Ibubotu bwakweenda Cakusyomeka

“Lulongezyo lwa-Jehova lulavubya, alimwi tayungizyi mause kulindulo.”—TUSIMPI 10:22.

1, 2. Nkaambo nzi ncotutayandiki kubikkila kapati maano kubuumi bwakumbele?

“I KUBIKKILA kapati maano kubuumi bwakumbele . . . kutupa kuti tutaboni bubotu kuli zeezyo nzyotujisi lino,” mbwaakaamba oobo haabupampu muna Amelika. Aaya masimpe kujatikizya bana ibayeeya buyo nzyobakonzya kucita baakukomena cakuti tababikkili amaano kububotu bwakuba mwana mane bakomena.

² Nobaba bakombi ba Jehova zimwi ziindi abalo inga bayeeya boobu. Amubone cikonzya kucitika. Tulombozya kuzuzikizigwa kwacisyomezyo ca Leza cakuleta paradaiso anyika. Tulombozya buumi bunyina malwazi, kucembaala, macise alimwi akupenga. Nokuba kuti ncibotu ikulangila zintu zili boobu, ncinzi cikonzya kucitika ikuti twabikkila kapati maano kuzilongezyo zyakumubili zili kumbele cakuti azilongezyo zyakumuuya nzyotujisi lino twacileka kuzibikkila maano? Inga catupa kuusa kaka eeco! Tulakonzya kutyompwa ‘akucisa moyo nkaambo bulangizi mbotwajisi bwasumpizigwa’ kwiinda mpotwali kuyeeyela. (Tusimpi 13:12) Mapenzi abuyumuyumu mubuumi zilakonzya kutupa kutaba abulangizi buliboonse. Muciindi cakuliyumya mubukkale butali kabotu, tulakonzya kutalika kutongooka. Zyoonse eezi tazikonzyi kuba ikuti katuzinzibala kuyeeya azilongezyo nzyotujisi lino.

3. Ncinzi ncotutiibikkile maano mucibalo eeci?

³ “Lulongezyo lwa-Jehova lulavubya, alimwi tayungizyi mause kulindulo,” mbotwaamba Tusimpi 10:22. Sena buvwubi bwakumuuya mbobajisi babelesi ba Jehova bamazuba aano tabuli cilongezyo ceelede kutupa kukkomana? Atulange-lange mbazu zimwi zyabuvwubi bwesu bwakumuuya akubona ncozyaamba kuli umwi  aumwi wesu. Ikulanga-langa zilongezyo Jehova nzyapa “muntu uululeme uuenda cakoololoka” masimpe kuyootugwasya kuzumanana kubelekela Taateesu wakujulu katukkomene.—Tusimpi 20:7.

‘Zilongezyo Zituvubya’ Lino

4, 5. Ninjiisyo iili yamu Bbaibbele iimukonda kapati alimwi nkaambo nzi?

⁴ Tulijisi luzibo lwini-lwini lwanjiisyo zyamu Bbaibbele. Izikombelo zya Bunakristo bwanyika zyaamba kuti zilalisyoma Bbaibbele. Nokuba boobo, balaalilwa kuzuminana anjiisyo nzyoliyiisya. Nobaba baabo banjila cikombelo comwe ikanji-kanji bajisi mizeezo iindene kujatikizya nzyaayiisya Magwalo. Elo bukkale bwabo buliimpene kaka abwababelesi ba Jehova! Kunyina makani acisi, zilengwa naa bukkale motwakakomenena, tukomba Leza wakasimpe ooyo ngotuzi zina. Tali leza wabutatu utazibidwe kabotu. (Deuteronomo 6:4; Intembauzyo 83:18; Marko 12:29) Alimwi tulizi kuti ikaambo kapati kajatikizya bulelo bwa Leza bwakoonse-koonse kayoomanizigwa ino-ino alimwi akuti kwiinda mukuzumanana kusyomeka kulinguwe, aumwi wesu ulijatikizyidwe mukaambo aaka. Tulizi kabotu kujatikizya bafwide alimwi kunyina natukonga Leza ooyo ibanji ngobaamba kuti ulabapenzya bantu mumulilo uutamani naa kubatuma kupuligatoliyo.—Mukambausi 9:5, 10.

⁵ Alimwi, cilakkomanisya kuziba kuti kunyina notwakasanduka buya. Pele tuli zilenge zya Leza, zyakapangwa mucinkozya cakwe. (Matalikilo 1:26; Malaki 2:10) “Njookulumba nkaambo kakugambya kwakulengwa kwangu,” mbwaakaimba sintembauzyo kwiimbila Leza wakwe. “Milimo yako ilagambya; moyo wangu ulizi loko.”—Intembauzyo 139:14.

6, 7. Nkucinca kuli buti mubuumi bwanu naa mubuumi bwabamwi mbomuzi kwamugwasya?

⁶ Tatujatikizyigwi muziyanza alimwi amicito iinyonyoona. Ikucenjezyegwa kujatikizya bubi bwakufweba, kunywa kapati bukoko, akutalilemeka mukoonana kulacitwa kubanamaleya. Bunji bwaziindi, kucenjezya ooku tabakubikkili maano bantu. Pele ncinzi cicitika muntu uujisi miyeeyo mibotu naziba kuti Leza wakasimpe taziyandi zintu zili boobo akuti ulakalazyigwa abaabo ibazicita? Muntu ooyo ulakulwaizyigwa kuzileka zintu eezi zitayandiki. (Isaya 63:10; 1 Ba-Korinto 6:9, 10; 2 Ba-Korinto 7:1; Ba-Efeso 4:30) Nokuba kuti ulacita oobo kutegwa akkomanisye Jehova Leza, kuli zilongezyo nzyajana mwini—buumi buli kabotu alimwi akuliiba.

⁷ Ikuleka ziyanza zitali kabotu cilabakatazya banji. Pele, amwaka zyuulu-zyuulu zyabantu balacita obo. Balalyaaba kuli Jehova akulibombya kwiinda mukubbizyigwa mumeenda, aboobo kuzibya buleya kuti bazileka ziyanza zitamukkomanisyi Leza mubuumi bwabo. Cilatukulwaizya toonse eco. Imakanze eesu aakutayanda kunjila mubuzike bwabukkale bubyaabi alimwi buletela mapenzi, alayumizyigwa.

8. Ndulayo luli buti lwamu Bbaibbele lupa kuti kube lukkomano mumukwasyi?

⁸ Bukkale bukkomanisya mumukwasyi. Muzisi zinji bukkale bwamukwasyi buyaansi. Zikwati zinji zilamana, kanji-kanji bana balacaala kabatyompedwe. Muzisi zimwi zyaku Europe, kuli mikwasyi iijisi muzyali omwe buyo itandila ku 20 pasenti yamikwasyi yoonse. Mbuti Jehova mbwatugwasya kweenda cakusyomeka kujatikizya bukkale bwamukwasyi?  Amubale Ba-Efeso 5:22–6:4, akubona lulayo lubotu Jwi lya Leza ndolipa kubalumi, bamakaintu abana. Ikubelesya zyaambwa aawa alimwi akumbi mu Magwalo masimpe kulagwasya kuyumya lukwatano alimwi akubakomezya kabotu bana kubikkilizya akupona buumi bukkomanisya mumukwasyi. Sena eeci tacili cilongezyo ceelede kutupa kukkomana?

9, 10. Ino bulangizi mbotujisi bwabuumi bwakumbele bwiindene buti abwanyika?

⁹ Tuli alusyomo lwakuti mapenzi aali munyika ino-ino ayoomanizyigwa. Nokuba kuti kuli kuyaambele musayaansi azyakupanga-panga alimwi akusoleka kuli kabotu kucitwa abasololi bamwi, mapenzi aakatazya ngotujisi lino kunyina naamanizyigwa. Klaus Schwab, sikutalisya mbunga iitegwa World Economic Forum, caino-ino wakaamba kuti “mapenzi aaliko munyika ayaabuyaambele pele calo ciindi cakwaalanganya ciyaabuceya.” Wakaamba zya “ntenda zijatikizya masi oonse mbuli lunya lucitwa azigwebenga, kusofwaala kwabusena bukkala bantu alimwi apenzi lyamali.” Schwab wakamanizya amajwi aakuti: “Lino, kwiinda lyoonse, ibantu beelede kubelekela antoomwe akusala cakucita cakufwambaana kutegwa bamane mapenzi aali munyika.” Mbouyaabuyaambele mwaanda wamyaka wa 21, buumi bwakumbele tabuboneki kabotu.

¹⁰ Cilakkomanisya kuziba kuti Jehova wabikka bubambe bukonzya kumanizya mapenzi oonse aalwana bantu—Bwami bwa Leza bwa Mesiya. Kwiinda mulimbubo, Leza wakasimpe ‘uyoolesya inkondo’ akuleta ‘luumuno lunji.’ (Intembauzyo 46:9; 72:7) Imwami munanike, Jesu Kristo, ‘uyoovuna bacete, bapengede, abatengwana kukupenzyegwa.’ (Intembauzyo 72:12-14) Mubweendelezi bwa Bwami, izyakulya zinooli zinji. (Intembauzyo 72:16) Jehova “uyoosindula misozi yoonse kumeso [eesu], takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” (Ciyubunuzyo 21:4) Ibwami bwakakkazikwa kale kujulu alimwi ino-ino buyoobweza ntaamu iiyandika mukumanizya penzi lili lyoonse anyika.—Daniele 2:44; Ciyubunuzyo 11:15.

11, 12. (a) Sena kuyandaula kulikkondelezya kuletela lukkamano mane kukabe kutamani? Amupandulule. (b) Ncinzi cipa lukkomano lwini-lwini?

¹¹ Tulizi ciletela lukkomano lwini-lwini. Ino ncinzi ciletela lukkomano lwini-lwini? Haabupampu umwi kumakani aakwiiya mbobayeeya ambobalilemeka bantu wakaamba kuti lukkomano luli mumbazu zyotatwe—kulikondelezya, kuba acakucita (kutola lubazu mumulimo alimwi amukwasyi) alimwi akukkutila (kubelekela kugwasya bamwi). Akati kambazu zyotatwe eezi, wakaamba kulikondelezya kuti nkokutayandiki kapati akwaamba kuti: “Aka kaambo kalakondelezya kukaambila banamaleya nkaambo kakuti bantu banji babikkila buyo maano kukulikondelezya mubuumi bwabo.” Ino Bbaibbele yaamba nzi kukaambo aaka?

¹² Mwami Solomoni wamu Israyeli yansiku wakati: “Lino ndakaamba mumoyo wangu kuti, Boola usole kukondwa akubona bubotu. Pele ndakajana kuti eci acalo ncabuyo.  Kusekaseka, ndakaamba kuti, Nkusondoka buyo; akukondwa, ndakaamba kuti, Kulagwasya nzi?” (Mukambausi 2:1, 2) Kweelana abwaamba Magwalo, kufwumbwa lukkomano luboola kwiinda mukulikondelezya ndwakaindi buyo kasyoonto. Ino mbuti kujatikizya kutola lubazu mumulimo? Tulijisi mulimo uuyandika kapati motweelede kutola lubazu—imulimo wakukambauka Bwami akugwasya bamwi kuba basikwiiya. (Matayo 24:14; 28:19, 20) Kwiinda mukwaambila bamwi mulumbe walufwutuko waambwa mu Bbaibbele, tutola lubazu mumulimo uukonzya kutupa kufwutuka tobeni abaabo ibatuswiilila. (1 Timoteo 4:16) Mbotuli “basimilimonyina Leza,” tulabona kuti “kupa kuletela cileleko cipati kwiinda kutambula.” (1 Ba-Korinto 3:9; Milimo 20:35, Ci) Ooyu mulimo upa kuti buumi bwesu bube ampindu alimwi upa Mulengi kujana bwiinguzi bwakuvwiila sikumusampaula, Saatani Diabolosi. (Tusimpi 27:11) Masimpe, Jehova watutondezya kuti kulyaaba kuli Leza kuletela lukkomano lwini-lwini mane kukabe kutamani.—1 Timoteo 4:8.

13. (a) Muubuti Cikolo Camulimo Weendelezyegwa a Leza mocili cilongezyo ceelede kutupa kukkomana? (b) Ino ndugwasyo luli buti ndomwajana mu Cikolo Camulimo Weendelezyegwa a Leza?

¹³ Tulijisi bubambe bwalwiiyo buyandika kapati alimwi bugwasya. Gerhard mwaalu mumbungano ya Bakamboni ba Jehova. Wayeeya naakacili mwana, waamba kuti: “Nindakacili mwana ndakajisi penzi lyakwaambaula. Ikuti kandilibilikide, cali kundaalila kwaambaula alimwi ndakali kumamausya kwaamba. Ndaali kulimvwa bubi alimwi akutyompwa. Bazyali bangu bakandilangauda cikolo cakwiiya kwaambaula pele tiicakandigwasya. Ipenzi ndindakajisi lyakali mumizeezo ikutali mumubili. Pele kwakali bubambe bubotu kuzwa kuli Jehova—Cikolo Camulimo Weendelezyegwa a Leza. Nondakalilembya mucikolo eeci cakandikulwaizya. Ndakasoleka canguzu kubelesya nzyondakali kwiiya. Zyakandigwasya! Ndakatalika kukanana cakulikwaya, tiindakacityompedwe alimwi ndakaba sicamba mumulimo. Mane lino ndilakanana amakani aakubuleya. Ndilamulumba kapati Jehova wakandigwasya kuyaambele mubuumi kwiinda mucikolo eeci.” Sena Jehova mbwatuyiisya kucita mulimo wakwe takali kaambo keelede kutupa kukkomana?

14, 15. Ciindi notuli mumapenzi, ndugwasyo luli buti ndotujisi? Amupandulule.

¹⁴ Tulijisi cilongwe a Jehova alimwi tulagwasyigwa abunyina bwanyika yoonse bukamantene. Katrin, uukkala ku Germany wakalilibilikide kapati naakamvwa makani aamuzuzumo wanyika wakacitika mulwaanje ku Asia nkoili kumusanza lwaajwe. Mwanaakwe musimbi wakali kuswaya kucisi ca Thailand ntenda eeyi noyakacitika. Kwamaola aali 32 banyina musimbi ooyu kunyina nobakazi naa wakacili muzumi naa wakali akati kabaabo bakalicisa naa bakafwa ibakali kuyaabuvwula. Elyo wakamvwa kabotu Katrin kumamanino naakatambula luwayile lwakumuzibya kuti mwanaakwe wakali buyo kabotu!

¹⁵ Ncinzi cakamugwasya Katrin mumaola aayo naakali kulibilika? Wakalemba kuti: “Ciindi coonse eeci ndakali kupaila kuli Jehova. Ndakatalika kuba anguzu alimwi akusitikila akaambo kakupaila. Kunze lyaboobo, bakwesu bakumuuya bali aluyando bakandiswaya akundiyumya-yumya.” (Ba-Filipi 4:6, 7) Naakapenga kapati ikuti naakakkala buyo ciindi eeco kakunyina akupaila kuli Jehova alimwi aluumbulizyo kuzwa kubakwesu bakumuuya bali aluyando! Icilongwe cesu a Jehova alimwi a Mwanaakwe kubikkilizya akusangana kwesu abakwesu Banakristo ncilongezyo citaliboteli alimwi tweelede kucibikkila maano kapati.

16. Amupe cikozyanyo citondezya mbobuyandika bulangizi bwabubuke.

¹⁶ Ibulangizi bwakuyoobabona alimwi bayandwa besu bafwide. (Johane 5:28, 29) Mulombwana umwi wazina lya Matthias wakakomezyegwa kali Kamboni wa Jehova. Pele kunyina naakazibikkila maano zilongezyo nzyaakajisi, mpoonya wakaleya mumbungano ya Bunakristo naakacili mukubusi. Lino ulemba kuti: “Kunyina notwakabandikide zintu  zyakali kumoyo abataata. Kwamyaka minji, twakali kuzwangana kapati. Pele, bataata bakacili kuyanda kuti ndibe abuumi bubotu. Bakali kundiyanda kapati, pele tiindakakabona kaambo ncobakali kundiyandila boobo aciindi eeco. Mu 1996 kandikkede kumbali abulo mpobakalede, kandibajatilide kujanza kumwi kandilila cakuusa, ndakabaambila mbondakalivwide kuzintu zyoonse nzyondakacita akuti ndakali kubayanda kapati. Pele kunyina nobakali kukonzya kumvwa nzyondakali kwaamba. Nobakaciswa kwaciindi cisyoonto buyo, bakazimina. Ikuti ndikapone akubabona bataata baakubusyigwa, ndisyoma kuti ndiyoobacitila eezyo nzindatakabacitila. Masimpe bayookkomana kuziba kuti lino ndili mwaalu akuti ndili mupainiya antoomwe amukaintu wangu.” Bubuke ncilongezyo cipati kaka kulindiswe!

“Tayungizyi Mause Kulindulo”

17. Ino kuzinzibala kuyeeya zilongezyo zya Jehova kutugwasya buti?

¹⁷ Kujatikizya Bausi bakujulu, Jesu Kristo wakati: “Ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” (Matayo 5:45) Ikuti Jehova Leza kalongezya nobaba baabo bataluleme alimwi ababi, masimpe ulabalongezya aabo ibeenda cakusyomeka. “Jehova . . . takabakasyi cintu cibotu beenda cakululama,” mboyaamba Intembauzyo 84:11. Ikuti twazinzibala kuyeeya mbwababikkila maano kapati aabo ibamuyanda, tulamulumba kapati alimwi tulakkomana amoyo woonse.

18. (a) Mbuti mbokunga kwaambwa kuti Jehova tayungizyi mause kuzilongezyo zyakwe? (b) Nkaambo nzi ibanji basyomeka kuli Leza ncobapenga?

¹⁸ “Lulongezyo lwa-Jehova”—ndolwavwubya bantu bakwe kumuuya. Alimwi tusyomezyegwa kuti “tayungizyi mause kulindulo.” (Tusimpi 10:22) Ino nkaambo nzi ibanji basyomeka kuli Leza ncobasikilwa masunko amasukusyo, aabaletela macise amause? Kuli twaambo tupati totatwe tutuletela mapenzi. (1) Miyeeyo yesu mibi. (Matalikilo 6:5; 8:21; Jakobo 1:14, 15) (2) Saatani amadaimona aakwe. (Ba-Efeso 6:11, 12) (3) Inyika mbyaabi. (Johane 15:19) Nokuba kuti Jehova ulazumizya zintu zibyaabi kutucitikila, taasyi nguwe uupa kuti zitucitikile. Mubwini “zipego zyoonse zibotu azilondokede zilazwa kujulu kuli Taata wakalenga mimuni.” (Jemusi 1:17, Ci) Zilongezyo zya Jehova tazipi kuusa.

19. Ncinzi ncobalangila aabo ibazumanana kweenda cakusyomeka?

¹⁹ Ikuba abuvwubi bwakumuuya kanji-kanji kubikkilizya kuba acilongwe cibotu a Leza Twaba acilongwe cibotu anguwe, ‘tuliyobweda intalisyo mbotu yaciindi ciciza, kuti tujatisye buumi bwinibwini’—buumi butamani. (1 Timoteo 6:12, 17-19) Munyika ya Leza mpya, tuyoovwuba kumuuya akumubili. Ibuumi bwini-bwini buzwide zilongezyo mbobuumi mbobayoopona boonse aabo ‘baswiilila ijwi lya Jehova.’ (Deuteronomo 28:2) Mbotwayumizyigwa, atuzumanane kweenda cakusyomeka kumwi katukkomene.

Ino Mwaiya Nzi?

• Nkaambo nzi ncocitali kabotu ikubikkila kapati maano mbobuyooba buumi kumbele?

• Nzilongezyo zili buti nzyotujisi lino?

• Ino nkaambo nzi babelesi ba Leza basyomeka ncobapengela?

[Mibuzyo yaciiyo]