Sena Muyooyenda A Leza?
Sena Muyooyenda A Leza?
‘Amweende cakulibombya a Leza wanu.’ —Mika 6:8.
1, 2. Ino kulimvwa kwa Jehova kujatikizya ndiswe inga kwakonzyanisyigwa buti kukulimvwa kwamuzyali uuyiisya mwanaakwe kweenda?
IMWANA muniini waimikila kumwi maulu kaakankama. Watambikizya maanza aakwe akujata maanza aamuzyali aatambikidwe akubbatula ntaamo zisyoonto buyo zyakusaanguna. Eeci cilakonzya kulibonya kuba kantu kaniini, pele kuli banyina abausyi ncintu cipati, nciindi cikkazika moyo kujatikizya zyakumbele. Bazyali balangila kuyooyenda amwanaabo kumwi kabajisene kumaanza mumyezi alimwi amumyaka iiboola. Balangila kuyoopa mwana busolozi alimwi alugwasyo kumbele aamazuba munzila zinji.
2 Awalo Jehova Leza mbwalimvwa kubana bakwe baanyika. Ciindi cimwi wakaamba kuti: “Ndakaiisya Efraimu kweenda. Ndakali kubeenzyaenzya mumaanza aangu, . . . Zyaanzyo nzindakabaanzya zyakali zyabuuya, intambo zyangu zyakali zyaluyando.” (Hosea 11:3, 4) Aawa Jehova ulipandulula kuba muzyali siluyando walo uuyiisya mwanaakwe kweenda cakukkazika moyo, ambweni uumunyamuna mumaanza ikuti wawa. Jehova Imuzyali wiinda kubota ulilisungude kutuyiisya mbokweendwa. Alimwi ulayandisya kweendelaamwi andiswe mbotuya buzumanana kuyaambele. Kweelana ambolutondezya lugwalo lwamutwe, tulakonzya kweenda a Leza! (Mika 6:8) Pele ino caamba nzi kweenda a Leza? Ino nkaambo nzi ncotuyandika kucita boobo? Ino inga cakonzyeka buti? Alimwi ino nzilongezyo nzi nzyotukonzya kujana akaambo kakweenda a Leza? Atwiilange-lange mibuzyo eeyi yone aumwi kuugama.
Ino Kweenda a Leza Caamba nzi?
3, 4. (a) Ino ncinzi ciinda kubota caboola kubupanduluzi bwakweenda a Leza? (b) Ino caamba nzi kweenda a Leza?
3 Masimpe bantususu tabakonzyi kuyaabweendeenda a Jehova mbwaanga walo muuya. (Kulonga 33:20; Johane 4:24) Aboobo, Ibbaibbele nolyaamba bantu kuti baleenda a Leza, libelesya maambilambali. Lipa bupanduluzi bubotu kapati, bwalo butasinkilwi acisi muntu nkwazwa naa zilengwa alimwi bubeleka kwaciindi coonse. Ee, ino mbusena nzi naa ndizyalani nzi litakonzyi kumvwa caambwa twati muntu uleenda amweenzinyina? Ibupanduluzi oobu butondezya cilongwe alimwi alukamantano, sena tabusi? Ikulimvwa boobu kulatupa busongo bwakuzyiba ncocaamba kweenda a Leza. Pele lino atwiiyase nondo muliso.
4 Amuyeeye balombwana basyomeka ba Enoki alimwi a Nowa. Ino nkaambo nzi ncobapandululwa kuti bakeenda a Leza? (Matalikilo 5:24; 6:9) Mu Bbaibbele, “kweenda” ziindi zinji caamba kutobela bubambe bumwi. Enoki alimwi a Nowa bakasala kutobela nzila imwi mubuumi bwabo yakali kweendelana akuyanda kwa Jehova Leza. Kwiindana abaabo ibakali munyika ciindi eeco, balo bakalindila Jehova kuti abasololele. Bakamusyoma. Sena eeci caamba kuti Jehova ngowakali kubasalila zintu? Peepe. Jehova wakapa bantu nguzu zyakukonzya kusala alimwi uyanda kuti tucibelesye cipego eeco antoomwe a “nguzu zyakuyeeya.” (Ba-Roma 12:1, NW) Nokuba boobo, notusala zintu inguzu zyesu zyakuyeeya, lyoonse zyeelede kusololelwa amizeezo ya Jehova mibotu. (Tusimpi 3:5, 6; Isaya 55:8, 9) Aboobo, mbotuya bweenda, lweendo oolu tulalweenda antoomwe a Jehova.
5. Ino nkaambo nzi Jesu ncaakaamba zyakuyungizya kakokola kubuumi?
5 Ziindi zinji Ibbaibbele likozyanisya buumi kulweendo naa kukweenda. Ziindi zimwi, kukozyanisya ooku kulagaminina, pele ziindi zimwi nkwamaambilambali. Mucikozyanyo, Jesu wakati: “Nguni akati kanu uulibilika uukonzya [kuyungizya kubuumi bwakwe] nikaba kakokola komwe?” (Matayo 6:27) Mabala aaya alakonzya kumukopa. Nkaambo nzi Jesu ncaakaamba kuyungizya “kakokola komwe,” kubuumi ikabelesyegwa kupima musinzo bwalo bupimwa aciindi? * Cilasalala kuti buumi Jesu wakali kububona mbuli lweendo. Aboobo, wakayiisya kuti kulibilika takukonzyi kumugwasya kuyungizya ntaamo yomwe kulweendo lwabuumi bwanu. Nokuba boobo sena tuleelede kukosola kuti tacikwe makani kufwumbwa naa tuyooyenda musinzo mulamfwu buti a Leza? Peepe. Eeci cituleta kumubuzyo wabili, Nkaambo nzi ncotweelede kweenda a Leza?
Ino Nkaambo nzi Ncotuyandika Kweenda a Leza?
6, 7. Ino ncinzi ncobayandisya bantu batalondokede, alimwi nkaambo nzi ncotweelede kulanga kuli Jehova kutegwa atugwasye?
6 Ikaambo kamwi ncotweelede kweenda a Jehova Leza kalipanduludwe kuli Jeremiya 10:23 kuti: “O Jehova, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” Aboobo, swebo tobantu tatujisi nguzu zyakukonzya kulyeendelezya mubuumi bwesu. Tulikuyandide citaambiki kweendelezyegwa. Aabo ibayanda kulyeendelezya kakunyina kweendelezyegwa a Leza, balalubizya mbuli bwakacita Adamu a Eva. Ibanabubili aaba bakayanda kuti babe anguzu zyakulisalila cibi acibotu. (Matalikilo 3:1-6) Inguzu zyakucita boobu tazili zyesu pe.
7 Sena tamulimvwi kuti muyandika kusololelwa mulweendo lwabuumi? Tuyandika kusala zintu ziniini azipati abuzuba. Izimwi akati kazyeezi zilakatazya kusala alimwi zilakonzya kubujatikizya buumi bwesu bwakumbele alimwi abwabayandwa besu. Pele, amuyeeye buyo kuti umwi mupati lyoonse alimwi musongo kutwiinda uliyandide kutusololela notusala! Cuusisya ncakuti, bunji bwabantu sunu bayandisya kusyoma mbobazibona zintu kuti kubasololele nobeenda. Balayalampya bwini bwaambidwe ku Tusimpi 28:26, bwakuti: “Uusyoma moyo wakwe mwini mufubafuba, pele oyo uuenda mubusongo ulavunwa.” Jehova uyanda kuti tutantamuke mapenzi aboola akaambo kakusyoma moyo wamuntu iweena. (Jeremiya 17:9) Uyanda kuti katweenda cabusongo, katusyoma nguwe walo uli Ngomusololi wesu musongo alimwi Sikutuyiisya. Ikuti naa twamusyoma, tunookwabilidwe mubuumi bwesu, tunookkutilide akukkalwa moyo.
8. Ino nkuli cibi alimwi akutalondoka nkozitola bantu, pele ino Jehova ncinzi ncayanda kuti tube ancico?
8 Kaambo akambi ncotweelede kweenda a Leza kajatikizya bulamfwu bwamusinzo ngotuyanda kweenda. Ibbaibbele lilaamba kujatikizya kaambo kamwi kausisya. Munzila imwi, boonse bantu batalondokede bali mukweenda kuunka kubusena bomwe. Ibbuku lya Mukambausi 12:5 nolipandulula masukusyo aakubucembele, lyaamba kuti: “Muntu ulaya kucikalilo cakwe citamani, abasikulila baleendeenda mumigwagwa.” Ino “cikalilo cakwe citamani” ncinzi? Ncuumbwe, kwalo cibi alimwi akutalondoka nkozitutola. (Ba-Roma 6:23) Nokuba boobo, Jehova uyanda kuti katupona ciindi cilamfwu, muciindi cakupona buyo kaindi kasyoonto kuzwa kukuzyalwa kusikila kulufwu. (Jobu 14:1) Kulikke kweenda a Leza nkokukonzya kutupa bulangizi bwakweenda lweendo ndwayanda kuti tweende, nkokuti kukabe kutamani buya. Sena eeci tacili ncomuyanda? Aboobo, nkokuti muyandika kweenda a Uso wanu.
Mbuti Mbotukonzya Kweenda a Leza?
9. Ino nkaambo nzi ziindi zimwi Jehova ncaakayubide bantu bakwe, pele ncisyomezyo nzi ncaakapa kweelana a Isaya 30:20?
9 Mubuzyo watatu akati kamibuzyo njotulanga-langa uuyandika kubikkila maano kapati, ngwakuti, Mbuti mbotukonzya kweenda a Leza? Bwiinguzi tulabujana kubbuku lya Isaya 30:20, 21, ilyaamba kuti: “Mwiiyi wanu takooyooyuba limbi pe; meso aanu ayoobona Mwiiyi wanu. Nkabela matwi aako ayoomvwa ijwi kusule lyako liti, Njeeyi inzila, amweende mulinjiyo, kufwumbwa ciindi nimuleya nikuba kululyo nikuba kulumwensi.” Mucibalo eeci cikulwaizya, majwi aa Jehova aalembedwe mukapango 20 ayelede kuti akayeezya bantu bakwe, nobakamuzangila, cakali mbuli kuti ulibayubide. (Isaya 1:15; 59:2) Nokuba boobo, aawa Jehova utondezyedwe kuti tayubide, pele uliimvwi antangalala kumbele lyabantu bakwe basyomeka. Tulakonzya kuyeeya mwiiyi wiimvwi kumbele kwabasicikolo, kabatondezya ncayanda kuti baiye.
10. Ino muunzila nzi momukonzya ‘kumvwa jwi kusule lyanu’ kuzwa ku Mwiiyi wanu Mupati?
10 Mukapango 21, kwakabelesyegwa cikozyanyo cimbi. Jehova waambwa kuti weendela kusule lyabantu bakwe, kabatondezya nzila njobeelede kutozya. Basikwiiya Bbaibbele bakaamba kuti kaambo aaka ambweni katondezya mbuli mweembezi ziindi zimwi mbwatobela mbelele zyakwe, katambizya kutegwa zitaleyi munzila. Ino mbuti cikozyanyo eeci mbocibeleka kulindiswe? Aboobo, notulanga mu Jwi lya Leza kuti litusololele, tubala majwi aakalembwa myaka minji yainda. Cili mbuli kuti azyila kusule lyesu, mbwaanga ngakaindi. Nokuba boobo, alabeleka mazubaano mbubwenya mbuli ciindi naakalembwa. Lulayo lwamu Bbaibbele lulakonzya kutusololela mukusala nkotucita abuzuba, alimwi lulakonzya kutugwasya kubona mbotweelede kupona mumyaka yakumbele. (Intembauzyo 119:105) Notuyandaula lulayo oolu cakusinizya alimwi akulubelesya, Jehova ulaba Ngomusololi wesu. Tuleenda a Leza.
11. Kweelana a Jeremiya 6:16, ino Jehova wakatondezya cikozyanyo nzi kubantu bakwe, ino bakacita buti?
11 Sena ncobeni tulazumina kuti Jwi lya Leza litusololele? Cilayandika kujana ciindi cakulilanga-langa lunywa meenda. Amubone kapango ikakonzya kutugwasya kutegwa tucite boobo: “Mbuboobo mbwaamba Jehova. Amwiime munzila, mubone, mubuzye inzila zyaciindi, nzenzizyo ziindika kabotu. Amweende mumonya, elyo myoyo yanu iyoojana cilyokezezyo.” (Jeremiya 6:16) Imajwi aaya atuyeezya simweendanzila wiima aandaanina nzila kutegwa abuzye nkweelede kugama. Munzila yakumuuya, bantu ba Jehova bazangi mu Israyeli ncobakeelede kucita eeci. Bakeelede kupilukila ‘kunzila zyaciindi.’ ‘Nzila iindika’ yakali njenzila bamasyaanyinakulu basyomeka mobakali kweendela, inzila bamasi cakutayeeya mobakaleya. Cilausisya kuti bana Israyeli tiibakaswiilila naaceya kukuyeekezya ooku Jehova nkwaakacita caluyando. Kapango nkamunya kalazumanana ategwa: “Pele bati, Tatukooyooenda mumo pe.” Nokuba boobo, mazubaano bantu ba Leza tabaciti mbubakacita aaba pe.
12, 13. (a) Ino mbuti batobeli ba Kristo basyomeka mbobacita kululayo luli kubbuku lya Jeremiya 6:16? (b) Ino mbuti mbotukonzya kulilingula caboola kumakani aambotupona mazubaano?
12 Kutalikila mumwaanda wamyaka wa 19, batobeli ba Kristo bananike balubelesya lulayo luli kubbuku lya Jeremiya 6:16. Nkamu yabo yasololela ‘kunzila zyaciindi.’ Kwiindana a Bunakristo bwanyika buzangide, cakusyomeka baatobela “majwi menimeni” aakatalisyigwa a Jesu Kristo alimwi akutobelwa abasikutobela basyomeka bansiku mumwaanda wamyaka wakusaanguna C.E. (2 Timoteo 1:13) Kusikila sunu, bananike balagwasyanya akati kabo alimwi abeenzinyina iba “mbelele zimwi” kutegwa kabapona munzila iili kabotu alimwi iikkomanisya mwalo Bunakristo bwanyika mobwakaleya.—Johane 10:16.
13 Kwiinda mukupa zilyo zyabo kuciindi ceelede, ciinga camuzike uusyomeka cagwasya bantu banji kujana “nzila zyaciindi” alimwi akweenda a Leza. (Matayo 24:45-47) Sena muli akati kabantu aabo banji? Ikuti naa mboobo, ino ncinzi ncomukonzya kucita kutegwa mutatozyi nzila yanu? Ikujana ciindi cakulanga-langa mbomupona ngamaano. Ikuti naa mulabala Bbaibbele cakusyomeka kubikkilizya amabbuku aamba zili mu Bbaibbele akujanika kumapulogilamu aamalailile aabambwa abananike sunu, nkokuti muli mukuyiisyigwa kweenda a Leza. Alimwi ikuti naa cakulibombya mulabelesya lulayo ndomupegwa, masimpe muli mukweenda a Leza, ikutobela “nzila zyaciindi.”
Amweende Mbuli Kuti ‘Mulimubwene Ooyo Uutabonwi’
14. Ikuti naa Jehova tumubona kuba mwini-mwini, ino mbuti eeci mbocikonzya kutondezyegwa mukusala nkotucita?
14 Ikutegwa tweende kabotu a Jehova, weelede kuba mwini-mwini kulindiswe. Amuyeeye kuti Jehova wakasyomezya bantu basyomeka bamu Israyeli yansiku kuti tanaakali bayubide pe. Mazubaano, mbubwenya buyo ulaliyubununa kubantu bakwe kali Mwiiyi Mupati. Sena Jehova mbomumubona oobo, mbuli kuti uliimvwi kumbele lyanu kutegwa amulailile? Ndolusyomo ndotuyandika ikuti katuyanda kweenda a Leza. Musa wakalijisi lusyomo luli boobo, “nkaambo wakalibilamine mbuli sikubona yooyo uutabonwa.” (Ba-Hebrayo 11:27) Ikuti Jehova kali mwini-mwini kulindiswe, nkokuti tunoobikkila maano kujatikizya mbwalimvwa notusala zintu. Mucikozyanyo, tatukasoli kucita zibi akuzisisa kubaalu Banakristo naa kuli bamumukwasyi wesu. Muciindi caboobo, tulasoleka kweenda a Leza nociba ciindi nokutakwe muntu uukonzya kutubona. Mbubwenya mbuli Mwami wansiku Davida, tukanza kuti: “Njooendeenda muŋanda yangu camoyo uululeme.”—Intembauzyo 101:2.
15. Ino mbuti kuyanzana abakwesu abacizi Banakristo mbokutugwasya kubona Jehova mbwali mwini-mwini?
15 Jehova ulizyi kuti tatulondokede, tuli buyo zilenge zyanyama zyalo ziindi zimwi ziyuminwa kusyoma ncozitaboni ameso. (Intembauzyo 103:14) Nzinji nzyacita kutegwa atugwasye kuzunda kukompama kuli boobu. Mucikozyanyo, wabungika “bantu kuzina lyakwe” kuzwa kumasi woonse aanyika. (Incito 15:14) Mbotubelekela antoomwe, tulajana nguzu kuzwa kuli umwi aumwi. Twamvwa mbuli Jehova mbwaagwasya mukwesu wakumuuya naa mucizi ikuzunda kukompama kumwi naa musunko muyumu, cipa kuti Leza abe mwini-mwini kapati kulindiswe.—1 Petro 5:9.
16. Ino mbuti kwiiya Jesu mbokukonzya kutugwasya kweenda a Leza?
16 Ikaambo kapati, Jehova watupa cikozyanyo ca Mwanaakwe. Jesu wakati: “Ndime nzila, ndime bwini, ndime buumi. Takukwe uuza kuli-Taata, pele mulindime.” (Johane 14:6) Ikwiiya buumi mbwaakapona Jesu anyika njenzila imwi Jehova mbwakonzya kuba mwini-mwini kulindiswe. Zyoonse Jesu nzyaakaamba naa kucita cakali citondezyo cilondokede cabube alimwi abukkale bwa Wisi wakujulu. (Johane 14:9) Notusala zyakucita, tuleelede kuyeeyesya kapati kujatikizya mbuli Jesu mbwaakali kunga wacita. Nzyotusala nozitondezya kuti tulabikkila maano alimwi tulazipailila, nkokuti tuli mukutobela nzila mwaakainda Kristo. (1 Petro 2:21) Twacita boobo nkokuti tuli mukweenda a Leza.
Ino Nzilongezyo nzi Zijanika?
17. Ikuti tweenda munzila ya Jehova, ino “[n]cilyokezezyo” nzi mubuumi bwesu ncotuyoojana?
17 Kweenda a Jehova Leza cipa kupona buumi bukkazika moyo. Amuyeeye Jehova ncaakasyomezya bantu bakwe kujatikizya makani aakuyandaula ‘nzila ziindika.’ Wakati: “Amweende mumonya, elyo myoyo yanu iyoojana cilyokezezyo.” (Jeremiya 6:16) Ino “cilyokezezyo” ncecinzi? Sena eeci caamba kupona buumi bwakulikondelezya akuba azintu zyakusobanya? Peepe. Jehova ulapa cintu ciinda aawa kubota, calo muntu uubainda kuvwuba ncatakonzyi kujana majanejane. Kujana cilyookezezyo mubuumi caamba kuliiba mumizeezo, kukkomana, kukkalwa moyo alimwi akukkutila kumuuya. Kulyookezya kuli boobo caamba kuti mulisyomede kuti mwakasala nzila iinda kubota mubuumi. Ikuliiba mumizeezo kuli boobo takujaniki-janiki munyika eeyi iizwide mapenzi.
18. Ino ncilongezyo nzi Jehova ncayanda kuti amupe, alimwi ino mukanzide kucita buti?
18 Ibuumi kubugama ncilongezyo cipati. Ibuumi nobufwiimpa mbubotu kwiinda kutaponenalyo. Nokuba boobo, Jehova kunyina naakacita bubambe bwakuti lweendo lwanu kaluli lufwaafwi buyo kuzwa kunguzu zyabukubusi kusikila kumakatazyo aakubucembele. Jehova uyanda kuti kamujisi cilongezyo ciinda kubota. Uyanda kuti mweende anguwe kukabe kutamani! Kaambo aaka kalitondezyedwe kabotu kubbuku lya Mika 4:5 kuti: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” Sena muyoocikkomanina cilongezyo eeco? Sena mulayanda kujana ceeco Jehova ncaita kuti “buumi bwinibwini”? (1 Timoteo 6:19) Aboobo, cakulisungula amukanze kweenda a Jehova kuzwa sunu mane kukabe kutamani!
Bupanduluzi buyungizidwe
^ munc. 5 Busanduluzi bumwi bwama Bbaibbele bulacinca bbala lya “kakokola” mukapango aaka akubelesya “ciindi ciniini” (The Emphatic Diaglott) naa kuti “miniti yomwe” (A Translation in the Language of the People, lyakasandululwa a Charles B. Williams). Pele mumagwalo aakusaanguna kwaambidwe kakokola, kakali kulampa 45 centimeters.
Ino Inga Mwaingula Buti?
• Ino cipandulula nzi kweenda a Leza?
• Nkaambo nzi ncomulimvwa kuti muyandika kweenda a Leza?
• Ino ncinzi ciyoomugwasya kweenda a Leza?
• Ino nzilongezyo nzi nzibajana aabo beenda a Leza?
[Mibuzyo yaciiyo]
[Zifwanikiso izili apeeji 29]
Kwiinda mu Bbaibbele, tulamvwa jwi lya Jehova kusule lyesu kaliti, “Njeeyi inzila”
[Cifwanikiso icili apeeji 31]
Kumiswaangano, tulapegwa cakulya cakumuuya muciindi ceelede