Ikulimvwisya Bbaibbele Icintu Cikondelezya Ncomukonzya Kujana

IBBAIBBELE lijisi kasimpe kayandika kapati kazwa kuli Leza. Litwaambila ncotuponena, icipa bantu kupenga alimwi abuumi bwakumbele mbobuyakuba. Lilatuyiisya mbotukonzya kuba bantu bakkomene, kuba abalongwe ambotukonzya kwaalanganya mapenzi. Pele kwiinda zyoonse lituyiisya makani aajatikizya Mulengi, Taateesu wakujulu, Jehova. Luzibo luli boobu lutupa kukkomana alimwi lutugwasya kuzyiba ncotuponena.

Ikwiiya luzibo lwa Leza, mu Bbaibbele kulakozyanisigwa akulya. Jesu wakaamba kuti: “Teensi insima ilike njaaponena muntu, ulaponena amajwi oonse aazwa kumulomo wa-Leza.” (Matayo 4:4; Ba-Hebrayo 5:12-14) Mbubonya mbuli mbokuyandika kulya abuzuba cakulya cijisi busani kutegwa katupona, akwalo kubala Jwi lya Leza lyoonse kulayandika kutegwa tukabe abuumi butamani Leza mbwaasyomezya.

Tulakkomana kulya akaambo kakuti mbotubambidwe alimwi ikulya kuzuzikizya cintu ciyandika kapati. Pele, tulijisi acimwi cintu ciyandika ncotweelede kuzuzikizya ikuti katuyanda kuba bantu bakkomene. Jesu wakaamba kuti: “Bali acoolwe bacete mumuuya.” (Matayo 5:3) Tulakonzya kukkomana nkaambo ziyandika zyakumuuya inga zyazuzikizyigwa kwiinda mukumvwisya Jwi lya Leza.

Mmasimpe kuti bamwi bajana buyumuyumu ikulimvwisya Bbaibbele. Mucikozyanyo, inga mwayandika lugwasyo kujatikizya zibalo zyaamba zilengwa zitazizyilwe naa izibelesya maambilambali. Alimwi kuli businsimi bulembedwe munzila yacikozyanyo bukonzya buyo  kuteelelwa kwiinda mukubala zibalo zimbi zyamu Bbaibbele zyaamba makani ngamunya aayo. (Daniele 7: 1-7; Ciyubunuzyo 13:1, 2) Nokuba boobo, mulakonzya kulimvwisya ncobeni Bbaibbele. Mbuti mbomunga mwasinizya kuti mulakonzya kulimvwisya Bbaibbele?

Icintu Cikondelezya Ncobakonzya Kujana Boonse

Ibbaibbele ndi Jwi lya Leza. Mulindilyo, Leza ulatwaambila luyando lwakwe. Sena Leza inga wapa bbuku likatazya kumvwa ncolyaamba naa likonzya buyo kuteelelwa abantu bayiide kapati? Peepe, Jehova takonzyi kuba alunya luli boobu. Jesu Kristo wakaamba kuti: “Sena kuli wisi uunga naa mwanaakwe wakumbila nswi, wamupa nzoka? Na mwana wakumbila iji, wamupa kabanze? Nikuba kuti nywebo muli bantu babi, pele mulizi zibotu kubana banu! Ino Uso uuli kujulu inga wakakilwa buti kupa Muuya Uusalala kuli aabo ‘bamukumbila!’” (Luka 11:11-13, Ci) Aboobo, mulakonzya kusinizya kuti inga mwalimvwisya Bbaibbele akuti naa mwamulomba Leza camoyo woonse, uyoomupa lugwasyo ndomuyandika kutegwa mulimvwisye Jwi lyakwe. Nobaba bana balakonzya kumvwisya njiisyo zyantalisyo zyamu Bbaibbele.—2 Timoteo 3:15.

Nokuba kuti ikumvwisya Bbaibbele kuyanda kulitakata, kucita oobo kulakonzya kutuyumya. Jesu naakabuka, wakalibonya kuli basikwiiya bakwe bobile akubaambila businsimi bwamu Bbaibbele. Cibalo cakalembwa a Luka caamba kuti: “Kuzwida kuli-Musa akubasinsimi boonse, wakabapandulwida makani aamu-Magwalo oonse aamwaamba lwakwe mwini.” Ino ncinzi cakatobela mubandi ooyu? Kumangolezya nobakakkala ansi kuyeeya zintu nzyobakayiya, basikwiiya bakaamba mucabocabo kuti: “Sena myoyo yesu teyali kupya muzyamba zyesu, naali kuza bwaambaula aswebo munzila, aleeliya naali kutupandulwida Magwalo?” (Luka 24:13-32) Kumvwisya Jwi lya Leza kwakabapa kukkomana nkaambo kwakayumya lusyomo lwabo muzisyomezyo zya Leza alimwi kwakabapa kutalibilika kujatikizya mazuba aakumbele.

Muciindi cakuba mukuli, kumvwisya Jwi lya Leza kulakkomanisya alimwi kuli ampindu, kulakondelezya mbuli kulya cakulya cijisi busani. Ncinzi ncomweelede kucita kutegwa mukonzye kulimvwisya Bbaibbele munzila iili boobu? Cibalo citobela citondezya mbomukonzya kulukkomanina “luzibo lwa-Leza.”—Tusimpi 2:1-5.

[Zifwanikiso izili apeeji 4]

Mbuli usyi siluyando, Jehova ulatupa muuya uusalala kutegwa utugwasye kulimvwisya Bbaibbele