Hena Kusyomeka Cilagwasya?
Hena Kusyomeka Cilagwasya?
KARL mwiiminizi wa kkampani iilanganya zyabuumi, wakaambila Jens * kuti: “Mali ngobbadala kukkampani iilanganya zyabuumi manji kapati. Ikuti waboola kukkampani yesu, ulakonzya kuti kosyaalilwa mali aasika ku K94,000.00 amwezi. Ayo mali manji.”
Jens wakaingula kuti: “Inzya ayo inga kaali masimpe, pele ndakkala anjiyo kkampani eeyi iilanganya zyabuumi kwamyaka minji. Bakandigwasya kapati munsi oomu, alimwi ndiyanda kuti ndizumanane kusyomeka kuli mbabo.”
Karl wavwiila kuti: “Kusyomeka mbube bubotu. Pele ikukaka kucinca kkamapani akaambo kakuyanda kusyomeka, kukupa kuti kotila mali manji.”
Karl wakaliluzi. Ikanji, kusyomeka kumuntu umwi inga cayanda mali. Alimwi ciyanda ciindi, nguzu, alimwi akubbaatilwa mumizeezo. Hena kusyomeka kulagwasya?
Nekuba Kuti Banji Balakuyanda Kusyomeka, Bunji Bwabo Tabasyomeki
Ikuvwuntauzya kwakacitwa mucisi ca Germany abakabunga ka Allensbach Opinion Research Institute, kwakajanwa kuti 96 pasenti yabaabo ibakabuzyigwa, bakabona kuti kusyomeka mbube buyandika kapati. Kuvwuntauzya kwabili kwaba Allensbach kubantu bajisi myaka iili akati ka 18 a 24, kwakatondezya kuti akati kabantu bali botatwe, ibali bobilo bakazumina kuti kusyomeka cilayandika.
Nekuba kuti kusyomeka kwasakana munyika, tabusyi mbozyibede zintu caboola kumakani aakuti muntu asyomeke. Mucikozyanyo, mumasi manji aa Bukuwa, banabukwetenyi naa bamukwasyi, ziindi zinji basyomeka buyo asyoonto muli cabo. Ikanji balongwe abalo tabasyomeki akati kabo. Kusyomeka ikwakali kukamantanya basikulemba bantu milimo abasikulembwa naa basimakwebo abasikubaula, kwaya ansi kapati. Nkaambo nzi?
Aabona kubbaatilwa mubuumi kupa kubula ciindi naa kubula nguzu zyakuyeeya zintu ziyandika kubikkilwa maano caboola kumakani aakusyomeka. Ibantu bakatyompezyegwa abantunyina inga bajana kwaamba kuti tabaciyandi kabili kusyomeka kumuntu uuli woonse. Bamwi inga bayanda buumi bwakutasitikila bwalo butayandiki kusyomeka.
Kufwumbwa naa zintu zyili buti, kusyomeka ikanji kulalumbaizyigwa pele takucitwi-citwi. Mbwaanga mbozyibede zintu oobu, atulange-lange mibuzyo eeyi yakuti: Hena kusyomeka cilagwasya? Ikuti naa cilagwasya, ino nkuulaani nkotweelede kusyomeka, alimwi muunzila nzi? Nimpindu nzi zijanika akaambo kakusyomeka?
Bupanduluzi buyungizidwe
^ munc. 2 Mazina acincwa mucibalo eeci amucibalo ciccilila.
Majwi aakwelelezya sikubala aali apeeji 3]
Kusyomeka mbube bulumbaizyigwa kapati pele butacitwi-citwi