Amutondezye Kulibombya Kwini-kwini
Amutondezye Kulibombya Kwini-kwini
“Bantu [balibombya] ulabavuna.”—2 SAMUELE 22:28.
1, 2. Kaambo nzi kazyibidwe kujatikizya baleli banji bamunyika?
ZYUUMBWE zyakali kuyakwa mu Egepita zipa bumboni bwabantu bakeendelezya cisi eeco. Ibambi bali ampuwo ngu Sanakeribu waku Asuri, Alesandro Mupati waku Greece alimwi a Julius Caesar waku Roma. Kuli kaambo komwe kazyibidwe kujatikizya baleli boonse aaba. Tiibakasiya mpuwo yakulibombya kwini-kwini.—Matayo 20:25, 26.
2 Sena inga mweezeezya kuti umwi akati kabeendelezi baambwa mumuncali wakutaanguna inga waba acilengwa cakuyandaula balelwa bapengede mubwami bwakwe ibayandika kuumbulizyigwa? Peepe. Alimwi tamukonzyi kubayeeyela kuti inga baunka nkobakkala basicisi bapengede kutegwa babakulwaizye bantu bali boobo. Elo kaka ciimo cabo cakulanga bantu bapengede ciliindene aceeco ca Muleli Mupati wakujulu, Jehova Leza!
Cikozyanyo Ciinda Zyoonse Cakulibombya
3. Mbuti Muleli Mupati mbwabeendelezya balelwa bakwe bantunsi?
3 Ibupati bwa Jehova tabweeli, pele “meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Makani 16:9) Alimwi ino ncinzi ncacita Jehova ajana bakombi babombede ibapengede mumoyo akaambo kamasukusyo aindene-indene? Munzila imwi, ‘ulakkala’ abantu bali boobo kwiinda mumuuya wakwe uusalala kutegwa ‘abusye muuya wamuntu uubombede akukatalusya moyo wayooyo uupengede.’ (Isaya 57:15) Aboobo, bakombi bakwe ibabukulusyidwe balazulila kapati eelyo balatalika alimwi kumubelekela cakukkomana. Elo kaka Leza ulatondezya kulibombya kwini-kwini!
4, 5. (a) Mbuti sintembauzyo mbwaakalimvwa kujatikizya Leza mbweendelezya? (b) Ino ‘kulibombya’ kwa Leza kutegwa agwasye ‘batengwana’ caamba nzi?
4 Kunyina naba omwe mububumbo wakalicesya mbuli Mwami Wakujulu Aansi kutegwa agwasye bantu basizibi. Sintembauzyo wakalemba kuti: “Jehova ulisumpukide kumisyobo yoonse, abulemu bwakwe bulainda majulu. Ngwani uuli mbuli Jehova Leza wesu, uukala kujulu kulamfu, uulibombya kuti abone zintu zyakujulu azyaansi? Ulabusya mutengwana kuzwa kulusuko, ulagwisya mucete kuzwa kuzitantaala.”—Intembauzyo 113:4-7.
5 Amubone bbala lyabelesyegwa lyakuti “uulibombya.” ‘Kulibombya’ kupa muzeezo wakulitola ansi akulibikka muciimo caumwi uuli ansi kapati naa kuzwa acuuno umwi ncajisi antela bulemu kuti ayendelezye muntu waansi kapati. Aboobo ncolyaamba Ibbaibbele ku Intembauzyo 113:6 ncakuti Leza ulalibombya naa kulitola ansi kuciimo cabantunsi nabeendelezya. Elo kaka cilapandululwa kabotu ciimo ca Leza wesu uulibombya kabikkila maano caluyando kuzintu nzyobayandika bakombi bakwe bantunsi batalondokede!—2 Samuele 22:36.
Jesu Ncaakali Kulibombya
6. Ncikozyanyo nzi cipati cakulibombya kwa Jehova?
6 Cikozyanyo ciinda zyoonse cakulibombya kwa Leza aluyando nciceeco cakutuma Mwanaakwe mutaanzi uuyandwa anyika akukomezyegwa kali muntunsi kutegwa bantu bafwutulwe. (Johane 3:16) Jesu wakatuyiisya kasimpe kajatikizya Usyi wakujulu akutuula buumi bwakwe bwabuntunsi bulondokede kutegwa agusye “cibi cenyika.” (Johane 1:29; 18:37) Kwiinda mukumwiiya cakulondoka Usyi, kubikkilizya akulibombya kwa Jehova, Jesu wakalilisungude kucita Leza ncaakamwaambila kucita. Eeco cakali cikozyanyo citalikomeneni cakulibombya alimwi aluyando lutana tondezyedwe acilenge cimbi ica Leza. Tabali boonse ibakakukkomanina kulibombya kwa Jesu, mane buya basinkondonyina bakamubona kuti “muntu uubombede.” (Daniele 4:17) Pele, mwaapostolo Paulo wakabona kuti basyominyina bakeelede kumwiiya Jesu alimwi akulibombya munzila mbobakali kweendelezyanya. (1 Ba-Korinto 11:1; Ba-Filipi 2:3, 4) Paulo wakacikankaizya cikozyanyo ca Jesu citaliboteli, naakalemba kuti:
7, 8. (a) Mbuti Jesu mbwaakaiya kulibombya? (b) Nkulomba nzi Jesu nkwaakacita kuli baabo bakali kukonzya kuba basikwiiya bakwe?
7 “Amube amoyo oyo nguwenya iwakali muli-Kristo Jesu. Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. Wakalilonzya, wakalisalila ciimo cabuzike akuba mbubonya mbuli bantu balya maila. Lino naakabonwa kuti waba acikozyano camuntu, wakalibombya akuzumina nikuba kufwa, nkukuti kufwa [acisamu cakupenzyezya].”—Ba-Filipi 2:5-8.
8 Bamwi balakonzya kulibuzya kuti, ‘Mbuti Jesu mbwaakaiya kulibombya?’ Nkwiinda mukuyanzana a Usyi wakujulu kwamyaka iitabaliki, eelyo naakali kubeleka kali “mufuzi” wa Leza mukulenga zintu zyoonse. (Tusimpi 8:30, BT) Nokwakacitika buzangi mu Edeni, Mwana wa Leza Mutaanzi wakali kukonzya kubona kulibombya kwa Bausyi mukweendelezya bantu basizibi. Aboobo naakali anyika, Jesu wakatondezya kulibombya kwa Bausyi alimwi akulomba kuti: “Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu.”—Matayo 11:29; Johane 14:9.
9. (a) Ncinzi Jesu ncaakajana mubana icakamukkomanisya? (b) Nciiyo nzi ncaakayiisya Jesu kwiinda mukubelesya mwana?
9 Akaambo kakuti Jesu wakali kulibombya ncobeni, bana tiibakali kumuyoowa. Pele bakali kukwelelezyegwa kulinguwe. Walo kumugama, wakatondezya kubayandisya bana alimwi wakababikkila maano. (Marko 10:13-16) Ncinzi Jesu ncaakajana mubana icakamukkomanisya kapati? Masimpe, bakalijisi bube bumwi butaliboteli oobo bamwi basikwiiya bakwe bapati mbobatakali kutondezya lyoonse. Cilizyibidwe kuti bana babona bapati kuti balabainda. Mulakonzya kucibona eeci kwiinda mumibuzyo minji njobabuzya. Ee, kwiindana abapati banji ncuuba-uba kubayiisya bana alimwi tabajisi cilengwa cakulisumpula. Aciindi cimwi, Jesu wakaita mwana akwaambila basikwiiya bakwe kuti: “Mwataakusanduka akuba mbuli twana, tamukooyoonjila pe mu-Bwami bwakujulu.” Wakazumanana ulaamba: “Umwi aumwi uulibombya mbuli kana aka nguwenya uuzooba mupati mu-Bwami bwakujulu.” (Matayo 18:3, 4) Jesu wakaamba mulawo ooyu: “Umwi umwi uulisumpula uyoofwiinsigwa, ayooyo uulifwiinsya uyoosumpulwa.”—Luka 14:11; 18:14; Matayo 23:12.
10. Mibuzyo nzi njotutiilange-lange?
10 Kasimpe aako kaleta mibuzyo minji. Ibulangizi mbotujisi bwabuumi butamani munzila imwi buyeeme akutondezya kulibombya kwini-kwini, pele nkaambo nzi Banakristo zimwi ziindi ncocibakatazya kulibombya? Nkaambo nzi ncocitukatazya kuleka kulisumpula alimwi akuliyumya mumasukusyo katuli babombe? Alimwi ino ncinzi ciyootugwasya ikuzwidilila mukutondezya kulibombya kwini-kwini?—Jakobo 4:6, 10.
Ncocikatazya Kulibombya
11. Nkaambo nzi ncocitagambyi kuti tweelede kusolekesya kutegwa tulibombye?
11 Ikuti naa cilamuyumina kulibombya, tamuli mulikke pe. Kaindi mu 1920, imagazini eeyi yakabandika zyalulayo lwamu Bbaibbele lujatikizya mbokuyandika kulibombya noyakati: “Aboobo mbotuzumanana kubona mbwakubikkila maano kapati Mwami kulibombya, eeci ceelede kubakulwaizya basikwiiya boonse bakasimpe kutondezya bube oobu abuzuba.” Mpoonya yakacisalazya kuti: “Nokuba kuti kuli lulayo loonse oolu kuzwa mu Magwalo ikutalondoka kwa bantunsi kupa kuti aabo ibaba bantu ba Mwami alimwi ibasala kutobela nzila ya Mwami balibonye kukatazyigwa kapati, akuba azintu zinji zyakulwana mukaambo aaka kajatikizya kulibombya ikwiinda bube bumbi.” Eeci citondezya kaambo komwe Banakristo bakasimpe ncobeelede kusolekesya kulibombya—ikubisya kwa buntunsi kutupa kulibikka mpotuteelede. Cili boobu akaambo kakuti tuli luzubo lwabantu bakusaanguna basizibi, Adamu a Eva, ibakazundwa akoongelezyegwa kubyaabi.—Ba-Roma 5:12.
12, 13. (a) Mbuti nyika mboipa kuti cikatazye kutondezya kulibombya kwa Bunakristo? (b) Nguni uupa kuti ciindile kutukatazya caboola kumakani aakulibombya?
12 Ikaambo kambi kapa kuti cituyumine kulibombya nkakuti tuli munyika iikulwaizya bantu kusolekesya kapati kuti bainde bamwi. Akati kambaakani zimwi zyamunyika eeyi kuli kulombozya kuzuzikizya “zisusi zyanyama [iitalondokede] niziba zisusi zyameso nikuba kulisumpula kwabuumi.” (1 Johane 2:16) Muciindi cakuzundwa akulombozya ooko kwakunyika, basikwiiya ba Jesu beelede kuba aliso lyabuuya akubikkila maano kukucita kuyanda kwa Leza.—Matayo 6:22-24, 31-33; 1 Johane 2:17.
13 Ikaambo katatu ncocili ciyumu kutondezya kulibombya nkakuti sikutalisya kulisumpula, Saatani Diabolosi, nguweendelezya nyika eeyi. (2 Ba-Korinto 4:4; 1 Timoteo 3:6) Saatani usumpula bube bwakwe bubyaabi. Mucikozyanyo, wakayanda kuti Jesu amukombe mpoonya walo amupe “zisi zyoonse zyanyika abulemu bwazyo.” Mbwaanga wakali kulibombya lyoonse, Jesu cabusicamba wakakaka ncaakamwaambila Diabolosi. (Matayo 4:8, 10) Mbubwenya buyo, Saatani ulabasunka Banakristo kutegwa baliyandawide bulemu. Pele Banakristo balibombya balasolekesya kutobela cikozyanyo ca Jesu, aboobo balamutembaula akumulemeka Leza.—Marko 10:17, 18.
Ikutondezya Akusumpula Kulibombya Kwini-Kwini
14. Caamba nzi ‘kulibombya kwalweeno’?
14 Mulugwalo lwakwe ndwaakalembela Bana Kolose, mwaapostolo Paulo wakabacenjezya kujatikizya kulibombya kwaatala-tala buyo ikwakukkomanisya bantu. Ooku Paulo wakakupandulula kuti ‘nkulibombya kwalweeno.’ Aabo ibatondezya kulibombya kwakuupaupa ameso tabali bantu babikkila maano kuzintu zyakumuuya. Pele, kakunyina kuzyiba balalitondezya kuti bazwide kulisumpula. (Ba-Kolose 2:18, 23) Jesu wakapa zikozyanyo zyakulibombya kwakubeja. Wakabasinganya ba Farisi akaambo kamipailo yakulitondezya alimwi anzila mbobakali kuliimya kabasulungene kubusyu kutegwa babonwe abantu. Mukwiindana, kutegwa mipailo yesu ayitambule Leza, yeelede kupailwa cakulibombya.—Matayo 6:5, 6, 16.
15. (a) Ncinzi ncotukonzya kucita kutegwa tuzumanane kuba amyoyo mitete? (b) Nzikozyanyo nzi zimwi zibotu zyakulibombya?
15 Banakristo balagwasyigwa kutondezya kubomba moyo kwini-kwini kwiinda mukubikkila maano kuzikozyanyo zitaliboteli zyakulibombya, nkokuti Jehova Leza alimwi a Jesu Kristo. Ikucita boobo cijatikizya kuba aciiyo lyoonse ca Bbaibbele amabbuku aabandika Bbaibbele aapegwa kwiinda mu “muzike musyomesi uucenjede.” (Matayo 24:45) Ciiyo cili boobo cilayandika kapati kubalangizi Banakristo, ‘kuti myoyo yabo italisumpuli kwiinda babunyina.’ (Deuteronomo 17:19, 20; 1 Petro 5:1-3) Amuyeeye cakuzinzibala kujatikizya zikozyanyo zinji zyabaabo ibakalongezyegwa akaambo kakulibombya, mbuli Rute, Hana, Elizabeta abamwi banji. (Rute 1:16, 17; 1 Samuele 1:11, 20; Luka 1:41-43) Alimwi amuyeeye kujatikizya zikozyanyo zinji zyabantu badumide ibakazumanana kulibombya mumulimo wa Jehova, mbuli Davida, Josiya, Johane Mubbapatizi amwaapostolo Paulo. (2 Makani 34:1, 2, 19, 26-28; Intembauzyo 131:1; Johane 1:26, 27; 3:26-30; Incito 21:20-26; 1 Ba-Korinto 15:9) Ino mbuti kujatikizya zikozyanyo zinji zyamazubaano zyakulibombya nzyotujana mumbungano ya Bunakristo? Kwiinda mukuzinzibala kuyeeya azikozyanyo eezi, Banakristo bakasimpe bayoogwasyigwa kuba ‘amyoyo mitete akugwasyanya.’—1 Petro 5:5.
16. Mbuti mulimo wa Bunakristo mboutugwasya kulibombya?
16 Alimwi ikutola lubazu lyoonse mumulimo wa Bunakristo kulakonzya kutugwasya kulibombya. Ikuba amoyo mutete kulakonzya kutupa kuba bacibwene kapati notusikila bantu mbotutazi aabo mbotujana kuŋanda aŋanda amumasena aambi. Eeci cili masimpe ikapati lweendo lwakusaanguna bantu mumaanda nobatautambuli mulumbe wa Bwami antela akukazya buya. Kanji-kanji nzyotusyoma zilakazyigwa, aboobo kulibombya kulakonzya kugwasya Munakristo kuzumanana kwiingula mibuzyo “amoyo mutete akuyoowa Leza.” (1 Petro 3:15) Babelesi ba Leza ibalibombya balongela kuzilawo zipya alimwi babagwasya bantu ibajisi bukkale bwiindene-indene. Bakambausi bali boobo cakulibombya balaliyumya mumulimo uukatazya wakwiiya mwaambo mupya ikutegwa babagwasye kapati aabo boonse mbobayanda kwaambila makani mabotu. Elo kaka beelede kulumbwa kapati!—Matayo 28:19, 20.
17. Mmikuli nzi ya Bunakristo motuyandika kulibombya?
17 Akaambo kakulibombya, ibanji cabapa kucikonzya kwiibeleka milimo yabo ya Bunakristo, calo cabapa kubikka zintu nzyobayandika bamwi kumbele lyazintu nzyobayandika balo. Mucikozyanyo, kuyandika kulibombya kutegwa usyi Munakristo aleke nzyayanda kucita akubikka ciindi ambali ikulibambila alimwi akusololela ciiyo ca Bbaibbele cigwasya kubana bakwe. Alimwi kulibombya kugwasya bana kubalemeka alimwi akulibombya kubazyali babo, ibatalondokede. (Ba-Efeso 6:1-4) Bamakaintu ibakwetwe kubalumi batasyomi kanji-kanji baba mubukkale mobeelede kutondezya kulibombya nobasoleka kubasandula mbobakwetene limwi kwiinda ‘mukweenda kwabo kusalala nkobeenda cakuyoowa.’ (1 Petro 3:1, 2) Kulibombya aluyando lwakulyaaba nzintu ziyandika kapati notulanganya nzyobayandika bazyali besu baciswa alimwi ibacembede.—1 Timoteo 5:4.
Kulibombya Kulamana Mapenzi
18. Mbuti kulibombya mbokukonzya kutugwasya kumana mapenzi?
18 Babelesi ba Leza boonse bantunsi tabalondokede. (Jakobo 3:2) Zimwi ziindi, kulakonzya kuba kutamvwana akati ka Banakristo bobilo. Umwi ulakonzya kajisi kaambo kaya koomoonga kamupa kumutongooka mweenzinyina. Kanji-kanji, penzi eeli lilakonzya kumanwa kwiinda mukutobela lulayo oolu: “Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo.” (Ba-Kolose 3:13) Masimpe, tacili cuuba-uba kulutobela lulayo oolu, pele kulibombya inga kwamugwasya muntu kulutobela lulayo oolu.
19. Ncinzi ncotweelede kuyeeya notubandika amuntu iwatulubizyila?
19 Zimwi ziindi Munakristo ulakonzya kulimvwa kuti kaambo ikaleta kutamvwana nkapati kapati cakuti takakonzyi kulangwa buyo. Nkokuti kulibombya kuyoomugwasya kumusikila muntu ooyo ngwayeeyela kuti wakamulubizyila kajisi makanze aakuti luumuno luzumanane. (Matayo 18:15) Ikaambo kamwi kapa kuti mapenzi azumanane akati ka Banakristo nkakuti umwi akati kabo antela boonse inga kabalisumpula cakuti tabayandi kuzumina kuti balijatikizyidwe mukuleta penzi. Ambweni ooyo wabweza ntaamu kusikila umwi ulakonzya kucita boobo munzila iitondezya kulilulamika alimwi cankazi. Pele, ikulibombya kwini-kwini kuyoogwasya kapati kumana kutamvwana.
20, 21. Nintaamu nzi imwi iigwasya kapati ikutegwa tube balibombya?
20 Intaamu iigwasya kapati mukwiiya kulibombya nkupaila kulomba lugwasyo lwa Leza amuuya wakwe. Pele kamuyeeya kuti, “Leza . . . batete-myoyo ulabapa luzyalo [kubikkilizya amuuya wakwe uusalala].” (Jakobo 4:6) Aboobo ikuti naa kuli mbumwaimpana amusyominyoko, amupaile kuli Jehova kutegwa amugwasye kuzumina cakulibombya kufwumbwa kulubizya kwanu kwakapa kuti kubuke penzi, nokuba kuti nkuniini antela nkupati. Ikuti naa cili mucimide kapati alimwi sikumulubizyila waamba kuti, “Amundijatile,” cakulibombya amumulekelele. Ikuti kacili ciyumu kucita boobo, amupaile kulomba lugwasyo lwa Jehova kutegwa kulisumpula kuli koonse kuzwe mumoyo wanu.
21 Ikuteelelesya zilongezyo zinji ziboola akaambo kakulibombya kweelede kutukulwaizya kutondezya bube oobu butaliboteli. Ikuti twacita boobo, elo kaka taciliboteli cikozyanyo ncotujisi ca Jehova Leza a Jesu Kristo! Kamuciyeeyede cisyomezyo ca Leza eeci cakuti: “Kulibombya akuyoowa Jehova kulaleta buvubi abulemu abuumi.”—Tusimpi 22:4.
Twaambo Twakuyeeya Cakuzinzibala
• Mbaani ibali zikozyanyo zibotu zyakulibombya?
• Nkaambo nzi ncocili ciyumu kulibombya?
• Nzintu nzi zikonzya kutugwasya kuti tukonzye kulibombya?
• Nkaambo nzi ncociyandika kapati kuzumanana kulibombya?
[Mibuzyo yaciiyo]
[Cifwanikiso icili apeeji 17]
Jesu wakali kulibombya ncobeni
[Cifwanikiso icili apeeji 19]
Inyika ikulwaizya bantu kusolekesya kwiinda bamwi
[Kulumba]
Cifwoto ca WHO cakacitwa a L. Almasi/K. Hemzǒ
[Cifwanikiso icili apeeji 20]
Kulibombya kulatugwasya kubasikila bantu mbotutazyi mumulimo wesu
[Zifwanikiso izili apeeji 21]
Kuzwangana kanji-kanji tulakonzya kukumana kwiinda mukulekelelana caluyando acakulibombya