“Milumbe yako Njindibotezya”
“Milumbe yako Njindibotezya”
“Makani aali boobo aakalembwa kalekale, nkukwiiya kwesu nkwaakalembelwa.”—BA-ROMA 15:4.
1. Ino Jehova utupa buti ziyeezyo alimwi nkaambo nzi ncotuyandika kuyeezyegwa?
JEHOVA ulabayeezya bantu bakwe kutegwa abagwasye kuliyumya mumapenzi aakuziindi eezino zikatazya. Nzila zimwi mwatuyeezya nkwiinda mukubala Bbaibbele, kakuli nzila imwi nkwiinda mumakani naa zyaambwa lyamiswaangano ya Bunakristo. Bunji bwazyeezyo nzyotubala naa kumvwa tazili zyeenzu kulindiswe. Ambweni tulaazi kale makani aaya. Mbwaanga tuli bantu baluba, tuyandika kuyeezyegwa ciindi aciindi kujatikizya makanze, milawo alimwi amalailile aa Jehova. Tweelede kulumba akaambo kaziyeezyo zya Leza. Zilatukulwaizya kwiinda mukutugwasya kubikkila maano kutwaambo twakatupa kutalika kupona buumi bweendelana akuyanda kwa Leza. Nkakaambo kaako sintembauzyo ncaakaimba kuli Jehova kuti: “Milumbe yako njindibotezya.”—Intembauzyo 119:24.
2, 3. (a) Nkaambo nzi Jehova ncaakayoboda makani aamba zyabuumi bwabantu baambwa mu Bbaibbele kusikila kuciindi ncotupona? (b) Nzibalo nzi zyamu Magwalo zitiilangwe-langwe mucibalo eecino?
2 Nokuba kuti lyakalembwa myaanda yamyaka minji yainda, Ijwi lya Leza lili anguzu. (Ba-Hebrayo 4:12) Lilatwaambila zyakacitika ncobeni mubukkale bwabantu baambidwe mu Bbaibbele. Nokuba kuti ziyanza amizeezo zyacinca kapati kuzwa lyaciindi caambwa mu Bbaibbele, imapenzi ngotujana kanji-kanji ngamwi buyo ayaayo aakaliko kuciindi eeco. Makani manji aayobodwe mu Bbaibbele kutegwa atugwasye alatupa zikozyanyo zikulwaizya zyabantu bakamuyanda Jehova akumubelekela cakusyomeka nokuba kuti bakali mubukkale bukatazya. Zibalo zimwi zyaamba bukkale mbwasulide Leza. Jehova wakabona kuti makani aaya oonse mabotu amabi aajatikizya bantu, abikkilizyigwa mu Bbaibbele kuti abe ziyeezyo. Cili mbuli mbwaakalemba imwaapostolo Paulo kuti: “Makani aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.”—Ba-Roma 15:4.
3 Atulange-lange zibalo zyotatwe kuzwa mu Magwalo: imakani aamba zyabuumi bwa Davida a Saulo, bwa Hananiya a Safira alimwi amakani aamba zyabukkale bwa Josefa amukaintu wa Potifara. Makani aaya atuyiisya njiisyo ziyandika kapati.
Kutobela Bubambe bwa Leza Cakusyomeka
4, 5. (a) Ino mbukkale buli buti bwakaliko akati ka Mwami Saulo a Davida? (b) Ino Davida wakalubona buti lusulo lwa Saulo?
4 Mwami Saulo kunyina naakasyomeka kuli Jehova alimwi tanaakacili kweelela kweendelezya bantu Bakwe. Aboobo Leza wakamukaka akulailila musinsimi Samuele ikunanika Davida kuti akabe mwami wa Israyeli kumbele. Davida naakatondezya luzibo alimwi abusicamba kali sikalumamba akulumbaizyigwa abantu, Saulo wakatalika kubona Davida kuba mulwani. Saulo ziindi zinji wakasoleka kumujaya. Davida wakafwutuka ziindi zyoonse nkaambo Jehova wakali anguwe.—1 Samuele 18:6-12, 25; 19:10, 11.
5 Kwamyaka minji, Davida wakali kupona kali muzangalisi. Nocakaboneka ciindi cakumujaya Saulo, beenzinyina Davida bakamukulwaizya kucita oobo, kabati Jehova nguwakali kwaaba sinkondonyina mumaanza aakwe. Pele Davida wakakaka. Ikusyomeka kwakwe kuli Jehova alimwi ambwaakali kucilemeka cuuno cakajisi Saulo kali mwami uunanikidwe wabantu ba Leza kwakamukulwaizya kulilemeka munzila eeyi. Jehova wakalimusalide Saulo kuba mwami wa Israyeli, tee kayi? Jehova nguwakali kuyoomugusya ikuti naa wabona kuti cili kabotu kucita oobo. Davida wakabona kuti wakanyina nguzu zyakunjililila. Naakacita zyoonse nzyaakali kukonzya kucita kutegwa amutontozye Saulo kubukali mbwaakajisi kulinguwe, Davida wakabona kuti: “Jehova nguuyoomujaya, nanka buzuba bwakwe bwakufwa buyoosika bwini, nanka ulanjila munkondo kuti imujaye. Jehova anditondye kutambika ijanza lyangu kukulwisya munanike wa-Jehova.”—1 Samuele 24:3-15; 26:7-20.
6. Nkaambo nzi makani aa Davida a Saulo ncaayandika kuti twaalange-lange?
6 Cibalo eeci cijisi ciiyo ciyandika kapati. Sena kuli nomwakalibuzyide ncokuli mapenzi amwi mumbungano ya Bunakristo zimwi ziindi? Ambweni kuli muntu umwi uucita zintu munzila iiteelede. Ncacita inga kacitali cibi cipati pesi cilamunyonganya. Ino ncinzi ncomweelede kucita? Akaambo kaluyando lwa Bunakristo ndomujisi kumuntu ooyo alimwi akuyanda kusyomeka kuli Jehova, inga mwayanda kuti mwaambaule anguwe munzila iili kabotu, kamujisi muzeezo wakumuboozya. Ino mbuti kuti ipenzi lyazumanana? Mwacita zyoonse nzyomukonzya, mulakonzya kusiya makani oonse mumaanza aa Jehova. Mbwaakacita oobo Davida.
7. Kwiinda mukwiiya Davida, ino tweelede kucita nzi ikuti naa tiitweendelezyegwa kabotu naa kusalaulwa?
7 Ambweni mujisi mapenzi aakuteendelezyegwa kabotu mucilawo momukkala naa kutayandwa akaambo kakwiindana kwabukombi. Ambweni kunyina ncomukonzya kucita kujatikizya mapenzi aayo aciindi cino. Mubukkale buli boobu inga nciyumu kuliyumya, pele mbwaakacita Davida naatakeendelezyegwa kabotu kutuyiisya ciiyo cibotu. Intembauzyo Davida nzyaakalemba mbumboni bukulwaizya kapati bwamipailo njaakapaila camoyo woonse kulomba Leza kuti amuvwune mumaanza aa Saulo alimwi akusyomeka kwakwe kuli Jehova ambwaakali kubikkila maano kukutembaulwa kwazina lya Leza. (Intembauzyo 18:1-6, 25-27, 30-32, 48-50; 57:1-11) Davida wakazumanana kusyomeka kuli Jehova nokuba kuti Saulo wakazumanana anzila zyakwe zitaluleme kwamyaka minji. Andiswe tweelede kuzumanana kusyomeka kuli Jehova akumbunga yakwe nokuba kuti tulapenzyegwa alimwi kunyina makani anzyobacita bamwi. Tulakonzya kuba alusyomo lwakuti Jehova ulibubwene bukkale bwesu.—Intembauzyo 86:2.
8. Ino mbuti Bakamboni ba Jehova ku Mozambique mbobakacita ciindi nobakasunkwa mukusyomeka kwabo kuli Jehova?
8 Banakristo ku Mozambique bapa cikozyanyo cibotu camazuba aano cabantu bamwi bazumanana kusyomeka kuli Jehova nobasunkwa. Mu 1984 minzi yabo yakasaalwa ziindi zinji azigwebenga zilwana mfwulumende, zyakabba, kuumpa maanda akujaya. Kunyina ncobakali kukonzya kucita Banakristo bakasimpe aaba kutegwa balikwabilile. Bantu bakkala kubusena oobo bakasinikizigwa kusangana zigwebenga eezi naa kusinikizigwa kuzigwasya munzila zimbi. Bakamboni ba Jehova bakabona kuti kucita boobo takweendelani alusyomo lwabo lwakutatola lubazu kwa Bunakristo. Ikukaka kwabo kwakapa kuti zigwebenga eezi zikalale. Bakamboni basika ku 30 bakajaigwa kuciindi eeci camapenzi, pele kunyina nokuba kuyoowa lufwu nokwakapa bantu ba Leza kucileka kusyomeka kulinguwe. * Mbuli Davida, bakaliyumya mukupenzyegwa pele kumamanino bakazwidilila.
Ciyeezyo Cakutucenjezya
9, 10. (a) Ino mbuti mbotukonzya kugwasigwa azikozyanyo zimwi zyamu Magwalo? (b) Ino ncinzi cakalubila kuli ncobakacita ba Hananiya a Safira?
9 Bamwi bantu baambwa mu Magwalo bapa ciyeezyo cakucenjezya kujatikizya bukkale butayandiki. Masimpe, Ibbaibbele lilijisi makani manji aabantu, nokuba akati kababelesi ba Leza, ibakacita zibi akupenga azyakatobela. (1 Ba-Korinto 10:11) Amwi makani aali boobu ngayaayo aajatikizya Hananiya a Safira, banabukwetene ibakali kuswaangana ambungano ya Bunakristo yamumwaanda wamyaka wakusaanguna ku Jerusalemu.
10 Noyakainda Pentekoste 33 C.E., kwakali kuyandika kugwasya basyomi bapya munzila yakumubili aabo ibakaceede mu Jerusalemu kutegwa bagwasyigwe kwiinda mukuyanzana abaapostolo. Bamwi mumbungano bakaulisya nzyobakajisi kutegwa bajane mali aakugwasilizya babulide. (Incito 2:41-45) Hananiya a Safira bakaulisya muunda akuleta buyo cibeela cisyoonto camali ngobakajana kubaapostolo, kabaamba kuti mali oonse ngobakajana bakaapa kaali cipego. Ncamasimpe kuti Hananiya a Safira bakalaangulukide kupa kufwumbwa mbobakali kuyanda, pele bakajisi makanze mabi alimwi bakacita cabumpelenge. Bakali kuyanda kukkomanisya baapostolo akuboneka mbuli kuti bacita kabotu kwiinda mbobakali kucita. Imwaapostolo Petro, kasololelwa amuuya uusalala, wakayubununa bumpelenge bwabo akuupa-upa ameso kwabo alimwi Jehova wakabajaya.—Incito 5:1-10.
11, 12. (a) Amupe zikozyanyo zyamu Magwalo zijatikizya kusyomeka. (b) Mbubotu nzi bujanika mukusyomeka?
11 Ikuti naa twasunkwa kwaamba zyakubeja kutegwa bamwi batubone kuba bantu bali kabotu, makani aa Hananiya a Safira atucenjezya kuti tatweelede kucita oobo. Tulakonzya kubacenga bantuma, pele tatukonzyi kumucenga Jehova. (Ba-Hebrayo 4:13) Cakwiinduluka-induluka Imagwalo atukulwaizya kuba bantu baamba zyamasimpe kuli umwi amweenzinyina, nkaambo basikubeja banoonyina busena munyika iiluleme. (Tusimpi 14:2; Ciyubunuzyo 21:8; 22:15) Ikaambo kakucitila boobo kalamvwugwa. Ooyo uukulwaizya kwaamba zyakubeja ngu Saatani Diabolosi.—Johane 8:44.
12 Ikusyomeka mubuumi bwesu kulagwasya munzila zinji. Bumwi bubotu bujanika nkuba amanjezyeeya aali kabotu alimwi alukkomano luboola kwiinda mukuziba kuti bamwi balatusyoma. Ziindi zinji, akaambo kakusyomeka, Banakristo bajana mulimo naa bazumanana amulimo wabo. Pele ciyandika kapati ncakuti, kwiinda mukuba bantu basyomeka tuba acilongwe a Leza Singuzuzyoonse.—Intembauzyo 15:1, 2.
Kuzumanana Kulilemeka
13. Mmuubukkale buli buti Josefa mwaakajanika, alimwi ino ncinzi ncaakacita?
13 Josefa, imwana wasyaanene Jakobo, wakasambalwa mubuzike kajisi myaka iili 17. Wakazikujanika muŋanda ya Potifara, silutwe waku Egepita, ooko Josefa nkwaakayandwa amukaintu wasimalelaakwe. Wakali kuyanda kuti boonane a Josefa, walo wakali mulombwana weebeka, alimwi abuzuba wakali kumoongelezya kuti: “Atweende ayebo.” Josefa wakali kule amukwasyi wakwe, kucisi ooko kwakanyina naba omwe wakalimuzi. Naakazumina kweenda amukaintu ooyu bantu bamwi kakunyina akuziba. Pele, ciindi mukaintu wa Potifara naakamuvwaampila, Josefa wakatija.—Matalikilo 37:2, 18-28; 39:1-12.
14, 15. (a) Nkaambo nzi ncotweelede kwaabikkila maano makani aajatikizya Josefa? (b) Nkaambo nzi mukaintu umwi Munakristo ncaakatondezya kulumba akaambo kakuti wakaswiilila ziyeezyo zya Leza?
14 Josefa wakakomezyegwa mumukwasyi uuyoowa Leza, alimwi wakalizi kuti ikoonana kwabantu batakwetene kwakali kulubizya. “Nkacite buti bubi bupati buli boobu akubisizya Leza?” wakabuzya. Kuboneka kuti wakakosola makani kwiinda mukusololelwa aluzibo lwazyeelelo zya Leza nzyaakapa kubantu mu Edeni, kuba amukaintu naa musankwa omwe. (Matalikilo 2:24) Bantu ba Leza mazuba aano balakonzya kugwasigwa kwiinda mukulanga-langa mbwaakacita Josefa mubukkale oobo. Mumbazu zimwi, ikoonana kulazumizigwa cakuti bana ibatatoli lubazu mukutalilemeka ooku balasampaulwa abeenzinyina. Izisyamwali akati kabanabukwetene zilidumide. Nkakaambo kaako, makani aajatikizya Josefa atuyeezya cintu cimwi ciyandika kapati kuciindi ncotupona. Ceelelo ca Leza cili mbubwenya, bwaamu abumambi nzibi. (Ba-Hebrayo 13:4) Ibanji boongelezyegwa kutola lubazu mukoonana kutali kwamumulawo balazumina kwaamba kuti kuli kaambo kamvwugwa ikeelede kubagwasya ikutacita oobo. Akati kazintu zibyaabi zizwa mukoonana ooku kuli kusampuka, kukatazigwa mumizeezo, ibbivwe, kumita alimwi amalwazi. Mbubwenya buyo Magwalo mbwatuyeezya, sibwaamu “ulabisizya mubili wakwe mwini.”—1 Ba-Korinto 5:9-12; 6:18; Tusimpi 6:23-29, 32.
15 Jenny, * Kamboni wa Jehova uutakwetwe, ujisi kaambo kamupa kulumba Leza akaambo kaziyeezyo zyakwe. Kuncito, mulombwana ngwabeleka limwi wakali kucita nkwela kulinguwe. Mbwaanga Jenny kunyina ncaakacita, mulombwana ulya wakazumanana kucita oobo. Waamba kuti, “Cilandiyumina kuzumanana kulilemeka mumakani aakoonana, nkaambo cilakondelezya ikuti mulombwana kakubikkila maano.” Pele, wakazi kuziba kuti mulombwana ulya wakali kuyanda buyo kuti abe akati kabasimbi banji mbaakali koona limwi. Naakabona kuti wakatiitalike kuzumina, wakalomba Jehova kuti amugwasye kuzumanana kusyomeka kulinguwe. Jenny wakajana kuti zintu nzyaakaiya naakali kuvwuntauzya mu Bbaibbele alimwi amumabbuku aa Bunakristo zyakali mbuli ncenjezyo zyakumukulwaizya kupakamana. Imwi yancenjezyo eezyo akali makani aajatikizya Josefa amukaintu wa Potifara. “Kufwumbwa buyo ndayeeya mbondimuyanda Jehova,” ulamanizya kati, “kunyina nendiyeeya kuti inga ndilacita cibi eeci akumubisizya.”
Amutobele Ziyeezyo zya Leza!
16. Ino mbuti mbotukonzya kugwasigwa kwiinda mukulanga-langa akuzinzibala kuyeeya abukkale bwabantu baambwa mu Bbaibbele?
16 Toonse tulakonzya kuzumanana kumulumba Jehova akaambo kazyeelelo zyakwe kwiinda mukusoleka kumvwisya cakamupa kuti makani amwi ayobolwe mu Magwalo akaambo kandiswe. Ino ziyiisya nzi? Mbube naa bukkale buli buti bwakatondezyegwa abantu baambwa mu Bbaibbele mbotweelede kwiiya naa kutatobela? Masimpe, kuli myaanda yabantu balembedwe mu Jwi lya Leza. Boonse aabo ibayanda malailile aa Leza balakonzya kugwasigwa kwiinda mukuyandisya luzibo lupa buumi kubikkilizya aziiyo nzyotukonzya kwiiya kuzikozyanyo eezyo Jehova nzyatuyoboda. Magazini eeyi bunji bwaziindi ilijisi zibalo zijatikizya bantu aaba bajisi makani aatuyiisya cintu cimwi. Ino mulekelanzi kutola ciindi akuzilanga-langa zibalo eezi?
17. Ino mulimvwa buti kujatikizya ziyeezyo zya Jehova alimwi nkaambo nzi?
17 Elyo tulalumba kaka akaambo kakubikkila maano nkwacita Jehova kulibaabo ibasoleka kucita kuyanda kwakwe! Masimpe, tatulondokede pe, mbubwenya mbuli baalumi abamakaintu baambidwe mu Bbaibbele. Nokuba boobo, izilembedwe kujatikizya nzyobakacita zilatugwasya kapati. Kwiinda mukutobela ziyeezyo zya Jehova, tatukaciti cintu cikonzya kutuletela mapenzi, alimwi tulakonzya kwiiya zikozyanyo zibotu zyabaabo ibakeenda munzila zyabululami. Twacita boobo, tuyoocikonzya kwiimba antoomwe asintembauzyo kuti: “Bali acoolwe babamba imbeta zya [Jehova], bamuyandaula camoyo woonse. Moyo wangu ulabamba milumbe yako. Ndaiyandisya loko.”—Intembauzyo 119:2, 167.
Bupanduluzi buyungizidwe
^ munc. 8 Amubone Yearbook of Jehovah’s Witnesses yamu 1996, amapeeji 160-2.
^ munc. 15 Izina lyacincwa.
Ino Inga Mwaingula Buti?
• Ncinzi ncotukonzya kwiiya kujatikizya Davida mbwaakamubona Saulo?
• Ino makani aajatikizya Hananiya a Safira atuyiisya nzi?
• Ino nkaambo nzi makani aabuumi bwa Josefa ncaayandika kapati mazuba aano?
[Mibuzyo yaciiyo]
[Cifwanikiso icili apeeji 18]
Nkaambo nzi Davida caakakakila kuti Saulo ajaigwe?
[Cifwanikiso icili apeeji 19]
Ncinzi ncotwiiya kumakani aajatikizya Hananiya a Safira?
[Cifwanikiso icili apeeji 20]
Ncinzi cakamugwasya Josefa kukaka kujatikizyigwa mukutalilemeka?