“Masusu Aali Amitwe Yanu Alibalidwe” A Jehova
“Masusu Aali Amitwe Yanu Alibalidwe” A Jehova
“Taakwe [kayuni] nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse.”—MATAYO 10:29, 30.
1, 2. (a) Nkaambo nzi Jobu ncaakalimvwa kuti Leza wamulekelezya? (b) Sena majwi aa Jobu aamba kuti wakamuzangila Jehova? Amupandulule.
“NDAKULILILA O Leza pele taakwe nondivuwa pe, ndaima pele yebo tondiboni pe. Wandibeda silunya, wandipenzya ajanza lyako lyanguzu.” Imwaalumi wakaamba majwi aayo wakali mumapenzi mapati alimwi tacigambyi pe kuti mapenzi ngaakajisi aakali mapati. Wakasweekelwa zintu nzyaakavwubide, wakafwidwa bana muntenda iikankamanisya alimwi lino bulwazi bubyaabi bwakali mujisi. Izina lyamwaalumi ooyu ngu Jobu alimwi makani aakwe aayenzya mubili alilembedwe mu Bbaibbele kutegwa tugwasyigwe.—Jobo 30:20, 21, BT.
2 Majwi aa Jobu alakonzya kulimvwisya mbuli kuti wakamukalalila Leza, pele tacili boobu pe. Jobu wakali kwaamba buyo kweelana ambwaakali pengede mumoyo. (Jobu 6:2, 3) Tanaakazyi kuti Saatani ngowakali kumuletela masunko, aboobo cakutazyiba wakali kuyeeya kuti Leza wakamulekelezya. Mane aciindi cimwi Jobu wakaambila Jehova kuti: “Undisisilanzi busyu bwako, akundicita mbuli sinkondonyoko?” *—Jobu 13:24.
3. Ncinzi cikonzya kuboola mumizeezo yesu nokwaba mapenzi?
3 Mazubaano, bantu ba Jehova banji bali mumapenzi aatamani akaambo kankondo, mazwanga mutwaambo twacisi amubukkale, ntenda, bucembele, kuciswa, bucete butaambiki alimwi akulesyegwa mulimo wakukambauka amfwulumende. Cakutadooneka kuli masukusyo amwi andinywe aamujisi. Zimwi ziindi, mulakonzya kulimvwa kuti Jehova tamubikkili maano pe. Mulaazyi kabotu-kabotu majwi aali kulugwalo lwa Johane 3:16 aamba kuti: “Leza mbwaakayandisya nyika, wakapa Mwanaakwe simuzyalwa alike.” Pele, ikuti kamuli mumapenzi alimwi kakulibonya kuti kunyina lugwasyo luliko, mulakonzya kweezeezya kuti: ‘Sena Leza ulandiyanda ncobeni? Sena ulaabwene mapenzi aandijisi? Sena ulandibikkila maano mebo kundigama?’
4. Ndipenzi nzi litamani ndyaakeelede kulwana andilyo Paulo, alimwi muunzila nzi bukkale oobo mbobukonzya kutujatikizya?
4 Amubone cakacitika kumwaapostolo Paulo. Wakalemba kuti: “Ndakapegwa [bumvwa mu]mubili wangu, mutumwa wa-Saatani wakundidinkaula.” Wakayungizya kuti: “Ndakakumbila kotatwe ku-Mwami nkaambo kacintu eci, kuti cindizwide.” Jehova wakakumvwa kulomba kwakwe. Nokuba boobo, wakacisalazya kuli Paulo kuti tanaakali kuyoobweza ntaamu munzila yamaleele kutegwa amuponye. Muciindi caboobo, Paulo wakeelede kusyoma nguzu zya Leza kutegwa zimugwasye kuliyumya ‘kubumvwa mbwaakajisi mumubili.’ * (2 Ba-Korinto 12:7-9) Mbubwenya mbuli Paulo, mulakonzya kamujisi musunko umwi uutamani. Ambweni muleezeezya kuti: ‘Mbwaanga kulibonya mbuli kuti Jehova tabikkili maano kujatikizya musunko wangu, sena caamba kuti tabuzyi bukkale bwangu antela tandibikkili maano?’ Ibwiinguzi mbwakuti peepe. Jehova mbwamubikkilide maano mubelesi wakwe uusyomeka umwi aumwi kulakankaizyigwa amajwi Jesu ngaakaambila baapostolo bakwe nokwakainda buyo ciindi cisyoonto kuzwa naakabasala. Atubone majwi aakwe mbwaakonzya kutuyumya mazubaano.
“Mutayoowi”—Nkaambo nzi?
5, 6. (a) Mbuti Jesu mbwaakabagwasya baapostolo bakwe kutayoowa zintu zyakali kuyoocitika kumbele? (b) Mbuti Paulo mbwaakatondezya lusyomo lwakuti Jehova ulamubikkila maano?
5 Baapostolo bakatambula nguzu zilibedelede kuzwa kuli Jesu, kubikkilizya a “bwami bwakutanda badaimona basofweede akuponya malwazi oonse.” Pele eeci tacaambi kuti tiibakali kuyoojana masukusyo alimwi amapenzi. Muciindi caboobo, Jesu wakapandulula cakusalazya zintu zimwi zyakeelede kubasikila. Nokuba boobo, wakabakulwaizya kuti: “Mutabayoowi bajaya mubili pele tabakonzyi kujaya muuya, amuyoowe nguwe uukonzya kujaya mubili antoomwe amuuya mu-Gehena.”—Matayo 10:1, 16-22, 28.
6 Kutegwa abagwasye baapostolo bakwe kumvwisya kaambo ncobatakeelede kuyoowa, Jesu wakabapa zikozyanyo zyobilo. Wakabaambila kuti: “Sa tuyuni tobile tatuulwi kobili? nekubaboobo taakwe nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse. Nkaambo kaako mutayoowi, mulayandika kwiinda tuyuni tunji.” (Matayo 10:29-31) Amubone kuti Jesu wakaswaanganya kutayoowa muciindi camapenzi alimwi akusyoma kuti Jehova ulamulanganya umwi aumwi wesu kumugama. Kulibonya kuti mwaapostolo Paulo wakajisi lusyomo luli boobo. Wakalemba kuti: “Anooli Leza kali aswe, ino nguni uukonzya kutulwisya? Oyo iwatakatukasya Mwanaakwe mwini, pele wakamwaabila ndiswe toonse, sa takooyootupa buyo antoomwe anguwe zintu zimwi zyoonse?” (Ba-Roma 8:31, 32) Kufwumbwa mapenzi ngomukonzya kujana, andinywe amube masimpe kuti Jehova ulamubikkila maano lwanu kumugama kufwumbwa buyo kuti kamusyomeka kulinguwe. Eeci cilalibonya kapati notulangisya lulayo Jesu ndwaakapa kubaapostolo bakwe.
Mbokayandika Katiiti
7, 8. (a) Ino tutiiti twakali kubonwa buti kuciindi ca Jesu? (b) Ino kulibonya kuti nkaambo nzi lugwalo lwa Mateyo 10:29 mu Cizuminano Cipya ncolubelesya bbala lyaci Giliki lya “tutiiti” eelyo lyaamba “tuyuni tuniini”?
7 Zikozyanyo zya Jesu zilapandulula kabotu-kabotu Jehova mbwabikkila maano kumubelesi Wakwe umwi aumwi. Cakusaanguna amulange-lange kaambo kajatikizya tutiiti. Kuciindi ca Jesu, tutiiti twakali kusunswa kacili cisyu, pele akaambo kakuti twakali kunyonyoona zyakulya, twakali kubonwa kuti ntulyi. Tutiiti twakali tunji kapati alimwi tiitwakali kudula cakunga tobilo twakali kukonzya kuulwa amuulo ulaansi kapati mazubaano. Makobili obilo akali kukonzya kuula ikutali tutiiti tone pele tosanwe—ikayuni akambi kakali kuyungizyigwa, kakali kakupegwa buyo.—Luka 12:6.
8 Amuyeeye alimwi kujatikizya bupati bwakayuni aaka kadumide. Ikuti twakeelanya atuyuni tumbi, nokaba katiiti kapati nkaniini loko. Pele, ibbala lya Cigiliki lyakasandululwa kuti “tuyuni” ku Matayo 10:29, cacigaminina lyaamba tuyuni tuniini. Kulibonya kuti Jesu wakali kuyanda kuti baapostolo bakwe bayeeyele kayuni kaniini kapati alimwi katabikkilwi maano. Ibbuku limwi lyakuvwuntauzizya lyaamba kuti, “Jesu waamba kayuni kaniini kapati alimwi akubelesya mabala aatondezya kuti nkaniini kapati naakali kukapandulula!”
9. Nkaambo nzi kapati nkakaamba Jesu mucikozyanyo cijatikizya tutiiti?
9 Cikozyanyo ca Jesu catutiiti citondezya kaambo kapati aaka: Icilibonya kuti cinyina mpindu kubantu, cilayandika kapati kuli Jehova Leza. Jesu wakayaambele kukankaizya kasimpe aaka kwiinda mukuyungizya kuti kayuni takakonzyi ‘kuwida ansi’ Jehova kakunyina kuzyiba. * Kaambo kalisalede. Ikuti naa Jehova Leza ulabikkila maano kukayuni kaniini alimwi ikatayandiki kapati, sena takaindi kubikkila maano kubukkale bwabantu ibakasala kumubelekela?
10. Kaamba nzi kaambo kakuti: “Masusu aali amitwe yanu alibalidwe oonse”?
10 Kunze lyacikozyanyo cakwe kujatikizya tuyuni, Jesu wakati: “Masusu aali amitwe yanu alibalidwe oonse.” (Matayo 10:30) Kaambo kafwaafwi aaka pesi ikapa kukkala ansi kuyeeya kapa kumvwisya cikozyanyo ca Jesu cijatikizya tutiiti. Amulange kaambo aka: Mutwe wamuntu ujisi masusu aabalilwa ku 100,000. Muzibeela zinji, kasusu kamwi kalibonya mbubonya mbuli kambi, alimwi kunyina kasusu kalibonya kuti swebo tweelede kukabikkila maano. Pele, akamwi kasusu ulakabona Jehova Leza alimwi akukabala. Mbwaanga cili boobu, sena kuli kaambo nikaba komwe kajatikizya buumi bwesu nkatakonzyi kuzyiba Jehova? Masimpe Jehova ulizyi mbwabambidwe munzila iilibedelede aumwi mubelesi wakwe. Ee, “ulabona moyo.”—1 Samuele 16:7.
11. Mbuti Davida mbwaakatondezya lusyomo mukubikkilwa maano a Jehova?
11 Davida iwakapenga kapati, wakasyoma kuti Jehova wakalimubwene. Wakalemba kuti: “O Jehova, ulandilingula, ulindizi. Ulizi kukala kwangu akubuka kwangu, ulibwene miyeeyo yangu noli kule.” (Intembauzyo 139:1, 2) Anywebo mulakonzya kuba masimpe kuti Jehova ulimuzyi kumugama. (Jeremiya 17:10) Mutabindi kuyeeya kuti tamuyandiki kapati cakunga meso aa Jehova aabona koonse-koonse taamubwene!
“Bika Misozi Yangu Munsazi Yako”
12. Ino tuzyi buti kuti Jehova ulizyi kabotu-kabotu mapenzi aakatazya bantu bakwe?
12 Jehova tazyi buyo umwi aumwi mubelesi wakwe, pele alimwi ulizyi kabotu-kabotu mapenzi aumwi aamukatazya. Mucikozyanyo, bana Israyeli nobakali kupenzyegwa kabali bazike, Jehova wakaambila Musa kuti: “Ncobeni ndibwene mapenzi aabantu bangu bali mu-Egepita. Ndimvwide mbubalila nkaambo kabaabo bababelesya. Ndizi buusu bwabo mbobubede.” (Kulonga 3:7) Elo kaka cilaumbulizya ikuzyiba kuti notuli mukuliyumya akaambo kamusunko, Jehova ulabona icili mukucitika alimwi ulamvwa kulila kwesu! Ulibikkilide maano kumapenzi aatupenzya.
13. Ncinzi citondezya kuti Jehova masimpe ulabeetelela babelesi bakwe?
13 Jehova mbwababikkilide maano ibalongwe bakwe kulalibonya alimwi munzila mbwaakalimvwa kujatikizya bana Israyeli. Nokuba kuti mapenzi aabo kanji-kanji akali kuboola akaambo kabusicinguni bwabo, Isaya wakalemba boobo kujatikizya Jehova: “Mumapenzi aabo oonse wakapenga alakwe.” (Isaya 63:9) Mbomuli babelesi ba Jehova uusyomeka, mulakonzya kuba masimpe kuti nomwapenga, awalo Jehova ulapenga. Sena eeci tacimukulwaizyi kuliyumya cabusicamba nomwapenga akuzumanana kucita kusikila mpomugolela ikumubelekela?—1 Petro 5:6, 7.
14. Ino muubukkale buli buti moyakalembelwa Intembauzyo 56?
14 Lusyomo ndwaakajisi Mwami Davida lwakuti Jehova wakali kumulanganya akuti wakali kumweetelela lulalibonya ku Intembauzyo 56, eeyo njaakalemba Davida naakali kuccija Mwami Saulo mujayi. Davida wakaccijila ku Gati, pele wakayoowa kujatwa naakazyibwa abana Filisti. Wakalemba kuti: “Basinkondoma balandivwima ciindi coonse, nkaambo mbanji bandilwisya cakulisumpula.” Akaambo kabukkale bwakwe bukatazyide, Davida wakapaila kuli Jehova. Wakati: “Buzuba boonse balavwelenganya majwi aangu, miyeeyo yabo yoonse njakundibisizya.”—Intembauzyo 56:2, 5.
15. (a) Ncinzi Davida ncaakapandulula naakalomba Jehova kubikka misozi yakwe munsazi antela mubbuku? (b) Ncinzi ncotukonzya kuba masimpe notuli mukuliyumya mubukkale busunka lusyomo lwesu?
15 Mpoonya, kweelana ambokulembedwe ku Intembauzyo 56:8, Davida waamba majwi aaya aanjila mumoyo: “Ulibwene kuzingwa kwangu. Bika misozi yangu munsazi yako. Sa tiilembedwe mubbuku lyako?” Elo tabuliboteli kaka bupanduluzi oobu bunjila mumoyo bujatikizya mbwalanganya Jehova! Notutyompedwe, tulakonzya kumulilila Jehova. Naba muntu uulondokede Jesu wakacita oobo. (Ba-Hebrayo 5:7) Davida wakali masimpe kuti Jehova wakali mubwene alimwi akwayeeya mapenzi aakwe, mbuli kuti nkuyobola misozi yakwe munsazi antela kwiilemba mubbuku. * Ambweni mulimvwa kuti misozi yanu ilakonzya kuzuzya cibeela cipati cansazi eeyo naa mapeeji manji aabbuku eelyo. Ikuti kacili boobo, mulakonzya kuumbulizyigwa. Ibbaibbele litusyomezya kuti: “Jehova uli afwaafwi kubawizukide mumoyo, ulafutula batete myuuya.”—Intembauzyo 34:18.
Ikuba Mulongwe Mwini-Mwini wa Leza
16, 17. (a) Ino tuzyi buti kuti Jehova ulabikkila maano kumapenzi aabasikila bantu bakwe? (b) Ncinzi Jehova ncaacita kutegwa bantu bacikonzye kumvwana anguwe?
16 Ikaambo kakuti Jehova ulaabalide ‘masusu aali amitwe yesu’ katupa muzeezo kujatikizya mbwabikkila maano alimwi ambwalanganya Leza ooyo ngotujisi coolwe cakukomba. Nokuba kuti tweelede kulindila nyika mpya yakasyomezyegwa kutegwa macise oonse alimwi amapenzi akamane, nociba ciindi cino Jehova uli mukucita cintu cimwi cikondelezya kapati kubantu bakwe. David wakalemba kuti: “Lumvwano lwa-Jehova ndulwabo bamuyoowa, ulabazibya cizuminano cakwe.”—Intembauzyo 25:14.
17 ‘Kumvwana a Jehova.’ Ikaambo keni kukagama kalibonya mbuli kuti tacikonzyeki pe kubantu batalondokede! Pele, Jehova ulabatamba aabo ibamuyoowa kuti bamuswaye mutente lyakwe. (Intembauzyo 15:1-5) Alimwi ino ncinzi Jehova ncabacitila aabo ibamuswaya? Kweelana ambwaakaamba Davida, ulabagwasya kuzyiba cizuminano cakwe. Jehova ulabaambila twaambo, akuyubununa “maseseke aakwe” kubasinsimi kutegwa bazyibe makanze aakwe alimwi ancobeelede kucita kutegwa bapone kweendelana angayo.—Amosi 3:7.
18. Ino tuzyi buti kuti Jehova uyanda kuti swebo tube balongwe bakwe beni-beni?
18 Masimpe, cilakulwaizya kuzyiba kuti swebo tobantu batalondokede tulakonzya kuba balongwe beni-beni a Mupatikampatila, Jehova Leza. Alimwi buya utukulwaizya kuti tucite mbubonya. Ibbaibbele lyaamba kuti: “Amuswenenene kuli-Leza, elyo alakwe ulamuswenenena.” (Jakobo 4:8) Jehova uyanda kuti swebo tube balongwe bakwe beni-beni. Walo wakabweza kale ntaamu ziyandika kutegwa cilongwe eeco cikonzyeke. Cipaizyo cacinunuzyo ca Jesu cakajalula nzila kulindiswe kutegwa tube balongwe ba Leza Singuzuzyoonse. Ibbaibbele lyaamba kuti: “Swebo tulamuyanda nkaambo nguwakasaanguna kuyanda ndiswe.”—1 Johane 4:19.
19. Mbuti kuliyumya mbokukonzya kuyumya cilongwe cesu a Jehova?
19 Icilongwe eeco cini-cini cilayumizyigwa notuliyumya mubukkale bukatazyide. Sikwiiya Jakobo wakalemba kuti: “Lukakatilo alukalondole mulimo walo woonse, kuti mube balondosi akuba aciimo cizulide cakutabula cintu.” (Jakobo 1:4) Ino “mulimo” nzi uuzuzikizyigwa kwiinda mukuliyumya mubuyumuyumu? Amuyeeye ‘bumvwa mumubili’ mbwaakajisi Paulo. Ino kuliyumya kwakabeleka mulimo nzi kulinguwe? Paulo wakaamba boobu kujatikizya masunko ngaakajisi: “Aboobo ndalikankaizizya makompami aangu cakukondwa, kuti inguzu zya-Kristo zindipopele. Kaako makompami azyuumo amapakasyo amapenzi amamanikizi, ezi zyoonse buyo ndazibotelwa nkaambo ka-Kristo, ikuti ciindi ncinkompeme nciconya ncindi singuzu.” (2 Ba-Korinto 12:9, 10) Ncaakabona Paulo ncakuti Jehova wakali kuyoopa nguzu zyakali kuyandika—“inguzu zigambya” ikuti kwayandika kutegwa aliyumye. Aboobo eeci cakamupa kuba acilongwe cini-cini a Kristo alimwi a Jehova Leza.—2 Ba-Korinto 4:7; Ba-Filipi 4:11-13.
20. Mbuti mbotukonzya kuba masimpe kuti Jehova uya kutugwasya alimwi akutuumbulizya notuli mumapenzi?
20 Ambweni Jehova waalekela masukusyo aanu kuti azumanane. Ikuti kakuli boobo, amuyeeye cisyomezyo cakwe kuli baabo ibamuyoowa: “Nsikwe nenti kamulekelezye nokuba kuyoomuleka buyo pe, pe.” (Ba-Hebrayo 13:5) Mulakonzya kutambula lugwasyo alimwi aluumbulizyo luli boobo. Jehova wakaabala ‘masusu aali mumutwe wanu.’ Ulakubona kuliyumya kwanu. Ulamvwa kucisa nkomumvwa nywebo. Ulamulanganya cakubikkila maano. Alimwi kunyina naya “kuluba milimo yanu akuyanda nkomwatondezya nkaambo kezina lyakwe.”—Ba-Hebrayo 6:10.
Bupanduluzi buyungizidwe
^ munc. 2 Majwi aakozyenye akaambwa amuntu mululami Davida alimwi abana ba Kora ibasyomeka.—Intembauzyo 10:1; 44:24.
^ munc. 4 Ibbaibbele talyaambi cigaminina ‘bumvwa mumubili’ mbwaakajisi Paulo. Ambweni lyakali penzi lyakumubili, mbuli kutabona kabotu. Antela majwi aakuti ‘bumvwa mumubili’ alakonzya kwaamba baapostolo bakubeja alimwi abamwi ibakali kukazya bwaapostolo bwa Paulo amulimo wakwe.—2 Ba-Korinto 11:6, 13-15; Ba-Galatiya 4:15; 6:11.
^ munc. 9 Basikwiiya bamwi bayeeya kuti ikuwida ansi kwakayuni kwaambwa cilakonzya kwaamba acimbi kunze buyo lyakufwa. Baamba kuti kaambo aaka mumwaambo wakusaanguna kalakonzya kwaamba ikukkala kwakayuni ansi kutegwa kagome cakulya. Ikuti naa mbocibede oobu, cilakonzya kwaambwa kuti Leza ulabona akubikkila maano kukayuni mubukkale bwako bwabuzuba abuzuba, ikutali buyo ciindi nokafwa.—Matayo 6:26.
^ munc. 15 Ikaindi, nkomwi zyacipaya zyakali kubambwa kuzwa kuzipaya zyambelele, mpongo alimwi aŋombe. Nkomwi zyacipaya eezyo zyakali kubelesyegwa kubikkila mukupa, mafwuta ameenda. Zipaya eezyo zyakali kubambwa kabotu zyakali kukonzya kubikkilwa mungwimba naa waini.
Sena Muciyeeyede?
• Ntwaambo nzi tukonzya kupa muntu kulimvwa kuti Leza wamulekelezya?
• Nciiyo nzi ncotukonzya kwiiya kucikozyanyo ca Jesu catuyuni alimwi akubalwa kwamasusu mumutwe wesu?
• Ino caamba nzi kubikka misozi yaumwi “munsazi” ya Jehova naa “mubbuku” lyakwe?
• Mbuti mbotukonzya kuba ‘alumvwano a Jehova’?
[Mibuzyo yaciiyo]
[Cifwanikiso icili apeeji 19]
Nkaambo nzi Jehova ncaatakagusyila ‘bumvwa mumubili’ wa Paulo?
[Cifwanikiso icili apeeji 20]
Ncinzi ncotukonzya kwiiya kucikozyanyo ca Jesu catutiiti?
[Kulumba]
©J. Heidecker/VIREO
[Cifwanikiso icili apeeji 22]
Kwiinda mukulibala Bbaibbele mazuba oonse, tulakonzya kujana cisyomezyo cakuti Leza ulamulanganya aumwi kumugama