Ijwi lya Jehova Lili Abuumi

Twaambo Tupati-Pati Kuzwa Mubbuku lya Makani lya Kusaanguna

MYAKA iili 77 yainda kuzwa ciindi ba Juda nobakapiluka kuzwa mubuzike ku Bbabbuloni. Itempele yakayakwa a Mweendelezi Zerubbabele yakkwanya myaka iili 55. Ikaambo kapati kakapa kuti ba Juda bapilukile ku Jerusalemu nkakuti babusye bukombi bwakasimpe. Nokuba boobo, bantu tabajisi busungu mukukomba Jehova. Kulayandika kufwambaana kubakulwaizya. Eeci ncencico bbuku lya Makani lya Kusaanguna ncolibandika.

Kunze lyamakani aamazyalani, bbuku lya Makani lya Kusaanguna lijisi makani aakacitika mumyaka iili 40, kuzwa naakafwa Mwami Saulo kusikila kulufwu lwa Mwami Davida. Mupaizi Ezara nguwaambwa kuti ngookalemba bbuku eeli mumwaka wa 460 B.C.E. Bbuku lya Makani lya Kusaanguna lilijisi makani ayandika kulindiswe nkaambo lilatuzyibya makani aajatikizya bukombi mbobwakabede kutempele alimwi amakani mapati aajatikizya mazyalani aa Mesiya. Mbwaanga ncibeela ca Jwi lya Leza lyakasololelwa amuuya, makani aali mumo alayumya lusyomo lwesu alimwi akutugwasya kuyaambele mukumvwisya Bbaibbele.—Ba-Hebrayo 4:12.

KULEMBA MAZINA AAYANDIKA

(1 Makani 1:1–9:44)

Imakani aajisi twaambo toonse tujatikizya mazyalani Ezara ngaakalemba alayandika kapati mutwaambo tutaceyi kuli totatwe, mbuli tootu: ikubona kwaamba kuti balikke balombwana bazumizidwe mbabakabeleka kabali bapaizi, ikugwasya mumakani aajatikizya zikono zyamisyobo alimwi akuyobola malembe aajatikizya izyalani lyakali kusololela kuli Mesiya. Makani aamazyalani aswaanganya makani aansiku aajatikizya ba Juda mane kusikila kumuntu wakusaanguna. Kuli mazyalani aali kkumi kuzwa kuli Adamu kusikila kuli Nowa, alimwi kuli mazyalani aambi aali kkumi atusisya kuli Abrahamu. Naakamana kundandamika bana ba Ismayeli, bana basimamambi wa Abrahamu Ketura alimwi abana ba Esau, icibalo citalika kwaamba kujatikizya mazyalani aabana basankwa ba Israyeli ibali 12.—1 Makani 2:1.

Bana ba Juda balaambwa cakusitikila nkaambo momuli cikombokombo cabwami ica Mwami Davida. Kuli mazyalani aali 14 kuzwa kuli Abrahamu kusikila kuli Davida alimwi kuli mazyalani aambi aali 14 kusikila kuciindi nobakatolwa buzike ku Bbabbuloni. (1 Makani 1:27, 34; 2:1-15; 3:1-17; Matayo 1:17) Eelyo Ezara wandandamika mazyalani aamisyobo yakali kujwe lya Jordano, kumane kwatobela mazyalani aabana ba Levi. (1 Makani 5:1-24; 6:1) Amane boobo waamba mubufwaafwi misyobo imwi iili kumbo kwa Mulonga wa Jordano alimwi akwaamba twaambo toonse tujatikizya mulongo wamazyalani wa Benjamini. (1 Makani 8:1) Imazina abaabo ibakasaanguna kukkala mu Jerusalemu nobakazwa ku Bbabbuloni mubuzike aalo alilembedwe.—1 Makani 9:1-16.

Mibuzyo Yamu Magwalo Iingulwa:

1:18—Ino wisi Sela nguni, sena ngu Kainane naa ngu Aripakisadi? (Luka 3:35, 36) Aripakisadi  ngowisi Sela. (Matalikilo 10:24; 11:12) Ibbala lyakuti “Kainane” ku Luka 3:36 kweelede kuti lyakanyonganyizigwa buya kubbala lyakuti ba “Kasidi.” Ikuti naa mbozibede zintu oobu, cibalo cakumatalikilo ambweni cakalembedwe kuti, “mwana a-Aripakisadi mu Kasidi.” Antela inga twaamba kuti Kainane a Aripakisadi mazina amuntu omwe. Ikaambo kateelede kulubwa nkakuti mabala aakuti “mwana a-Kainane” taajaniki mumagwalo aakusaanguna amwi.—Luka 3:36, NW, bupanduluzi buyungizyidwe.

2:15—Sena Davida wakali mwana musankwa wa Jese waciloba? Peepe. Jese wakajisi bana basankwa bali lusele, Davida kali ngowakali muniini. (1 Samuele 16:10, 11; 17:12) Kuboneka kuti mwana umwi wa Jese wakafwa kanyina bana. Mbwaanga mwana musankwa ooyo tanaakali kujatikizyigwa mumakani aamazyalani, Ezara wakalisotoka zina lyakwe.

3:17—Nkaambo nzi bbuku lya Luka 3:27 ncolyaamba zya Salatieli mwana musankwa wa Jekoniya kuti mwana musankwa wa Neri? Jekoniya mbebakali bawisi Salatieli. Nokuba boobo, kuboneka kuti Neri wakakwasya mwanaakwe musimbi kuli Salatieli. Luka wakaamba mukwe wa Neri kuti mwana musankwa wa Neri mbubwenya mbwaakacita kuli Josefa, wakamwiita kuti mwana musankwa wabausyi Mariya ba Heli.—Luka 3:23.

3:17-19—Ino Zerubabele, Pedaya, a Salatieli bakaswaangene buti? Zorobabele wakali mwana musankwa wa Pedaya iwakali munyina Salatieli. Pele, Ibbaibbele ziindi zimwi lyaamba Zorobabele kuti mwana musankwa wa Salatieli. (Matayo 1:12; Luka 3:27) Cilakonzya kuba boobu akaambo kakuti Pedaya wakafwa, eelyo Salatieli ngowakakomezya Zorobabele. Munzila imwi, ambweni mbwaanga Salatieli wakafwa katazyede mwana, Pedaya ngowakanjila muŋanda, eelyo Zorobabele ngowakaba mwana mutaanzi mulukwatano oolo.—Deuteronomo 25:5-10.

5:1, 2—Ino kutambula lukono lwakuba mwana mutaanzi kwakali kupandulula nzi kuli Josefa? Cakapandulula kuti Josefa wakatambula zibeela zyobilo zyalukono. (Deuteronomo 21:17) Aboobo wakaba bawisi bamisyobo yobilo—Efraimu a Manase. Ibana basankwa bamwi ba Israyeli bakajisi buyo musyobo omwe-omwe.

Ziiyo Kulindiswe:

1:1–9:44. Imazyalani aabantu bakapona ncobeni asinizya kuti bubambe boonse bwabukombi bwakasimpe tabuyeeme atwaano twakulengelela, pele abwini.

4:9, 10. Jehova wakawiingula mupailo wa Jabezi uujatikizya kukomezya cilawo cakwe caluumuno kutegwa cikonzye kukkalwa abantu banji bayoowa Leza. Andiswe tuleelede kupaila mipailo camoyo woonse ikutegwa bakombi ba Jehova bavwule mbotuya butola lubazu cabusungu mumulimo wakugwasya bantu kuba basikwiiya.

5:10, 18-22. Mumazuba aakali kupona Mwami Saulo, imisyobo yakali kujwe lya Jordano yakazunda ba Hagiri nokuba kuti mweelwe wamisyobo eeyi wakali kunjila ziindi ziinda kuli zyobilo kumweelwe wabana Hagiri. Eeci cakacitika akaambo kakuti basintanze bamisyobo eeyi bakali kusyoma Jehova akulangila kuti abagwasye. Atumusyome Jehova cakumaniina mbotuya buzumanana munkondo yakumuuya njotulwana abasinkondoma batwiinda kuvwula.—Ba-Efeso 6:10-17.

9:26, 27. Balindizi bamilyango bana Levi bakalijisi mulimo mupati kapati. Bakalipedwe cijuzyo camilyango yakuzibeela zisalala izya tempele. Bakali kusyomeka mukujalula milyango abuzuba. Tulipedwe mukuli wakusikila bantu muzilwo zyesu akubagwasya kutegwa batalike kukomba  Jehova. Sena tatweelede kusyomeka mbuli bwakali ba Levi ibakali kulindila milyango?

DAVIDA WABA MWAMI

(1 Makani 10:1–29:30)

Ikuluula kulatalika acibalo caamba mbwaakafwa Mwami Saulo abana bakwe basankwa botatwe munkondo njibakali kulwana aba Filisti ku Mulundu wa Giliboa. Davida mwana wa Jese wabikkwa kuba mwami wamusyobo wa Juda. Balombwana ibazwa kumisyobo yoonse baboola ku Hebroni akumubikka kuti abe mwami waba Israyeli boonse. (1 Makani 11:1-3) Nokwainda kaindi kaniini, wauzunda munzi wa Jerusalemu. Kumbele, bana Israyeli baleta bbokesi lyacizuminano ku Jerusalemu “bali kuyoba-yoba, akulizya . . . nyeele atuntimbwa.”—1 Makani 15:28.

Davida watondezya luyandisyo lwakuti ayakile Leza wakasimpe ŋanda. Jehova mulimo ooyu waupa Solomoni, pele wabamba cizuminano ca Bwami a Davida. Davida mbwaya buzumanana kulwana basinkondonyina babana Israyeli, Jehova wamugwasya kuyaabuzunda. Ikubala bantu kakunyina kuzumizyigwa kwapa kuti kufwe bantu ibali 70,000. Naapegwa busolozi kwiinda mumungelo bwakuti ayakile Jehova cipaililo, Davida waula busena kuli Orinani mu Jebusi. Davida watalika “[ku]bamba zibelesyo zinji” zyakuyasya ‘ŋanda yeelede kukomena loko’ iya Jehova mubusena oobo. (1 Makani 22:5) Davida wacita bubambe bwamilimo yeelede kucitwa aba Levi. Milimo eeyi ilipanduludwe cakumaniina mubbuku lya Makani lya Kusaangunga kwiinda mboipanduludwe muzibeela zimbi zya Magwalo. Imwami abantu bapa zipo zyakuyasya tempele. Davida walela kwamyaka iili 40, kumane boobo wafwa “kali amyaka minji abuvubi bunji abulemu bunji, nkabela Solomoni mwanaakwe [nguwalya] izina lyakwe.”—1 Makani 29:28.

Mibuzyo Yamu Magwalo Iingulwa:

11:11—Nkaambo nzi mweelwe wabantu bakajaigwa ncouli 300 ikutali 800 kweelana acibalo cikozyene icili kubbuku lya 2 Samuele 23:8? Imupati wabasikalumamba botatwe basintanze iba Davida wakali Jasobeamu naa Josebubasebete. Baalumi basinguzu bobilo abambi kwakali Eleazara a Sama. (2 Samuele 23:8-11) Ikaambo kakonzya kupa kwiindana muzibalo zyobilo kalakonzya kuba kakuti kwakali kwaambwa zintu zyakacitwa muziindi ziindene amuntu ngomunya.

11:20, 21—Ino Abisai wakajisi cuuno nzi akati kabalombwana basintanze botatwe iba Davida? Abisai tanaakali umwi wabalombwana basintanze botatwe ibakabelekela Davida pe. Nokuba boobo, kweelana ambokulembedwe ku 2 Samuele 23:18, 19, wakali mupati wabasikalumamba bali 30 alimwi walo wakaliindene kapati abaaba bambi. Impuwo ya Abisai yakaduma abalombwana basintanze botatwe nkaambo wakacita milimo mipati iikozyene ayakacita Jasobeamu.

12:8—Ino muunzila nzi imasyu aabasikalumamba bana Gadi mbwaakali mbuli “masyu aabalavu”? Aaba balombwana basintanze bakali a Davida munkanda. Masusu aabo akalampa. Akaambo kamasusu aabo aakali malamfwu bakali kuyoosya, kababoneka mbuli kuti mmulavwu.

13:5—Ino “Sihori waku-Egepita” ncinzi? Mbwaanga “Sihori” caamba “mulonga” mu Chihebrayo, ibamwi bayeeya kuti mabala aaya aamba kalonga kazwa mu Mulonga wa Nile. “Kalonga ka-Egepita” kaambidwe kubbuku lya Myeelwe 34:5 akalo kayeeyelwa kuti nkakamunya “kalonga” aaka. Nokuba boobo, ku Myeelwe 34:5 ibbala limbi lyakabelesyegwa lyamu Chihebrayo lilakonzya kusandululwa kabotu kuti cikuka naa ceezi. Aboobo, “Sihori waku-Egepita” banji bayeeya kuti ncikuka caku Egepita—mumpata mulamfwu  uucita mugano wanyika Yakasyomezyegwa.—Myeelwe 34:2, 5; Matalikilo 15:18.

16:30—Ino bbala lyakuti ‘kukankama’ akaambo ka Jehova lyaamba nzi? Ibbala lyakuti ‘kukankama’ lyakabelesyegwa mumaambilambali lyaamba kuyoowa cakumaninina naa kumulemeka kapati Jehova.

16:1, 37-40; 21:29, 30; 22:19—Ino mbubambe buli buti bwabukombi bwakazumanana mu Israyeli kuzwa ciindi Bbokesi nolyakaletwa ku Jerusalemu kusikila ciindi noyakayakwa tempele? Davida naakatola Bbokesi ku Jerusalemu akulibikka mutente ndyaakabambide, Ibbokesi tiilyakali mutente lyakubunganina kwamyaka minji. Nolyakatolwa ku Jerusalemu, lyakakkala mutente oomo. Itente lyakubunganina lyakali ku Gibeoni, kwalo ikwakali Mupaizi Mupati Zadoki alimwi abanyina nkobakali kucitila zipaizyo zipanduludwe mu Mulawo. Ibubambe oobu bwakazumanana kusikila ciindi lyakamana tempele ku Jerusalemu. Noyakamana tempele, itente lyakubunganina lyakalonzyegwa kuzwa ku Gibeoni akutolwa ku Jerusalemu, eelyo Bbokesi lyakabikkwa mubusena bwatempele Busalalisya.—1 Bami 8:4, 6.

Ziiyo Kulindiswe:

13:11. Muciindi cakutongooka Jehova ciindi makanze eesu naatazwidilila, tuleelede kutulanga-langa twaambo akubona capa kuti zintu zyeendele kulumwensyi. Kakunyina kudooneka, Davida mbwaakacita oobo. Wakaiya kwiinda mukulubizya, eelyo kumbele wakazyi kukonzya kulilonzya Bbokesi kulitola ku Jerusalemu kwiinda mukubelesya nzila yeelede. *

14:10, 13-16; 22:17-19. Lyoonse tuleelede kupaila kuli Jehova ikulomba kutegwa atusololele katutanatalika kucita cintu cimwi calo cikonzya kutujatikizya kumuuya.

16:23-29. Kukomba Jehova tuleelede kukubikka kumbele mubuumi bwesu.

18:3. Jehova Ulazuzikizya nzyasyomezya. Kwiinda muli Davida, wakazuzikizya cisyomezyo cakupa mbuto ya Abrahamu inyika yoonse ya Kanana, “kuzwa kumulonga wa-Egepita kusikila kumulonga mupati, mulonga Firate.”—Matalikilo 15:18; 1 Makani 13:5.

21:13-15. Jehova wakaambila mungelo kuti alesye mapenzi nkaambo ulabikkila maano kukupenga kwabantu bakwe. Masimpe, “luzyalo lwakwe ndupati loko.” *

22:5, 9; 29:3-5, 14-16. Nokuba kuti tanaakazumizyigwa kuyaka tempele ya Jehova, Davida wakatondezya muuya wabwaabi. Nkaambo nzi? Nkaambo wakazyiba kuti zyoonse nzyaakajisi wakazijana akaambo kabubotu bwa Jehova. Ibukkale buli boobu bwakulumba bweelede kutukulwaizya ikuba amuuya wabwaabi.

24:7-18. Ibubambe bwamalizyi abapaizi ibali 24 mbwaakatalisya Davida bwakacili kubeleka mungelo wa Jehova naakalibonya kuli Zakariya, bausyi Johane Mubbapatizyi akwaambilizya kuzyalwa kwa Johane. Mbwaakali “wamubulizi bwa-Abiya,” Zakariya ngowakali kubeleka ciindi eeco mutempele. (Luka 1:5, 8, 9) Bukombi bwakasimpe buliswaangene amakani aansiku kutali twaano twakuyeeyela buya—itwabantu. Kuli zilongezyo zinji mukubelekela aamwi a “muzike musyomesi uucenjede” kwiinda mubukombi bwa Jehova bukamantene sunu.—Matayo 24:45.

Amubelekele Jehova “Camiyeeyo Iizuminisya”

Ibbuku lya Makani lya Kusaanguna talizwide buyo zyamazyalani pe. Alimwi lilaluula mbuli Davida mbwaakatola bbokesi lyacizuminano ku Jerusalemu, mbwaakali kuzunda, kulibambila kuyaka tempele alimwi akucita bubambe bwakubikka bapaizi ba Levi mumalizyi aakubeleka. Zyoonse Ezara nzyaluula mubbuku lya Makani lya Kusaanguna zyeelede kuti zyakabagwasya ncobeni bana Israyeli, ikubagwasya kuba basungu alimwi mubukombi bwa Jehova kutempele.

Elo kaka Davida wakatondezya cikozyanyo cibotu mukubikka kukomba Jehova kumbele mubuumi bwakwe! Muciindi cakuyanda kulijanina zyoolwe zyaalubazu, Davida wakayanda kucita kuyanda kwa Leza. Tukulwaizyigwa kubelesya lulayo oolu notubelekela Jehova “camoyo woonse acamiyeeyo iizuminisya.”—1 Makani 28:9.

Bupanduluzi buyungizidwe

Ccaati/[Zifwanikiso izili apeeji 8-11]

(Kutegwa mubone bwini mbwaakkede mabala, amubone bbuku lini)

4026 B.C.E. Adamu Mazyalani kuzwa kuli Adamu kusikila

kuli Nowa (myaka iili 1,056)

Myaka iili 130 ⇩

 

Seti

⇩

 

105 ⇩

 

Enosi

 

 

90 ⇩

 

Kenani

 

70 ⇩

 

Mahalalele

 

65 ⇩

Jaredi

 

162 ⇩

 

Enoki

 

65 ⇩

 

Metusela

 

187 ⇩

 

Lameki

 

182 ⇩

 

2970 B.C.E. Nowa 2970 B.C.E. NOWA wazyalwa

Mazyalani kuzwa kuli Nowa

kusikila kuli Abrahamu

Myaka iili 502 ⇩ (myaka iili 952)

 

Semu

ZAMBANGULWE 2370 B.C.E.

 

100 ⇩

 

Aripakisadi

 

35 ⇩

 

Sela

 

30 ⇩

 

Eberi

 

34 ⇩

 

Pelegi

 

30 ⇩

 

Reu

 

32 ⇩

 

Serugi

 

30 ⇩

 

Nahori

 

29 ⇩

 

Tera

 

130 ⇩

 

2018 B.C.E. Abrahamu 2018 B.C.E. ABRAHAMU wazyalwa

Kuzwa kuli Abrahamu kusikila kuli

Davida: mazyalani aali kkumi atune

Myaka iili 100 (myaka iili 911)

Izaka

60 ⇩

 

Jakobo

 

c.88 ⇩

 

Juda

 

⇩

 

Perezi

 

⇩

 

Hezironi

 

⇩

 

Ramu

 

⇩

 

Aminadabu

 

⇩

 

Nasoni

 

⇩

 

Salima

 

⇩

 

Boazi

 

⇩

 

Obedi

 

⇩

 

Jese

 

⇩

1107 B.C.E. DAVIDA wazyalwa