Amubutantamuke Bukombi Bwakubeja!
Amubutantamuke Bukombi Bwakubeja!
“Amuzwe akati kabo, mupambukane, mbwaamba Jehova. Mutaampi cintu citasalali.”—2 BA-KORINTO 6:17.
1. Muubukkale buli buti bwakumuuya mobajanika bantu banji babombe moyo?
BANTU banji babombe moyo tabamuzi bwini Leza alimwi abuumi bwabantu mbobuya kuba kumpela. Mbwaanga tiibabujana bwiinguzi bukkazika moyo kumakani aaya ngobapengede kapati, banyongana kapati. Tuulunzuma tuli mubuzike kumakani aamizimo, tunsiya-nsiya twabasikale, amapobwe zyalo zitamukkomanisyi Mulengi wesu. Ambweni mulijisi basimukobonyoko abamukowa basyoma kuti kuli kupya mulilo uutamani alimwi akuti Leza uli mubutatu, kutafwa kwabuumi, anjiisyo zimwi zyakubeja.
2. Ncinzi basololi bazikombelo ncibacita alimwi ncinzi caccilila?
2 Ngwuni waleta mudima ooyu wakumuuya uuli koonse-koonse? Ikwiingula nkwakuti, ncikombelo, ikapati mbunga zyazikombelo abasololi ibasumpula njiisyo ziteendelani akuyeeya kwa Leza. (Marko 7:7, 8) Akaambo kakuyiisya kuli boobu, bantu banji beenwa kabayeeya kuti bakomba Leza wakasimpe, kakuli mubwini bamukalazya buya. Cikombelo cakubeja cilijisi mulandu kubukkale oobu buusisya.
3. Ngwuni uuli kumpela kusumpula bukombi bwakubeja alimwi mu Bbaibbele upanduludwe buti?
3 Kuli muntu uutalibonyi uusumpula bukombi bwakubeja. Kaamba muntu ooyu, imwaapostolo Paulo wakati: “Saatani uuli ngoleza waansi aano woofwaazya mizeezo yabo, kuti bataboni mumuni wa Makani Mabotu aatondezya bulemu bwa Kilisito awalo Kilisito nguutondezya Leza mbwabede.” (2 Bakolinti 4:4, Ci) Saatani Diabolosi nguuli kumpela kusumpula bukombi bwakubeja. Paulo wakalemba kuti: “Saatani ulalicita mbuli mungelo wamumuni. Aboobo tacili cintu ceenzu kuti naa babelesi bakwe balicita beni mbuli babelesi babululami.” (2 Bakolinti 11:14, 15, Ci) Izintu zibi Saatani uzicita kuba zintu zibotu alimwi ulabeena bantu kwiinda mukusyoma zyakubeja.
4. Ncinzi Mulawo wa Leza ncookaamba kubana Israyeli bansiku kumakani aabasololi bakubeja?
4 Nkakaambo kaako Bbaibbele ncolitabuvwuninini bukombi bwakubeja. Mucikozyanyo, Mulawo wa Musa cakutainda amumbali wakacenjezya bantu ba Leza basale zyabasinsimi bakubeja. Kufwumbwa ooyo wakali kusumpula njiisyo zyakubeja akukomba baleza bakubeja wakeelede “kujayigwa, nkaambo waamba majwi aakumuleesya kuli-Jehova.” Bana Israyeli bakalailidwe ‘kugusya bubi bwakali akati kabo.’ (Deuteronomo 13:1-5) Bukombi bwakubeja Jehova ububona kuti mbubi.—Ezekiele 13:3.
5. Nkucenjezya kuli nkotweelede kuccilila sunu?
5 Jesu Kristo abasikwiiya bakwe bakatondezya mbwalimvwa Jehova kubukombi bwakubeja. Jesu wakacenjezya basikwiiya bakwe kuti: “Amucenjele basinsimi babeji beza kulindinywe basamide zyakusama zyambelele, anukuti mukati lyabo mbaumpe babutambo.” (Matayo 7:15; Marko 13:22, 23) Paulo wakalemba kuti: “Bukali bwa-Leza buzwa kujulu buli mukuyubunwidwa kami-kami akutalulama koonse kwabantu basinkila buswini.” (Ba-Roma 1:18) Cilayandika kapati ku Banakristo beni-beni kuccilila kucenjezya ooku akutacengwa amuntu uuli woonse uusola kusinkila kasimpe ka Jwi lya Leza naba uumwaya njiisyo zyakubeja.—1 Johane 4:1.
Amuzwe mu “BABULONI MUPATI”
6. Mbuti “BABULONI MUPATI” mbwaambwa mu Bbaibbele?
6 Amubone bbuku lyamu Bbaibbele lya Ciyubunuzyo mbolibwaamba bukombi bwakubeja. Libwaamba kuti mukaintu muvwuule uukoledwe uuyunga mami manji alimwi abantu babo. Ooyu mukaintu wacikozyanyo wacita bumambi amami manji alimwi wakolwa abulowa bwabakombi ba Leza bakasimpe. (Ciyubunuzyo 17:1, 2, 6, 18) Ulijisi zina lilembedwe ankumo yakwe lyeendelana amilimo yakwe yamamvwunze. Izina lyakwe ngu “BABULONI MUPATI UUZYALA BASIBWAAMU AZISESEMYO ZYAANSI.”—Ciyubunuzyo 17:5.
7, 8. Mbuti bukombi bwakubeja mbubwaba muvwuule, alimwi ncinzi caccilila?
7 Bupanduluzi bwa Magwalo bwaamba Babuloni Mupati buleelela kwaamba zikombelo zyoonse zyakubeja. Nekuba kuti zyuulu zyazyikombelo taili mbunga yomwe munyika, zijisi makanze omwe amilimo yomwe. Mbuli mbwaambwa mukaintu muvwuule wamu Ciyubunuzyo, bukombi bwakubeja bulijisi nguzu kapati mumfwulumende. Kakozyanya amukaintu uutasyomeki kucikonke cakwe camulukwatano, bukombi bwakubeja bwavwuula kwiinda mukubamba zilongwe amfwulumende zinji zyatwaambo twacisi. Sikwiiya Jakobo wakalemba kuti: “Nobasimamambe, sa tamuzi kuti kutangana buzwalani anyika, nkokulwana a-Leza? Eno kufwumbwa muntu uulisalila kuba muzwalani wanyika walicita sinkondonyina a-Leza.”—Jakobo 4:4.
8 Ooku kubamba cilongwe bukombi bwakubeja nkobwacita kumfwulumende, kwaleta mapenzi manji kubantu. Haabupampu muna Afulika uulanga-langa twaambo twacisi wazina lyakuti Dr. Xolela Mangcu, wakabona kuti “kuli zyikozyanyo zinji zyakujaigwa kwabantu banji nyika yoonse kwalo kwacitwa akaambo kazikombelo izyabamba cilongwe abasitwaambo twacisi.” Muteende umwi caino-ino wakati: “Imazwanga manji aajatikizya kutilwa kwabulowa alimwi aakatazide . . . atalikila muzikombelo.” Tuulunzuma tunji twabantu bafwa munkondo zicitwa kwiinda mukugwasyigwa azikombelo. Babuloni Mupati wabapenzya ababelesi ba Leza bakasimpe alimwi wabajaya, aboobo ubonekaanga ulikoledwe abulowa bwabo.—Ciyubunuzyo 18:24.
9. Mbuti lusulo lwa Jehova kubukombi bwakubeja mbolutondezyedwe mubbuku lya Ciyubunuzyo?
9 Jehova mbwabusulide bukombi bwakubeja kulalibonya kwiinda mu Ibbaibbele ncolyaamba kuti ciyakucitikila Babuloni Mupati. Ciyubunuzyo 17:16 caamba kuti: “Meja aali ikumi ngowabona kucinyama, aba balamusula mwanakazi sikuvuula, balamusyaazya alike, balamusamununa, balalya mubili wakwe akumuumpa amulilo.” Kutaanguna munyama mupati uya kumuluma akumujaya mwanakazi, eelyo uuya kuulya mubili wakwe. Kuzwa waawo, kufwumbwa tubeela tuya kucaala, tuya kuumpwa kusikila tukalote. Azyalo mfwulumende lino-lino ziya kubweza ntaamu yakunyonyoona bukombi bwakubeja. Leza uya kuzikulwaizya kucita boobo. (Ciyubunuzyo 17:17) Babuloni Mupati bwami bwanyika yoonse bwabukombi bwakubeja buya kunyonyoonwa. “[Tabu]kooyoojanwa limbi pe.”—Ciyubunuzyo 18:21.
10. Nintaamu nzi njotweelede kubweza kujatikizya bukombi bwakubeja?
10 Nintaamu nzi bakombi bakasimpe njobeelede kubweza kujatikizya Babuloni Mupati? Munzila iisalede, Ibbaibbele lilailila kuti: “Kamuzwa mulinguwe nobantu bangu, kuti mutavwelanizigwi azibi zyakwe, mutapenzegwi azipenzyo zyakwe.” (Ciyubunuzyo 18:4) Aabo bayanda kufwutulwa beelede kuzwa mubukombi bwakubeja cakufwambaana. Naakali anyika, Jesu Kristo wakasinsima kuti kumazuba aakumamanino, banji banakwaamba kuti baccilila nguwe. (Matayo 24:3-5) Kubantu aaba, waamba kuti: “Nsimuzi pe, amuzwe kulindime inywe nubamucita zibi.” (Matayo 7:23) Jesu Kristo uubikkidwe acuuno sunu kali Mwami, wabukaka bukombi bwakubeja.
Muunzila nzi Motunga Twabukaka Bukombi Bwakubeja?
11. Ncinzi ncotweelede kucita kutegwa tubukake bukombi bwakubeja?
11 Banakristo bakasimpe balabukaka bukombi bwakubeja alimwi anjiisyo zyabukombi bwakubeja. Eeci caamba kuti tatuswiilili wailesi akweebelela cipekupeku nekuli mapulogilamu aabukombi kubikkilizya akubala mabbuku aabo alo aayiisya zyakubeja kujatikizya Leza a Jwi lyakwe. (Intembauzyo 119:37) Alimwi tatweelede kutola lubazu mumapobwe alimwi amuzisobano zicitwa ambunga iili yoonse iijisi kabeela mubukombi bwakubeja. Kunze lyaboobo, tatugwasilizi bukombi bwakubeja munzila iili yoonse. (1 Ba-Korinto 10:21) Ikwiinda mukubweza ntaamu iili boobu, tulakwabililwa ‘kukuyungwa akusongwaala-songwaala akwaamba makani aatako aazwa kutunsiyansiya twabantu, aazwa kuzilenge zitaanzi zyaansi, aatazwi kuli Kristo pe.’—Ba-Kolose 2:8.
12. Mbuti muntu mbwakonzya kuleka kuba wambunga zyabukombi bwakubeja?
12 Ino mbuti kuti muntu uuyanda kuba umwi wa Bakamboni ba Jehova wajanwa kuti ucibalilwa kubukombi bwakubeja? Ikanji-kanji iŋwadi iitondezya kuti wakaleka kuba wacikombelo eeco ilagwasya kubona kuti taciyandi kubonwa kuti ucili umwi wabukombi bwakubeja. Cilayandika kapati kuti muntu ooyo abweze ntaamu yeelede kutegwa atasofwaazigwi abukombi bwakubeja. Milimo yayooyo uuyanda kuba Kamboni, yeelede kulibonya caantangala kumbunga yabukombi akubuleya kuti tacili umwi wabukombi oobo.
13. Ndulayo nzi Ibbaibbele ndolipa kujatikizya mbociyandika kutakaka bukombi bwakubeja?
13 Mwaapostolo Paulo wakalemba kuti: “Mutabi nimusungwa mujoko antoomwe abaabo batali bazumini mbumupambukene abo. Nkaambo bululami bulaswaana buti abusendami? Awalo mumuni ulavwelana buti amudima? Sa Kristo a-Beliyali balakonzya kuzuminana na? Muzumini ulijisi mwaabonzi antoomwe ayooyo uutazumini? Intempele ya-Leza ilijisi makaninzi amituni? . . . Nkaambo kaako amuzwe akati kabo, mupambukane, mbwaamba Jehova. Mutaampi cintu citasalali.” (2 Ba-Korinto 6:14-17) Tulaaccilila malailile aaya ikwiinda mukukaka bukombi bwakubeja. Sena lulayo lwa Paulo lwaamba kuti tweelede kubatantamuka abalo bakombi bakubeja?
‘Amweende Cabusongo’
14. Sena tweelede kubatantamukilalyo aabo bali mubukombi bwakubeja? Amupandulule.
14 Sena bakombi bakasimpe beelede kubatantamukilalyo bantu bali mubukombi bwakubeja? Sena tweelede kubatantamukilalyo buya aabo mbotuteendelani lusyomo? Ibwiinguzi mbwakuti, peepe. Mulawo wabili kumilawo mipati yobilo waamba kuti: “Yanda mweenzinyoko mbuli mboliyanda omwini.” (Matayo 22:39) Tulatondezya kuti tulabayanda basimukoboma notubakambaukila makani mabotu aa Bwami. Alimwi luyando ndotujisi kuli mbabo lulatondezyegwa notwiiya ambabo Bbaibbele akubagwasya kubona kuti cilayandika kubutantamuka bukombi bwakubeja.
15. Ino caamba nzi kutaba “bayeeyi nyika”?
15 Nekuba kuti tulakambauka makani mabotu kuli basimukoboma, mbotuli basikwiiya ba Jesu tatuli “bayeeyi nyika.” (Johane 15:19) Ibbala lyakuti “nyika,” awa lyaamba bantu bakalyaandaanya kuli Leza. (Ba-Efeso 4:17-19; 1 Johane 5:19) Tulaandeeni anyika mukuti tatuciti zibacita banyika, ŋambaudo, amilimo iitamukkomanisyi Jehova. (1 Johane 2:15-17) Kunze lyaboobo, kweelana anjiisyo yaamba kuti “mweenda abamineme, anywebo mulaminama,” tatubi balongwe abantu aabo bataponi kweelana azyeelelo zya Bunakristo. (1 Ba-Korinto 15:33) Kutaba wanyika, ‘nkutaba akabala nikaba komwe kanyika.’ (Jakobo 1:27) Aboobo, kutaba wanyika tacaambi kuti nkulekela limwi buya kumvwana abantu bamwi.—Johane 17:15, 16; 1 Ba-Korinto 5:9, 10.
16, 17. Mbuti Banakristo mbobeelede kubabona aabo batazyi kasimpe kamu Bbaibbele?
16 Aboobo, mbuti mbotweelede kubabona aabo batakazi kasimpe kamu Bbaibbele? Ku Mbungano yaku Kolose, Paulo wakalemba kuti: “Amucenjele kuti ibe yabusongo inzila njimweenda abaabo batali basimbungano ba-Kristo, alimwi amucibelesye loko ciindi canu coonse. Kwaamba kwanu kulweezegwe amunyo wakulumba, kuti mube abusongo bwakutyaba kabotu kubantu boonse bamubuzya makani.” (Ba-Kolose 4:5, 6) Imwaapostolo Petro wakalemba kuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Petro 3:15) Paulo wakalaya Banakristo kuti: “Batanoosampaula muntu pe, batabi bandwane, pele ababe batontozi, akuba babombe-moyo kubantu boonse.”—Tito 3:2.
17 Mbotuli Bakamboni ba Jehova, tatweelede kwaamba zintu zibi naa kulisumpula kuli bamwi. Tatweelede kubelesya majwi mabi ikwaamba bantu bazikombelo zimbi. Ncotweelede kucita, nkuba bampampu, nekuba kuti mukamwini munzi, simukoboma naa ngotubeleka limwi kabelesya majwi mabi.—Ba-Kolose 4:6; 2 Timoteo 2:24.
“Kojatisya Majwi Menimeni”
18. Mbukkale buli buti buusisya bwakumuuya mbobanjana aabo bajokela kubukombi bwakubeja?
18 Elyo inga causisya kaka kuti muntu wakayiya kasimpe kamu Bbaibbele wajokela kubukombi bwakubeja! Ibbaibbele lilaamba ziccilila akaambo kakusala kutali kabotu noliti: “Kuti banooli bavunwa kubusofwaazi bwaansi kukuzibisya Mwami Mufutuli Jesu Kristo, elyo kusule babweedela kukusambailwa akuzundwa mbubo, ncobeni magolelo aabo abija kwiinda aalutaanzi . . . Kwababeda mbubonya mbobakaamba kasimpi kenikeni kakuti, mubwa wabweedela bulusi bwakwe mwini, alakwe nkuntula uwakasambide wabweedela kwaalabana mubutimba.”—2 Petro 2:20-22.
19. Nkaambo nzi ncociyandika kupakamana lyoonse kucintu cili coonse cikonzya kutubikka muntenda kumuuya?
19 Tweelede kuti lyoonse katupakameni kucintu cili coonse cikonzya kutubikka muntenda kumuuya. Ntenda nkozili ncobeni. Mwaapostolo Paulo ucenjezya kuti: “Muuya waamba ncobeni kuti kuciindi ciciza bamwi bayookuzwa kulusyomo, bakagame kumvwa myuuya yakweena amafundisyo aabadaimona.” (1 Timoteo 4:1) Tupona “kuciindi ciciza.” Aabo batabukaki bukombi bwakubeja, balakonzya “kupepaulwa koonse koonse akupupululwa amyuuwo yanjiisyo zyamisyobo misyobo iizwa kukweena-ena kwabantu bapyungi bajisi macenjela aakucita bubeji.”—Ba-Efeso 4:13, 14.
20. Mbuti mbotukonzya kulicingilila kumuuya mubi wabukombi bwakubeja?
20 Mbuti mbotukonzya kulicingilila kumuuya mubi wabukombi bwakubeja? Amulange-lange zyoonse Jehova nzyaatupa. Tulijisi Jwi lya Leza, Ibbaibbele. (2 Timoteo 3:16, 17) Alimwi Jehova wapa cakulya cinji cakumuuya kwiinda mu “muzike musyomesi uucenjede.” (Mateyo 24:45) Mbotuya ampela mukasimpe, sena tatweelede kuyandisya ‘zilyo ziyumu zyabantu bakakomena,’ akuyandisya kubungana antoomwe oko nkotwiiya kasimpe kakumuuya? (Ba-Hebrayo 5:13, 14; Intembauzyo 26:8) Atube bantu bayandisya lyoonse kutola lubazu muzintu Jehova nzyaatubambila kutegwa tukonzye ‘kujatisya majwi menimeni’ ngotwakamvwa. (2 Timoteo 1:13) Ikuti twacita oobo tulakonzya kubukaka bukombi bwakubeja.
Ncinzi Ncomwaiya?
• Ino “BABULONI MUPATI” ncinzi?
• Ncinzi ncotweelede kucita kutegwa tubukake bukombi bwakubeja?
• Nintenda nzi nzyotweelede kutantamuka zikonzya kutunyonganya kumuuya?
[Mibuzyo yaciiyo]
[Cifwanikiso icili apeeji 14]
Sena mulicizyi “Babuloni Mupati” ncaambwa kuti mukaintu muvwuule?
[Cifwanikiso icili apeeji 15]
“Babuloni Mupati” uyoonyonyoonwa
[Cifwanikiso icili apeeji 17]
Tulabavwiila “amoyo mutete akuyoowa Leza” aabo ibatasyomi nzyotusyoma