Twaambo Tupati-Pati Kuzwa Mubbuku lya Jobu
Ijwi lya Jehova Lili Abuumi
Twaambo Tupati-Pati Kuzwa Mubbuku lya Jobu
SINSIKU Jobu wakali kukkala mucisi ca Uzi, sunu ciitwa kuti Arabia. Ibunji bwabana Israyeli bakali kukkala mu Egepita aciindi eeco. Nekuba kuti walo tanaakali muna Israyeli, Jobu wakali mukombi wa Jehova Leza. Ikwaamba nguwe, Ibbaibbele lyaamba kuti: “Taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi.” (Jobu 1:8) Eeci ceelede kuti cakali ciindi naakali kupona Josefa mwana wa Jakobo amusinsimi Musa, ibabelesi ba Jehova bakali ampuwo kapati.
Musa walo uuyeeyelwa kuti ngookalemba bbuku lya Jobu, kulibonya kuti wakamvwa zya Jobu naakakkala myaka iili 40 ku Midyani kufwiifwi acisi ca Uzi. Kweelede kuti Musa wakamvwa zyakamucitikila Jobu mumyaka yakwe yamamanino ciindi bana Israyeli nibakali aafwiifwi aku Uzi, kumamanino aalweendo lwabo lwamunkanda lwamyaka iili 40. * Zyakamucitikila Jobu zyakalembwa munzila mbotu cakuti cibalo coonse caambwa kuti nkweema kubotu kapati. Pele kunze lyaboobo, cilaingula amibuzyo yakuti: Nkaambo nzi bantu babotu moyo ncobapengela? Nkaambo nzi Jehova ncalekela bubi? Sena bantu batalondokede balakonzya kusyomeka kuli Leza? Mbwaanga alyalo bbuku lya Jobu ndi Jwi lya Leza lyakasololelwa amuuya, imulumbe uuli mumo ulaabuumi, ulaanguzu naaba mazuba aano.—Ba-Hebrayo 4:12.
‘ABUFWIDILILE BUZUBA MBUNDAKAZYALWA’
Buzuba bumwi Saatani wakakudooneka kusyomeka kwa Jobu kamvwide a Leza. Jehova wakakuzumina kudooneka ooku, alimwi wakamuzumizya Saatani kumupenzya Jobu. Pele Jobu wakakaka ‘kumutukila Leza.’—Jobu 2:9.
Balongwe ba Jobu botatwe bakaboola “kumuumbulizya.” (Jobu 2:11) Bakalikkede anguwe kakunyina akumwaambauzya kusikila limwi Jobu waambaula wati: “Bufwidilile buzuba mbundakazyalwa.” (Jobu 3:3) Jobu wakali kulombozya kuba “mbuli kavwanda katabona zuba,” naa mwana waindilila.—Jobo 3:11, 16, BT.
Mibuzyo Yamu Magwalo Iingulwa:
1:4—Sena bana ba Jobu bakali kusekelela buzuba bwakuzyalwa? Peepe. Mumulaka wakali kubelesyegwa kumatalikilo mabala aakuti “buzuba” a “buzuba bwakuzyalwa” aliindenyi, ibbala alimwi lilijisi bupanduluzi bwayo. (Matalikilo 40:20) Kuli Jobu 1:4 mu Bbaibbele lya New World Translation ibbala lyakuti “buzuba” lyaamba ciindi kuzwa nkolipolela zuba kusikila nkolibbilila. Kulibonya kuti bana ba Jobu basankwa bali ciloba bakali kucita pobwe lyamukwasyi kwamazuba aali ciloba ciindi comwe amwaka. Mbobakali kupana ciindi, mwana aumwi wakali kucita pobwe aŋanda yakwe “aumwi buzuba bwakwe.”
1:6; 2:1—Mbabaani bakali kuzumizyigwa kusika kubusyu bwa Jehova? Akati kabaabo bakasika kubusyu bwa Jehova, kwakali Mwana wa Leza simuzyalwa alikke wiitwa kuti Jwi; bangelo basyomeka; abana ba Leza bangelo bakazanga kubikkilizya a Saatani Diabolosi. (Johane 1:1, 18) Saatani abangelo bakwe tiibakainda kutandwa kujulu, bakakkala kusikila Bwami bwa Leza nibwakatalisyigwa mu 1914. (Ciyubunuzyo 12:1-12) Kwiinda mukubazumizya kusika kubusyu bwakwe, Jehova wakazibya bangelo boonse nzyaakaamba Saatani kujatikizya kukazya kwakwe alimwi atwaambo twakabuka.
1:7; 2:2—Sena Jehova wakaambaula a Saatani kabalangenyi? Ibbaibbele talitwaambili zyoonse kujatikizya nzila Jehova njabelesya naambaula azilenge zyamuuya. Nekuba boobo, musinsimi Mikaya wakabona cilangaano mwaakabona mungelo kaambaula a Jehova kabalangenyi. (1 Bami 22:14, 19-23) Aboobo, kulibonya kuti Jehova wakaambaula a Saatani kakunyina muntu uyiima akati.
1:21—Mmuunzila nzi Jobu mwaakali kukonzya kujokela ‘mwida lyabanyina’? Mbwaanga Jehova Leza wakabumba “muntu abulongo,” ibbala lyakuti “baama” awa libelesyedwe munzila yamaambilambali ikwaamba nyika naa bulongo.—Matalikilo 2:7, BT.
2:9—Ino mukaintu wa Jobu uboneka kuti wakali kuyeeya nzi naakaambila mulumi wakwe kuti amutukile Leza kutegwa afwe? Mukaintu wa Jobu awalo wakasweekelwa bwakasweekelwa mulumi wakwe. Kulibonya kuti cakamucima kubona mulumi wakwe iwakali muyumu kaciswa bulwazi busesemya. Wakasweekelwa bana bakwe bayandwa. Kulibonya kuti wakalinyongene kapati akaambo kazintu zyoonse eezyi cakuti kunyina naakabikkila maano kucintu cakali kuyandika kapati—cilongwe cabo a Leza.
Ziiyo Kulindiswe:
1:8-11; 2:3-5. Mbuli mbokwatondezyegwa azyakamucitikila Jobu, kunze lyakucita zintu zili kabotu alimwi akwaambaula munzila iili kabotu, kusyomeka kuyandika kuba amakanze mabotu mukubelekela Jehova.
1:21, 22. Ikuti katusyomeka lyoonse kuli Jehova muziindi zyamapenzi azitali zyamapenzi tutondezya kuti Saatani mmubeji.—Tusimpi 27:11.
2:9, 10. Mbuli Jobu, tweelede kwiima nji mulusyomo nekuba kuti bamukwasyi tababikkili maano zyakumuuya nzyotwakasala naa batusinikizya kucita nzyobayanda nekuba kutupa kucileka kusyomeka.
2:13. Balongwe ba Jobu tiibakalijisi makani aaumbulizya ngobakali kukonzya kwaamba kujatikizya Leza azyisyomezyo zyakwe, nkaambo zintu tiibakali kuzibona mbwazibona Leza.
“TANDIKALEKI KUSYOMEKA!”
Kaambo nkobakajisi balongwe ba Jobu botatwe mumakani aabo nkakuti kuli cintu cipati Jobu ncaakacita cakapa kuti Leza amusubule. Elifazi nguwakali kumpela. Bilidadi wakamuccilila Elifazi kaamba majwi mabi aacisizya moyo. Walo Zofari wakaliindide kufwubaazya.
Jobu wakakukaka kuyeeya kwabeenzu bakwe kutaluzi. Akaambo kakutamvwisya capa kuti Leza azumizye kuti apenge boobu, wakopana akutalika kulibosya-bosya. Pele nekuba boobo, Jobu ulamuyanda Leza aboobo wati: “Kusikila ndikafwe tandikaleki kusyomeka!”—Jobu 27:5, NW.
Mibuzyo Yamu Magwalo Iingulwa:
7:1; 14:14—Ncinzi caambwa nokutegwa ‘mumazuba oonse aamulimo’? Mapenzi ngaakajisi Jobu akali mapati kapati cakuti buumi bwakazyi kumuyumina. (Jobu 10:17) Mbwaanga mazuba muntu ngakkala Mucuumbwe—kuzwa ciindi naafwa kusikila ciindi ncayoobusyigwa, nciindi muntu ncatakonzyi kucinca, iciindi eeci Jobu wakaceelanya amazuba oonse aamulimo.
7:9, 10; 10:21; 16:22—Sena twaambo ootu tutondezya kuti Jobu tanaakali kusyoma mububuke? Aaya makani aa Jobu ajatikizya buumi bwakwe bwakumbele. Aboobo, ino ncinzi ncaakali kwaamba? Kamwi kaambo nkakuti ikuti wafwa, taku naba omwe akati kabalongwe bakwe wakali kukonzya kumubona. Mukuyeeya kwabo, tanaakali kukonzya kujokela kuŋanda yakwe naa kukonzya kuzyibwa kusikila ciindi Leza ncabikkide. Alimwi kulibonya kuti Jobu wakali kwaamba kuti taku muntu uukonzya kubuka mu Cuumbwe kwiinda munguzu zyakwe mwini. Ibumboni bwakuti Jobu wakajisi lusyomo mububuke nkobuli kuli Jobu 14:13-15.
10:10—Mbuti Jehova ‘mbwaakamutila Jobu mbuli mukupa akuba mbuli cipwaza’? Oobu mbupanduluzi bwakweema butondezya Jobu mbwaakatalika kuba muntu mwida lyabanyina.
19:20—Ncinzi Jobu ncaakali kwaamba naakati “ndilobokede biyo anyama yamumeno aangu”? Ikwiinda mukwaamba kuti wakaloboka anyama yacintu calo citajisi nyama, kulibonya kuti Jobu wakali kwaamba kuti tanaakaloboka acintu cili coonse.
Ziiyo Kulindiswe:
4:7, 8; 8:5, 6; 11:13-15. Tatweelede kufwambaana kuyeeya kuti muntu uuli mumapenzi utebula ncaakasyanga alimwi akuti taciyandwi a Leza.
4:18, 19; 22:2, 3. Lulayo lwesu lweelede kuzwa mu Jwi lya Leza, ikutali mumizeezo yesu.—2 Timoteo 3:16.
10:1. Bukali bwakamunyonganya Jobu cakunga tanaakatuyeeya twaambo tumwi kubona cakali kumupa kuciswa. Tatweelede kukalala netunjila mumapenzi, mbwaanga tulituzi kabotu twaambo tutupa kupenga.
14:7, 13-15; 19:25; 33:24. Ipenzi lili loonse Saatani ndyakonzya kutuletela, ibulangizi mbotujisi mububuke bulakonzya kutuyumya.
16:5; 19:2. Majwi ngotwaamba ayelede kubayumyayumya bantu, ikutali kubakalazya.—Tusimpi 18:21.
22:5-7. Lulayo ilupegwa kumuntu uuyeeyelwa kuti walubizya kakuli kunyina bumboni buzulide butondezya kuti muntu ooyo wacita oobo taluyandiki alimwi taluyaki.
27:2; 30:20, 21. Ikutegwa muntu asyomeke takutegwa ccita buya kalondokede. Jobu cakutaziba wakamubwentela Leza.
27:5. Jobu mwini nguwakali kukonzya kulisalila naa wakali kuyanda kuzumanana akusyomeka, nkaambo kusyomeka kuya buyo aumwi mbwamuyanda Leza. Aboobo tweelede kumuyanda kapati Jehova.
28:1-28. Muntu ulizi lubono luli munyika nkolubede. Mbwayaabulangaula lubono, busongo bwakwe bulamutola mukati mubulongo cakunga taku muyuni uulaameso naalanga buti uukonzya kubona. Pele busongo bwa Leza bulaboola kwiinda mukuyoowa Jehova.
29:12-15. Tweelede kubafwida luzyalo abo bapengede.
31:1, 9-28. Jobu wakatusiila cikozyanyo mukuti tanaakali kusobana nkwela, kubbukilwa, kucita zintu munzila iitaluleme alimwi calunya, kuyandisya lubono alimwi akukomba mituni.
“NDAPUBUKA MUKASUKO AMUTWE”
Imwana wazina lya Elihu wakali kuswiilila mubandi. Cabusicamba wakaambaula. Wakamunyona Jobu abeenzyinyina botatwe bakali kumuletela mapenzi.
Mbwaakamanina buyo Elihu, Jehova wakaingula kwiinda mukuleta guwo. Tanaakaamba cakali kumupa kuciswa Jobu. Pele, ikwiinda mukumubuzya mibuzyo minji, Singuzuzyoonse wakapa kuti Jobu azibe nguzu zitalikomeneni nzyajisi Leza abusongo bwakwe bunji kapati. Jobu wakazumina kuti wakaambaula cakubula luzibo, wakati: “Ndalinyansya, ndapubuka mukasuko amutwe.” (Jobu 42:6) Nowakamana musunko wa Jobu, wakapegwa bulumbu akaambo kakusyomeka.
Mibuzyo Yamu Magwalo Iingulwa:
32:1-3—Ndilili naakasika Elihu? Mbwaanga Elihu wakamvwa zyoonse zyakaambwa, kulibonya kuti wakalikkede aafwiifwi Jobu katanatalika kwaambaula kabakkede kwaamazuba aali ciloba balongwe bakwe botatwe kabatamwaambauzyi.—Jobu 3:1, 2.
34:7—Mbuti Jobu mbwaakali mbuli muntu “uuguumwina masampu mbuli maanzi”? Kanyongenyi kuyeeya, Jobu wakayeeya kuti beenzu bakwe botatwe bakali kufwubaazya nguwe, pele mubwini ngubakali kwaamba wakali Leza. (Jobu 42:7) Aboobo wakali kuguumwina masampu mbuli muntu uunywa maanzi cakukondwa.
Ziiyo Kulindiswe:
32:8, 9. Takuli kuti kufwumbwa muntu mupati ulijisi busongo. Busongo bulaboola kwiinda mukumvwisya Jwi lya Leza abusolozi bwamuuya wakwe.
34:36. Kusyomeka kulabonwa ikuti “[twa]penga cakumaninina” munzila imwi.
35:2. Elihu wakasaanguna kuswiililisya mpoonya wakaamba kaambo keni. (Jobu 10:7; 16:7; 34:5) Kabatanapa lulayo, baalu Banakristo beelede kuswiililisya, kujana bumboni, akumvwisya kaambo mbokabede.—Tusimpi 18:13.
37:14; 38:1–39:30. Ikukkala ansi kuyeeya milimo ya Jehova iitaliboteli, mbwatondezya nguzu abusongo bwakwe, kulatupa kuti tulicesye akutugwasya kubona kuti iciyandika kapati kwiinda zyoonse nzyotuyanda nkusalazyigwa kwa bulelo bwakwe.—Matayo 6:9, 10.
40:1-4. Ikuti twaba amuzeezo wakutongooka Singuzuzyoonse, tweelede ‘kubikka janza kumulomo wesu.’
40:15–41:34. Tazilivwulili nguzu nzyajisi civwubwe aciwena! Kutegwa tuliyumye mumulimo wa Leza, andiswe tuyandika nguzu kuzwa kuli yooyo Wakapanga banyama aaba bajisi nguzu, walo uutupa nguzu.—Ba-Filipi 4:13.
42:1-6. Ikumvwa jwi lya Jehova alimwi akuyeekezyegwa mbwatondezya nguzu zyakwe kwakamugwasya Jobu ‘kubona Leza,’ naa kuziba bwini mbwabede. (Jobu 19:26) Eeci cakamugwasya kuyeeya munzila iili kabotu. Ikuti twapegwa lulayo lwamu Bbaibbele, tweelede kuzumina kulubizya kwesu akululamika nzila zyesu.
‘Amukakatile Mbuli Jobu’
Bbuku lya Jobu lilasalazya kuti Leza taasyi nguupa kuti bantu kabapenga. Saatani nguupa kuti kabapenga. Kulekela mapenzi anyika Leza nkwaacita kutupa ciindi cakuti aumwi akonzye kutondezya mpaimvwi mutwaambo twabulelo bwa Jehova bwakoonse-koonse alimwi akusyomeka kwesu.
Mbuli Jobu, boonse aabo bamuyanda Jehova baya kusunkwa. Cibalo ca Jobu cilatukulwaizya kuti andiswe tulakonzya kuliyumya. Cilatugwasya kubona kuti mapenzi aatusikila taakazumanani kukabe kutamani. Bbuku lya Jakobo 5:11 lyaamba kuti: “Mulimvwide kale aalukakatilo lwa-Jobo, alimwi mulizi mbwaakamucitila Jehova kumamanino.” Jehova wakamupa bulumbu Jobu akaambo kakusyomeka kwakwe. (Jobu 42:10-17) Taluliboteli lusyomo ndotujisi lwakuba abuumi butamani mu Paradaiso anyika. Mbubwenya mbuli Jobu, atuzumanane kusyomeka.—Ba-Hebrayo 11:6.
Bupanduluzi buyungizidwe
^ munc. 2 Ibbuku lya Jobu lyaamba zyakacitika mumyaka yiinda ku 140, akati kamwaka wa 1657 awa 1473 B.C.E.
[Zifwanikiso izili apeeji 32]
Ncinzi ncotukonzya kwiiya ‘kukuliyumya kwa Jobu’?