Kuyobolola Zintu zya Kujulu Azintu ya Ansi

“Nkweelana aceeco ncaakayanda . . . kuyobolola zintu zyoonse alimwi muli Kristo, izintu zya kujulu alimwi azintu zya ansi.”—BA-EFESO 1:9, 10, NW.

1. Ino “eeco ncaakayanda” Jehova kujatikizya julu anyika ncinzi?

LUUMUNO KOONSE-KOONSE! Aaya ngamakanze mabotu aa Jehova, “Leza waluumuno.” (Ba-Hebrayo 13:20) Wakasololela imwaapostolo Paulo kulemba kuti, “eeco ncaakayanda” nca “kuyobolola zintu zyoonse alimwi muli Kristo, izintu zya kujulu alimwi azintu zya ansi.” (Ba-Efeso 1:9, 10, NW) Ino ncinzi cini icaambwa abbala lisanduludwe kuti ‘kuyobolola alimwi’ mukapango aaka? Haabupampu mu Bbaibbele J. B. Lightfoot waamba kuti: “Ikaambo aaka kaamba zya kukamantana kwa bubumbo boonse, bwalo bunoonyina cintu cinyonganya pele mwalo oomo zibeela zyoonse mozinooyeeme alimwi akukamantana muli Kristo. Cibi alufwu, buumba akukakilwa kucita zintu kubikkilizya akupenga, ziyoomana.”

“Izintu zya Kujulu”

2. Ino “izintu zya kujulu” ziyandika kuyobololwa mbaani?

² Imwaapostolo Petro wakabwaamba bulangizi mbobajisi Banakristo naakalemba kuti: “Swebo tulangila ijulu ipya anyika impya, mbubonya mbuli mbwaakatusyomezya. Mulinzizyo momukala bululami.” (2 Petro 3:13) “Ijulu ipya” lyakasyomezyegwa aawa lyaamba bweendelezi bupya, Bwami bwa Mesiya. “Izintu zya kujulu” zyaambwa a Paulo mulugwalo ndwaakalembela ba Efeso zyeelede kuyobololwa “muli Kristo.” Mmweelwe uugaminide wabantu bakasalwa kuyoolela a Kristo kujulu. (1 Petro 1:3, 4) Aaba Banakristo bananike ibali 144,000 “bakanununwa kuzwa ansi,” “[baka]nununwa akati kabantu,” kutegwa bakalele antoomwe a Jesu mu Bwami bwakwe bwakujulu.—Ciyubunuzyo 5:9, 10; 14:3, 4; 2 Ba-Korinto 1:21; Ba-Efeso 1:11; 3:6.

3. Mbuti mbokunga kwaambwa kuti ibananike ‘balikkede kujulu’ nokuba kuti bacili anyika?

³ Banakristo bananike balazyalwa alimwi kwiinda mumuuya uusalala kutegwa babe bana ba Jehova bakumuuya. (Johane 1:12, 13; 3:5-7) Kwiinda mukubwezyegwa a Jehova kabali “bana,” balaba banyina ba Jesu. (Ba-Roma 8:15; Ba-Efeso 1:5) Aboobo, nokuba kuti bacili anyika, baambwa kuti ‘balisumpwidwe antoomwe akukkazikwa kujulu muli Kristo Jesu.’ (Ba-Efeso 1:3; 2:6) Bali azyuuno zyakumuuya eezyi zisumpwidwe akaambo kakuti bakabikkilwa “citondezyo, nkukuti Muuya Uusalala ngu[ba]kasyomezyegwa kale. Oyu Muuya nguwenya ncecitondezyo calukono [lwabo]” cibambilidwe mbabo kujulu. (Ba-Efeso 1:13, 14; Ba-Kolose 1:5) Aboobo eezyi ‘nzyezintu zya kujulu,’ zyalo mweelwe wazyo wakabikkilwa limwi a Jehova uyandika kuyobololwa.

Kuyobolola Kwatalika

4. Ndilili alimwi mbuti kuyobololwa kwa “zintu zya kujulu” nokwakatalika?

⁴ Kweelana a “bweendelezi” naa nzila mbweendelezya zintu Jehova, kuyobololwa kwa “zintu zya kujulu” kwakali kuyootalika “caakusika buyo ciindi ceelede.” (Ba-Efeso 1:10, NW) Ciindi eeco cakasika lya Pentekoste 33 C.E. Buzuba oobo, muuya uusalala wakatilwa ali baapostolo ankamu yabasikwiiya, baalumi abamakaintu. (Incito 1:13-15; 2:1-4) Eeci cakapa bumboni bwakuti cizuminano cipya cakalitalikide kubeleka, imatalikilo aambungano ya Bunakristo alimwi amusyobo mupya waba Israyeli bakumuuya, “ba-Israyeli  ba-Leza.”—Ba-Galatiya 6:16; Ba-Hebrayo 9:15; 12:23, 24.

5. Ino Jehova wakalengela nzi “cisi” cipya kuti cinjilile busena ba Israyeli banyama?

⁵ Imulawo wacizuminano wakapanganwa abana Israyeli banyama kunyina nowakapa kuti kube “cisi cabapaizi, musyobo uusalalisya” walo wakali kuyoolela kujulu kukabe kutamani. (Kulonga 19:5, 6) Jesu wakaambila basololi bacikombelo caba Juda kuti: “Bwami bwa-Leza buzoonyanzigwa kulindinywe, buzoopegwa musyobo umbi uuzyala micelo yabo.” (Matayo 21:43) Cisi eeco, Israyeli wakumuuya, cibambidwe a Banakristo bananike bakanjizyigwa mucizuminano cipya. Kuli mbabo, imwaapostolo Petro wakalemba kuti: “Nywebo muli musyobo musale, bapaizi bami, cisi cisalala, bantu bavubidwe kuli-Leza kuti mukatondezye milimo iitembaulika yayooyo uwakamwiita kuzwa mumudima akumunjizya mumumuni wakwe uugambya. Kalekale teemwakali cisi, pele sunu muli cisi ca-Leza.” (1 Petro 2:9, 10) Ba Israyeli banyama kunyina nobakacili bantu ba Jehova bacizuminano. (Ba-Hebrayo 8:7-13) Kweelana a Jesu mbwaakasinsima, icoolwe cakuba cibeela ca Bwami bwa Mesiya cakanyangwa kuli mbabo akupegwa kuli ba 144,000 ba Israyeli bakumuuya.—Ciyubunuzyo 7:4-8.

Kunjizyigwa mu Cizuminano ca Bwami

6, 7. Ncizuminano nzi cilibedelede Jesu ncaakabamba abanyina bazyedwe amuuya, alimwi ino eeco caamba nzi kuli mbabo?

⁶ Masiku Jesu naakatalisya Ciibalusyo calufwu lwakwe, wakaambila baapostolo bakwe basyomeka kuti: “Nywebo ndinywe mwandiiminina mumapenzi aangu, eno ndamubika bwami mbubonya Taata mbwaakandibika, kuti mukalye akunywa atafule lyangu mubwami bwangu, alimwi muyookala azyuuno zyabwami akubeteka misyobo iili kumi ayobile ya-Israyeli.” (Luka 22:28-30) Aawa Jesu wakali kwaamba cizuminano cilibedelede ncaakabambide abanyina bazyedwe amuuya ibali 144,000, aabo ibakali kuyoozumanana ‘kusyomeka mane do kusikila kulufwu’ alimwi akuba baabo ‘bazunda.’—Ciyubunuzyo 2:10; 3:21.

⁷ Aabo bankamu eeyi iigaminide balatula ansi bulangizi boonse bwakupona anyika kabali amubili wanyama abulowa. Bayoolela antoomwe a Kristo kujulu, kabakkede azyuuno kubeteka bantunsi. (Ciyubunuzyo 20:4, 6) Lino atulange-lange aambi magwalo aamba buyo bananike aaba alimwi aatondezya iba “mbelele zimwi” ncobatalidi akunywa zitondezyo zya Ciibalusyo.—Johane 10:16.

8. Ncinzi bananike ncobatondezya nobalya mukamu? (Amubone kabbokesi apeeji 15.)

⁸ Ibananike balapenga mbuli bwakapenga Kristo alimwi balilisungude kufwa mbuli mbwaakafwa. Kali umwi wankamu eeyo, Paulo wakaamba kuti wakalilibambilide kulyaaba munzila iili yoonse kutegwa ‘ajane Kristo akuyandisya kumuziba anguzu zyabubuke bwakwe alumvwanano lwamacise aakwe.’ Masimpe, Paulo wakalilibambilide kulyaaba ‘kulufwu mbuli ndwaakafwa.’ (Ba-Filipi 3:8, 10) Banakristo bananike banji baliyumya mumubili wabo wanyama “kujayigwa kwa-Jesu.”—2 Ba-Korinto 4:10.

9. Mubili uuli wiimininwa amukamu wa Ciibalusyo?

⁹ Jesu naakali kutalisya Mulalilo wa Mwami wakati: “Ngooyu mubili wangu.” (Marko 14:22) Wakali kwaamba mubili wakwe wini, walo wakali afwaafwi kuumwa akuzwa bulowa. Mukamu uunyina bumena wakali citondezyo ceelela camubili ooyo. Nkaambo nzi? Nkaambo kakuti mu Bbaibbele, bumena bulakonzya kwiiminina cibi naa bubi. (Matayo 16:4, 11, 12; 1 Ba-Korinto  5:6-8) Jesu wakalilondokede alimwi mubili wakwe wanyama wakanyina cibi. Wakali kuyootuula mubili ooyo uulondokede kauli mulungo. (Ba-Hebrayo 7:26; 1 Johane 2:2) Ikucita boobo kwakali kuyoogwasya Banakristo boonse basyomeka, aabo bajisi bulangizi bwakuyoopona kujulu naa anyika muparadaiso mane kukabe kutamani.—Johane 6:51.

10. Muunzila nzi aabo ibanywa waini wa Ciibalusyo ‘mobaswaana abulowa bwa Kristo’?

¹⁰ Kujatikizya waini Banakristo bananike ngobanywa lya Ciibalusyo, Paulo wakalemba kuti: “Sa kanywido kakulumba nkotulumba takeensi kaluswanaano lwabulowa bwa-Kristo?” (1 Ba-Korinto 10:16) Muunzila nzi aabo ibanywa waini ‘mobaswaana abulowa bwa Kristo’? Tabatoli lubazu mukupa cituuzyo cacinunuzyo, mbwaanga abalo bayandika kunununwa. Kwiinda mulusyomo ndobajisi munguzu zyakunununa zyabulowa bwa Kristo, zibi zyabo zilalekelelwa alimwi baambwa kuti mbalulami akuti bayoopona kujulu. (Ba-Roma 5:8, 9; Tito 3:4-7) Nkwiinda mubulowa bwa Kristo bwakatilwa basikulelanyina a Kristo ibali 144,000 ‘mobasalazigwa,’ kubikkwa ambali, kusanzyigwa cibi kutegwa babe “basalali.” (Ba-Hebrayo 10:29; Daniele 7:18, 27; Ba-Efeso 2:19) Inzya, nkwiinda mubulowa bwakwe bwakatilwa Kristo “[mwaakatufwutula] kuli-Leza . . . swebo tobantu bamisyobo yoonse amilaka yoonse amikowa yoonse, azisi zyoonse, akutubika mbuli bami abapaizi ba-Leza wesu, nkabela tuyooendelezya ansi.”—Ciyubunuzyo 5:9, 10.

11. Kwiinda mukunywa waini wa Ciibalusyo, ino bananike batondezya nzi?

¹¹ Jesu naakatalisya Ciibalusyo calufwu lwakwe, wakatambika nkapu ya waini kubaapostolo bakwe basyomeka akwaamba kuti: “Amunywide mulinkako nyoonse, nkaambo mboobu bulowa bwangu bwamulongo butililwa bantu banji kuti balekelelwe milandu yabo.” (Matayo 26:27, 28) Mbubwenya bulowa bwaŋombe ampongo mbobwakali kusinizya Mulawo wacizuminano akati ka Leza a cisi ca Israyeli, bulowa bwa Jesu bwakasinizya cizuminano cipya eeco Jehova ncaakali kuyoobamba aba Israyeli bakumuuya, kutalikila lya Pentekoste 33 C.E. (Kulonga 24:5-8; Luka 22:20; Ba-Hebrayo 9:14, 15) Kwiinda mukunywa waini walo wiiminina “bulowa . . . bwamulongo,” ibananike batondezya  kuti banjizyigwa mucizuminano cipya akuti balagwasyigwa ancico.

12. Ino mbuti bananike mbobabbapatizyigwa mulufwu lwa Kristo?

¹² Ibananike alimwi balaibalusyigwa zyacintu cimwi. Jesu wakaambila basikwiiya bakwe basyomeka kuti: “Mucinywido munywida mebo, muyoonywida mumonya, alwalo lubapatizyo ndwembapatizigwa, muyoobapatizigwa ndulonya.” (Marko 10:38, 39) Imwaapostolo Paulo kumbele wakaamba Banakristo kuti ‘bakabbapatizyigwa mulufwu lwa Kristo.’ (Ba-Roma 6:3) Ibananike bapona buumi bwakulyaaba. Lufwu lwabo ndwakulyaaba mukuti balatula ansi bulangizi boonse bwakupona kukabe kutamani anyika. Ikubbapatizyigwa kwa Banakristo bananike aaba mulufwu lwa Kristo kulamanizyigwa nobafwa cakusyomeka akubusyigwa kabali zilenge zyamuuya “[k]uyooendelezya” a Kristo kujulu.—2 Timoteo 2:10-12; Ba-Roma 6:5; 1 Ba-Korinto 15:42-44, 50.

Ikulya Akunywa Zitondezyo

13. Ino nkaambo nzi aabo ibajisi bulangizi bwakuyoopona anyika ncobatalidi akunywa zitondezyo zya Ciibalusyo, pele nkaambo nzi ncobajanika ku Ciibalusyo?

¹³ Mbwaanga ikulya mukamu akunywa waini wiinzigwa lya Ciibalusyo kulabikkilizya zyoonse eezyi, nkokuti inga tacili kabotu kuli baabo bajisi bulangizi bwakuyoopona anyika ikulya akunywa. Aabo bajisi bulangizi bwakupona anyika balizyi beni kuti tabali cibeela camubili wa Kristo, alimwi tabali mucizuminano cipya eeco Jehova ncaakabamba abaabo ibayoolela a Jesu Kristo. Mbwaanga “cinywido” ciiminina cizuminano cipya, balikke aabo ibali mucizuminano cipya mbabalya akunywa zitondezyo. Aabo ibajisi bulangizi bwakuyoopona kukabe kutamani kabali bantu balondokede anyika mubulelo bwa Bwami, kunyina nobabbapatizyigwa mulufwu lwa Jesu alimwi kunyina nobatambwa kuyoolela anguwe kujulu. Ikuti naa balya akunywa zitondezyo, cilakonzya kutondezya cimwi cintu citaluzi kujatikizya mbabo. Aboobo, tabalyi naa kunywa, pele balajanika a Ciibalusyo kabali basikweebelela buyo. Balalumba kuzintu zyoonse Jehova nzyacita kwiinda mu Mwana wakwe, kubikkilizya akulekelela nkwacita kwiinda mubulowa bwa Kristo bwakatilwa.

14. Ino mbuti bananike mbobayumizyigwa kumuuya kwiinda mukulya mukamu akunywa waini?

¹⁴ Ikugwalwa kwamamanino kwamweelwe musyoonto wa Banakristo ibakaitwa kuyoolela a Kristo kujulu kuyaabulondelela kumana. Kusikila kumamanino aabuumi bwabo anyika, bwalo mbobaya kutuula, ibananike balayumizyigwa kumuuya kwiinda mukulya akunywa zitondezyo zya Ciibalusyo. Balikamantene a Bakamboninyina bananike kabali zibeela zya mubili wa Kristo. Ikulya kwabo mukamu akunywa waini wacitondezyo kubaibalusya mukuli ngobajisi wakuzumanana kusyomeka kusikila kulufwu.—2 Petro 1:10, 11.

Kuyobolola “Zintu zya Ansi”

15. Ino mbaani bayobololwa antoomwe a Banakristo bananike?

¹⁵ Kutalikila muma 1930, mweelwe munji waba “mbelele zimwi,” aabo ibatali ba “katanga kaniini” alimwi bajisi bulangizi bwakuyoopona kukabe kutamani anyika, balabeleka antoomwe abananike. (Johane 10:16; Luka 12:32; Zekariya 8:23) Bantu aaba, baba beenzinyina basyomeka babanyina ba Kristo, ikubagwasya kukambauka “aya Makani Mabotu aa-Bwami” kuti abe bumboni kubantu boonse. (Matayo 24:14; 25:40) Kwiinda mukucita boobo, balijisi coolwe cakuyooyendelezyegwa kabotu a Kristo kabali “mbelele” zyakwe, kabali “kululyo” lwakwe aakuboola  kubeteka masi. (Matayo 25:33-36, 46) Kwiinda mukuba alusyomo mubulowa bwa Kristo, babamba “inkamu impati,” ibayoofwutuka “mapenzi . . . mapati.”—Ciyubunuzyo 7:9-14.

16. Ino mbaani “zintu zya ansi” mboziyoobikkilizya alimwi mbuti boonse aaba mbobayooba acoolwe cakuba “bana ba-Leza”?

¹⁶ Kugwalwa kwabasyeede ba 144,000 kwaakusika kumamanino, “myuuwo” yalunyonyooko iyoolekezyegwa abukkale bubyaabi bwa Saatani anyika. (Ciyubunuzyo 7:1-4) Mubulelo bwa Myaka Iili Cuulu bwa Kristo abasikulelanyina, inkamu mpati iyoosanganwa abantu batakonzyi kubalwa ibayoobusyigwa. (Ciyubunuzyo 20:12, 13) Aaba bayooba acoolwe cakupona anyika kukabe kutamani kabali balelwa ba Mwami Mesiya, Kristo Jesu. Kumamanino aa Bulelo bwa Myaka Iili Cuulu, “zintu zya ansi” zyoonse ziyoosunkwa camamanino. Aabo ibayoosyomeka bayooba “bana ba-Leza” baanyika.—Ba-Efeso 1:10; Ba-Roma 8:21; Ciyubunuzyo 20:7, 8.

17. Ino mbuti makanze aa Jehova mbwaayoozuzikizyigwa?

¹⁷ Aboobo, kwiinda mu “bweendelezi” bwakwe bwabusongo buteeli, naa nzila mbweendelezya zintu, Jehova unooli wazuzikizya makanze aakwe aa “kuyobolola zintu zyoonse alimwi muli Kristo, izintu zya kujulu alimwi azintu zya ansi.” Zilenge zyoonse zijisi maano kujulu alimwi aansi zinooli zyayobololwa muluumuno mububumbo boonse, zinoolibombya kubulelo bululeme bwa Simakanze Mupati, Jehova.

18. Mbuti bananike abeenzinyina mbobagwasyigwa kwiinda mukujanika ku Ciibalusyo?

¹⁸ Elo cinooyumya lusyomo kaka kumweelwe musyoonto wabananike atuulunzuma twabeenzinyina bambelele zimwi ikuswaangana mu April 12, 2006! Bayooba a Ciibalusyo calufwu lwa Kristo mbubwenya Jesu mbwaakalailila kuti: “Amukacite obo kuti mukandiyeeye.” (Luka 22:19) Boonse ibayoojanika beelede kuyeeya Jehova ncaabacitila kwiinda mu Mwana wakwe uuyandwa, Kristo Jesu.

Ikwiinduluka

• Mmakanze nzi ngajisi Jehova kujatikizya zintu zya kujulu alimwi azintu zya ansi?

• Ino “zintu zya kujulu” mbaani, alimwi ino zyayobololwa buti?

• Ino “zintu zya ansi” mbaani alimwi mbulangizi nzi mbobajisi?

[Mibuzyo yaciiyo]

Kabbokesi kali apeeji 15]

“Mubili wa-Kristo”

Ku 1 Ba-Korinto 10:16, 17, naakali kwaamba kaambo kamwi kaamba zya mukamu kujatikizya banyina Kristo bananikidwe amuuya, Paulo wakaamba “mubili” munzila iilibedelede. Wakati: “Mukamu nguutukomona sa taweensi waluswanaano lwamubili wa-Kristo? Nkaambo tuli mukamu omwe, tuli mubili omwe, nituli banji-banji, ikuti toonse tulaabilwa kumukamu omwe.” Banakristo bananike nobalya mukamu wa Ciibalusyo, batondezya lukamantano luli akati kambungano yabananike, lwalo luli mbuli mubili a Kristo kali Mutwe.—Matayo 23:10; 1 Ba-Korinto 12:12, 13, 18.

[Zifwanikiso izili apeeji 15]

Nkaambo nzi bananike balikke ncobalida mukamu akunywa waini?

[Cifwanikiso icili apeeji 17]

Kwiinda mubweendelezi bwa Jehova, zilenge zyoonse zya kujulu alimwi aansi ziyookamantana