Kujana Luzibo Lwini-Lwini

BWAKALI buzuba bwamu December 18, 1810. Kuciindi cakulubundubundu. Ibwato butegwa British Navy HMS Pallas bwakalisweekede mulwizi lwakali amayuwe kuzwa kunkomwe iili kumusanza lwaajwe kwacisi ca Scotland. Imudima alimwi akuwa kwacaanda zyakali kupa kuti cibakatazye basikweenzya bwato kubona mimuni iizwa kungazi iisololela kucito cakuyusila. Amweezyeezye buyo mbobakakkalwa myoyo ciindi nobakabona mimuni akunyona bwato kutozya nkuko! Pele mukubula coolwe eeyi tiiyakali mimuni njobakali kuyanda. Mubwini wakali mulilo ngobakayasya basimilimo kufwaafwi ankomwe yalwizi. Ibwato bwabo bwakaakuuma amabwe eelyo bwakanyonyooka. Basibwato ibali kkumi aumwi bakanyikila akufwa muntenda eeyi.

Kujatikizya bwato bwa Pallas, kulubizya kwabasibwato kwakaleta ntenda. Pele zimwi ziindi basibwato bakali kunjila muntenda mpati—akaambo kakutobela mimuni iteelede. Bbuku litegwa Wrecks, Wreckers and Rescuers lyaamba kuti mimuni iili boobo yakali kuyasyigwa acaali kutegwa basibwato kabagama kucito cili amabwe eelyo bwanyonyooka bwato bwakali kusaalwa.

‘Magwalo Aasalala Aakonzya Kumupa Kufwutuka’

Mukuyandaula luzibo kwanu andinywe mulangilwa kusikilwa ntenda zili mbuli zyeezyo nzyobakajana basibwato baya. Mulakonzya kutobela makani aakubeja naa kweenwa abantu bacita caali. Zyoonse eezi zilakonzya kumuletela mapenzi. Ncinzi ncomukonzya kucita kutegwa mulikwabilile? Amulingule nzila njomubelesya mukujana luzibo akubona kuti ililuzi alimwi ilasyomeka. Kwamyaka yiinda ku 125, magazini eeyi yalikutondezya kuti Jwi ndyaakasololela Leza nkokuti Bbaibbele, nkakasensa kaluzibo kasyomeka akaambo kakuti momuli ‘magwalo aasalala aakonzya kumupa kufwutuka.’—2 Timoteo 3:15-17

Masimpe, kutegwa musyome kuti Bbaibbele lilijisi busolozi busyomeka, ncibotu kulanga-langa twaambo tutondezya kuti lilasyomeka. (Intembauzyo 119:105; Tusimpi 14:15) Mulaangulukide  kulembela basikumwaya ba magazini eeyi kutegwa mujane makani alo aagwasya tuulunzuma twabantu kusyoma kuti ncobeni Bbaibbele lyakasololelwa a Leza. Mucikozyanyo, amubale broshuwa yakuti Buku la Anthu Onse. * Broshuwa eeyi ilijisi twaambo tunji tutondezya kuti Bbaibbele ililuzi, ilasyomeka alimwi akuti yakasololelwa a Leza.

Injiisyo Ziyandika Kapati

Aboobo, ino ninjiisyo nzi zimwi ziyandika kapati zijanika “[mu]magwalo aasalala” aaya? Amulange-lange zikozyanyo eezi zitobela.

Kuli Leza omwe Singuzuzyoonse alimwi Mulengi wakapanga zintu zyoonse. (Matalikilo 1:1) Tulapona “nkaambo [Leza] wakalenga zintu zyoonse” alimwi wakatupa buumi. (Ciyubunuzyo 4:11) Nkakaambo kaako tweelede kumukomba walo alikke. Imulengi nkakasensa kaluzibo loonse. (Intembauzyo 36:9; Isaya 30:20, 21; 48:17, 18) Ulijisi zina limugeme ndyayanda kuti katubelesya. (Kulonga 3:15) Izina eelyo lisanduludwe kuti YHWH kuzwa kumabala aaci Hebrayo alimwi lilajanika ziindi zitandila ku 7,000 mu Bbaibbele. Kwamyaanda yamyaka lyali kubelesyegwa mu Chitonga kalilembwa kuti “Jehova.”—Intembauzyo 83:18.

Jehova wakapanga baalumi abanakazi kuti kabapona kukabe kutamani mu Paradaiso mpoona aano anyika. Wakapa bantu cipego cakukonzya kutondezya bube bwakwe bwakumuuya. Wakabapa luzibo alimwi anguzu zyakukonzya kucita zintu zyalo zikonzya kubaletela lukkomano akukkutila lyoonse mubuumi anyika. (Matalikilo 1:26-28) Tanaakajisi makanze aakuti nyika ibe mbuli busena bwakusunkila baalumi abanakazi—ibusena bwakulibambila kuyoopona kujulu mbuli kuti nkuujulu kwalo nkobakonzya kuba acilongwe aa Leza.

Kwakanyina cakalubide ciindi Leza naakalenga muntu. Ibubi bwakatalika ciindi zilenge zya Leza zimwi—zyabuntu azyamuuya—nozyakamuzangila Leza kwiinda mukutalubelesya kabotu lwaanguluko ndozyakajisi lwakulisalila. (Deuteronomo 32:5) Bazyali besu bakusaanguna bakalitwika mukuli wakulisalila cibotu acibi. (Matalikilo 2:17; 3:1-5) Eeco ncecakapa kuti bantu kabafwa. (Matalikilo 3:19; Ba-Roma 5:12) Kutegwa twaambo twakabusyigwa kwiinda mubuzangi tumanizyigwe, Jehova wakasala kuzumizya bubi kwaciindi cili mbocibede. Nokuba boobo, makanze aakwe kujatikizya nyika alimwi abantu acizumanana. (Isaya 45:18) Baalumi abanakazi bayakupona kumbele kukabe kutamani mu Paradaiso anyika iisalazidwe.—Matayo 6:10; Ciyubunuzyo 21:1-5.

Jesu Kristo tali Leza Singuzuzyoonse, pele Mmwana wa Leza. Ngu Jesu Kristo wakayiisya basikumutobela kupaila kuti: “Taateesu ooli kujulu, alilemekwe izina lyako.” (Matayo 6:9) Taaku naakalyaamba kuti uleelene a Leza pe. Pele wakaamba kuti: “Taata mupati kwiinda ndime.”—Johane 14:28.

Jesu ulijisi mulimo mupati mukuzuzikizyigwa kwamakanze aa Leza. Leza wakamutuma kali ‘mumuni, kuti umwi aumwi uumusyoma atakkali mumudima.’ (Johane 12:46)  Kweelena ambwaakaamba mwaapostolo Petro, “takukwe lufutuko kuluumbi naba omwe pe.” (Incito 4:12) Eeci ncamasimpe akaambo kakuti lufwutuko lwesu luyeeme abulowa buyandisi bwa Kristo. (1 Petro 1:18, 19) Jesu Kristo wakaaba buumi bwakwe kabuli cituuzyo cacinunuzyo kutegwa bafwutulwe bantu kuzwa kucibi eeco bazyali besu bakusaanguna, ba Adamu a Eva, ncobakaletela bantu. (Matayo 20:28; 1 Timoteo 2:6) Alimwi Jesu wakabelesyegwa a Leza kuyubununa makanze Aakwe.—Johane 8:12, 32, 46, 47; 14:6; Incito 26:23.

Leza wakkazika Bwami bwakujulu naa mfwulumende, iibambidwe a Jesu Kristo alimwi abaabo basalidwe kuzwa akati kabantu. Imulumbe ooyu uujatikizya Bwami bwa Leza ulaambwa cakwiinduluka-induluka mu Bbaibbele. Leza wakapa mukuli kumfwulumende eeyi wakubona kuti kuyanda kwakwe kwacitwa anyika mbubonya mbuli kujulu. (Matayo 6:10) Kumatalikilo Leza tanaakajisi makanze aakuti ibamwi akati kabantu bakaunke kujulu. Inyika ngowakali munzi wabo. Pele kuzwa ciindi muntu naakabisya, Leza wakaba amakanze amwi mapya. Wakabikka bubambe bwakusala bantu ‘bamisyobo yoonse amilaka yoonse amikowa yoonse, azisi zyoonse kuti bakeendelezye’ a Kristo mumfwulumende yakujulu. (Ciyubunuzyo 5:9, 10) Ibwami naa mfwulumende eeyi ino-ino ‘iiyoopwayaula akumanisya’ bulelo bwabantu boonse ibwaleta mapenzi alimwi amacise aatalikomeneni kumikwasyi yabantu.—Daniele 2:44.

Taaku cibeela camuntu cizumanana kupona muntu afwa. Injiisyo eeyi iiyandika kapati yamu Bbaibbele ilatusalazya twaambo tunji tujatikizya muntu alimwi abulangizi bwakwe bwabuumi bwakumbele. Alimwi yamanizya twaambo tutaluzi twali kunyonganya bantu kujatikizya cicitika kubantu nobafwa.

Ibbuku lyamu Bbaibbele lya Mukambausi 9:5, 10 litwaambila kuti: “Baumi balizi kuti balafwa, pele bafwide tabezi cintu niciba comwe; . . . Taakwe milimo niiba miyeeyo neluba luzibo nebuba busongo mukabanda moyoonjila.” Sena mwakabona kaambo kaliko aawa? Kunyina cibeela cimwi camuntu cizumanana kupona muntu afwa. Afwa muntu ‘ulapiluka kunyika.’—Matalikilo 3:19.

Ibafwide balakonzya kupona alimwi kwiinda mububuke. Caakumana ciindi eeco Leza ncaazumizya bubi kucitika, ciindi ciyoosika “ncobati kamvwe ijwi lya [Jesu] boonse abali muzyuumbwe, bayoozwa mpoonya, abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.” (Johane 5:28, 29; Incito 24:15) Ibubuke buyoopa kuti bantu bakapone alimwi muparadaiso anyika, ikupona kweelana ambwaakali  kuyanda Leza kumatalikilo kuti kabapona bantu.

Amulingule Magwalo Abuzuba

Sena mwabona mbomukonzya kugwasyigwa aluzibo lwanjiisyo zili boobu ziyandika kapati? Muciindi cino cizwide manyongwe alimwi cikatazya, iluzibo luli boobu lulakonzya kumukwabilila kuli “ceeco caambwa cakubeja kuti nduzibo” lumwaigwa a Saatani Diabolosi. Ulalisandula mbuli “angelo wamumuni” alimwi babelesi bakwe balitondezya mbuli “balanda babululami.” (1 Timoteo 6:20; 2 Ba-Korinto 11:13-15) Iluzibo lwini-lwini lwamu Bbaibbele lulakonzya kumukwabilila kuli ceeco ciitwa kuti nduzibo luyeeme abusyaabusongo bwabantu bamunyika “basimaanu abacenjede,” aabo ‘bakakide ijwi lya Jehova.’—Matayo 11:25; Jeremiya 8:9.

Akaambo kakuti kwakali njiisyo zinji zyakubeja mumazuba aakwe, mwaapostolo Johane wakacenjezya Banakristo bamumwaanda wamyaka wakusaanguna kuti: “Mutazuminini myuuya yoonse.” Wakati: “Amusoleke myuuya na njiya-Leza.” (1 Johane 4:1) Amulange-lange cikozyanyo eeci. Ikuti naa mwatambula mulumbe ukonzya kucinca buumi bwanu, sena inga muuzumina kakunyina akuulingula akaambo buyo kakuti uboneka mbuli kuti wazwa kumuntu uusyomeka? Peepe. Kusaanguna muyooyanda kuziba nkowazwida akulingula ncowaamba kamutanabweza ntaamu.

Kwiinda mukupa malembe aakasololelwa amuuya alo aajisi njiisyo ziyandika kapati, Leza wapa kuti cikonzyeke kulindinywe kucita boobo—kuti ‘musunke’ akubona kuti busolozi mbomutobela bulasyomeka. (1 Ba-Tesalonika 5:21) Bantu ibakajisi miyeeyo mibotu mumwaanda wamyaka wakusaanguna bakalumbaizyigwa akaambo ‘kakulingaula Magwalo mazuba oonse’ kutegwa basinizye kuti nzyobakali kwiiya zyakaliluzi. (Incito 17:11) Andinywe mulakonzya kucita oobo. Amulekele Bbaibbele, mbuli “ilampi limunika mumudima,” limusololele munzila mbotu. (2 Petro 1:19-21) Mwacita boobo, ‘muyoojana luzibo lwa Leza,’ ilupa kujaluka mutwe kwini-kwini.—Tusimpi 2:5.

Bupanduluzi buyungizidwe

[Cifwanikiso icili apeeji 4]

Ijwi lya Leza lili mbuli ilampi

[Cifwanikiso icili apeeji 5]

Ino Leza nguni zina lyakwe?

[Cifwanikiso icili apeeji 5]

Ino buumi bwabantu buyakuba buti kumbele?

[Cifwanikiso icili apeeji 6]

Sena Jesu ngo Leza Singuzuzyoonse?

[Cifwanikiso icili apeeji 6]

Ino bafwide bali kuli?

[Cifwanikiso icili apeeji 7]

Bubuke ninjiisyo imwi iiyandika kapati iiyiisyigwa mu Bbaibbele