabikkili buyo maano kukutalondoka kwesu, pele ulabona mbazu motukonzya kucita kabotu ncobeni. Alimwi ulizyi makanze eesu ambaakani. Davida wakalemba kuti: “Ulizi mbububede buntu bwesu, ulaibulukwa kuti tuli bulongo buyo.” (Intembauzyo 103:14) Inzya, Jehova ulituzyi kabotu kwiinda mbotulizyi tobeni!

“Musini Wabweebesi” Alimwi a “Ngala Yabwami”

20. Ncinzi businsimi bwa Isaya bwakupilusyigwa ncobuyubununa kujatikizya Jehova mbwababona babelesi bakwe?

²⁰ Kwiinda mumusinsimi Isaya, Jehova wakapa bantu bakwe bakaindi bulangizi bwakupilusyigwa. Nobakatolwa mubuzike ku Babuloni, luumbulizyo oolu alimwi acisyomezyo nzenzintu nzyobakali kuyooyanda bantu aaba batyompedwe! Kwiinda mukulanga kumbele kuciindi nobakali kuyoopiluka kunyika yabo, Jehova wakaamba kuti: “Uyooba musini wabweebesi mujanza lya-Jehova, ingala yabwami mujanza lya-Leza wako.” (Isaya 62:3) Kwiinda mumajwi aaya, Jehova wakapa bantu bakwe kulimvwa kuyandika alimwi akulemekwa. Wacita mbubonya akumusyobo wakwe waba Israyeli bakumuuya mazubaano. Cili buyo mbuli kuti wabasumpula mujulu kutegwa boonse banyomenene.

21. Mbuti mbomukonzya kuba alusyomo lwakuti Jehova uyoomupa bulumbu akaambo kakukakatila cakusyomeka?

²¹ Nokuba kuti businsimi oobu bulazuzikizyigwa kapati kubananike, bupandulula bulemu Jehova mbwapa kuli baabo boonse ibamubelekela. Aboobo, nomwatyompwa, amuyeeye kuti nokuba kuti tamulondokede, mulakonzya kuba bantu bayandika mbubonya mbuli “musini wabweebesi” alimwi a “ngala yabwami” kuli Jehova. Aboobo amuzumanane kupa moyo wakwe kukkomana kwiinda mukucita kuyanda kwakwe cakusinizya. (Tusimpi 27:11) Kwiinda mukucita boobo, mulakonzya kusyoma kuti Jehova uyoomupa bulumbu akaambo kakukakatila cakusyomeka!

Bupanduluzi buyungizidwe

Sena Muliyeeyede?

• Mbuti mbotuli “lubono luyandisi” kuli Jehova?

• Nkaambo nzi ncociyandika kapati kubona Jehova kuba Sikupa Bulumbu?

• Ino mbucenjenzu nzi bwa Saatani mbotweelede kucenjelela?

• Muunzila nzi Leza mwali “mupati kwiinda myoyo yesu”?

[Mibuzyo yaciiyo]

[Cifwanikiso icili apeeji 23]

Paulo

[Cifwanikiso icili apeeji 23]

Eliya

[Cifwanikiso icili apeeji 23]

Hana

[Cifwanikiso icili apeeji 24]

Ijwi lya Leza lijisi twaambo tunji tuumbulizya