Lweendo Lulamfwu Lwakalongezyegwa
Lweendo Lulamfwu Lwakalongezyegwa
KUCISI ca Democratic Republic of Congo kuzwa lipooti yabacizi banabokwabo bobile bakasala kweenda lweendo lulamfu mubusena mwaali nkondo, kutegwa bakaakujanike ku Muswaangano Wacooko wakuti “Amumulemeke Leza” wakali mudolopo lya Lisala. Kunze aamalailile aakumuuya akuyanzana kwa Bunakristo nkobakali kulangila kujana kumuswaangano, bakali kulangila akuswaangana abaiminizi baofesi lyamutabi wa Bakamboni ba Jehova ilili mudolopo lya Kinshasa. Akaambo kankondo yakali mucisi, kwamyaaka iili mbwiibede, tiibakali kubonana auli woonse uuzwa kumutabi, aboobo eeci bakacibona kuti ncoolwe nobakali kunga bacita boobo.
Kabeenda kwiinda mukubelesya bwato bwakubeza, bacizi bobile aaba bakatalika lweendo kuzwa kudolopo lyokwabo lya Basankusu kuya ku Lisala, imusinzo wamakkilomita aatandila ku 300, kabainda musyaka kutobelezya milonga yobile. Oolu lweendo lwaabatolela nsondo zyotatwe. Mbwaanga boonse bobile bali mumulimo waciindi coonse, umwi wakali mupainiya kwamyaaka yotatwe aumwi iili 19, bakabelesya lweendo oolu kukambauka makani mabotu aa Bwami. Bakakambauka kwamawoola aali 110, akusiya matulakiti aali 200 amamagazini aali 30 kubantu mbobaajana munzila.
Mumulonga, baali kuyandika kuleyauka bacivwubwe abaciwena, ibajanika kanji-kanji mubusena oobo. Tiicaali kukonzyeka pe kweenda mumulonga masiku. Alimwi bakainda mumasena manji aakali kugatelwa abasikalumamba.
Nokuba kuti ooyu musinzo waali mulamfu alimwi uukatazya, bacizi aaba baalikkomene akaambo kakusoleka kwabo. Boonse bobile baazwide lukkomano akulumba akaambo kakujanika kumuswaangano ku Lisala. Myoyo yabo yakali kupya abusungu bwakasimpe alimwi bakakulwaizigwa ambunga yabakwesu abacizi basika ku 7,000 bakajanika. Nowakamana muswaangano, bakajana buyumuyumu mulweendo lwabo lwakujokela kumaanda aabo mbubonya mbobakajana mulweendo lwakutaanguna, pele bakaakujana mikwasyi yabo ili buyo kabotu.