Nobakubusi, Amusale Kubelekela Jehova
Nobakubusi, Amusale Kubelekela Jehova
“Amulisalile buzuba obuno ngumuyanda kubelekela.”—JOSHUA 24:15.
1, 2. Ndubbapatizyo luli buti lutali kabotu lucitwa a Bunakristo bwanyika?
“AMUBALINDILE [bana] babe Banakristo basika aciimo cakuziba Kristo.” Sikulemba wazina lyakuti Tertullian wakalemba majwi aayo cakumamanino aamwaanda wamyaka wabili C.E. Wakali kukazya ciyanza cakubbapatizya bana bavwanda, calo cakali kucitwa mu Bunakristo bwaluleyo kumazuba aakwe. Mukukazyanya a Tertullian alimwi a Bbaibbele, Fwala wa Cikombelo Augustine wakaamba kuti lubbapatizyo lulagusya tumpenda tuboola abubi butaanzi akuti bana bavwanda ibafwa kabatanabbapatizigwa baunka kumulilo uutamani. Lusyomo luli boobo lwakakulwaizya ciyanza cakubbapatizya bana bavwanda cakufwambaana mbubazyalilwa buyo.
2 Zikombelo zinji zitobelwa abantu banji zya Bunakristo bwanyika zicibbapatizya bana bavwanda. Kunze lyaboobo, kutalikila kaindi, lubbapatizyo lwakusinikizigwa lwa “bahedeni” lwakali kucitwa abeendelezi alimwi abasololi bacikombelo bamuzisi zyakali kwaambwa kuti nzya Banakristo. Pele kubbapatizya bana bavwanda alimwi alubbapatizyo mobasinikizyigwa buya bantu kunyina noluzumizigwa mu Bbaibbele.
Kunyina Kulyaaba Mboozyalilwa Mazuba Aano
3, 4. Ncinzi cikonzya kubagwasya bana bajisi bazyali balyaabide ikulyaaba cakuliyandila?
3 Ibbaibbele litondezya kuti Leza bana baniini ubabona kuti balisalede nokuba kuti omwe buyo akati kabazyali babo ngo Munakristo uusyomeka. (1 Ba-Korinto 7:14) Sena eeco cipa bana aaba kuba babelesi balyaabide kuli Jehova? Peepe. Nokuba boobo, bana ibakomezyegwa abazyali balyaabide kuli Jehova batambula lwiiyo lukonzya kubasololela kukulyaaba beni kuli Jehova. Mwami musongo Solomoni wakalemba kuti: “Mwanaangu, jatisya malailile aauso, alimwi utaleki mulao wabanyoko. . . . Ciindi cakweendeenda zilakweenzya, ciindi cakoona zilakulindila, ciindi cakubuka zilakwaambauzya. Nkaambo mulazyo ndilampi, amulao mumuni; kutapatila kwalulayo ninzila yabuumi.”—Tusimpi 6:20-23.
4 Busolozi mbobapa bazyali Banakristo bulakonzya kubakwabilila bana, kufwumbwa buyo kuti kabalisungude kubutobela. Solomoni alimwi wakati: “Mwana musongo ulakondezya wisi, pele mwana mufubafuba ulaletela banyina insoni.” “Swiilila, mwanaangu, ujate busongo; enzya moyo wako munzila.” (Tusimpi 10:1; 23:19) Inzya, ikutegwa mugwasyigwe alwiiyo ndobamupa bazyali, nywebo nobana mweelede kulisungula kutambula lulayo abusolozi. Kunyina nomwakazyalwa abusongo, pele mulakonzya kuba a “busongo” alimwi akulisungula kweenda ‘munzila yabuumi.’
Ino Mumilazyo Caamba Nzi?
5. Ndulayo luli buti Paulo ndwaakapa kubana abamausyi?
5 Imwaapostolo Paulo wakalemba kuti: “Banike, amulemeke bazyali banu mu-Mwami, nkaambo cililuleme kucita obo. Aka kapango kakuti, Lemya uso abanyoko, ngumulazyo mutaanzi uuyungizizigwa cisyomezyo. Kulaambwa kuti, Ukale kabotu akupona ciindi cilamfu ansi. Anywebo numawisi, mutanooluvukili bana banu, pele amubalele mulwiiyo lwa-Mwami amumilazyo yakwe.”—Ba-Efeso 6:1-4.
6, 7. Ncinzi cijatikizidwe mukulela bana ‘mumilazyo ya Jehova,’ alimwi nkaambo nzi kucita boobu ncokutakonzyi kwaambwa kuti bazyali balabasinikizya bana babo?
6 Sena bazyali Banakristo balaboongelezya bana babo nobabalela “mulwiiyo lwa-Mwami amumilazyo yakwe”? Peepe. Nguni uukonzya kukazyanya abazyali akaambo kakuyiisya bana babo zintu nzyobabona kuti zililuzi alimwi zilabagwasya mubukkale bwabo? Bantu batasyomi kuti Leza nkwali kunyina nobakazigwa nobayiisya bana babo kuti kunyina Leza. Ba Roma Katolika balimvwa kuti beelede kuyiisya bana babo lusyomo lwaci Katolika, alimwi kunyina uubakazya mukusoleka kwabo kucita oobo. Mbubwenya buyo, Bakamboni ba Jehova tabeelede kutamikizyigwa kuti basinikizya bana babo nobabalela kuba amiyeeyo ya Jehova kujatikizya twaambo tumwi alimwi anjiisyo zyakulilemeka.
7 Kweelana abbuku litegwa Theological Dictionary of the New Testament, ibbala lini lya Cigiliki lyakasandululwa kuti “mumilazyo” ku Ba-Efeso 6:4 lyaamba nzila iibelesyegwa “mukusoleka kululamika miyeeyo, kululamika ceeco cinyongene, kugwasya kuba amiyeeyo yakumuuya.” Ino mbuti kuti mwana walukaka lwiiyo ndobamupa bazyali akaambo kakoongelezyegwa abeenzinyina, akuyandisya kucita nzyobacita beenzinyina? Nguni uukonzya kwaambwa kuti umusungilizya munzila ibi mwana—ibazyali bakwe naa beenzinyina? Ikuti beenzinyina kabamusungilizya mwana kunywa misamu iikola, kunywa bukoko, naa kutalilemeka, sena bazyali beelede kukazigwa akaambo kakusola kumululamika mwana mukuyeeya kwakwe alimwi akumugwasya kubona zikonzya kuboola akaambo kabukkale butali kabotu?
8. Ncinzi cakajatikizidwe mukugwasya Timoteo ‘kuzumina’?
8 Imwaapostolo Paulo wakalembela mukubusi Timoteo kuti: “Kojatisya makani ngowakaiya azintu nzozuminisya, nkaambo ulibezi abo abakakwiisya ngao, alimwi ulizi kuti kuzwa kuciindi niwakacili mwana ulyeezi magwalo aasalala aakonzya kukusongwaazya mukufutulwa kulusyomo luli muli-Kristo Jesu.” (2 Timoteo 3:14, 15) Kuzwa kubwana bwakwe Timoteo, banyina abakaapanyina bakayumya lusyomo lwakwe muli Leza kwiinda mukubelesya luzibo lwamu Magwalo Aasalala. (Incito 16:1; 2 Timoteo 1:5) Kumbele amazuba, nobakazikuba Banakristo, kunyina nobakamusinikizya Timoteo kusyoma pele bakamugwasya ‘kuzumina’ kwiinda mukumupanduluda kweelana aluzibo lwamu Magwalo.
Jehova Ukukulwaizya Kulisalila
9. (a) Ino Jehova wakabalemeka buti bantu, alimwi nkaambo nzi? (b) Ino mbuti Mwana wa Leza simuzyalwa alikke mbwaakazibelesya nguzu zyakulisalila?
9 Jehova naakayanda naakalenga bantu mbuli banyama, kubabikkila limwi bubambe bwakuti kabacita buyo kuyanda kwakwe. Muciindi caboobo, wakabapa nguzu zyakulisalila. Leza wesu uyanda balelwa balisungude kulelwa. Ulakkomana kubona zilenge zyakwe, bana abapati kabamubelekela akaambo kakuti balamuyanda. Icikozyanyo cibotu kapati cakulibombya kukuyanda kwa Leza nca Mwanaakwe simuzyalwa alikke, walo Jehova ngwaakaamba kuti: “Ngooyu mwanaangu uuyandika ngunkondelwa.” (Matayo 3:17) Ooyu Mwana mutaanzi kuzyalwa wakati kuli Bausyi: “Ndakondwa kucita luyando lwako, O Leza wangu; Mulao wako uli mumoyo wangu.”—Intembauzyo 40:8; Ba-Hebrayo 10:9, 10.
10. Ino kubelekela Jehova munzila njayanda kuyeeme anzi?
10 Jehova ulangila boonse aabo ibamubelekela kwiinda mukusololelwa a Mwanaakwe kulibombya mbubwenya kumakanze aakwe. Kwiinda mubusinsimi, sintembauzyo wakaimba kuti: “Bantu bako balabungana camoyo woonse azilundu zisalala mubuzuba bwalumamba lwako. Balombe bako bali mbuli malosi aalume luboneka cifumofumo.” (Intembauzyo 110:3) Mbunga ya Jehova yoonse, yakujulu ayaansi, ileendelezyegwa kwiinda mukulibombya kumakanze aa Leza.
11. Ncakusala cili buti ncobeelede kucita bakubusi bakomezyegwa abazyali balyaabide?
11 Aboobo, nywebo nobana mweelede kuziba kuti bazyali banu naa baalu Banakristo mumbungano kunyina nobakonzya kumusinikizya kubbapatizigwa. Mweelede kuliyandila nobeni kubelekela Jehova. Joshua wansiku wakaambila bana Israyeli kuti: ‘Amumumanine milimo Jehova cakululama acakusinizya. Amulisalile buzuba obuno ngumuyanda kubelekela.’ (Joshua 24:14-22) Mbubwenya buyo, andinywe mweelede kulisalila kulyaaba kuli Jehova akwaaba buumi bwanu kuti mucite kuyanda kwakwe.
Kuyumuna Mukuli Ngojisi
12. (a) Nokuba kuti bazyali balakonzya kubayiisya bana babo, ncinzi ncobatakonzyi kubacitila? (b) Ndilili mwana natalika kuba amukuli kuli Jehova akaambo kakusala nkwacita?
12 Kuli ciindi nywebo nobakubusi nomuleka kukwabililwa akusyomeka kwabazyali banu. (1 Ba-Korinto 7:14) Sikwiiya Jakobo wakalemba kuti: “Oyo uuzi kucita kabotu, nekubaboobo taciti, wabisya.” (Jakobo 4:17) Bazyali tabakonzyi kwiiminina bana babo mukubelekela Leza mbubwenya ibana mbobatakonzyi kwiiminina bazyali babo. (Ezekiele 18:20) Sena wakayiya kujatikizya Jehova amakanze aakwe? Sena ulacikonzya kuteelela nzyoyiya kutegwa ube acilongwe anguwe? Sena inga taciboti kuyeeya kuti lino Leza ukubona kuti ulakonzya kulisalila kuti umubelekele?
13. Mibuzyo iili buti bakubusi batanabbapatizigwa njobeelede kulibuzya?
13 Sena uli mwana uutanabbapatizigwa uulelwa abazyali bakomba Leza, ujanika kumiswaangano ya Bunakristo mane akutola lubazu mukukambauka makani mabotu aa Bwami? Ikuti kakuli boobo, kolibuzya kuti: ‘Ino ncinzi ncondicitila boobo? Sena ndilajanika kumiswaangano akutola lubazu mumulimo wakukambauka akaambo kakuti bazyali bangu bandilangila kucita oobo naa akaambo kakuti ndiyanda kukkomanisya Jehova?’ Sena mwalibonena “makani mabotu aatambulika aalondokede”?—Ba-Roma 12:2.
Nkaambo nzi Ncowayawaya Kubbapatizigwa?
14. Nzikozyanyo nzi zyamu Bbaibbele zitondezya kuti muntu tayelede kutola ciindi cilafwu kuti abbapatizigwe?
14 “Ncinzi ino icindikasya kubapatizigwa?” Imwaalumi muna Etiopiya wakabuzya mubuzyo ooyo kubuzya mukambausi Filipo wakazwa akuziba kuti Jesu ngo Mesiya. Pele muna Etiopiya wakalaazi kabotu Magwalo cakuti wakabona kuti tanaakeelede kuwayawaya kuzumina kuti kuzwa ciindi eeco wakali kuyoobelekela Jehova antoomwe ambungano ya Bunakristo, alimwi kaambo aako kakamukonda kapati. (Incito 8:26-39) Mbubwenya buyo, mwanakazi uutegwa Ludiya, walo wakajulidwe moyo “kuti aswiililisye kukukambauka kwa-Paulo,” cakutasowa ciindi ‘wakabbapatizigwa,’ walo amukwasyi wakwe. (Incito 16:14, 15) Mbubwenya buyo, sikulindila ntolongo ku Filipi wakabaswiilila ba Paulo a Sila nobakali ‘kumwaambila makani aa-Mwami’ mpoonya ‘wakabbapatizigwa antoomwe abana bakwe boonse.’ (Incito 16:25-34) Aboobo ikuti kamujisi luzibo kujatikizya Jehova amakanze aakwe, kamuyandisya kucita kuyanda kwakwe, alimwi kamuli ampuwo mbotu mumbungano alimwi akuti kamujanika lyoonse kumiswaangano akutola lubazu mukukambauka makani mabotu aa Bwami, nkaambo nzi ncomuwayawaya kubbapatizigwa?—Matayo 28:19, 20.
15, 16. (a) Nkuyeeya kuli buti kulubide kukonzya kupa bakubusi bamwi kuwayawaya kubbapatizigwa? (b) Ino mbuti kulyaaba akubbapatizigwa mbokukonzya kubakwabilila bakubusi?
15 Sena ulawayawaya kubweza ntaamu eeyi iiyandika kapati akaambo kakuyoowa kupegwa mulandu ikuti naa walubizya? Ikuti kakali nkakaambo aako, kweezyeezya makani aaya: Sena inga okaka kwiiya kuccovwa ncinga akaambo kakuyoowa kuti inga yaakukuusya buzuba bumwi? Peepe! Ncimwi buyo, toelede kuwayawaya kubbapatizigwa ikuti kozuzikizya zyeelelo. Masimpe, uyookulwaizigwa kusoleka kusikila mpokonzya kukaka kunjila mucibi ikuti naa walyaaba kuli Jehova akuzumina kucita kuyanda kwakwe. (Ba-Filipi 4:13) Nobakubusi, mutayeeyi kuti munyina mulandu nkaambo tamunabbapatizigwa. Ikuti naa mwasika aciimo mpomukonzya kupegwa mulandu, mulakonzya kulivwiilila kuli Jehova kujatikizya nzyomucita kufumbwa naa mulibbapatizidwe naa pe.—Ba-Roma 14:11, 12.
16 Bakamboni banji munyika yoonse bayeeya kuti kusala nkobakacita kuti babbapatizigwe nobakacili bana kwabagwasya kapati. Mucikozyanyo, amubone Kamboni umwi uujisi myaka yakuzyalwa iili 23 waku Europe nkoili Kumbo. Ulayeeya kuti kubbapatizigwa nkwaakacita naakali amyaka iili 13 kwakamukulwaizya kucenjela kutegwa atazundwi a “zisusi zyabwanike.” (2 Timoteo 2:22) Naakacili mwana, wakasalide kuyooba mubelesi waciindi coonse. Calino, ulabeleka kakkomene kuofesi yamutabi wa Bakamboni ba Jehova. Kuli zilongezyo zinji nzyobakonzya kujana bakubusi boonse ibasala kubelekela Jehova, kubikkilizya anduwe.
17. Muumbazu nzi mociyandika kapati kumvwisya mbulubede “luyando lwa-Mwami”?
17 Kulyaaba akubbapatizigwa ngamatalikilo aabuumi motubikkila kapati maano kuyanda kwa Jehova mubukkale bwesu boonse. Kupona kweelana akulyaaba kwesu kulajatikizya ‘akujana ciindi.’ Ino mbuti mbotunga twacita oobo? Kwiinda mukutola ciindi ncotwali kunoobelesya kucita zintu zitagwasyi akucibelesya mukubala Bbaibbele, kujanika kumiswaangano lyoonse, alimwi akutola lubazu kusikila mpotukonzya mukukambauka “Makani Mabotu aa-Bwami.” (Ba-Efeso 5:15, 16; Matayo 24:14) Kulyaaba kwesu kuli Jehova alimwi akuyandisya kwesu kucita kuyanda kwakwe kulagwasya mumbazu zyoonse zyabuumi bwesu kubikkilizya aciindi notulyookezya, notulya akunywa alimwi anyimbo nzyotuswiilila. Ino mulekelanzi kusala kulyookezya ooko nkomukonzya kunoocita kusikila kukabe kutamani? Zyuulu zinji zya Bakamboni bakubusi bakkomene inga bakwaambila kuti kuli nzila zinji zyakulikondelezya kuli kabotu zyeendelana a “luyando lwa-Mwami.”—Ba-Efeso 5:17-19.
“Atweende Anywebo”
18. Mmubuzyo uuli buti bakubusi ngobeelede kulibuzya?
18 Kuzwa mu 1513 B.C.E. kusikila lya Pentekoste 33 C.E., Jehova wakajisi bantu bakamantene anyika mbaakasalide kuti kabamukomba akuba bakamboni bakwe. (Isaya 43:12) Bana Israyeli bana-bana bakali kuzyalwa mumusyobo ooyo. Kuzwa lya Pentekoste, Jehova ulijisi “cisi” cipya anyika, Israyeli wakumuuya, ‘bantu bazina lyakwe.’ (1 Petro 2:9, 10; Incito 15:14; Ba-Galatiya 6:16) Imwaapostolo Paulo wakaamba kuti Kristo wakalisalazizya “bantu kuba [bakwe], balisanga kumana milimo mibotu.” (Tito 2:14) Nywebo nobakubusi mulaangulukide kuliyandauda bantu aabo nkobakonzya kujanika. Nguuli sunu “musyobo uululeme uusyomeka,” uupona kweelana anjiisyo zyamu Bbaibbele, uucita mbuli Bakamboni ba Jehova basyomeka alimwi bakambauka Bwami bwakwe kuba mbobulangizi bulikke mbobajisi bantu? (Isaya 26:2-4) Amulange-lange milimo yazikombelo zya Bunakristo bwanyika azimwi, akweezyanisya bukkale bwabo anzyolyaamba Bbaibbele kuti nzeziyandika kubabelesi ba Leza bakasimpe.
19. Ino tuulunzuma twabantu nyika yoonse mboizulwa basinizya nzi?
19 Tuulunzuma twabantu nyika yoonse, kubikkilizya abakubusi banji, balisinizizye kuti bananike basyeede ba Bakamboni ba Jehova mbabaambwa kuti “musyobo uululeme.” Kuli ba Israyeli bakumuuya aaba baamba kuti: “Atweende anywebo, nkaambo twamvwa kuti Leza mpali akati kanu.” (Zekariya 8:23) Tulasyoma alimwi akupaila kuti nobakubusi muyoosala kuba akati kabantu ba Leza, aboobo “amusale buumi”—buumi butamani munyika ya Jehova mpya.—Deuteronomo 30:15-20; 2 Petro 3:11-13.
Ikwiinduluka
• Ino ncinzi cijatikizidwe mumilazyo?
• Mulimo uuli buti Jehova ngwatambula?
• Ncakusala cili buti bakubusi boonse balelwa abazyali balyaabide ncobajisi?
• Nkaambo nzi muntu ncateelede kuwayawaya kubbapatizigwa?
[Mibuzyo yaciiyo]
[Zifwanikiso izili apeeji 28]
Nguni ngoyooswiilila?
[Cifwanikiso icili apeeji 30]
Ino mbuti kulyaaba akubbapatizigwa mbokukonzya kukukwabilila?
[Cifwanikiso icili apeeji 31]
Ino ncinzi cikulesya kubbapatizigwa?