Jehova Ulabayiisya Beembezi Kutegwa Beembele Butanga Bwakwe
Jehova Ulabayiisya Beembezi Kutegwa Beembele Butanga Bwakwe
“Jehova ulaabila busongo, mumulomo wakwe mulazwa luzibo abusongo.”—TUSIMPI 2:6.
1, 2. Nkaambo nzi baalumi babbapatizidwe ncobaya ambele kuti beelele kupegwa mikuli mumbungano?
NICK, iwali kubeleka kali mwaalu kwamyaka iili ciloba wakati: “Ndakakkomana kapati nondakasalwa kuba mwaalu. Mukuli ooyu ndakuubona kuba coolwe cakuyungizya mulimo wangu kuli Jehova. Ndakabona kuti ndakaleelede kumulumba kuzintu zyoonse nzyaakandicitila. Alimwi ndakali kuyanda kugwasya bantu mumbungano kusikila waawo mpondakali kukonzya, ikubagwasya munzila njiyona baalu bamwi mbobakandigwasya.” Pele nokuba kuti wakalikkomene, kuli zimwi zyakamukatazya. Nick ulazumanana kati: “Mbwaanga tiindakalininga kkwanya amyaka iili 30, ndakali libilikide kuti ndakanyina luzibo luyandika, nkokuti bupampu alimwi abusongo—kutegwa ndeembele kabotu butanga.”
2 Aabo Jehova mbasala kulanganya butanga bwakwe balijsi twaambo tunji tubapa kukkomana. Mwaapostolo Paulo wakabayeezya baalu baku Efeso kaambo kamwi kapa kukkomana. Kazubulula majwi aa Jesu wakati: “Kupa kuli coolwe kwiinda kupegwa.” (Incito 20:35) Ikubeleka muntu kali mukutausi naa mwaalu kupa baalumi babbapatizidwe nzila zinji zyakupa kuli Jehova alimwi akumbungano. Mucikozyanyo, bakutausi babelekela aantoomwe abaalu. Alimwi bakutausi aaba balanganya mikuli aimbi iibatolela ciindi cinji pele iiyandika. Bakwesu aaba balakulwaizigwa aluyando ndobajisi kuli Leza akuli basimukobonyina kutegwa babeleke mulimo uuyandika.—Marko 12:30, 31.
3. Nkaambo nzi bamwi ncobakonzya kuwayawaya kuyaambele kutegwa beelele kupegwa mikuli mumbungano?
3 Ino mbuti kujatikizya mwaalumi Munakristo uuwayawaya kuyaambele akaambo kakulitenga kutegwa eelele kupegwa mukuli wakuba mukutausi mpoonya kumbele akabe mwaalu? Mbuli Nick, ulakonzya kulibilika kuti tajisi luzibo luyandika mukuba mweembezi uucibwene. Sena anywebo muli akati kabakwesu babbapatizidwe ibalimvwa boobu? Kuyeeya kuli boobo kulamvwika. Jehova uya kubabeteka beembezi basalidwe kweelana ambobeendelezya butanga. Jesu wakati: “Kufumbwa uupegwa kunjikunji kuyooitwa kunjikunji kulinguwe, ayooyo uubikilwa kunjikunji, kulinguwe balakumbila kwiindilila.”—Luka 12:48.
4. Mbuti Jehova mbwabagwasya aabo mbasala kulanganya mbelele zyakwe?
4 Sena Jehova uyanda kuti aabo mbasala kuba bakutausi alimwi abaalu kababeleka milimo yabo kakunyina kugwasyigwa? Muciindi caboobo, ulabagwasya kutegwa baliyumye alimwi akuzwidilila. Kweelana ambokwabandikwa mucibalo cainda, Jehova ulabapa muuya wakwe uusalala, micelo yawo ilabagwasya kulanganya mbelele caluyando. (Incito 20:28; Ba-Galatiya 5:22, 23) Kuyungizya waawo, Jehova ulabapa busongo, luzibo alimwi abupampu. (Tusimpi 2:6) Mbuti mbwacita oobu? Atubandike nzila zyotatwe Jehova mbwabayiisya aabo mbasala kulanganya mbelele zyakwe.
Kuyiisyigwa Abeembezi Bacibwene
5. Nkaambo nzi Petro a Johane ncobakali beembezi bacibwene?
5 Mwaapostolo Petro alimwi a Johane nobakali kumbele lya Nkuta Mpati, babetesi basongo bankuta eeyo bakabona baalumi aaba kuba ‘bantu buyo ibatakaiya.’ Masimpe, bakali kukonzya kubala alimwi akulemba, pele kunyina nobakayiisyigwa Magwalo abasololi bazikombelo. Nokuba boobo, Petro a Johane antoomwe abasikwiiya bambi bakali bamayi bacibwene kumutwe, ibakali kupa banji ibakali kubaswiilila kuba basyomi. Ino mbuti bantu buyo aaba mbubakaba bamayi bacibwene boobu? Noyakaswiilila kuli Petro a Johane, nkuta ‘yakabaziba kuti bali kweenda a Jesu.’ (Incito 4:1-4, 13) Ncobeni bakatambula muuya uusalala. (Incito 1:8) Pele alimwi cakalibonya atuba, nokuba kubabetesi aabo ibatakali kukonzya kumvwisya zintu zyakumuuya, kuti Jesu ngonguwe wakayiisya baalumi aabo. Naakali ambabo munyika, Jesu wakayiisya baapostolo ikutali buyo mbokuyobololwa bantu bali mbuli mbelele pele alimwi ambobeelede kubeembela mbobabeda buyo mubutanga.—Matayo 11:29; 20:24-28; 1 Petro 5:4.
6. Ncikozyanyo nzi Jesu a Paulo ncobakapa kujatikizya kuyiisya bamwi?
6 Jesu naakabusyigwa, wakazumanana kuyiisya aabo mbaakasala kuba beembezi. (Ciyubunuzyo 1:1; 2:1–3:22) Mucikozyanyo, lwakwe Jesu kumugama wakamusala Paulo alimwi akumuyiisya. (Incito 22:6-10) Paulo wakalumba kapati kulwiiyo ndwaakatambula alimwi wakayiisya baalu bamwi nzyaakaiya. (Incito 20:17-35) Mucikozyanyo, wakatola ciindi cinji alimwi anguzu mukuyiisya Timoteo kuba “simulimo” mumulimo wa Leza, “uutakwe cintu cimuusya insoni.” (2 Timoteo 2:15) Kwakaba cilongwe cini-cini akati kabaalumi bobile aaba. Musyule, Paulo wakalemba kujatikizya Timoteo kuti: “Mbubonya mbuli mwana mbwabelekela wisi, alakwe wabelekela ndime cakugwasya milimo ya-Makani Mabotu.” (Ba-Filipi 2:22) Paulo kunyina naakacita Timoteo antela kufwumbwa buyo muntu uumbi kuba sikwiiya wakwe kumugama. Muciindi caboobo, wakakulwaizya basyominyina ‘kwiiya nguwe, mbubonya mbuli walo mbwaakaiya Kristo.’—1 Ba-Korinto 11:1.
7, 8. (a) Ncakuluula nzi citondezya mpindu iijanika baalu nobaiya Jesu alimwi a Paulo? (b) Ndiilili baalu nobeelede kutalika kubayiisya aabo balangilwa kuyooba bakutausi alimwi abaalu?
7 Ikwiiya Jesu a Paulo, beembezi bacibwene balabweza ntaamu yakuyiisya bakwesu babbapatizidwe, akujana mpindu mbotu mbuli yaambwa atala. Amulange cakuluula ca Chad. Wakakomenena mumukwasyi mobakaindene zikombelo pele lino-lino aawa wakasalwa kuba mwaalu. Mboobu mbwaamba: “Kwamyaka minji, baalu banji bacibwene bakandigwasya kuyaambele kumuuya. Akaambo kakuti bataata tiibakali basyomi, baalu aabo bakandibikkila maano alimwi bakaba mbuli bamataata bakumuuya. Bakajana ciindi cakundiyiisya mumulimo alimwi kumbele mwaalu umwi kumugama wakandiyiisya kulanganya mikuli yamumbungano njondakapegwa.”
8 Kweelana ambocitondezya cakuluula ca Chad, ibeembezi bapampu batalika kuyiisya baabo ibalangilwa kuba bakutausi alimwi abaalu kakucili ciindi cili mbocibede nokuba kuti tabana kweelela kupegwa mikuli iili boobo. Nkaambo nzi eeci ncociyandika kapati? Nkaambo kakuti Ibbaibbele lilailila kuti bakutausi antoomwe abaalu beelede kuba azyeelelo zisumpukide zyakulilemeka alimwi zyakumuuya kabatana kusalwa kubeleka mumikuli eeyo. Beelede “basaangune kulangililwa mbobacita.”—1 Timoteo 3:1-10.
9. Mmukuli nzi baalu basimide ngobajisi, alimwi nkaambo nzi?
9 Ikutegwa bakwesu babbapatizidwe balangililwe, cili kabotu kuti basaangune kuyiisyigwa. Mucikozyanyo: Ikuti naa sicikolo kucikolo waambilwa kulemba musunko kuciiyo cimwi bamayi ncobatakamuyiisya, sena sicikolo inga wazwidilila mumusunko? Kakunyina kuzumbauzya, takonzyi kuzwidilila. Aboobo kuyiisya kulayandika. Pele, bamayi bankutwe balabayiisya basicikolo ikutali buyo kuti babagwasye kuzwidilila mumusunko pele alimwi akubagwasya kulubelesya luzibo ndobajana. Mbubwenya buyo, baalu basungu balabagwasya bakwesu babbapatizidwe kuba abube buyandika kubaalumi babikkidwe kwiinda mukubayiisya cacigaminina. Balacita oobo ikutali buyo kuti bagwasye bakwesu aaba kutegwa bapegwe mikuli pele akuti babagwasye kutegwa bacikonzye kubulanganya kabotu butanga. (2 Timoteo 2:2) Masimpe, bakwesu babbapatizidwe beelede kusolekesya alimwi akubeleka canguzu kutegwa basike azyeelelo ziyandika zyakuba bakutausi alimwi abaalu. (Tito 1:5-9) Pele kwiinda mukulisungula kuyiisya baabo ibali mukuyaambele kutegwa beelele kupegwa mikuli mumbungano, beembezi basimide balakonzya kubagwasya kuyaambele cakufwambaana.
10, 11. Mbuti beembezi mbobakonzya kuyiisya bamwi mikuli aimbi?
10 Mbuti cacigaminina beembezi basimide mbobakonzya kuyiisya bamwi mboibelekwa milimo mumbungano? Cakusaanguna, kwiinda mukubabikkila maano bakwesu mumbungano—kubeleka ambabo lyoonse mumulimo wamumuunda alimwi akubagwasya kuyaambele munzila mbobapandulula “makani aalusinizyo mbukweelede.” (2 Timoteo 2:15) Beembezi basimide balabandika abakwesu aabo lukkomano lujanika mukubelekela bamwi alimwi akukkutila beembezi kubagama nkobajana kwiinda mukubikka akuzuzikizya mbaakani zyakumuuya. Alimwi calubomba balapa nzila zigaminide mbuli mukwesu mbwakonzya kuyaambele akuba “citondezyo cakutobela” kubutanga.—1 Petro 5:3, 5.
11 Mukwesu naasalwa kubeleka kali mukutausi, beembezi basongo balazumanana kumuyiisya. Bruce, iwabeleka kali mwaalu kwamyaka iitandila ku 50 waamba kuti: “Ndilakkomana kujana ciindi cakukkala ansi amukutausi mupya kutegwa ndimutondezya malailile aazwa kumuzike musyomesi uucenjede. Alimwi tulabala kufwumbwa malailile aajatikizya mulimo wakwe kuugama, alimwi ndilakkomana kubeleka anguwe kusikila waiziba mikuli yakwe.” Mukutausi mbwazumanana kuba aluzibo, alimwi ulakonzya kuyiisyigwa mulimo wabweembezi. Bruce ulazumanana kati: “Ndaunka amukutausi munyendo yabweembezi, ndilamugwasya kusala magwalo aagaminide aakonzya kuyumya alimwi akukulwaizya muntu naa mukwasyi ngotuyanda kuswaya. Ikwiiya mbwaayelede kubelesyegwa Magwalo munzila iiyoobanjila mumoyo bantu kulayandika kapati kutegwa mukutausi akabe mweembezi uucibwene kapati.”—Ba-Hebrayo 4:12; 5:14.
12. Mbuti beembezi basimide mbobakonzya kuyiisya baalu bapya?
12 Beembezi bapya abalo balagwasyigwa kapati kulwiiyo alumwi. Nick, iwaambwa musyule waamba kuti: “Kuyiisyigwa nkondakayiisyigwa abalangizi basimide bobile kwakandigwasya kapati. Bakwesu aaba kanji-kanji bakalizi twaambo tumwi mbotwakeelede kulanganizigwa. Lyoonse bakali kundiswiilila cakukkazika moyo akubikkila maano kapati kuzintu nzyondakali kwaamba, noliba leelyo nobakajisi mizeezo iindene ayangu. Zinji nzyondakaiya kwiinda mukulangilila mbobakali kweendelezya bakwesu abacizi mumbungano cakulicesya alimwi cabulemu. Baalu aaba bakandigwasya kubona mbociyandika kulibelesya kabotu Ibbaibbele nondilanganya twaambo antela nondiyumyayumya bamwi.”
Kuyiisyigwa a Jwi lya Leza
13. (a) Ncinzi ncayandika mukwesu kutegwa abe mweembezi uucibwene? (b) Nkaambo nzi Jesu ncaakaambila kuti: “Kwiisya kwangu takuli kwangu ndemwini”?
13 Masimpe, Ijwi lya Leza, Ibbaibbele, lilijisi milawo, njiisyo alimwi azikozyanyo mweembezi nzyayandika kutegwa “azulile kukumana milimo mibotu yoonse.” (2 Timoteo 3:16, 17) Mukwesu ulakonzya kajisi lwiiyo lubotu lwakumubili, pele nduzibo lwamu Magwalo alimwi ambwalubelesya iziyoomugwasya kuba mweembezi uucibwene. Amulange cikozyanyo ca Jesu. Ngonguwe wakali kwiinda kuba aluzibo, ngowakali kwiinda kuba abupampu alimwi ngomweembezi wakumuuya musongo kwiinda muntu uuli woonse wakapona anyika; pele, naba nguwe kunyina naakasyoma busongo bwakwe naakali kuyiisya mbelele zya Jehova. Wakati: “Kwiisya kwangu takuli kwangu ndemwini, nkukwakwe uwakandituma.” Nkaambo nzi Jesu ncaakalemeka Usyi wakujulu? Wakapandulula kuti: “Oyo muntu uulyaambila buyo, nguuliyandawida bulemu bwakwe mwini.”—Johane 7:16, 18.
14. Mbuti beembezi mbobakutantamuka kuliyandawida bulemu?
14 Beembezi basyomeka tabaliyandawidi bulemu. Lulayo lwabo alimwi akuyumyayumya, zizwa mu Jwi lya Leza ikutali mubusongo bwabo. Balizi kuti mulimo wamweembezi nkugwasya mbelele kuba “[a]miyeeyo ya-Kristo,” ikutali miyeeyo yabaalu. (1 Ba-Korinto 2:14-16) Mucikozyanyo, ncinzi cikonzya kucitika ikuti mwaalu iwali kugwasya banabukwetene kumana penzi mulukwatano lwabo wapa lulayo lwakwe luyeeme aaluzibo ndwajisi muciindi cakubelesya njiisyo zyamu Bbaibbele alimwi amakani aakamwaigwa a “muzike musyomesi uucenjede”? (Matayo 24:45) Lulayo lwakwe lulakonzya kuyaama kapati aazilengwa zyakubusena nkwazwa alimwi lulakonzya kujatikizya buyo eezyo nzyazi akaambo kaluzibo lwakwe lusyoonto. Masimpe, zilengwa zimwi kuzigama tazilubide pe, alimwi mwaalu ulakonzya kajisi busongo aluzibo mubuumi. Pele mbelele zilagwasyigwa kapati eelyo beembezi nobazikulwaizya kuswiilila jwi lya Jesu akuzintu nzyaamba Jehova muciindi camizeezo yabantu antela milawo yazilengwa zyankobazwa.—Intembauzyo 12:6; Tusimpi 3:5, 6.
Kuyiisyigwa “[A]muzike Musyomesi Uucenjede”
15. Mmulimo nzi Jesu ngwaakapa “[ku]muzike musyomesi uucenjede,” alimwi nkaambo nzi kamwi kapa ciinga camuzike kuzwidilila?
15 Beembezi mbuli mwaapostolo Petro, Johane alimwi a Paulo boonse bakali cibeela cankamu eeyo Jesu njaakapandulula kuti “muzike musyomesi uucenjede.” Ciinga eeci camuzike cibambidwe abanyina ba Jesu bananikidwe amuuya uusalala ibali anyika, aabo ibajisi bulangizi bwakuyoolela antoomwe a Kristo kujulu. (Ciyubunuzyo 5:9, 10) Muciindi eeci camazuba aaya aamamanino aabukkale oobu, mweelwe wabanyina ba Kristo anyika wayaansi. Nokuba boobo, mulimo Jesu ngwaakabapa kuti baubeleke, wakukambauka makani mabotu aa Bwami mamanino kaatanasika—wayaambele kapati kwiinda lyoonse. Nokuba boobo, ciinga camuzike cazwidilila kapati. Munzila nzi? Inzila imwi njakuti bayiisya ibacibeela “[ca]mbelele zimwi” ikubagwasya mumulimo wakukambauka alimwi akuyiisya. (Johane 10:16; Matayo 24:14; 25:40) Mazubaano, cibeela cipati camulimo ooyu cili mukubelekwa ankamu eeyi iisyomeka yambelele zimwi.
16. Mbuti ciinga camuzike mbociyiisya baalumi basalidwe?
16 Mbuti ciinga camuzike mbociyiisya? Mumwaanda wamyaka wakusaanguna, baiminizi baciinga camuzike bakazumizigwa kuyiisya alimwi akusala balangizi mumbungano, abalo mpoonya bakali kuyiisya bamwi mumbungano. (1 Ba-Korinto 4:17) Mbocibede amazubaano. Kabunga Keendelezya—kakamu kabaalu bananikidwe amuuya ibaiminina ciinga camuzike—kalazumizya baiminizi bankako kuyiisya akusala bakutausi abaalu mumbungano zinji nyika yoonse. Kuyungizya waawo, Kabunga Keendelezya kalabamba zikolo zyakuyiisya ibali mu Kkomiti Yamutabi, balangizi beendeenda, baalu alimwi abakutausi kujatikizya nzila mbotu mbobakonzya kulanganya mbelele. Malailile aambi alapegwa kwiinda mumagwalo, zibalo zimwaigwa mu Ngazi Yamulindizi alimwi akwiinda mumabbuku aambi, mbuli lya Bakamantene Mukucita Kuyanda kwa Jehova. *
17. (a) Mbuti Jesu mbwaatondezya lusyomo kuciinga camuzike? (b) Mbuti beembezi ibabikkila maano kuzintu zyakumuuya mbobatondezya kuti balaalusyomo kuciinga camuzike?
17 Jesu wakali alusyomo kapati muciinga camuzike cakunga wakacibikka kulanganya “zintu zyoonse nzyajisi”—nkokuti zintu zyoonse zyakumuuya zili anyika. (Matayo 24:47) Beembezi babikkidwe abalo balatondezya kuti balijisi lusyomo muciinga camuzike kwiinda mukutobela busolozi mbobapegwa ku Kabunga Keendelezya. Ee, beembezi nobayiisya bamwi, nobazumina kuyiisyigwa a Jwi lya Leza alimwi anobatobela kuyiisyigwa kuzwa kuciinga camuzike, bapa kuti kube lukamantano akati kabutanga. Elo tulalumba kaka kuti Jehova wabayiisya baalumi ibabikkila kapati maano kuli umwi aumwi mumbungano ya Bunakristo!
Bupanduluzi buyungizidwe
^ munc. 16 Lyakamwaigwa a Bakamboni ba Jehova.
Ino Inga Mwaingula Buti?
• Mbuti beembezi basimide ibabikkila maano kuzintu zyakumuuya mbobayiisya bamwi?
• Nkaambo nzi beembezi ncobatayiisyi zyamumizeezo yabo?
• Mbuti, alimwi nkaambo nzi beembezi ncobatondezya lusyomo kuciinga camuzike?
[Mibuzyo yaciiyo]
[Zifwanikiso izili apeeji 24, 25]
Baalu Banakristo balabayiisya baalumi bacili bana-bana mumbungano
[Zifwanikiso izili apeeji 26]
“Muzike musyomesi uucenjede” ulayiisya lwiiyo lunji kubaalu