Amagedoni​—Hena Mmamanino Aanyika Aayoosya?

AMAGEDONI! Hena bbala eeli limupa kweezyeezya mbuli mboluna kuli lupati lunyonyooko, naa mboliya kupya julu anyika? Mabala aamwi aamu Bbaibbele, bantu balaambaamba abuzuba, mbubwenya mbuli bbala lya “Amagedoni.” Ibbala eeli lyabelesyegwa kapati kwaamba mazuba mabi aayoosya aaya kusikila bantu. Basizisobano zyamabbasikopo azipekupeku, bapa bantu muzeezo mubi mbuli lunyonyooko lubi lwankondo ya “Amagedoni” iiboola mboluya kuba. Bbala lya Amagedoni lyamvwungilizyigwa mutwaambo twakulengelela. Nekuba kuti kuli nzila zinji kujatikizya bupanduluzi bwabbala lya Amagedoni, bunji bwazyo tazyeendelani abwaamba Bbaibbele, ikuzwa bbala eeli. Alimwi tabusyi oobu mboliyiisya Bbaibbele caboola kumakani aabbala lya Amagedoni.

Mbwaanga Bbaibbele lyaamba bbala lya Amagedoni kuti liliswaangene a “mamanino a cishi,” hena tamuzumini kuti cilayandika kucimvwisya bbala lya Amagedoni cini ncolyaamba? (Mateyo 24:3, The Bible in Lenje) Alimwi hena tacikonzyi kuba camaano kuvwuntauzya mu Jwi lya Leza lyaamba camasimpe kumakani aabbala eeli, kutegwa tujane bwiinguzi bwabbala lya Amagedoni ncolyaamba akubona mboliya kumujatikizya nywebo amukwasyi wanu?

Bupanduluzi buli boobu buya kutondezya kuti muciindi cakuleta mamanino aanyika aayoosya, Amagedoni iya kuleta lukkomano kubantu balombozya kupona akuzwidilila munyika mpya. Muya kugwasyigwa akusalazyigwa kwakaambo aaka kayandika kamu Magwalo mwalanga-langa cini bbala lya Amagedoni ncolyaamba mucibalo ciccilila.

Kabbokesi/[Cifwanikiso icili apeeji 3]

INO MUYEEYA KUTI AMAGEDONI NINZI?

• Hena ninkondo yanyukkiliya?

• Hena nkunyonyooka kwanyika?

• Hena kupwayana kwanyenyezi alimwi anyika?

• Hena nkunyonyoona babi nkwayoocita Leza?