Bakazyalwa Kumusyobo Wabantu Basalidwe A Leza

“Jehova Leza wanu wamusala, . . . kuti mube bantu bakwe.”—DEUTERONOMO 7:6.

1, 2. Mmilimo iilibuti mipati Jehova njaakacitila bantu bakwe, alimwi ncilongwe cili buti bana Israyeli ncobakaba ancico a Leza?

MU 1513 B.C.E., Jehova wakapa babelesi bakwe anyika kuba acilongwe cipya anguwe. Mumwaka ooyo, wakasampaula bwami bwakali kweendelezya nyika yoonse akufwutula bana Israyeli kuzwa mubuzike. Kwiinda mukucita boobu, wakaba Mufwutuli wabo a Mukamwini. Katanabweza ntaamu, Leza wakaambila Musa kuti: “Ambila bana ba-Israyeli kuti, Ndime Jehova. Njoomulemununa kumikuli milemu yaba-Egepita akumuvuna kubuzike bwabo. Njoomufutula akuboko kutandabikidwe ambeta impati. Njoomutambula, mube bantu bangu, ambebo njooba Leza wanu.”—Kulonga 6:6, 7; 15:1-7, 11.

² Mbubakazwida mu Egepita, bana Israyeli bakanjila mucizuminano a Leza, Jehova. Muciindi cakweendelezya muntu aumwi, mukwasyi naa mikowa, kuzwa ciindi eeco Jehova wakali abantu bakamantene, musyobo omwe anyika. (Kulonga 19:5, 6; 24:7) Wakapa bantu bakwe milawo yakali kubasololela mubuumi bwabo alimwi iciyandika kapati, mubukombi bwabo. Musa wakabaambila kuti: “Sa kuli musyobo umbi mupati uuli a-Leza uuli kufwaafwi mbubonya mbuli Jehova Leza wesu mbwali kufwaafwi kulindiswe kufumbwa ciindi netumwiita? Alimwi sa kuli musyobo umbi mupati uuli amilazyo ambeta ziluleme mbuli milao eyi yoonse njendamubikkila buzuba obuno?”—Deuteronomo 4:7, 8.

Bakazyalwa Kumusyobo wa Bakamboni

3, 4. Nkaambo nzi kapati bana Israyeli nkobakali kuponena?

³ Nokwakainda myaanda yamyaka, Jehova wakayeezya bana Israyeli, kwiinda mumusinsimi Isaya, ikaambo kayandika kapati nkobakali kuponena. Isaya wakati: “Mbuboobu mbwaamba Jehova, ngonguwe iwakakulenga O Jakobo, ngonguwe iwakakubumba O Israyeli. Utayoowi, nkaambo ndakunununa, ndakwiita kuzina lyako, uli wangu. Nkaambo ndime Jehova Leza wako, Uusalala wa-Israyeli, Mufutuli wako. . . . Leta bana bangu kuzwa kule abana bangu basimbi kuzwa kumagolelo aanyika. Leta boonse, kufumbwa uuambwa muzina lyangu, ngundakalengela bulemu bwangu. Ndime ndakamubumba, ndime ndakamwaanza. Ndinywe bakamboni bangu, mbwaamba Jehova, alakwe mulanda wangu ngundisalide, . . . bantu mbendakalibumbila  kuti banditembaule.”—Isaya 43:1, 3, 6, 7, 10, 21.

⁴ Mbobakali bantu baitwa azina lya Jehova, bana Israyeli bakali kunoopa bumboni kubweendelezi bwakwe kumasi ambi. Bakali kunooli bantu ‘bakalengelwa bulemu bwa Jehova.’ Bakaleelede ‘kutembaula Jehova,’ kuluula milimo yakwe yalufwutuko iiyoosya kucita kuti batembaule izina lyakwe lisalala. Mubufwaafwi, bakaleelede kuba musyobo wabakamboni ba Jehova.

5. Muunzila nzi bana Israyeli mobakali musyobo ulyaabide?

⁵ Mumwaanda wamyaka wa 11 B.C.E., Mwami Solomoni wakatondezya kuti Jehova wakawaandaanya musyobo wa Israyeli. Kapaila kuli Jehova, wakati: “Nduwe wakabaandaanya kuzwa kumisyobo yoonse yaansi, kuti babe caabilo cako.” (1 Bami 8:53) Awalo muna Israyeli aumwi wakajisi cilongwe cilibedelede a Jehova. Musyule, Musa wakabaambilide kuti: “Muli bana ba-Jehova Leza wanu. . . . Nkaambo muli bantu basalalisya kuli-Jehova Leza wanu.” (Deuteronomo 14:1, 2) Aboobo, bana Israyeli bana-bana, tiibakali kuyandika kulyaaba kuli Jehova. Bakazyalwa kabali akati kabantu ba Leza balyaabide. (Intembauzyo 79:13; 95:7) Zyalani alimwi lipya lyakali kulaililwa milawo ya Jehova alimwi lyakeelede kwiitobela akaambo kacizuminano cakali kuswaanganya Israyeli kuli Jehova.—Deuteronomo 11:18, 19.

Bakalaangulukide Kulisalila Aumwi

6. Nkusala kuli buti muna Israyeli aumwi nkwaakayelede kucita?

⁶ Nokuba kuti bana Israyeli bakazyalwa kumusyobo ulyaabide, aumwi wakaleelede kulisalila kubelekela Leza. Kabatananjila mu Nyika Yakasyomezyegwa, Musa wakabaambila kuti: “Ndatamba ijulu anyika buzuba obuno, kuti zyoonse zibe bakamboni bangu, kuzibwe kuti buumi alufu, lulongezyo alutuko, zyoonse ndazibika kuti mulisalile. Amusale buumi, kuti mupone, nywebo abana banu. Amuyandisye Jehova Leza wanu, amuswiilile ijwi lyakwe, amumukakatile, nkaambo kucita obo kulamuletela buumi akoongola, kuti mukale munyika eyo Jehova njaakakonkezya kupa bamausowanu, Abrahamu a-Izaka a-Jakobo.” (Deuteronomo 30:19, 20) Aboobo, muna Israyeli aumwi wakaleelede kusala kuyanda Jehova, kuswiilila ijwi lyakwe akukakatila kulinguwe. Mbwaanga bana Israyeli bakajisi nguzu zyakulisalila, bakaleelede kunyamuna mukuli wazintu zyakali kuyootobela akaambo kakusala kwabo.—Deuteronomo 30:16-18.

7. Ncinzi cakacitika nolyakafwa zyalani lya Joshua?

⁷ Ciindi nokwakali Babetesi cilatondezya kabotu-kabotu zitobela akaambo kakusyomeka alimwi akutasyomeka. Kacitanatalika ciindi eeco, bana Israyeli bakatobela cikozyanyo cibotu ncaakapa Joshua alimwi bakalongezyegwa. “Bantu bakamanina Jehova milimo mazuba oonse ngaakapona Joshua, amazuba oonse aabapatinyina ibakacili kupona Joshua naakamana kufwa, ibakabwene incito zigambya zya-Jehova ngaakacitila ba-Israyeli.” Nokuba boobo, nokwakainda ciindi kuzwa naakafwa Joshua, “kwakabuka izyalani alimwi iipya musule lyabo, ilyatakezi Jehova niziba incito zyakwe nzyaakacitila ba-Israyeli. Lino bana ba-Israyeli bakacita bubi mumeso aa-Jehova.” (Babetesi 2:7, 10, 11) Kuboneka kuti, izyalani lyabana bakali kuzya kumbele kunyina nobakabikkila maano kucikono cabo cakuba akati kabantu balyaabide, aabo Leza wabo, Jehova, mbaakacitila milimo mipati musyule.—Intembauzyo 78:3-7, 10, 11.

Kupona Kweelana Akulyaaba Kwabo

8, 9. (a) Mbubambe buli buti bwakabagwasya bana Israyeli kutondezya kulyaaba kwabo kuli Jehova? (b) Ino mbuti aabo bakatuula zituuzyo zyakuliyandila mbobakagwasyigwa?

⁸ Jehova wakapa bantu bakwe coolwe cakupona kweelana akulyaaba kwabo kabali musyobo. Mucikozyanyo, Mulawo wakwe wakalijisi bubambe bwazipaizyo naa zituuzyo, zimwi zyanzizyo zyakali kuyandika kumuntu uuli oonse kweelana amulawo, pele zimwi zyakali zyakuliyandila. (Ba-Hebrayo  8:3) Zipaizyo eezi zyakali kubikkilizya zituuzyo zitentedwe, zyabusu azyakutontozya zyalo zyakali zyakuliyandila—zipego zyakali kupegwa kuli Jehova kutegwa muntu akkomaninwe alimwi akutondezya kulumba.—Levitiko 7:11-13.

⁹ Eezyo zipaizyo zyakuliyandila zyakali kumukkomanisya Jehova. Zituuzyo zitentedwe azyabusu zyakali kwaambwa kuti zyakali “abweema bubotu bwakubotezya Jehova.” (Levitiko 1:9; 2:2) Mucipaizyo cakutontozya, ibulowa amafwuta aamunyama zyakali kupegwa kuli Jehova, kakuli zibeela zimwi zyakali kuligwa abapaizi kubikkilizya asikutuula. Aboobo cakali cakulya cacitondezyo calo cakali kwiiminina cilongwe cibotu a Jehova. Imulawo wakati: “Na mwatuulila Jehova cituuzyo cakutontozya, amucituule kuti citambulike.” (Levitiko 19:5) Nokuba kuti bana Israyeli boonse bakalilyaabide kuli Jehova mbobazyalilwa buyo, aabo ibakali kuyandisya kusala Jehova kali Leza wabo kwiinda mukutuula zituuzyo zyakuliyandila ‘bakatambulwa’ alimwi akulongezyegwa kapati.—Malaki 3:10.

10. Ino mbuti Jehova mbwaakatondezya kutakkomana kumazuba ngaakali kupona Isaya alimwi a Malaki?

¹⁰ Nokuba boobo, kanji-kanji imusyobo uulyaabide wa Israyeli tiiwakali kusyomeka kuli Jehova. Kwiinda mumusinsimi Isaya, Jehova wakabaambila kuti: “Tona kundiletela imbelele zyakupaizya nikuba kundilemekezya azituuzyo zyako. Nsina kukukataazya zipo zyabusu.” (Isaya 43:23) Kunze lyaboobo, zituuzyo zyatakali kupegwa amoyo omwe alimwi ikutali akaambo kaluyando zyakanyina mpindu kuli Jehova. Mucikozyanyo, myaka iitandila kumyaanda yotatwe kuzwa Isaya naakali kupona, kumazuba aamusinsimi Malaki, bana Israyeli bakali kutuula banyama balemene. Nkakaambo kaako Malaki wakabaambila kuti: “Nsimubotelwi pe! mbwaamba Jehova wamakamu. Nsikoozumina kutambula cituuzyo camumaanza aanu pe. . . . Mwandiletela cituulo cabanyama bakubba nanka balema nanka baciswa. Sa ndakonzya kutambula cituulo cili boobo kumaanza aanu? mbwaamba Jehova.”—Malaki 1:10, 13; Amosi 5:22.

 Wakakwa Musyobo Ulyaabide

11. Ncoolwe cili buti ncobakalipedwe bana Israyeli?

¹¹ Ciindi bana Israyeli nobakaba musyobo ulyaabide kuli Jehova, wakabasyomezya kuti: “Na mwazumina kuswiilila ijwi lyangu akubamba cizuminano cangu, muyooyandika mumeso aangu kwiinda bamasi boonse; nkaambo nyika yoonse njiyangu. Muyoondibeda cisi cabapaizi, musyobo uusalalisya.” (Kulonga 19:5, 6) Mesiya wakasyomezyegwa wakali kuyoozwa akati kabo akubapa coolwe citaanzi cakuba basikulela mu Bwami bwa Leza. (Matalikilo 22:17, 18; 49:10; 2 Samuele 7:12, 16; Luka 1:31-33; Ba-Roma 9:4, 5) Pele bunji bwabana Israyeli kunyina nobakali kupona kweelana akulyaaba kwabo. (Matayo 22:14) Bakamukaka Mesiya mane akumujaya.—Incito 7:51-53.

12. Majwi aali buti ngaakaamba Jesu aatondezya kuti bana Israyeli bakakakwa a Jehova kuti tiibakacili musyobo ulyaabide?

¹² Kakuceede mazuba masyoonto kuti afwe, Jesu wakaambila basololi bacikombelo baci Juda kuti: “Sa tamubalide mumagwalo kuti, ibbwe ndibakasowa bayaki lyakaba mutwe wacooko. Inkani eyi yakazwa ku[li]-Jehova, ilagambya mumeso esu. Nkaambo kaako ndamwaambila kuti Bwami bwa-Leza buzoonyanzigwa kulindinywe, buzoopegwa musyobo umbi uuzyala micelo yabo.” (Matayo 21:42, 43) Katondezya kuti Jehova wakalibakakide kuti tiibakacili musyobo ulyaabide kulinguwe, Jesu wakati: “Ikaka Jerusalemu, Jerusalemu, noojaya basinsimi, akubafusa mabwe abo batumwa kulinduwe! Kanjikanji ndakali kuyanda kubunganya bana bako mbuli inkuku intumbu mbiibunganya twana twayo mumababa aayo, nekubaboobo mwakakaka. Amulange! Iŋanda yanu yasyaala kulindinywe mbuli itongo.”—Matayo 23:37, 38.

Musyobo Mupya Ulyaabide

13. Makani aali buti aabusinsimi Jehova ngaakaamba kumazuba aa Jeremiya?

¹³ Kuciindi naakali kupona Jeremiya, Jehova wakasinsima cintu cimwi cipya kujatikizya bantu bakwe. Tubala kuti: “Amubone! Ayoosika mazuba, mbwaamba Jehova, ninzootangana aluzubo lwa-Israyeli aluzubo lwa-Juda cizuminano cipya. Tacikoozooba mbuli cizuminano ncindakatangene abamawisaabo mubuzuba obuya mbundakabajata ajanza kukubapozya kucisi ca-Egepita, nkaambo cizuminano eco bakacimwaya, nekuba kuti ndakababeda mbuli mulumi, mbwaamba Jehova. Pele cizuminano ncinzootanga abana ba-Israyeli mumazuba aaboola nceeci, mbwaamba Jehova. Nzoobika Mulao wangu mukati kabo, nzooulemba amyoyo yabo, nkabela nzoobabeda Leza wabo, abalo bazoondibeda bantu bangu.”—Jeremiya 31:31-33.

14. Ndilili alimwi nkwiinda munzi musyobo mupya ulyaabide wa Jehova nowakatalika? Amuupandulule musyobo ooyo.

¹⁴ Cizuminano cipya eeci cakacitika Jesu naakafwa akupa mpindu yabulowa bwakwe bwakatilwa kuli Bausyi mu 33 C.E. (Luka 22:20; Ba-Hebrayo 9:15, 24-26) Nokuba boobo, kwiinda mukutilwa kwamuuya uusalala lya Pentekoste 33 C.E. alimwi akuzyalwa kwamusyobo mupya, “ba-Israyeli ba-Leza,” cizuminano cipya cakatalika kubeleka. (Ba-Galatiya 6:16; Ba-Roma 2:28, 29; 9:6; 11:25, 26)  Kalembela Banakristo bananike, imwaapostolo Petro wakati: “Nywebo muli musyobo musale, bapaizi bami, cisi cisalala, bantu bavubidwe kuli-Leza kuti mukatondezye milimo iitembaulika yayooyo uwakamwiita kuzwa mumudima akumunjizya mumumuni wakwe uugambya. Kalekale teemwakali cisi, pele sunu muli cisi ca-Leza.” (1 Petro 2:9, 10) Cilongwe cilibedelede akati ka Jehova abana Israyeli bakumubili cakalimanide. Mu 33 C.E., zilongezyo zya Jehova zyakazwa kubana Israyeli bakumubili akupegwa kubana Israyeli bakumuuya, imbungano ya Bunakristo, ‘musyobo uuzyala micelo’ ya Bwami bwa Mesiya.—Matayo 21:43.

Kulyaaba Kwaumwi Aumwi

15. Mubuzuba bwa Pentekoste 33 C.E., ndubbapatizyo luli buti Petro ndwaakakulwaizya bamuswiilila kubbapatizyigwa?

¹⁵ Nowakainda mwaka wa Pentekoste 33 C.E., aumwi, mu Juda naa Wamasi, wakeelede kulisalila kulyaaba kuli Jehova akubbapatizigwa “muzina lya-Taata alya-Mwana alya-Muuya Uusalala.” * (Matayo 28:19) Lya Pentekoste, imwaapostolo Petro wakaambila ba Juda alimwi abasandule bakajisi myoyo mibotu kuti: “Amusanduke, mubapatizigwe umwi umwi muzina lya-Jesu Kristo, mujatilwe zibi zyanu, nomwati tambule cipego ca-Muuya Uusalala.” (Incito 2:38) Iba Juda abasandule aaba bakeelede kutondezya kwiinda mukubbapatizigwa kuti balyaaba kuli Jehova alimwi akuti bazumina kuti Jesu nenzila Jehova mwabalekelela milandu yabo. Bakeelede kuzumina kuti Mupaizi Mupati wa Jehova ngo Musololi wabo, Mutwe wambungano ya Bunakristo.—Ba-Kolose 1:13, 14, 18.

16. Kumazuba aa Paulo, ino mbuti babombemyoyo—ba Juda a Bamasi—mbobakazikuba cibeela ca Israyeli wakumuuya?

¹⁶ Nokwakainda myaka, imwaapostolo Paulo wakazikwaamba kuti: “Kusaanguna mu-Damasko, aku-Jerusalemu, amucisi coonse ca-Judaya, akulibamasi ndakali kukambauka kuti beempe basandukile kuli-Leza, bacite milimo iielede kusanduka.” (Incito 26:20) Naakabazula bantu—iba Juda a Bamasi—kuti Jesu wakali Kristo, Mesiya, Paulo wakabagwasya kusikila kukulyaaba akubbapatizigwa. (Incito 16:14, 15, 31-33; 17:3, 4; 18:8) Kwiinda mukuboola kuli Leza, basikwiiya bapya aaba bakazikuba akati kaba Israyeli bakumuuya.

17. Ino mulimo nzi wakugwala uuyanda kusika kumamanino, alimwi mulimo nzi umbi uuli mukucitwa cakufwambaana?

¹⁷ Mazuba aano, ikugwalwa kwamamanino kwaba Israyeli bakumuuya basyeede kuli afwaafwi. Kwaakumaninina kucitika, “baangelo bone” bajata myuuwo yalunyonyooko lwa “mapenzi ayo mapati” bayoozumizigwa kwiilekezya myuuwo eeyo. Kacitanasika eeco ciindi, kuyobololwa kwaba “nkamu impati,” aabo ibajisi bulangizi bwakuyoopona anyika kukabe kutamani, kulimukucitwa cakufwambaana. Eezi “mbelele zimwi” zilalisalila kusyoma “mubulowa bwa-Mwanambelele” akutondezya kulyaaba kwabo kuli Jehova kwiinda mukubbapatizigwa. (Ciyubunuzyo 7:1-4, 9-15; 22:17; Johane 10:16; Matayo 28:19, 20) Akati kabo kuli bana banji ibakomezyegwa abazyali Banakristo. Ikuti kamuli umwi wabana aaba, muyookkomana ikubala cibalo citobela.

Bupanduluzi buyungizidwe

Ikwiinduluka

• Ino nkaambo nzi bana Israyeli baniini ncobatakali kuyandika kulyaaba beni kuli Jehova?

• Ino mbuti bana Israyeli mbobakali kukonzya kutondezya kuti bakali kupona kweelana akulyaaba kwabo?

• Nkaambo nzi Jehova ncaakabakakila bana Israyeli kuti tiibakacili musyobo wakwe uulyaabide, alimwi ino mbuti mbobakanjililwa mubusena?

• Kuzwa lya Pentekoste 33 C.E. kuyakumbele, ncinzi iba Juda a Bamasi ncobakeelede kucita kutegwa babe akati kaba Israyeli bakumuuya?

[Mibuzyo yaciiyo]

[Cifwanikiso icili apeeji 23]

Bana Israyeli bana-bana bakali kuzyalwa kabali musyobo wa Leza uusalidwe

[Cifwanikiso icili apeeji 25]

Muna Israyeli aumwi wakaleelede kulisalila kubelekela Leza

[Cifwanikiso icili apeeji 25]

Zituuzyo zyakuliyandila zyakapa bana Israyeli coolwe cakutondezya luyando lwabo kuli Jehova

[Cifwanikiso icili apeeji 27]

Nolyakainda Pentekoste 33 C.E., basikumutobela Kristo bakaleelede kulyaaba beni kuli Leza akutondezya oobo kwiinda mukubbapatizigwa