Mibuzyo Yabasikubala

Ncinzi cipa kuti “zintu ziyandisi zyazisi zyoonse” ziboole mu “ŋanda” yabukombi bwakasimpe?—Hagai 2:7.

Kwiinda mumusinsimi Hagai, Jehova wakasinsima kuti: “Njoozungaanya zisi zyoonse, kuti zintu ziyandisi zyazisi zyoonse ziboole, elyo njoozuzya iŋanda eyi bulemu.” (Hagai 2:7) Sena kuzungaanizigwa kwa “zisi zyoonse” nkokupa “zintu ziyandisi” zyazisi—bantu babombemyoyo—ikutambula kasimpe? Ibwiinguzi mbwakuti peepe.

Amubone cizungaanya zisi alimwi ancokuleta kuzungaanya ooku. Ibbaibbele lyaamba kuti ‘bamasi batingila alimwi bantu bayeeya zyabuyo.’ (Intembauzyo 2:1) ‘Zyabuyo nzyobayeeya’ nkuzumanana abulelo bwabo. Kunyina cibayoosya kapati kwiinda ceeco cinyonganya bweendelezi bwabo.

Ikukambaukwa kwa Bwami bwa Leza bukkazikisidwe kucitwa nyika yoonse a Bakamboni ba Jehova kulabayoosya kapati bamasi. Kayi Ibwami bwa Leza bwa Mesiya bweendelezyegwa a Jesu Kristo “buyoopwayaula akumanisya mami [aabantu] aya oonse.” (Daniele 2:44) Imulumbe walubeta uubikkilizidwe mumulimo wesu wakukambauka ulaazungaanya masi. (Isaya 61:2) Alimwi kuzungaana ooku kuyaabwiindila mulimo wakukambauka mbouyaabuyaambele. Ino kuzungaanya kwakasinsimwa kuli Hagai 2:7 kwiiminina nzi?

Kuli Hagai 2:6, tubala kuti: “Mbuboobu mbwaamba Jehova wamakamu. Kusyeede kaindi kaniini buyo, elyo njoozungaanya ijulu anyika alwizi ansi injumu.” Kazubulula kukapango aaka, imwaapostolo Paulo wakalemba kuti: “Wasyomezya wati, Eno kwasyaala lumwi luzutu kudidimya. Nsikooyoodidimya insi ilike, pe, ndiyoolididimya alyalo ijulu. Eno eli ijwi lyakuti ‘Kwasyaala lumwi luzutu’ nkukwaamba kuti kuyoososololwa zeezyo zizungaanizigwa, mbuli zintu izyakalengwa buyo, kuti ezyo zitazungaanizikwa [Ibwami] zikasyaale.” (Ba-Hebrayo 12:26, 27) Inzya, ibukkale bwamazuba aano boonse buyoogusyigwa akunjililwa busena anyika mpya eeyo Leza njayoobamba.

Bantu babombemyoyo balaboola mubukombi bwakasimpe ikutali akaambo kakuti masi azungaanizigwa. Icibapa kuboola kuli Jehova abukombi bwakwe ncecipa imasi kuzungaana, nkokuti ikukambaukwa kwa Bwami bwa Leza bukkazikisidwe ikucitwa nyika yoonse. Ikwaambilizyigwa kwa “Makani Mabotu aateeli” kupa kuti bantu bajisi miyeeyo mibotu bazumine bukombi bwa Leza wakasimpe.—Ciyubunuzyo 14:6, 7.

Imulumbe wa Bwami mmulumbe walubeta alufwutuko. (Isaya 61:1, 2) Imakanze aakukambauka mulumbe wa Bwami nyika yoonse ali mumbazu zyobilo: ikuzungaanya masi akuyoboloka kwazintu ziyandisi zyazisi kukutembaula Jehova.