Amubikkile Maano Kububotu Bwa Mbunga Ya Jehova
Amubikkile Maano Kububotu Bwa Mbunga Ya Jehova
“[Tuyookkomana] kububotu bwaŋanda yako.”—INTEMBAUZYO 65:4.
1, 2. (a) Ino bubambe bwatempele bwakali kuyoobagwasya buti bantu ba Leza? (b) Ndugwasyo nzi Davida ndwaakapa kumayake aatempele?
DAVIDA wamu Israyeli yansiku uli akati kabantu balibedelede baambwa mu Magwalo aa Cihebrayo. Ooyu mweembezi, sikwiimba, musinsimi alimwi mwami wakabikka lusyomo lwakwe muli Jehova Leza. Cilongwe ciyumu ncaakajisi Davida a Jehova cakamukulwaizya kuyandisya kuyaka ŋanda ya Leza. Ŋanda naa tempele iili boobu, yakali kuyooba busena bupati bwabukombi bwakasimpe mu Israyeli. Davida wakalizi kuti bubambe bujatikizya tempele bwakali kuyoobakkomanisya akubagwasya bantu ba Leza. Aboobo Davida wakaimba kuti: “Uli acoolwe muntu ngosala, ngoswenya kulinduwe, kuti akale muŋanda yako. Tulamwe kububotu bwaŋanda yako, itempele yako iisalalisya.”—Intembauzyo 65:4.
2 Davida tanaakazumizigwa kweendelezya mayake aaŋanda ya Jehova. Muciindi caboobo, coolwe cilibedelede eeco cakapegwa kumwanaakwe Solomoni. Davida kunyina naakatongooka akaambo kakuti muntu umbi ngowakapegwa coolwe eeco ncaakali kuyandisya. Icakali kuyandika kapati kulinguwe ncakuti tempele ikayakwe. Camoyo woonse wakagwasyilizya mumulimo ooyu kwiinda mukupa Solomoni malailile ngaakamupede Jehova amboyakeelede kuyakwa tempele. Kunze lyaboobo, Davida wakabunganya ba Levi basimilimo mutukamu akusanga ngolida ansiliva zyakuyasya tempele.—1 Makani 17:1, 4, 11, 12; 23:3-6; 28:11, 12; 29:1-5.
3. Ino mbuti babelesi ba Leza mbobabubona bubambe bwabukombi bwakasimpe?
3 Bana Israyeli basyomeka bakabutobela bubambe bwakabikkwa bwabukombi bwakasimpe kuŋanda ya Leza. Mbotuli babelesi bamazuba aano ba Jehova, andiswe tulabutobela bubambe bwabukombi bubikkidwe mumbunga ya Jehova yaanyika. Aboobo tutondezya kuti andiswe tuyeeya bwakali kuyeeya Davida. Tatuli bantu bayandisya kutongooka. Muciindi cakuba bantu bali boobo, tubikkila maano kububotu bwambunga ya Leza. Sena kuli nomwakayeeyede zintu zibotu zinji eezyo zyeelede kutupa kulumba? Atulange-lange zimwi zyanzizyo.
Kulumba Akaambo Kabaabo Basololela
4, 5. (a) Ino mbuti “muzike musyomesi uucenjede” mbwazuzikizya mulimo wakwe? (b) Ino mbuti Bakamboni bamwi mbobalimvwa kujatikizya cakulya cakumuuya ncobatambula?
4 Tujisi twaambo tumvwika tutupa kulumba akaambo ka “muzike musyomesi uucenjede” ubikkidwe a Jesu Kristo kuti kalanganya zintu zyakwe. Ciinga camuzike cibambwa a Banakristo bananikidwe amuuya cilasololela mukukambauka makani mabotu, cibikka bubambe bwamiswaangano yabukombi alimwi cilamwaya mabbuku aamba zyamu Bbaibbele mumyaambo iinda ku 400. Tuulunzuma twabantu nyika yoonse balalya “zilyo zya[kumuuya] kuciindi ceelede.” (Matayo 24:45-47) Masimpe kunyina kaambo keelede kutupa kubutongooka bubambe oobu.
5 Kwamyaka minji, Kamboni wa Jehova ucembeede wazina lya Elfi wali kuumbulizigwa akugwasyigwa kwiinda mukutobela lulayo lwamu Magwalo lujanika mumabbuku aaciinga camuzike. Akaambo kakulumba kwakwe, Elfi wakalemba kuti: “Ino ncinzi ncendalikukonzya kucita nokwanyina mbunga ya Jehova?” Peter a Irmgard abalo bali babelesi ba Leza kwamakumi aamyaka. Irmgard utondezya kulumba akaambo kamabbuku oonse apegwa a “mbunga ya Jehova yaluyando alimwi iibikkila maano.” Mabbuku aaya alabikkilizya ayaayo abambilwa bantu bayandika kulanganizigwa munzila imbi, mbuli bantu ibataboni naa basinke matwi.
6, 7. (a) Ino mbuti milimo iicitwa ambungano nyika yoonse mboizulwa mboyeendelezyegwa? (b) Ino mbuti bamwi mbobalimvwa kujatikizya mbunga ya Jehova iili anyika?
6 “Muzike musyomesi” wiimininwa a Kabunga Keendelezya ka Bakamboni ba Jehova, kakamu kasyoonto kabaalumi bananikidwe amuuya babelekela kumaofesi mapati aa Bakamboni ba Jehova ku Brooklyn, New York. Kabunga Keendelezya kalasala babelesi ba Jehova bajisi luzibo kubeleka mumaofesi aamitabi iilanganya milimo iicitwa ambungano ziinda ku 98,000 nyika yoonse mboizulwa. Baalumi bazuzikizya zyeelelo zyamu Bbaibbele balasalwa kuba baalu abakutausi mumbungano eezi. (1 Timoteo 3:1-9, 12, 13) Ibaalu balasololela alimwi caluyando baleembela butanga bwa Leza mbobapedwe kulanganya. Cilagwasya kaka kuba umwi wambelele eezyo akulibonena luyando alukamantano luliko akati ‘kabunyina bwesu’!—1 Petro 2:17; 5:2, 3.
7 Muciindi cakutongooka, ibantu kanji-kanji batondezya kulumba akaambo kabusolozi bwakumuuya bucitwa caluyando oobo mbobatambula kuzwa kubaalu. Mucikozyanyo, kuli Birgit, mukaintu Munakristo uujisi myaka iibalilwa kuma 30. Naakacili mukubusi, wakatalika kusobana abantu batali kabotu, kwakaceede buyo aniini kuti acite cibi. Pele ilulayo lusalede lwamu Bbaibbele ndobakamupa baalu alimwi alugwasyo luzwa kubasyominyina zyakamugwasya kuzwa mubukkale butali kabotu. Ino Birgit ulimvwa buti lino? Waamba kuti: “Ndilalumba kuti ndicili mumbunga ya Jehova mbotu kapati.” Mulombwana ujisi myaka iili 17 wazina lya Andreas waamba kuti: “Eeyi masimpe nembunga ya Jehova, nembunga mbotu kwiinda munyika yoonse.” Sena tatuyandiki kulumba akaambo kabubotu bwambunga ya Jehova iili anyika?
Aabo Basololela Tabalondokede
8, 9. Ino mbuti bamwi mbocakali kupona a Davida mbobakacita, alimwi mbuti mbwaakacita kujatikizya bukkale bwabo?
8 Masimpe, aabo basalidwe kuti kabasololela mubukombi bwakasimpe tabalondokede pe. Boonse buyo balalubizya alimwi bamwi bajisi tumpenda ooto ntobasoleka kumana. Sena eeci ceelede kutupa kutakkomana? Peepe. Nobaba baabo bakapedwe mikuli minji mu Israyeli yansiku bakali kulubizya kapati. Davida naakacili mwana, mucikozyanyo, wakalombwa kunoobeleka kali mwiimbi kutontonzya Mwami Saulo walo wakakkopene mumizeezo. Kumbele, Saulo wakatiimujaye Davida, walo kumamanino wakatija kutegwa atajaigwi.—1 Samuele 16:14-23; 18:10-12; 19:18; 20:32, 33; 22:1-5.
9 Bana Israyeli bamwi bakali basilweeno. Mucikozyanyo, mupati wabasikalumamba ba Davida, Joabu wakajaya Abineri musazinyina wa Saulo. Absalomu wakazangila usyi, Davida, kuyanda kuti amwaatule acuuno cabwami. Awalo sikumupa lulayo David wazina lya Ahitofeli wakamubukila. (2 Samuele 3:22-30; 15:1-17, 31; 16:15, 21) Pele Davida tanaakatalika kutongooka; alimwi kunyina naakabusiya bukombi bwakasimpe. Davida wakacita munzila iindene kapati. Mapenzi akapa Davida kukakatila kuli Jehova akuzumanana kuba abulangizi buli kabotu mbwaakajisi naakatija akaambo ka Saulo. Aciindi eeco, Davida wakaimba kuti: “Undifwide luzyalo, O Leza, undifwide luzyalo, nkaambo ndayubila mulinduwe. Ndayubila mucenzule camababa aako, mane lunyonyooko lwiindilile.”—Intembauzyo 57:1.
10, 11. Ncinzi cakamucitikila Munakristo wazina lya Gertrud naakacili mwana, alimwi ino wakaamba nzi kujatikizya kulubizya kwabasyominyina?
10 Tunyina kaambo katupa kutongooka kujatikizya lweeno mumbunga ya Leza mazuba aano. Jehova naa bangelo bakwe naa beembezi bakumuuya kunyina nobalekela lweeno abantu bacita zibi mumbungano ya Bunakristo. Nokuba boobo, toonse tulacitikilwa mapenzi akaambo kakutalondoka kwabuntu—ikwesu tobeni akwababelesi ba Leza bamwi.
11 Gertrud iwalikukomba Jehova kwaciindi cilamfwu naakacili musimbi, wakatamikizyigwa kuti wakali silucengo ikutali mukambausi waciindi coonse wa Bwami. Ino wakacita buti? Sena Gertrud wakatongooka kujatikizya twaambo ooto? Peepe. Katanafwa mu 2003 kali amyaka iili 91, wakayeeya zyakamucitikila musyule akwaamba kuti: “Mubuumi bwangu boonse zintu zyakandicitikila zyakandiyiisya kuti kunyina makani akulubizya nkwacita muntu aumwi, Jehova uleendelezya mulimo wakwe uuyandika kapati, mwalo mwabelesya bantu batalondokede.” Naakaba apenzi akaambo kukutalondoka kwababelesi bamwi ba Leza, Gertrud wakapaila kuli Jehova camoyo woonse.
12. (a) Ncikozyanyo cili buti citali kabotu Banakristo bamwi bamumwaanda wamyaka wakusaanguna ncobakasiya? (b) Ino ncinzi ncotweelede kubikkila maano?
12 Mbwaanga abalo Banakristo basyomeka kapati alimwi balyaabide tabalondokede, ciindi mubelesi uupedwe mukuli nalubizya, atuzumanane kucita ‘zintu zyoonse cakutatongooka.’ (Ba-Filipi 2:14) Inga caba cintu cuusisya ikuti twatobela cikozyanyo cibyaabi cabantu basyoonto bamumbungano ya Bunakristo yamumwaanda wamyaka wakusaanguna! Kweelana asikwiiya Juda, bamayi bakubeja bakuciindi eeco bakali ‘kukaka bulelo bwa Leza akusampaula balemekwa ba Leza.’ Kunze lyaboobo, basikubisya aabo bakali ‘kusyolooka akutongooka.’ (Judi 8, 16, Ci) Tatweelede kweenda munzila mweenda basikutongooka pele tweelede kubikkila maano kuzintu zibotu nzyotutambula kuzwa ‘kumuzike musyomesi.’ Atube bantu balumba kububotu bwambunga ya Jehova ‘akucita zintu zyoonse cakutatongooka.’
“Majwi aya Mayumu”
13. Ino mbuti bamwi mbobakazitambula zimwi zyanjiisyo zya Jesu Kristo?
13 Nokuba kuti ibamwi mumwaanda wamyaka wakusaanguna bakatongooka babelesi basalidwe, bamwi bakatongooka njiisyo zya Jesu. Kweelana ambokulembedwe kuli Johane 6:48-69, Jesu wakati: “Oyo uulya mubili wangu, akunywa bulowa bwangu uli abuumi ubutamani.” Bamvwe buyo majwi aaya, “banjibanji babasikwiiya bakwe . . . bakati, Majwi aya mayumu, nguni uuti amvwe?” Jesu wakalizi kuti “basikwiiya bakwe bali kutongauka majwi aya.” “Nkaambo kaako basikwiiya bakwe banjibanji bakapiluka, tabacili kweenda limbi awalo.” Pele tabali boonse basikwiiya bakatongooka. Amumvwe cakactika Jesu naakabuzya baapostolo bali 12 kuti: “Sena anywebo mulainka?” Imwaapostolo Petro wakavwuwa wati: “Omwami, tuye kuli? Nduwe oojisi majwi aabuumi ubutamani. Eno swebo twakasyoma, alimwi tulizi kuti nduwe Uusalala wa-Leza.”
14, 15. (a) Nkaambo nzi bantu basyoonto ncobatakkomani anjiisyo zimwi zya Bunakristo? (b) Ncinzi ncotukonzya kwiiya kuzwa kucakamucitikila mulombwana wazina lya Emanuel?
14 Kumazuba aano, mweelwe musyoonto buyo wabantu ba Leza mbabatakkomene azibeela zimwi zyanjiisyo zya Bunakristo alimwi batongooka kujatikizya mbunga ya Jehova yaanyika. Ino kaambo nzi? Ikutongooka kuli boobo ikanji-kanji kuboola akaambo kakutamvwisya Leza mbwacita zintu. Imulengi ulayubununa kasimpe bucebuce kubantu bakwe. Nkakaambo kaako ikumvwa kwesu kwa Magwalo zimwi ziindi kuyandika kucincululwa. Ibantu ba Jehova banji balakukkomanina kucinca ooku. Ibasyoonto ‘balaindilila kukululama’ alimwi balacimwa akucinca ooku. (Mukambausi 7:16) Kulisumpula kulakonzya kuba ndepenzi ndyobajisi alimwi bamwi tabayandi kweendelezyegwa. Kufwumbwa kaambo nkobajisi, kutongooka ooku takuli kabotu, mbwaanga kulakonzya kutupilusya kunyika anzila zyayo.
15 Mucikozyanyo, Emanuel wakali Kamboni wakali kukazya zimwi zintu nzyaakali kubala mumabbuku aa “muzike musyomesi uucenjede.” (Matayo 24:45) Wakaleka kubala mabbuku eesu aa Bunakristo mane akwaambila baalu bambungano kuti tanaakacili kuyanda kuba umwi wa Bakamboni ba Jehova. Pele muciindi buyo cisyoonto, Emanuel wakazi kuziba kuti njiisyo zyambunga ya Jehova masimpe zyakaliluzi. Wakapiluka kuli Bakamboni, akuzumina kulubizya nkwaakacita, mpoonya wakapilusyigwa kuba umwi wa Bakamboni ba Jehova. Kuzwa waawo, wakakkomana alimwi.
16. Ncinzi cikonzya kutugwasya kutadooneka njiisyo zimwi zya Bunakristo?
16 Ino mbuti kuti naa twasunkwa kutongooka akaambo kakudooneka njiisyo zimwi nzyobasyoma bantu ba Jehova boonse? Tuyandika kukkazika moyo. ‘Imuzike musyomesyi’ mukuya kwaciindi ulakonzya kumwaya makani aamwi aaingula mibuzyo njotujisi akutugwasya kumvwisya. Ncamaano ikuyandaula lugwasyo kubaalu Banakristo. (Juda 22, 23) Mupailo, ciiyo cesu tobeni alimwi akusangana abasyomima babikkila maano zintu zyakumuuya zilakonzya kutugwasya kutadooneka alimwi akulumba kapati kukasimpe kamu Bbaibbele kayumya lusyomo nkotwaiya kwiinda mububambe Jehova mwatupeda zintu.
Amuzumanane Amuuya Mubotu
17, 18. Muciindi cakutongooka, ino tweelede kuba amuuya uuli buti alimwi nkaambo nzi?
17 Inzya, bantu batalondokede lyoonse inga bajisi miyeeyo mibi alimwi bamwi inga kabali bantu baile kutongooka aatakwe akaambo. (Matalikilo 8:21; Ba-Roma 5:12) Pele ikuti twaba bantu baile kutongooka lyoonse, tuyoobikka cilongwe ncotujisi a Jehova Leza muntenda. Aboobo, tuyandika kulyeendelezya kufwumbwa notwasunkwa kutongooka.
18 Muciindi cakutongooka kujatikizya zintu mumbungano, inga cabota kuba amuuya mubotu akutobela bubambe buyootugwasya kujata bubi, kukkomana, kuba abulemu, kuzilanga bweelede zintu akuyuma mulusyomo. (1 Ba-Korinto 15:58; Tito 2:1-5) Jehova nguweendelezya zintu zyoonse mumbunga yakwe, alimwi Jesu ulizizi zyoonse zitola busena mumbungano aimwi, mbubwenya mbocakabede amumwaanda wamyaka wakusaanguna. (Ciyubunuzyo 1:10, 11) Cakukkazika moyo amulindile Leza a Kristo, Mutwe wambungano. Beembezi bapedwe nguzu balakonzya kubelesyegwa kululamika twaambo ooto tukonzya kuyandika kululamikwa.—Intembauzyo 43:5; Ba-Kolose 1:18; Tito 1:5.
19. Kusikila leelyo Bwami bwaakutalika kweendelezya bukkale bwabantu, ncinzi ncotweelede kubikkila maano lino?
19 Ino-ino eeyi nyika mbyaabi iyoomana alimwi Bwami bwa Mesiya buyootalika kweendelezya bukkale bwabantu. Kusikila ciindi eeco, cilayandika kuti umwi aumwi wesu azumanane amuuya mubotu. Eeci ciyootugwasya kubona bubotu mbobajisi basyomima muciindi cakubona buyo mobalubizya. Ikubikkila maano kububotu bwabo kuyootupa kukkomana. Muciindi cakupengana mumizeezo akaambo kakutongooka, tuyookulwaizigwa akuyumizigwa kumuuya.
20. Ino kuba amuuya mubotu kuyootugwasya kujana zilongezyo zili buti?
20 Muuya uuli kabotu uyootugwasya kubikkila maano kuzilongezyo zinji nzyotujisi akaambo kakujanika mumbunga ya Jehova yaanyika. Eeyi njembunga ilikke munyika iisyomeka ku Mwami wakoonse-koonse. Ino mulimvwa buti kumakani aaya alimwi acoolwe cakukomba Leza alikke wakasimpe, Jehova? Amube amuuya mbuli wakajisi Davida walo wakaimba kuti: “Webo ooswiilila zikombyo, bantu boonse bayoosika kulinduwe. Uli acoolwe muntu ngosala, ngoswenya kulinduwe, kuti akale muŋanda yako. Tulamwe kububotu bwaŋanda yako.”—Intembauzyo 65:2, 4.
Sena Mulayeeya?
• Nkaambo nzi ncotweelede kulumba akaambo kabaabo basololela mumbungano?
• Ino tweelede kucita buti ciindi bakwesu basololela nobalubizya?
• Ino tweelede kukubona buti kucinca kucitwa mukumvwisya Magwalo?
• Ncinzi cikonzya kumugwasya Munakristo kutadooneka?
[Mibuzyo yaciiyo]
[Cifwanikiso icili apeeji 14]
Davida wakapa Solomoni malailile amboyakeelede kuyakwa tempele alimwi camoyo woonse wakagwasilizya bukombi bwakasimpe
[Cifwanikiso icili apeeji 17]
Baalu Banakristo balapa lugwasyo lwakumuuya cakukondwa