Sena Tuyandika Mesiya?

MULAKONZYA kubuzya mubuzyo ooyu wakuti, “Sena tuyandika Mesiya?” Inzya, cileelela kubuzya kuti naa Mesiya kuli mbwakonzya kumujatikizya nywebo.

Ibamwi mbomusyoma balakonzya kumusyomezya kuti bwiinguzi busalede alimwi bwini-bwini mbwakuti: Ncobeni muyandika Mesiya mbubonya mbuli bantu bamwi. Mboobu mbwaakalemba haazibwene mumulawo waba Juda wamumwaanda wamyaka wakusaanguna kujatikizya Mesiya, wakati: “Zisyomezyo zya-Leza zyoonse zili buti, ijwi lya-Ee lyakuzizuzya mulili mulinguwe.” Aboobo, wakatondezya mulimo mupati ngwajisi Mesiya mumakanze aa Mulengi wesu aakulongezya bantu boonse anyika. (2 Ba-Korinto 1:20) Mulimo wa Mesiya mupati kapati cakuti businsimi bwamu Bbaibbele bwakali kugamika akuboola kwakwe alimwi abuumi bwakwe bwaanyika. Mubbuku lyamalailile lyakali kubelesyegwa atuulunzuma twabantu kwamyaka yiinda ku 70 yainda, Henry H. Halley cakusinizya wakaamba kuti: “Cizuminano Cakale cakalembelwa kupa bulangizi alimwi akubamba nzila yaku Boola kwa [Mesiya].” Pele sena kuboola kwakwe kulayandika? Nkaambo nzi ncomweelede kubikkila maano kumakani aaya?

Ibbala lyakuti “Mesiya” mubwini lyaamba “Munanike” alimwi lileelene abbala lizizilwe kapati lyakuti “Kristo.” Ooyu Kristo, lyalo bbuku lya Encyclopædia Britannica, lyamu 1970 ngolyaamba kuti “munununi mupati,” cakamupa kuboola akaambo kalunyansyo lwa banabubili bakusaanguna ba Adamu a Eva. Bakalengwa kabalondokede kabajisi bulangizi butaliboteli bwa buumi butamani mu Paradaiso, pele bakabupusyaula bulangizi oobo. Imungelo muzangi walo wakazyi kwiitwa kuti Saatani Diabolosi wakabaambila kuti Mulengi wabo tanaakali kubeedelezya kabotu alimwi akuti bakali kunoopona kabotu ikuti nibakalisalila beni cibotu acibi.—Matalikilo 3:1-5.

Eva wakeenwa alimwi wakaasyoma makani ayo aakubeja. Kuboneka kuti akaambo kakuyandisya mukaintu wakwe kwiinda kusyomeka kuli Leza, Adamu wakajatikizyigwa mubuzangi bwakatalisyigwa a Diabolosi. (Matalikilo 3:6; 1 Timoteo 2:14) Kwiinda mumicito yabo, tiibaanyonganya buyo bulangizi bwabo bwakuba abuumi butamani mu Paradaiso pe. Pele bakabaletela abana babo batakalinazyalwa cibi alufwu.—Ba-Roma 5:12.

Mpoona-mpoona, Mulengi wesu Jehova wakabikka bubambe bwakugwisya zintu zibyaabi zyakatalisyigwa abuzangi. Wakali kuyooleta luyanzano kwiinda munjiisyo yakali mu Mulawo wa Musa—yakucita zintu mukweelana, nkokuti liso aliso. (Deuteronomo 19:21; 1 Johane 3:8) Injiisyo eeyi yamumulawo yakaleelede kuzuzikizyigwa kutegwa bana ba Adamu a Eva aaba batako mugwasyi bakonzye kutambula buumi butamani muparadaiso anyika, mbubonya Mulengi mbwaakakanzide kuti kabapona bantu. Eeci cituleta kuli Mesiya.

Naakali kusubula Diabolosi, mboobu mbwaakaamba Jehova Leza mubusinsimi bwakusaanguna bwamu Bbaibbele bwakuti: “Njoobusya inkondo akati kanduwe amwanakazi, akati kalunyungu lwako alunyungu lwakwe. Walo uyookuuma amutwe, ayebo uyoomuluma kukasinde.” (Matalikilo 3:15) Sikwiiya Bbaibbele umwi wakaamba kuti “makani aazisyomezyo zya Mesiya mbuli bwaambwa mu Magwalo atalikila akaambo [aaka].” Umbi wakaamba kuti Mesiya ngonguwe ngwayoobelesya Leza “kugwisya mapenzi oonse aakaboola akaambo kacibi cabantu bakusaanguna,” alimwi akuleta zilongezyo kubantu.—Ba-Hebrayo 2:14, 15.

Pele, mulakonzya kulimvwa kuti ciindi cino bantu kunyina nobalongezyedwe pe. Muciindi caboobo, balizingidwe alimwi balityompedwe kapati. Aboobo bbuku lyakuti, The World Book Encyclopedia lyaamba kuti “ba Juda banji bacilindila kuboola kwa Mesiya” alimwi akuti “[uyoo]gwisya bubi akuzunda zikopa bantu.” Nokuba boobo, Ibbaibbele lyaamba kuti Mesiya wakaboola kale.