Sena Mulilibambilide Kuyoofwutuka?
Sena Mulilibambilide Kuyoofwutuka?
“Njila mubwaato, webo abeŋanda bako boonse, nkaambo nduwe olike ngombwene kuti uliluleme mumeso aangu akati kabasyasunu.”—MATALIKILO 7:1.
1. Mbubambe nzi bwakufwutukila Jehova mbwaakabikka kumazuba a Nowa?
JEHOVA ‘wakapazya maanzi kulibasikasampusampu boonse baansi’ kumazuba aa Nowa, pele alimwi wakabikka bubambe bwakufwutukila. (2 Petro 2:5) Leza mwini-mwini wakapa Nowa malailile aagaminide ambwaakeelede kuyaka bwato kutegwa afwutuke zambangulwe. (Matalikilo 6:14-16) Mbubwenya mbotukonzya kulangila mubelesi wa Jehova uusyomeka, “wakacita mbubonya mbuli Leza mbwaakamulailila.” Inzya, “Nowa wakacita obo.” Munzila imwi tulapona akaambo kakusyomeka kwa Nowa.—Matalikilo 6:22.
2, 3. (a) Ino mbocakali kupona limwi a Nowa bakaubona buti mulimo ngwaakali kucita Nowa? (b) Ndusyomo luli buti ndwaakajisi Nowa naakanjila mubwato?
2 Ikuyaka bwato wakali mulimo muyumu kapati. Kuboneka kuti, bantu banji bakagambwa amulimo Nowa amukwasyi wakwe ngobakali kucita. Pele, eeco tiicakabapa kusyoma kuti kutegwa bafwutuke bakaleelede kunjila mubwato. Kumamanino, Leza wakaleka kukkazika moyo kubantu bakali kucita zibi.—Matalikilo 6:3; 1 Petro 3:20.
3 Nowa amukwasyi wakwe nobakamana kubeleka mulimo muyumu kwamakumi aamyaka, Jehova wakaambila Nowa kuti: “Njila mubwaato, webo abeŋanda bako boonse, nkaambo nduwe olike ngombwene kuti uliluleme mumeso aangu akati kabasyasunu.” Kajisi lusyomo mujwi lya Jehova, “Nowa wakanjila mubwaato, walo abanakwe abanabakwe abamukabana bakwe.” Jehova wakajala mulyango kutegwa akwabilile bakombi bakwe. Nolyakaboola Zambangulwe anyika, ibwato bwakaba bubambe bugwasya mukufwutula bantu.—Matalikilo 7:1, 7, 10, 16.
Kukozyanya Kuliko Akati Kamazuba Aano Amazuba aa Nowa
4, 5. (a) Nkuunzi Jesu nkwaakakozyanisya ciindi cakubako kwakwe? (b) Nkukozyanya kuli buti kuliko ciindi cino akwakaliko kuciindi ca Nowa?
4 “Kuboola kwa-Mwana a-Muntu kuyooba mbuli kumazuba aa-Nowa.” (Matayo 24:37) Kwiinda mukwaamba boobu Jesu wakatondezya kuti ciindi cakubako kwakwe ikutalibonyi cakali kuyooba mbubwenya mbocakabede kumazuba aa Nowa, alimwi oobo mbocibede. Ikapati kuzwa mu 1919, ikucenjezya mbuli nkwaakacita Nowa kwalikwaambilizyigwa kubantu bamisyobo yoonse. Kanji-kanji, ikucenjezya ooku bantu bakubona mbubwenya mbobakali kukubona bantu bakumazuba aa Nowa.
5 Kwiinda mu Zambangulwe, Jehova wakabweza ntaamu kunyonyoona nyika ‘yakazwide luuni.’ (Matalikilo 6:13) Kutatola lubazu kwa Nowa amukwasyi wakwe muluuni luli boobo akuzumanana muluumuno amulimo wakuyaka bwato bakakubona bantu boonse ibakali kubalangilila. Aalo aawa tubona kukozyanya kuliko amazuba ngotupona. Bantu bajisi myoyo mibotu lino balakonzya ‘kubona lwaandaano luliko akati kabaluleme ababi, aakati kabaabo babelekela Leza abaabo batamubelekeli.’ (Malaki 3:18, BT) Ikusyomeka, buuya, luumuno abupampu nzyobatondezya Bakamboni ba Jehova balazilombozya bantu bajisi miyeeyo mibotu alimwi ibube oobu bulabaandaanya bantu ba Leza kubantu bamunyika. Bakamboni tabatoli lubazu mukulwana kuli koonse alimwi mbantu basololelwa amuuya wa Jehova. Nkakaambo kaako bali aluumuno alimwi batobela nzila iiluleme.—Isaya 60:17.
6, 7. (a) Ncinzi bantu kumazuba aa Nowa ncobakakakilwa kubona, alimwi mbuti mbobeelene akumazuba aano? (b) Nzikozyanyo zili buti zitondezya kuti Bakamboni ba Jehova balizibidwe abantu banji kuti baliindene?
6 Mbocakali kupona limwi a Nowa bakakakilwa kubona kuti Nowa wakali kugwasyigwa a Leza akuti wakali kutobela malailile aa Leza. Kunyina nobakaubikkila maano mulumbe wakwe wakucenjezya, aboobo tiibakabweza ntaamu yakali kuyandika. Ino mbuti mazuba aano? Nokuba kuti ibanji balakkomana amulimo alimwi abukkale bwa Bakamboni ba Jehova, bunji bwabo makani mabotu alimwi akucenjezya kwamu Bbaibbele tabazibikkili maano. Basimukoboma, basikutulemba ncito naa basazima balakonzya kubalumbaizya akaambo kabube bubotu mbobajisi Banakristo bakasimpe pele kumwi kabatongooka kuti, “Cabija buyo kuti Mbaakamboni ba Jehova!” Ncobatazi basikulangilila aaba ncakuti Bakamboni batondezya bube oobu, luyando, luumuno, buuya, bubotu, kubomba moyo akulyeendelezya akaambo kakuti beendelezyegwa amuuya uusalala wa Leza. (Ba-Galatiya 5:22-25) Eeci ceelede kubapa kaambo ncobeelede kuusyoma mulumbe ngobakambauka.
7 Mucikozyanyo, ku Russia, Bakamboni ba Jehova bakali kuyaka Ŋanda ya Bwami. Imwaalumi wakaima akwaambaula amubelesi umwi kati: “Tabuliboteli busena oobu mpomubelekela—kunyina uufweba, waamba zyacisapi alimwi boonse kunyina uukoledwe! Sena ndinywe Bakamboni ba Jehova?” Mubelesi wakamubuzya kuti, “Ikuti ndati peepe, sena inga mwandisyoma?” Mwaalumi uulya wakavwiila kuti, “Peepe.” Mudolopo aimbi yaku Russia nkweena, mweendelezi wadolopo wakakkomana kapati naakabona Bakamboni kabayaka Ŋanda ya Bwami yabo mpya. Wakati nokuba kuti wakali kubona zikombelo zyoonse kuti zileelene, naakabona kulyaaba kwa Bakamboni ba Jehova, tanaakababona kabili munzila eeyo. Eezi nzikozyanyo zyobilo buyo zitondezya kuti bantu ba Jehova baliindene abaabo ibatatobeli zyeelelo zyamu Bbaibbele.
8. Ino ncinzi ciyootupa kufwutuka mamanino aanyika mbyaabi eeyi?
8 Kumamanino aa “nyika yakalekale” yakanyonyoonwa a Zambangulwe, Nowa wakali “mukambausi wabululami” uusyomeka. (2 Petro 2:5) Kumazuba aakumamanino aabukkale bwamazuba aano, bantu ba Jehova baambilizya zyeelelo zya Leza ziluleme alimwi bakambauka makani mabotu kujatikizya mbocikonzyeka kuyoofwutuka kunjila munyika mpya. (2 Petro 3:9-13) Mbubwenya mbuli Nowa amukwasyi wakwe wakali kuyoowa Leza mbobakakwabililwa mubwato, kufwutuka kwabantu sunu kuyeeme alusyomo ndobajisi, kusangana akusyomeka kwabo kumbunga ya Jehova yaanyika.
Lusyomo Lulayandika Kutegwa Tukafwutuke
9, 10. Nkaambo nzi lusyomo ncoluyandika kapati ikuti katuyanda kuyoofwutuka mamanino aabukkale bwamazuba aano bwa Saatani?
9 Ncinzi muntu ncayelede kucita kutegwa akafwutuke lunyonyoonko luboola lwanyika eeyi yeendelezyegwa a Saatani? (1 Johane 5:19) Kusaanguna weelede kumvwisya mbokuyandika kukwabililwa. Mpoonya weelede kulisungula kugwasyigwa alukwabililo oolo. Ibantu bakumazuba aa Nowa bakazumanana amilimo yabo mbuli mbobakali kucita lyoonse alimwi kunyina nobakakubikkila maano kukwabililwa kuntenda yakali kuboola. Kuli acimbi ncobakabulide—lusyomo muli Leza.
10 Kulubazu lumwi, Nowa amukwasyi wakwe bakabona mbokwakali kuyandika kukwabililwa alimwi akufwutulwa. Alimwi bakali alusyomo mu Mwami wa Bubumbo boonse, Jehova Leza. “Kuti kakwiina lusyomo tacikonzeki kukonda Leza,” mbwaakalemba obo mwaapostolo Paulo, “nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” Paulo wakayungizya kuti: “Alimwi Nowa, naakacenjezegwa a-Leza kumakani aazintu izyatalina kubonwa, lusyomo ndolwakamugulunganya kubeza bwaato bwakufutusizya bana bakwe, aboobo wakiisampaula inyika, nkabela wakaba sikujana bululami obo buzwa kulusyomo.”—Ba-Hebrayo 11:6, 7.
11. Ncinzi ncotukonzya kwiiya munzila Jehova mbwaakakwabilila bantu bakwe lyansiku?
11 Kutegwa tukafwutuke mamanino aabukkale bwamazuba aano bubyaabi, nzinji nzyotweelede kucita kunze lyakwiile kusyoma kuti buyoonyonyoonwa. Tweelede kuba alusyomo muzipego nzyatupede Leza kutugwasya kuyoofwutuka alimwi akutondezya lusyomo oolu kwiinda mukuzibelesya. Inzya, tuyandika kuba alusyomo mucituuzyo cacinunuzyo ca Mwana wa Leza Jesu Kristo. (Johane 3:16, 36) Nokuba boobo, tutalubi kuti balikke aabo ibakanjide mukati kabwato bwa Nowa mbabakafwutuka Zambangulwe. Mbubwenya buyo, minzi yamayubilo yakali mu Israyeli yansiku yakali kukwabilila muntu iwajaya muntunyina cakutaziba lelikke kuti watijila mumunzi uuli boobo akuzumanana kali mumunzi mweena oomo kusikila mupaizi mupati akafwe. (Myeelwe 35:11-32) Mucipenzyo cakkumi cakapegwa mu Egepita kumazuba aa Musa, bana basankwa bakusaanguna babana Egepita bakajaigwa pele aabo babana Israyeli bakafwutulwa. Nkaambo nzi? Jehova wakaambilide Musa kuti: “[Bana Israyeli] baleelede kukombola bulowa [bwamwanaambelele wapobwe lya Kwiindilila] akububika kuminsende yoonse yobile akucikunguzyo kumaanda nkobayoolida. . . . Lino kutabi naba omwe akati kanu uuzwa muŋanda yakwe mane bukace.” (Kulonga 12:7, 22) Nguli mwana wakusaanguna akati kabana ba Israyeli wakali kukonzya kuunduluzya malailile aaya aakapegwa a Leza kwiinda mukuzwa muŋanda iilambikidwe bulowa kuminsende yobilo alimwi akucikunguzyo?
12. Mubuzyo uuli buti aumwi ngwayelede kulibuzya alimwi nkaambo nzi?
12 Aboobo tujisi twaambo tweelede kutupa kuyeeyesya kujatikizya bukkale bwesu. Sena mubwini tuli mukati kabubambe bwa Jehova bwabukwabilizi bwakumuuya? Mapenzi mapati aakusika, aabo ibayandaula bukwabilizi oobu bayoozwa misozi yakukondwa akulumba. Kuli bamwi kunooli buyo misozi yabuumba akuusa.
Kucinca Kuyaabucitika Bucebuce Kulatugwasya Kulibambila
13. (a) Ino kucinca kwali kucitika mumbunga kugwasya nzi? (b) Amupandulule kucinca kumwi kwacitika bucebuce.
13 Jehova wapa zintu kucinca bucebuce mumbunga yakwe yaanyika. Kucinca ooku kulabotya alimwi kulayumya bubambe bwakwe bwakutukwabilila kumuuya. Kuzwa muma 1870 kusika mu 1932, baalu abadikoni bakali kuvwootelwa buya abantu bamumbungano. Mu 1932 baalu ibakali kuvwootelwa buya bakanjililwa busena akkomiti yamulimo iisalidwe ambungano kugwasyilizya mweendelezi wamulimo uubikkidwe. Mu 1938, kwakabikkwa bubambe bwakuti babelesi boonse mumbungano kababikkwa kweelana anjiisyo zyamu Bbaibbele. Kwiinda mubusolozi bwa Kabunga Keendelezya ka Bakamboni ba Jehova, kutalikila mu 1972, kusalwa kulacitwa alimwi ikuti naa kwazuminwa, mbungano zilatambula magwalo aazumizya kusalwa kwabalangizi abakutausi kweelana anjiisyo zyamu Bbaibbele. Kwamyaka iili mbwiibede yainda, imulimo ngokacita Kabunga Keendelezya wakomena alimwi kuli kucinca kwacitwa kutegwa mulimo wabo weende kabotu.
14. Mbubambe buli buti bwalwiiyo bwakatalikwa mu 1959?
14 Mu 1950, kulanga-langa Intembauzyo 45:16 kwakapa kuti kube bubambe bwalwiiyo luyaabuyaambele. Lugwalo oolo lwaamba kuti: “Mucibaka cabamauso kuyooba bana bako; uyoobacita kuba bami munyika yoonse.” Baalu ibasololela lino mumbungano balayiisyigwa kutegwa babeleke mulimo ngobapedwe a Leza lino ayaakwiinda Amagedoni. (Ciyubunuzyo 16:14, 16) Cikolo Camulimo wa Bwami cakatalikwa mu 1959. Aciindi eeco, lwiiyo lutola mwezi omwe lwakatalikwa ikapati kubabelesi bambungano mbuli mbobakali kwiitwa balangizi beendelezya eeco ciindi. Eeci cikolo lino cakabambululwa kutegwa cibikkilizye lwiiyo lwa balangizi abakutausi boonse. Mpoonya, bakwesu aaba abalo balatalika kuyiisya Kamboni wa Jehova aumwi mumbungano mobazulilwa. Aboobo, boonse balagwasyigwa kumuuya alimwi akuyaambele mumulimo wabo mbobali basikwaambilizya makani mabotu aa Bwami.—Marko 13:10.
15. Ninzila nzi zyobilo busalali bwambungano ya Bunakristo mobukwabililwa?
15 Bantu bayanda kusangana mbungano ya Bunakristo beelede kuzuzikizya zyeelelo zimwi. Nkakaambo kaako, basikusampaula bamazuba aano tabazumizidwe kuboola mumbungano ya Bunakristo mbubwenya mbubatakazumizigwa kunjila mubwato bwa Nowa. (2 Petro 3:3-7) Ikapati kutalikila mu 1952, Bakamboni ba Jehova babutobela kapati bubambe bugwasya kukwabilila mbungano—nkokuti, ikugusyigwa kwabasikubisya bateempwi. Inzya, basikucita zibi ibeempwa ncobeni balagwasyigwa caluyando ‘kweenzya maulu aabo munzila ziluzi.’—Ba-Hebrayo 12:12, 13; Tusimpi 28:13; Ba-Galatiya 6:1.
16. Mbukkale buli buti bwakumuuya mobabede bantu ba Jehova?
16 Buvwubi bwakumuuya bwabantu ba Jehova tabugambyi alimwi tabulicitikili bolikke. Kwiinda mumusinsimi Isaya, Jehova wakati: “Balanda bangu bayoolya, pele inywe muyoofwa inzala. Balanda bangu bayoonywa, pele inywe muyoofwa nyota. Balanda bangu bayoosekelela, pele inywe muyoousa insoni. Balanda bangu bayooimba cakukondwa mumoyo, pele inywe muyoolila mumause aamyoyo yanu, muyoomoka mukupenga kwamyuuya yanu.” (Isaya 65:13, 14) Jehova ulazumanana kutupa cakulya cakumuuya cinji cabusani bubotu aciindi ceelede citugwasya kuba bantu bayumu kumuuya.—Matayo 24:45.
Amulibambile Kuyoofwutuka
17. Ncinzi ciyootugwasya kulibambila kuyoofwutuka?
17 Kwiinda lyoonse, ecino nceciindi ‘cakuyeeyana, kubusyanya-busyanya mukuyandana akucita milimo mibotu akutaleka kulibunga-bunga, mbuli bamwi mbubaleka, pele kucenjezyanya twaambo.’ (Ba-Hebrayo 10:23-25) Kusangana alimwi akutola lubazu cabusungu mumbungano imwi akati kambungano ziinda ku 98,000 zya Bakamboni ba Jehova, kuyootugwasya kulibambila kuyoofwutuka. Basyomima bayootugwasya notusoleka kulisamika “buntu bupya” akulyaaba camoyo woonse kugwasya bamwi kuziba zyabubambe mbwabikkide Jehova bwakufwutukila.—Ba-Efeso 4:22-24; Ba-Kolose 3:9, 10; 1 Timoteo 4:16.
18. Nkaambo nzi kamupa kuzumanana kusangana ambungano ya Bunakristo?
18 Saatani anyika yakwe mbyaabi balayandisya kutoongelezya akutupa kuleya kuzwa kumbungano ya Bunakristo. Pele, tulakonzya kuzumanana mumbungano ya Bunakristo alimwi tulakonzya kufwutuka mamanino aabukkale bwamazuba aano bubyaabi. Luyando ndotujisi kuli Jehova alimwi akulumba kububambe bwakwe zyeelede kutukulwaizya kumukazya Saatani mumakanze aakwe. Kuzinzibala kuyeeya kujatikizya zilongezyo nzyotujisi kuyootuyumya kuzumanana akusala kwesu. Zimwi zyazilongezyo eezi ziyoobandikwa mucibalo citobela.
Ino Mwiingula Buti?
• Mbuti mazuba esu mbwakozyene amazuba aa Nowa?
• Mbube nzi buyandika kutegwa tukafwutuke?
• Nkucinca kuli buti kucitika bucebuce kwayumya bubambe bwa Jehova bwakutukwabilila?
• Mbuti mbotukonzya kulibambila kuyoofwutuka?
[Mibuzyo yaciiyo]
[Cifwanikiso icili apeeji 8]
Mbocakali kupona limwi a Nowa kunyina nobakabikkila maano kulinzyaakali kwaamba
[Cifwanikiso icili apeeji 9]
Cilagwasya kubikkila maano kumilumbe yakucenjezya ya Leza
[Cifwanikiso icili apeeji 10]
Ino Cikolo Camulimo wa Bwami cijisi mulimo nzi?
[Cifwanikiso icili apeeji 11]
Ecino nceciindi cakukakatila kumbungano ya Bunakristo