Ino Lusyomo Lwanu Muli Leza Nduyumu Buti?
Ino Lusyomo Lwanu Muli Leza Nduyumu Buti?
“Pele amusaangune kuyandaula Bwami.”—MATAYO 6:33.
1, 2. Ino nintaamo nzi musankwa umwi njaakabweza kujatikizya mulimo wakumubili, alimwi nkaambo nzi?
M USANKWA umwi wakali kuyanda kuti kagwasyilizya kapati mumbungano mwazwa. Penzi ndyaakajisi lyakali lyakuti mulimo wakwe wakumubili tiiwakali kumupa ciindi cakuti kajanika kumiswaangano lyoonse. Ino penzi eeli wakalimana buti? Wakaubya-ubya buumi bwakwe, wakacileka mulimo wakali kumupa mali manji akujana mulimo wakali kumupa ciindi cakucita milimo ya Bunakristo. Mazuba aano, tavwoli mali manji mbuli ngaakali kuvwola kaindi, pele ulacikonzya kujana ziyandika zyamukwasyi wakwe alimwi ulacikonzya kugwasyilizya mumbungano.
2 Sena mulikazyi kaambo kakapa kuti musankwa ooyo abweze ntaamo iili boobo? Ikuti nomwakali mubukkale mbwaakabede, sena muyeeya kuti nomwakaubya-ubya buumi bwanu mbuli mbwaakacita? Cilakkomanisya kuti Banakristo banji babweza ntaamo zyeelene alimwi milimo yabo itondezya lusyomo ndobajisi mucisyomezyo ca Jesu cakuti: “Amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.” (Matayo 6:33) Basyoma muli Jehova kuti abakwabilile muciindi cakusyoma nyika.—Tusimpi 3:23, 26.
3. Nkaambo nzi bamwi ncobadooneka naa ncamaano mazuba aano kubikka Bwami bwa Leza mubusena bwakusaanguna?
3 Kweelana aziindi zikatazya motubede, bamwi balakonzya kulibuzya naa kusala nkwaakacita musankwa ooyo kwakali kwamaano. Mazuba aano, bantu bamwi balipengede kapati kakuli bamwi bakkede kabotu. Bantu bakkede muzisi zitavwubide inga bayandisya kujana nzila zyakusumpula buumi bwabo. Kulubazu lumwi, bantu banji bali muzisi zivwubide balajana buyumu-yumu caboola kumakani aakuzumanana abuumi busumpukide nokuba kuti buvwubi bwacisi buyaansi, kucinca kwazyeelelo ziyandika mukunjila mulimo alimwi bababelesya bayanda kuti kababeleka canguzu alimwi kabamuka kukotoka bantu. Twalanga buyumu-yumu bujatikizyidwe mukujana ziyandika mubuumi, bamwi balakonzya kulibuzya kuti, ‘Sena ncamaano aino kusaanguna kuyandaula Bwami?’ Kutegwa mugwasyigwe kwiingula mubuzyo ooyo, amulange-lange bantu Jesu mbaakali kwaambila.
“Mutalibiliki”
4, 5. Mbuti Jesu mbwaakatondezya kuti cakali camaano kubantu ba Leza kutalibilika kujatikizya zintu zyabuzuba abuzuba?
4 Jesu wakali ku Galilaya kaambaula kunkamu yabantu bakazwa mumasena manji. (Matayo 4:25) Akati kabantu aabo mbasyoonto ibakavwubide. Cilibonya kuti banji bakalipengede. Pele Jesu wakabakulwaizya kutabikka zintu zyakumubili mubusena butaanzi, pele kuliyobweda cintu ciyandika kapati, nkokuti lubono lwakumuuya. (Matayo 6:19-21, 24) Wakati: “Mutalibiliki kubuumi bwanu, kuti, Tukalyenzi? Tukanywenzi? nikuba kumibili yanu kuti, Tukasamenzi? Sa buumi tabwiindi zilyo, awalo mubili sa tuuindi zyakusama?”—Matayo 6:25.
5 Ibunji bwabaabo bakali kuswiilila, majwi aa Jesu ayelede kuti akamvwika kuti tanaakali kugwasya. Bakalizyi kuti ikuti tiibabeleka canguzu, mikwasyi yabo ilakonzya kupenga. Nokuba boobo, Jesu wakabayeezya kujatikizya tuyuni. Tuyuni tweelede kujana cakulya aakoona abuzuba, pele Jehova ulatulanganya. Jesu alimwi wakabayeekezya Jehova mbwalanganya maluba aamusyokwe, bubotu bwalo bwiindilila bulemu boonse mbwaakajisi Solomoni. Ikuti Jehova kalanganya tuyuni alimwi amaluba, sena takaindi kutulanganya? (Matayo 6:26-30) Mbuli Jesu mbwaakaamba, myoyo yesu alimwi amibili zilayandika kwiinda cakulya ncotuula kutegwa katuba abuumi alimwi azyakusama nzyotuula kutegwa katusama. Ikuti katubelesya nguzu zyesu zyoonse kukujana buyo cakulya a azyakusama, kakunyina ciindi cicaala cakubelekela Jehova, nkokuti tatucizyi cini ncotuponena.—Mukambausi 12:13.
Kuzilanga Kabotu Zintu
6. (a) Mukuli nzi Banakristo ngobajisi? (b) Muuli ni Banakristo mobasyoma cakumaniina?
6 Masimpe, Jesu tanaakabakulwaizya bakali kumuswiilila kucileka kubeleka akulindila Leza kuti abape ziyandika zyamikwasyi yabo. Notuba tuyuni tweelede kuliyandauda zyakulya kubikkilizya acakulya catwana twatuto. Aboobo, Banakristo beelede kubeleka ikuti kabayanda kulya. Bakeelede kulanganya mikuli yamukwasyi. Babelesi Banakristo abazike bakeelede kubeleka cabunkutwe kuli basimalelo babo. (2 Ba-Tesalonika 3:10-12; 1 Timoteo 5:8; 1 Petro 2:18) Mwaapostolo Paulo lyoonse wakabeleka kali sikusuma matente kutegwa kajana mali aakuligwasya. (Incito 18:1-4; 1 Ba-Tesalonika 2:9) Nokuba boobo, Banakristo aabo tiibakasyoma mulimo wakumubili kubakwabilila. Bakasyoma muli Jehova. Akaambo kaceeco, bakali liibide mumizeezo kwalo kwatakali kucitika kuli bamwi. Sintembauzyo wakati: “Abo basyoma Jehova bali mbuli cilundu ca-Zioni, citazungaani, cikede lyoonse.”—Intembauzyo 125:1.
7. Ino muntu uutasyomi Jehova cakumaniina ulakonzya kuba amuzeezo uuli buti?
7 Uli woonse uutasyomi cakumaniina muli Jehova inga wayeeya bumbi. Bantu banji babona buvwubi kuba lukwabililo. Aboobo, bazyali bakulwaizya bana babo kusowela ciindi cinji cabukubusi bwabo kutola lwiiyo lwaatala, kabajisi muzeezo wakuti bakajane mulimo uunoobapa kuvwola mali manji. Cuusisya ncakuti, mikwasyi imwi ya Banakristo yasweekelwa kapati nkaambo bana babo bacileka kubikkila maano kuzintu zyakumuuya akutalika kubikkila maano zintu zyakumubili.
8. Ino Banakristo bazilanga buti zintu
8 Aboobo, Banakristo basongo balizyi kuti lulayo lwa Jesu lulagwasya mazuba aano mbuli mbulwakali kugwasya mumwaanda wamyaka wakusaanguna alimwi balasola kuzilanga kabotu zintu. Nokuba kuti balakonzya kusowela mawoola manji mumulimo wakumubili kutegwa balanganye mikuli yamu Magwalo, tabalekeli kuyandisya mali kubapa kuunduluzya zintu ziyandika zyakumuuya.—Mukambausi 7:12.
Alumbi Lulayo Lujatikizya Kutalibilika
9. Ino mbuti Jesu mbwabasyomezya aabo bamusyoma Jehova cakumaniina?
9 Mu Mulumbe wakwe waa Cilundu, Jesu wakakulwaizya bakali kumuswiilila kuti: “Mutalibiliki cakwaamba kuti, Tukalyenzi? Tukanywenzi? Tukasamenzi? Nkaambo nzeezi zyoonse nzibayandaula bamasi, alimwi Usowanu uuli kujulu ulizi kuti zintu ezi zyoonse zilayandwa kulindinywe.” (Matayo 6:31, 32) Elo alakulwaizya majwi aaya! Ikuti katumusyoma Jehova cakumaniina, lyoonse unakutugwasya. Nokuba boobo, majwi aa Jesu alapa kukkala ansi kuyeeya. Atuyeezya kuti, ikuti ‘twayandisya’ zintu zyakumubili, kuyeeya kwesu kulakonzya kuba mbuli “bamasi,” ibantu batali Banakristo bakasimpe.
10. Musankwa naakasikila Jesu kutegwa ajane lulayo, mbuti Jesu mbwaakayubununa ncaakali kuyandisya kapati musankwa ooyu?
10 Kuciindi cimwi, musankwa umwi uuvwubide kapati wakabuzya Jesu ncaakeelede kucita kutegwa akajane buumi butamani. Jesu wakamuyeezya ziyandika zya Mulawo walo wakacili kubeleka kuciindi eeco. Musankwa ooyo wakamusyomezya Jesu kuti: “Eyi yoonse ndaijatisya. Ino ncinzi ncincibula?” Bwiinguzi bwa Jesu bwakali kulibonya kuti tabugwasyi kubantu banji. Wakati: “Kuti koyanda kulondoka, koya ukauzye imboni zyako, ukaabile bacete, nkabela uzoojana buvubi kujulu, lino uboole kuzootobela ndime.” (Matayo 19:16-21) Musankwa uya wakaunka kauside nkaambo tanaakauyanda muzeezo wakusweekelwa buvwubi bwakwe. Nokuba kuti wakali kumuyanda Jehova, ncaakali kuyandisya kapati lwakali lubono lwakwe.
11, 12. (a) Majwi aali buti apa kuyeeya Jesu ngaakaamba kujatikizya lubono? (b) Ino mbuti imbono mbozinga zyaba cisinkilizyo kukubelekela Jehova?
11 Cakacitika eeco cakapa Jesu kwaamba cintu cimwi catakali kuyeeyelwa, kati: “Ncobeni ndamwaambila kuti nciyumu kumuntu muvubi kunjila mubwami bwakujulu. Ncitete kunkamele kunjila kuti injile mukapulo kanyeleti kwiinda kuti muntu muvubi anjile mubwami bwakujulu.” (Mateyo 19:23, 24, Ci) Sena Jesu wakaamba kuti kunyina muntu muvwubi uyoonjila mu Bwami? Peepe, nkaambo wakazumanana kwaamba kuti: “Zintu zyoonse zilakonzeka kuli-Leza.” (Matayo 19:25, 26) Masimpe, kwiinda mulugwasyo lwa Jehova bantu bamwi bakavwubide kaindi bakaba Banakristo bananike. (1 Timoteo 6:17) Nokuba boobo, kuli kaambo kamwi kamvwika kakapa kuti Jesu aambe majwi aayo aagambya. Wakali kucenjezya.
12 Ikuti muntu wayandisya kapati imbono zyakwe mbuli bwakacita musankwa uulya muvwubi, imbono zyakwe inga zyapa kuti cimukatazye kubelekela Jehova amoyo omwe. Eeci cilakonzya kuba masimpe kumuntu muvwubi kale alimwi ayooyo ‘uuyandisya kuvwuba.’ (1 Timoteo 6:9, 10) Ikusyoma kapati zintu zyakumubili kulakonzya kupa kuti muntu ‘atabikkili maano kuzintu zyakumuuya.’ (Matayo 5:3) Icitobela, ulakonzya kubona kuti taciyandiki kugwasyigwa a Jehova. (Deuteronomo 6:10-12) Ulakonzya kulangila kuti kalemekwa mumbungano. (Jakobo 2:1-4) Alimwi ulakonzya kusowela ciindi cinji kulya lubono lwakwe muciindi cakubelekela Jehova.
Amube Amuzeezo Mubotu
13. Ino muzeezo uutali kabotu uuli buti ngobakajisi bana Laodikeya?
13 Nkamu imwi yakajisi muzeezo uutali kabotu kujatikizya lubono, yakali mbungano yamumwaanda wamyaka wakusaanguna yaku Laodikeya. Jesu wakabaambila kuti: “Waamba kuti, Ndi muvubi, ndivubide lubono, taakwe cintu ncembula, pele tozi kuti ulipengede, ulisampaukide, uli mucete, uli moofu, alimwi uli acinswe.” Tiibwakali buvwubi bwabo bwakabapa kuusa kumuuya bana Laodikeya. Cakabapa kuusa cakali akaambo kakuti bakasyoma mubuvwubi muciindi cakusyoma Jehova. Akaambo kaceeci bakali kupya buyo aniini kumuuya alimwi bakeelede ‘kuswidwa’ a Jesu.—Ciyubunuzyo 3:14-17.
14. Nkaambo nzi Banakristo bana Hebrayo ncobakali kuyandika kulumbaizyigwa a Paulo?
14 Kulubazu lumwi, Paulo wakabalumbaizya Banakristo bana Hebrayo akaambo kambobakali kuzilanga zintu nobakali kupenzyegwa. Wakati: “Mwakali kubafwida luzyalo abo abakali kwaangidwe, alimwi mwakali kumweta-mweta nomwakali kunyangwa lubono lwanu, nkaambo kakuti mwakalizi kuti mulijisi lubono lumbi lubotu lutamani.” (Ba-Hebrayo 10:34) Aabo Banakristo tiibakanyonganizyigwa akusweekelwa lubono lwabo. Bakakkomana akaambo kakuti bakajatisya lubono luyandika, “lubono lumbi lubotu lutamani.” Mbuli musambazi wamucikozyanyo ca Jesu wakaaba zyoonse nzyaakajisi kutegwa ajane ngale yomwe injandisi, bakalilisungwide kuzumanana kuba abulangizi bwa Bwami ziyume zitete. (Matayo 13:45, 46) Elo bakali kuzilanga kabotu zintu!
15. Ino mbuti mukaintu Munakristo wakucisi ca Liberia mbwaakabikka ziyandika zya Bwami mubusena bwakusaanguna?
15 Ibanji mazuba aano abalo batalika kuzilanga kabotu zintu. Mucikozyanyo, ku Liberia Munakristo mukaintu uucili mwana-mwana wakatambulwa kucikolo cipati. Mucisi eeco, coolwe cili boobu cibonwa kuti nenzila yakulibambila buumi bwakumbele. Nokuba boobo, wakali mupainiya, mukambausi waciindi coonse alimwi wakatambwa kubeleka kali mupainiya waalubazu kwakaindi kaniini. Wakasala kuyandaula Bwami cakusaanguna akuzumanana kuba mumulimo waciindi coonse. Wakaunka nkwaakaambilwa kuti akabelekele, eelyo wakatalisya ziiyo zya Bbaibbele zili 21 mumyezi yotatwe. Mucizyi ooyu abamwi banji ibali mbuli nguwe basaanguna kuyandaula Bwami nokuba kuti inga caamba kubulilwa zintu zyakumubili. Ino mbuti mbobazumanana kuzilanga kabotu zintu munyika eeyi iisumpula zintu zyakumubili? Bacikonzya akaambo kakuti baba abube bunji butaliboteli. Atulange-lange bumwi bwabube oobu.
16, 17. (a) Nkaambo nzi kulibombya ncokuyandika ikuti katuyanda kusyoma Jehova? (b) Nkaambo nzi ncotweelede kuba alusyomo muzisyomezyo zya Leza?
16 Kulibombya: Ibbaibbele lyaamba kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako. Utalisongwaazyi mumeso aako omwini.” (Tusimpi 3:5-7) Ziindi zimwi nzila imwi ilakonzya kulibonya kuti ilagwasya kweelana akuyeeya kwamunyika. (Jeremiya 17:9) Nokuba boobo, Munakristo wini-wini usyoma Jehova kuti amusololele. (Intembauzyo 48:14) ‘Munzila zyakwe zyoonse’—mumakani aambungano, mulwiiyo naa mumilimo yakumubili, kulyookezya naa cintu cili coonse, cakulibombya ulayandaula lulayo lwa Jehova.—Intembauzyo 73:24.
17 Lusyomo muzisyomezyo zya Jehova: Paulo wakati: “Woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” (Ba-Hebrayo 11:6) Ikuti katudooneka naa Jehova uyoozuzikizya zisyomezyo zyakwe, kulakonzya kulibonya kuba camaano ‘kubelesya zintu zyaansi cakumaniina.’ (1 Ba-Korinto 7:31) Kulubazu lumwi, ikuti lusyomo kaluli luyumu, tuyookanza kuyandaula Bwami kusaanguna. Ino mbuti mbotunga twaba alusyomo luyumu? Tulakonzya kucita oobo kwiinda mukuba acilongwe a Jehova lyoonse, kupaila camoyo woonse alimwi akwiinda mukuba aciiyo cesu tobeni. (Intembauzyo 1:1-3; Ba-Filipi 4:6, 7; Jakobo 4:8) Mbuli Mwami Davida, tulakonzya kupaila kuti: “Ndasyoma nduwe, O Jehova; ndaamba kuti, Nduwe Leza wangu. Mbupati loko bubotu bwako.”—Intembauzyo 31:14, 19.
18, 19. (a) Mbuti bunkutwe mbobuyumya lusyomo lwesu muli Jehova? (b) Nkaambo nzi Munakristo ncayelede kulisungula kulyaaba?
18 Bunkutwe mumulimo wa Jehova: Paulo wakaswaanganya lusyomo muzisyomezyo zya Jehova abunkutwe naakalemba kuti: “Swebo tuyandisya kuti umwi aumwi wanu ajatisye kusungwaala nkukonya, kukulindila kumaninide mane do kumamanino.” (Ba-Hebrayo 6:11) Ikuti katujisi bubi mumulimo wa Jehova, uyootugwasya. Lyoonse notugwasyigwa, lusyomo lwesu mulinguwe lulayuma eelyo tulaba bantu ‘bakakatila, batazungaani.’ (1 Ba-Korinto 15:58) Lusyomo lwesu lulabukulusyigwa alimwi bulangizi bwesu bulayumizyigwa.—Ba-Efeso 3:16-19.
19 Kulyaaba: Paulo wakaleka mulimo wakali kukonzya kumupa mali manji kutegwa atobele Jesu. Cakutadooneka wakasala kabotu, nokuba kuti wakali kubulilwa zyakumubili. (1 Ba-Korinto 4:11-13) Jehova tasyomezyi buumi bubotu alimwi ziindi zimwi babelesi bwakwe balasikilwa makatazyo. Kulisungula kwesu kuubya-ubya buumi bwesu alimwi akulyaaba, kutondezya makanze eesu aakubelekela Jehova.—1 Timoteo 6:6-8.
20. Nkaambo nzi kukkazyika moyo ncokuyandika kumuntu uyandaula Bwami?
20 Kukkazyika moyo: Sikwiiya Jakobo wakakulwaizya Banakristonyina kuti: “Bakwesu, amukazike myoyo mane kusikila kukuboola kwa-Mwami.” (Jakobo 5:7) Munyika eeyi, cilakatazya kukkazyika moyo. Tuyanda kuti zintu kazyicitika cakufwambaana. Pele Paulo utukulwaizya kwiiya “baabo abayoojana ceeco icakasyomezegwa nkaambo kakusyoma akubosya moyo.” (Ba-Hebrayo 6:12) Amumulindile Jehova camoyo omwe. Buumi butamani anyika yaparadaiso, masimpe buleelede kulindilwa.
21. (a) Ino tutondezya nzi notuyandaula Bwami cakusaanguna? (b) Ncinzi ciyoobandikwa mucibalo citobela?
21 Masimpe, lulayo lwa Jesu lwakuyandaula Bwami cakusaanguna lulagwasya. Notucita boobo, tutondezya kuti masimpe tusyoma Jehova alimwi nenzila ilikke njobeelede kutola Banakristo. Nokuba boobo, Jesu alimwi wakatulaya kuzumanana “kusaanguna kuyandaula . . . bululami bwa [Leza].” Mucibalo citobela tuyoolanga-langa kukulwaizya ooko ncokuyandika mazuba aano.
Sena Inga Mwapandulula?
• Kujatikizya zintu zyakumubili, ino nkuzilanga buti zintu Jesu nkwaakatukulwaizya kuba ankuko?
• Ino ncinzi ncotwiiya kucikozyanyo ca Jesu ca nkamela akasena kanyeleti?
• Mbube buli buti bwa Bunakristo butugwasya kuyandaula Bwami bwa Leza cakusaanguna?
[Mibuzyo yaciiyo]
[Cifwanikiso icili apeeji 19]
Ibanji bakamvwa majwi aa Jesu bakalipengede
[Cifwanikiso icili apeeji 21]
Musankwa wakavwubide wakayandisya imbono kwiinda mbwaakali kumuyanda Leza
[Cifwanikiso icili apeeji 21]
Musambazi wamucikozyanyo ca Jesu wakapa zyoonse kutegwa ajane ngale injandisi
[Cifwanikiso icili apeeji 22]
Ikuti katujisi bubi mumulimo wa Jehova, uyootugwasya