Ngwani Ngomumvwida, Ngu Leza Naa Bantu?
Ngwani Ngomumvwida, Ngu Leza Naa Bantu?
“Tweelede kumvwa Leza kwiinda bantu.”—INCITO 5:29.
1. (a) Ndugwalo nzi lwamutwe wacibalo eeci? (b) Nkaambo nzi baapositolo ncobakabikkwa muntolongo?
BABETESI bana Juda bankuta mpati beelede kuti bakakalala akaambo kakuti baange bakazwa muntolongo. Aba baange bakali baapositolo ba Jesu Kristo, muntu walo nkuta mpati nsondo ziniini buyo zyakaindide ngoyakati wakeelede kujaigwa. Lino nkuta yakali libambide kubakkazyika ansi basikwiiya ba Jesu. Pele bakapaso nibakaunka kuntolongo kuti bababweze akubaleta kunkuta, bakajana nkampyayi nekuba kuti milyango yakali kkiidwe. Kumane bakapaso bakazyiba kuti baapositolo bali kutempele mu Jelusalemu, cakutayoowa kabayiisya bantu makani aamba zya Jesu Kristo, imulimo ngweena wakabapa kwaangwa. Cakutasowa ciindi bakapaso bakaunka kutempele, bababweza baapositolo babajokezya muntolongo, kumane babaleta kunkuta.—Incito 5:17-27.
2. Ncinzi mungelo ncaakabalailila baapositolo kucita?
2 Mungelo wakabaangulula baapositolo muntolongo. Hena eeci cakali kwaamba kuti taku nibakali kulangilwa kupenzyegwa alimwi? Nee. Mungelo wakacita oobo kutegwa bantu bamu Jelusalemu bakonzye kumvwa makani mabotu aamba zya Jesu Kristo. Kulailila kwamungelo kubaapositolo kwakali kwakuti ‘bazumanane kwaambila bantu boonse makani aabuumi obu.’ (Incito 5:19, 20) Bakapaso nibakaunka kutempele, bakajana kuti baapositolo baluujisi mulimo ngobakalaililwa kucita.
3, 4. (a) Nibakaambilwa kuti baleke kukambauka, ncinzi Petro a Johane ncibakaamba? (b) Mbuti baapositolo abamwi mbobakaamba?
3 Baapositolo bobilo basicamba mukukambauka, Petro a Johane bakalaangidwe kale, alimwi mupati wankuta Josefa Kayafa wakali bakasyide kuti nelilampa batakasoli kukambauka. Wakati: “Twakamukasya akumupa mulawo wakuti, tamweelede kunooiisya muzina lyamuntu ooyu [Jesu]. Pele amubone ncomwacita! Mwadumya kwiisya kwanu mu Jelusalemu yoonse.” (Milimo 5:28, Ci) Eeci tiicakamulamya Kayafa kubona Petro a Johane kuti bajokela alimwi munkuta. Nibakalaililwa kuleka kukambauka lweendo lwakusoka, baapositolo bobilo bakaingula kuti: “Na kuliluleme kumbele lya-Leza kuswiilila ndinywe kwiinda Leza, amulisalile. Nkaambo tatukonzyi swebo kutaamba nzotwakabona akumvwa.” Mbuli musinsimi wansiku Jeremiya, Petro a Johane tiibakali kukonzya kuuleka mulimo wabo wakukambauka.—Incito 4:18-20; Jeremiya 20:9.
4 Aciindi aawa, tali buyo Petro a Johane, pele boonse baapositolo kubikkilizya awakasalwa caino-ino Matiya bakaba aciindi munkuta cakulyaambilida mpobaimvwi. (Incito 1:21-26) Nibakaambilwa kuti baleke kukambauka, cabusicamba Petro a Johane bakati: “Tuleelede kumvwa Leza kwiinda bantu.”—Incito 5:29.
Kumvwida Leza naa Bantu?
5, 6. Nkaambo nzi baapositolo tiibakakumvwida kulailila kwankuta?
5 Baapositolo bakali bantu ibakali kuccilila mulawo batakali kukaka cikake-kake caamba nkuta. Nekuba boobo, taku muntu nekuba kuti ujisi nguzu zili buti uupedwe nguzu zyakwaambila bantu kutamvwida mulawo wa Leza. Jehova ngo “Mupatikampatila atala anyika yoonse.” (Intembauzyo 83:18) Takuli buyo kuti ‘nguubeteka nyika yoonse,’ pele alimwi Ngosikupa Milawo Mupati alimwi Mwami uutamani. Kufwumbwa mulawo wankuta uusola kunyonganya mulawo wa Leza uuli woonse, ngwabuyo kuli Leza.—Matalikilo 18:25; Isaya 33:22.
6 Aaya makani azuminizyigwa abantu bamwi basyaabupampu bamilawo. Mucikozyanyo, William Blackstone similawo mukuwa wamumwaanda wamyaka wa 18, wakalemba kuti taku mulawo wamuntu weelede kulekelwa kukazyanya “amulawo uulembedwe” uujanwa mu Bbaibbele. Aboobo Nkuta Mpati yakausotoka mulawo niya kalailila baapositolo kuti baleke kukambauka. Baapositolo tiibakali kukonzya kukumvwida kulailila kwankuta.
7. Nkaambo nzi mulimo wakukambauka ncowakabakalazya bapaizi bapati?
7 Kutajoka munsi kwabaapositolo kwakuyanda kukambauka kwakabakalazya bapaizi bapati. Bapaizi bapati bamwi kubikkilizya a Kayafa kumugama, bakali ba Saduki, batakali kusyoma mububuke. (Incito 4:1, 2; 5:17) Pele baapositolo bakazumanana kwaamba kuti Jesu wakabusyigwa. Kunze lyaboobo, bamwi bapaizi bapati bakasika aalamfwu mumakani aaya kutegwa bayandwe abweendelezi bwabana Roma. Jesu naakali kubetekwa, Pilato wakabapa ciindi cakuti bazumine kuti Jesu mwami wabo, pele bapaizi bapati bakakaka, limwi bakasika nkoboongolola kuti: “Tatujisi Mwami pele Kaisara walo.” (Johane 19:15) * Takuli kuti baapositolo bakali kwaamba buyo makani aakusinizya kuti Jesu wakabusyigwa, pele alimwi bakali kuyiisya kuti kunze lyazina lya Jesu, “takukwe zina limbi ansi ilipegwa bantu, ndotweelede kufutulwa andilyo.” (Incito 2:36; 4:12) Ikuti bantu batalika kulanga kuli Jesu wakabusyigwa kuba Musololi wabo, bapaizi bakalibilika kuti bana Roma balakonzya kuboola eelyo basololi baba Juda balakonzya ‘kunyangwa busena bwabo acisi cabo.’—Johane 11:48.
8. Ndulayo nzi lubotu Gamaliyeli ndwaakapa Nkuta Mpati?
8 Buumi bwakumpela bwabaapositolo ba Jesu Kristo bwakali kulibonya kutaba kabotu. Babetesi ba Nkuta Mpati bakalikanzide kubajaya. (Incito 5:33) Nekuba boobo, izintu zyakacinca cakutayeeyelwa. Gamaliyeli Simulawo wakaimikila akubacenjezya beenzyinyina kuti bataazwidi nzunzu makani aaya. Cabusongo wakaamba kuti, ikuti: “Kwiisya oku amulimo oyu anooli ngwabantu ulamwaika. Kwalo na nguwa-Leza, tamukookonzya kuumwaya.” Kumane Gamaliyeli wakaamba kaambo akambi kapati kakuti, “ambweni mulajanwa kuti mulwanya Leza.”—Incito 5:34, 38, 39.
9. Ncinzi citondezya kuti mulimo wabaapositolo wakazwa kuli Leza?
9 Cakutayeeyelwa, nkuta yakaluzumina lulayo lwa Gamaliyeli. Ba Nkuta Mpati “bakaita baapostolo, babauma, babalailila kuti batacaambi muzina lya-Jesu, babaleka. Aboobo bakazwa.” Nekuba boobo, baapositolo tiibakaba bantu bakandu, cabusicamba bakali zumide kuccilila kulailila kwamungelo kwakuti bakambauke. Nibakaangululwa, “mazuba oonse [baapositolo] tabakalekede kwiisya akukambauka muntempele amumaanda kuti Jesu ngo-Kristo.” (Incito 5:40, 42) Jehova wakaulongezya mulimo wabo. Kusikila aali? “Majwi aa Leza akamwaika koonse-koonse, awalo mweelwe wabasyomi wakali kuya buvula akukomena mu Jelusalemu.” Alimwi “abalo bapaizi banji bakasyoma.” (Milimo 6:7, Ci) Alimwi kulibonya kuti eeco cakabanyonganya bapaizi bapati! Cakalisondolola kuti: Mulimo wabaapositolo masimpe wakazwa kuli Leza.
Balwana Leza Tabakonzyi Kuzwidilila
10. Kweelana akuyeeya kwabuntu, ncinzi cakali kupa kuti Kayafa ayeeye kuti ulikwabilidwe acuuno, pele nkaambo nzi kuyeeya kwakwe kuli boobu ncokwatakali kabotu?
10 Mumwaanda wamyaka wakutaanguna bapaizi bapati baba Juda bakali kubikkwa azyuuno abweendelezi bwabana Roma. Josefa Kayafa muvwubi wakabikkwa acuuno cabwami a Valerius Gratus, alimwi wakakkala ciindi cilamfwu kwiinda mbobakakkala bapaizi bapati bakamutaangunina. Kulibonya kuti Kayafa wakayeeya kuti wakakkala acuuno akaambo kaluzyibo lwakwe alimwi acilongwe ncaakajisi a Pilato muciindi cakuyeeya kuti ngu Leza wakapa kuti zintu zyeende kabotu. Ooku kusyoma mubantu nkwaakacita, tiikwakali kabotu. Kwiinde buyo myaka yotatwe baapositolo nibakatolwa ku Nkuta Mpati, Kayafa wakalekwa kuyandwa abweendelezi bwabana Roma, alimwi bakamusetula acuuno eelyo wakaleka kuba mupaizi mupati.
11. Ncinzi cakacitika kuli Ponto Pilato abulelo bwaba Juda, alimwi ncinzi ncomukonzya kwiiya kumakani aaya?
11 Kugusyigwa kwa Kayafa acuuno kwakazwa kuli Lucius Vitellius ngwaakali kuccilila Pilato mweendelezi wa Asuri alimwi Pilato mulongwe wa Kayafa tanaakali kukonzya kumwiiminina. Kwiinde buyo mwaka omwe kuzwa Kayafa naakagusyigwa acuuno, awalo Pilato kumugama wakagusyigwa acuuno alimwi wakajolwa ku Roma kuti azyikwiingule mibuzyo iinyonganya bongo. Kubasololi baba Juda bakasyoma muli Kaisara, bana Roma bakabanyanga ‘busena bwabo acisi cabo.’ Eeci cakacitika mumwaka wa 70 C.E. basikalumamba bana Roma nibakanyonyoona munzi wa Jelusalemu cakumaniina, kubikkilizya atempele a Nkuta Mpati. Elo majwi aasintembauzyo akaba aamasimpe twalanga cakacitika naakati: “Mutasyomi bami, na muntu waansi uutagwasyi.”—Johane 11:48; Intembauzyo 146:3.
12. Mbuti kubikkwa kwa Jesu acuuno mbokutondezya kuti kumvwida Leza nenzila yabusongo?
12 Kwiindana abantu balya maila, Leza wakabikka Jesu Kristo wakabusyigwa kuba Mupaizi Mupati watempele lipati lyakumuuya. Taku muntu uukonzya kukulesya kubikkwa ooku. Masimpe Jesu “tajisi muntu uunga ulakala mucibaka cabupaizi bwakwe.” (Ba-Hebrayo 2:9; 7:17, 24; 9:11) Alimwi Leza wakamubikka Jesu kuba Mubetesi wabaumi abafwide. (1 Petro 4:5) Kwiinda munguzu nzyapedwe, Jesu uya kubona naa Josefa Kayafa a Ponto Pilato inga beelela kubusyigwa.—Matayo 23:33; Incito 24:15.
Basikwaambilizya Bwami Bamazuba Aano Ibatayoowi
13. Mulimo nzi mazuba aano walibonya kuti uzwa kubantu, alimwi mulimo nzi uulibonya kuti uzwa kuli Leza? Mbuti mbomuzyi?
13 Mazuba aano mbweena ambocakabede mumwaanda wamyaka wakutaanguna, ‘balwana Leza’ bali banji lyoonse. (Incito 5:39) Mucikozyanyo, Bakamboni ba Jehova mucisi ca Germany nibakakaka kumulemeka Adolf Hitler kuti ngo Musololi wabo, Hitler wakalumbila kuti ulabamana kubajaya. (Matayo 23:10) Nkamu ya Hitler yakali kukonzya kubajaya Bakamboni ba Jehova. Nkamu ya Nazi yakazwidilila ikwaanga zyuulu-zyuulu zya Bakamboni akubatola munkambi. Alimwi bakakonzya kubajaya Bakamboni bamwi. Pele ba Nazi bakaalilwa kujaya cikonke ca Bakamboni icakukomba buyo Leza alikke, alimwi bakaalilwa kubajaya boonse babelesi ba Leza. Mulimo wa Banakristo aaba, wakazyila kuli Leza ikutali kumuntu, alimwi mulimo wa Leza taukonzyi kwiimikwa. Kwiinde myaka iili 60, ibasyomeka ibakafwutuka munkambi ya Hitler asunu bacimubelekela Jehova ‘amoyo wabo woonse, amuuya wabo woonse amiyeeyo yabo yoonse,’ kakuli Hitler ankamu yakwe ya Nazi bakazita.—Matayo 22:37.
14. (a) Nkusoleka kuli buti basikukazya nkobacita kutegwa batyompye babelesi ba Leza, alimwi ncinzi caccilila? (b) Hena kusoleka kuli boobu kuna kubanyonganya bantu ba Leza kukabe akutamani? (Ba-Hebrayo 13:5, 6)
14 Kuzwa ciindi ba Nazi nibakali kulwana Bakamboni, abamwi bantu banjila munkondo yakulwana Jehova abantu bakwe, pele tiibazwidilila. Mumasi manji ku Europe, basizyikombelo basilweeno abasitwaambo twacisi, babapa zina Bakamboni ba Jehova lyakuti ‘nkakamu kamaseseke kayoosya,’ mbweena ambocakabede ku Banakristo bamumwaanda wamyaka wakutaanguna. (Incito 28:22) Bwini mbwakuti, kabunga ka Nkuta ya Makuwa Iibona Lwaanguluko Lwabantu yabona kuti Bakamboni ba Jehova ncikombelo, ikutali kakamu kamaseseke. Cakutadooneka basikukazya balizyi nkuta mboyakaamba. Pele nekuba boobo bacuujisi kubabejekezya Bakamboni. Akaambo kakutabaamba bwini mbobabede, bamwi Banakristo aaba baimikwa milimo. Bana ba Bakamboni bapenzyegwa muzyikolo. Bamukamwini mayake ibayoosya bacijaya cilongwe ncobakapangenyi a Bakamboni cakubelesya mayake aabo mwalo mubali kuswaanganina kwamyaka minji. Alimwi munzila zimwi, babelesi bamfwulumende basika antaamu yakubaima zitupa akaambo kakuti Mbaakamboni ba Jehova. Nekuba boobo, Bakamboni tabazungaani pe.
15, 16. Mbuti Bakamboni ba Jehova ku France mbobacita kukukazyigwa kumulimo wabo wa Bunakristo, alimwi nkaambo nzi ncobataleki kukambauka?
15 Mucikozyanyo, mucisi ca France bantu banji balilomenyi. Nekuba boobo, basikukazya bali mbobabede babikka mulawo kutegwa mulimo wa Bwami uye ansi. Mbuti Bakamboni ba Jehova mbobacita mucisi eeco? Baba basungu mumuunda ikwiinda mbobakali kucita kaindi, alimwi balongezyegwa cakuti boola ubone. (Jakobo 4:7) Mubuti? Mumyezi buyo iili cisambomwe, ziiyo zya Bbaibbele zyaaŋanda zyavwula kusika amweelwe wa 33 pesenti. Kulibonya kuti tacimoonyi ŋonzi Daibolosi kukalala kwalo abona babombe moyo mu France nkobazumina makani mabotu. (Ciyubunuzyo 12:17) Banakristoma mu France balisinizyide kuti majwi aamusinsimi Isaya aya kuba aamasimpe kuli mbabo aakuti: “Taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu.”—Isaya 54:17.
16 Bakamboni ba Jehova tabakukkomanini kupenzyegwa. Pele akaambo kakumvwida kulailila kwa Leza kupedwe ku Banakristo boonse, tabakonzyi alimwi tabakaleki kwaamba zintu nzyobakamvwa. Balasoleka kuba bana bacisi bali kabotu. Aboobo ikuti kwajanwa kuti kuli kukwelana kwamulawo wa Leza awabantu, beelede kumvwida Leza.
Mutabayoowi
17. (a) Nkaambo nzi basinkondoma ncobateelede kuyoogwa? (b) Mbuti mbotweelede kubabona basikutupenzya?
17 Basinkondoma bali muntenda iitaambiki. Balwana Leza. Aboobo, kweelana akulailila kwa Jesu, muciindi cakubayoowa, tulabapailila aabo batupenzya. (Matayo 5:44) Tupaila kuti, ikuti naa balamukazya Leza akaambo kakutazyiba mbuli bwakali Saulu waku Tarso, Jehova cabuuya uya kwaajalula meso aabo kukasimpe. (2 Ba-Korinto 4:4) Saulu iwakazyi kuba Paulu mwaapositolo Munakristo alimwi wakapenzyegwa cakuzwa munzila abweendelezi bwamazuba aayo ngaakali kupona. Nekuba boobo, wakazumanana kubayeekezya basyominyina “kuti kabanga kabalitesya kubabetesi akumami, kabacita coonse ncobaambilwa kulimbabo, akucita cintu ciluzi coonse. Batanoosampaula muntu pe, batabi bandwane, pele ababe batontozi, akuba babombe-moyo kubantu boonse [nibabapenzya].” (Tito 3:1, 2) Bakamboni ba Jehova mu France alimwi anyika yoonse balasoleka kuluccilila lulayo oolu.
18. (a) Muunzila nzi Jehova mwakonzya kwaangulula bantu bakwe? (b) Ncinzi cikonzya kuccilila?
18 Leza wakaambila musinsimi Jeremiya kuti: “Ndi ayebo, nzookuvuna.” (Jeremiya 1:8) Mbuti mbwanga Jehova sunu watuvwuna kupenzi lyakupenzyegwa? Ulakonzya kupa kuti kube mubetesi uuli kabotu mbuli bwakali Gamaliyeli. Ambweni ulakonzya kubona kwaamba kuti nkume-nkume iikatazya kapati yanjililwa busena ankume-nkume iijisi luzyalo. Aabona, Jehova ulakonzya kulekela kuti kupenzyegwa kuzumanane kubantu bakwe. (2 Timoteo 3:12) Ikuti Leza walekela kuti tupenzyegwe, lyoonse uya kutupa nguzu kutegwa tukonzye kuliyumya. (1 Ba-Korinto 10:13) Kufwumbwa Leza ncakonzya kulekela, tatudooneki ciya kuccilila: Aabo balwana bantu ba Leza, balwana Leza, alimwi ibalwana Leza tabakazwidilili.
19. Ndugwalo nzi lwamwaka wa 2006, alimwi nkaambo nzi ncolweelela?
19 Jesu wakabaambila basikwiiya bakwe kuti beelede kukulangila kupenzyegwa. (John 16:33) Kweelana akaambo aaka, majwi aalembedwe ku Incito 5:29 ngaaciindi ceelede aakuti: “Tweelede kumvwa Leza kwiinda bantu.” Akaambo kakaambo aaka, aya majwi aaumbulizya, asalwa kuba lugwalo lwamwaka wa 2006 lwa Bakamboni ba Jehova. Aabe makanze eesu imwaka uuno alimwi kukabe akutamani aakumvwida Leza kwiinda bantu ziyume zitete!
Bupanduluzi buyungizidwe
^ munc. 7 “Kaisara” walo bapaizi bapati ngobakali kulumbaizya caantangalala buzuba oobo, wakali Muleli muna Roma simasampu Tiberiyo sikuupaupa ameso alimwi mujayi. Alimwi Tiberiyo wakazyibidwe kuti mmuntu uutalilemeki caboola kumakani aakoonana.—Daniele 11:15, 21.
Hena Inga Mwaingula?
• Ncikozyanyo nzi cikulwaizya ncobakatusiila baapositolo twalanga mbobakakulwana kupenzyegwa?
• Nkaambo nzi lyoonse ncotweelede kumvwida Leza kwiinda bantu?
• Ngwani mubwini ngobalwana basikutukazya?
• Ncinzi ciccilila ncotukonzya kulangila kuli baabo baliyumya kukupenzyegwa?
[Mibuzyo yaciiyo]
Majwi aakwelelezya sikubala aali apeeji 7]
Lugwalo lwamwaka wa 2006 lunakuli lwakuti: “Tuleelede kumvwa Leza kwiinda bantu.” —Incito 5:29
[Cifwanikiso icili apeeji 3]
“Tuleelede kumvwa Leza kwiinda bantu”
[Cifwanikiso icili apeeji 5]
Kayafa wakasyoma bantu muciindi cakusyoma Leza