Amumuyoowe Jehova—Amukkomane!
Amumuyoowe Jehova—Amukkomane!
“Ulikkomene muntu uuyoowa Jehova.”—INTEMBAUZYO 112:1, NW.
1, 2. Ino kuyoowa Jehova kulakonzya kuleta nzi?
LUKKOMANO talubooli buyo. Lukkomano lwini-lwini luyeeme akusala zintu munzila iiluzi, kucita ciluzi akutantamuka cibi. Mulengi wesu, Jehova, watupa Ijwi lyakwe, Ibbaibbele, kutegwa lituyiisye mbotukonzya kupona buumi buli kabotu. Kwiinda mukuyandaula akutobela busolozi bwa Jehova, ikutondezya kuyoowa Leza, tulakonzya kukkomana ncobeni akukkutila.—Intembauzyo 23:1; Tusimpi 14:26.
2 Mucibalo eeci, tulalanga-langa zikozyanyo zyamu Bbaibbele alimwi azyamazuba aano zitondezya kuyoowa Leza kwini-kwini mbokupa nguzu zyakukazya kuyungwa kucita cibi alimwi akuba acamba mukucita cibotu. Tulabona kuti kuyoowa Leza kulakonzya kutupa kukkomana kwiinda mukutukulwaizya kululamika nzila iitaluzi mbubwenya bwakacita Mwami Davida. Alimwi tulabona kuti kuyoowa Jehova masimpe ncikono ciyandika kapati eeco bazyali ncobakonzya kupa bana babo. Masimpe, Ijwi lya Leza litusyomezya kuti: “Ulikkomene muntu uuyoowa Jehova.”—Intembauzyo 112:1, NW.
Kubukulusya Lukkomano
3. Ncinzi cakamugwasya Davida kuyaambele kuzwa muzibi?
3 Mbuli mbokwaambwa mucibalo camusyule, Davida ziindi zyotatwe wakaalilwa kutondezya kuyoowa Leza alimwi wakalubizya. Pele mbwaakalutambula lulayo lwa Jehova bwakatondezya kuti wakacili muntu uuyoowa Leza. Bulemu mbwaakajisi kuli Leza bwakamukulwaizya kuzumina cibi ncaakacita, kululamika nzila zyakwe akubukulusya cilongwe cakwe a Jehova. Nokuba kuti kulubizya kwakwe kwakamuletela mapenzi walo kubikkilizya abamwi, ikweempwa kwini-kwini nkwaakacita kwakapa kuti Jehova azumanane kumugwasya akumulongezya. Cikozyanyo ca Davida masimpe cilakonzya kubayumya Banakristo mazuba aano ibakonzya kunjila mucibi cipati.
4. Ino mbuti kuyoowa Leza mbokukonzya kugwasya muntu kukkomana alimwi?
4 Amubone cakamucitikila Sonja. * Nokuba kuti wakali mukambausi waciindi coonse, Sonja wakali kusangana abantu bajisi bukkale bubyaabi, wakanjila mubukkale buteelede kumunakristo mane wakazikugusyigwa mumbungano ya Bunakristo. Naakamvwisya ncaakacita, Sonja wakacita zyoonse ziyandika kutegwa abukulusye cilongwe cakwe a Jehova. Mukuya kwaciindi, wakapilusyigwa mumbungano. Nokuba kuti wakainda muzintu zyoonse eezi, Sonja kunyina naakatolwaala kubelekela Jehova. Mane wakatalika alimwi mulimo wabupainiya bwaciindi coonse. Kumbele, wakazikukwatwa kumwaalu Munakristo uujisi mpuwo mbotu alimwi lino ulabeleka antoomwe anguwe kabakkomene mumbungano. Nokuba kuti Sonja ulimvwa bubi kuti wakalileyede munzila ya Bunakristo, ulikkomene kuti kuyoowa Leza kwakamugwasya kupiluka.
Ncibotu Kupenga Kwiinda Kubisya
5, 6. Amupandulule Davida mbwaakamulekelela alimwi akaambo ncaatakamujaila Saulo ziindi zyobilo naakajisi ciindi.
5 Masimpe ncibotu ikuti kuyoowa Leza kwamugwasya muntu kutanjila mucibi. Eeci mbocakabede kuli Davida. Aciindi cimwi, Saulo ampi yakwe yabantu bali zyuulu zyotatwe kabayandaula Davida, bakanjila mumpangala—impangala njiyona Davida abantu bakwe mobakayubide. Baalumi mbaakali limwi Davida bakamukulwaizya kuti amujaye Saulo. Sena taasyi Jehova wakali kwaaba sinkondonyina mumaanza aakwe? Davida wakasobelela kuya waawo mpaakalede Saulo akutendulula moombe wacikobela cakwe. Akaambo kakuti Davida wakali kuyoowa Leza, nociba ceeco ncaakacita, uutali amulandu mupati, cakamupenzya mumoyo. Davida wakabakasya bantu bakwe bakalutide kati: “Jehova anditondye kucita obo kumwami munanike wa-Jehova.” *—1 Samuele 24:1-7.
6 Aciindi cimwi kumbele, Saulo wakayakide zilabba masiku, walo abantu bakwe boonse “iŋonzi zizwa kuli-Jehova zyakalibajayide.” Davida amuntu wakwe sicamba Abisai bakanjila mukati kacilabba akwiima aawo eni aakalede Saulo. Abisai wakatiimujaye Saulo. Davida wakamukasya Abisai, akumwaambila kuti: “Taakwe muntu uukonzya kutambika ijanza lyakwe kukumulwisya munanike wa-Jehova akutaba amulandu.”—1 Samuele 26:9, 12.
7. Ncinzi cakamugwasya kutabisya Davida?
7 Nkaambo nzi Davida ncaatakamujaila Saulo naakajisi coolwe cakucita oobo ziindi zyobilo? Akaambo kakuti wakayoowa Jehova kwiinda mbwaakayoowa Saulo. Akaambo kakuyoowa Leza, Davida wakalilibambilide kupenga ikuti kwakali kuyandika kucita oobo kwiinda kubisya. (Ba-Hebrayo 11:25) Wakali alusyomo luyumu lwakuti Jehova wakali kuyoobakwabilila bantu bakwe kubikkilizya anguwe. Davida wakalizi kuti ikuswiilila alimwi akusyoma Leza kwakali kuyoomuletela lukkomano azilongezyo zinji, kakuli ikutamubikkila maano Leza kwakali kuyoomupa kutakkomaninwa a Leza. (Intembauzyo 65:4) Alimwi wakalizi kuti Leza wakali kuyoozuzikizya cisyomezyo cakubikka Davida kuba mwami alimwi akugusya Saulo muciindi ncabikkide alimwi munzila yakwe.—1 Samuele 26:10.
Kuyoowa Leza Kuletela Lukkomano
8. Ino kulilemeka kwa Davida naakali mumapenzi kupa buti cikozyanyo cakutobela?
8 Mbotuli Banakristo, tweelede kulangila kufwubaazigwa, kupenzyegwa amasukusyo amwi buyo. (Matayo 24:9; 2 Petro 3:3) Zimwi ziindi, mane tulakonzya kuba amakatazyo aajatikizya bakombima. Pele tulizi kuti Jehova ulabona zintu zyoonse, ulamvwa mipailo yesu akuti aciindi ceelede uyoolulamika zintu kweelana akuyanda kwakwe. (Ba-Roma 12:17-21; Ba-Hebrayo 4:16) Aboobo, muciindi cakuyoowa basikutukazya, tuyoowa Leza akusyoma kuti uyootunununa. Mbuli Davida kunyina notupilusya cibi kumuntu alimwi kunyina notuleka kutobela njiisyo ziluleme kuyoowa kupenzyegwa. Kumamanino, eeci ciletela lukkomano. Munzila nzi?
9. Amupe cikozyanyo ikuyoowa Leza mbokukonzya kuleta lukkomano kakunyina makani akupenzyegwa.
9 Misyinali wali kubeleka kwamyaka minji mu Afulika uluula kuti: “Ndiyeeya mutumbu umwi amwanaakwe musimbi ibakakaka kuula makkaadi aankamu yatwaambo twacisi akaambo kakutatola lubazu kwabo kwa Bunakristo. Bakaumwa kapati ankamu yabaalumi mpoona akubaambila kuti baunke kuŋanda. Nobakali kuyaabweenda, ibanyina bakasola kuumbulizya mwanaabo musimbi, iwatakamvwisya ncozyakacitikila boobo zintu. Tiibakakkomene aciindi eeco, pele manjezyeezya aabo akalisalade. Kumbele, bakakkomana kapati nkaambo kakuti bakaswiilila Leza. Nibakaula makkaadi, makamu naakakondwa. Baalumi baya nobakabapa zyakunywa akubazyanina mane kusika kuŋanda kwabo. Pele musimbi abanyina, kabazyi kuti bakalibombya kubantu, nibakausa kapati.” Ikuyoowa Leza kwakabagwasya ikutaba muciimo eeco.
10, 11. Mbubotu nzi bwakatobela akaambo kakuyoowa Leza kwamukaintu umwi?
10 Kutondezya kuyoowa Leza alimwi kuletela lukkomano notuli mumasukusyo aajatikizya kubona kuti buumi bulisetekene. Mary naakali kulangila mwana watatu, dokotela wakamukulwaizya kuti agusye da. Wakati: “Toli kabotu. Ulakonzya kunjila muntenda kufwumbwa ciindi mane akufwa mumawoola aali 24. Awalo mwana ulafwa. Kayi, tatuzi akuti naa mwana uyooba kabotu.” Mary wakali kwiiya Bbaibbele a Bakamboni ba Jehova pele tanaakaninga bbapatizigwa. Mary waamba kuti: “Pele ndakalisalide kubelekela Jehova alimwi ndakali kuyandisya kuzumanana kumumvwida kufwumbwa zyakali kulangilwa kucitika.”—Kulonga 21:22, 23.
11 Kali bubi, Mary wakazumanana kwiiya Bbaibbele akulanganya mukwasyi wakwe. Kumamanino wakatumbuka. Mary uluula kuti: “Ndakajisi penzi kutumbuka kwiinda mbocakabede kuli bobilo bakusaanguna pele tiilyakali penzi mpati.” Kuyoowa Leza kwakamugwasya Mary kuba amanjezyeezya mabotu alimwi tiilyakalampa wakabbapatizigwa. Ooyo mwana naakakomena awalo wakatalika kuyoowa Jehova mane lino ubelekela kuofesi yamutabi wa Bakamboni ba Jehova.
‘Koliyumya Munguzu zya Jehova’
12. Ino kuyoowa Leza kwakamuyumya buti Davida?
12 Kuyoowa Leza kwa Davida kwakamugwasya kapati kunze buyo lyakutacita cibi. Kwakamuyumya kucita cabusicamba alimwi camaano naakali mumapenzi. Kwamwaka omwe amyezi yone Davida abantu bakwe bakamuyuba Saulo ku Zikilaga mucisi caba Filisti. (1 Samuele 27:5-7) Aciindi cimwi baalumi nobakazwide amunzi, impi yabafumpi bana Amaleki yakauumpa munzi akubwezelezya bamakaintu, bana amatanga oonse. Nobakapiluka akubona cakacitikide, Davida abantu bakwe bakalila. Kuusa ooko kwakaleta bukali alimwi bantu ba Davida bakati mufwuse mabwe. Nokuba kuti wakapenzyegwa mumoyo, Davida tanaakatyompwa pe. (Tusimpi 24:10) Kuyoowa Leza kwakamukulwaizya kusyoma muli Jehova alimwi “wakaliyumya munguzu zya-Jehova.” Kwiinda mulugwasyo lwa Leza, Davida abantu bakwe bakabeenzya bana Amaleki akuboozya zintu zyoonse.—1 Samuele 30:1-20.
13, 14. Ino kuyoowa Leza kwakamugwasya buti Munakristo umwi kusala camaano?
13 Babelesi ba Leza sunu abalo balajanika mubukkale buyandika kusyoma muli Jehova alimwi akuba acamba cakusala cakucita. Atubone cikozyanyo ca Kristina. Kali mukubusi, Kristina wakaiya Bbaibbele a Bakamboni ba Jehova. Pele wakali kuyanda kuyooba sikulizya piyano, alimwi wakayaambele kapati mumakanze aakwe. Kunze lyaboobo, kukambauka kwakali kumupa kulibilika aboobo wakayoowa kuzumina mikuli imwi iiboola alubbapatizyo. Kristina naakazumanana kwiiya Jwi lya Leza, wakatalika kuzimvwa nguzu zyalyo. Wakali kwiiya kuyoowa Jehova alimwi wakaziba kuti Jehova uyanda kuti babelesi bakwe kabamuyanda amoyo, miyeeyo, buumi anguzu zyabo zyoonse. (Marko 12:30) Eeci cakamukulwaizya kulyaaba kuli Jehova akubbapatizigwa.
14 Kristina wakalomba Jehova kuti amugwasye kuyaambele kumuuya. Kristina waamba kuti: “Ndakalizi kuti buumi bwakulizya piyano bwakali kubikkilizya kweendeenda azipangano zyakulizya nkosaadi ziinda ku 400 amwaka. Aboobo, ndakasala kuba buyo mwiiyi kutegwa kandijana mali akuligwasya kumwi kandili mukambausi waciindi coonse.” Aciindi eeco, Kristina wakali kulangilwa kuyoolizya zilimba kwaciindi cakusaanguna muŋanda ijisi mpuwo kapati yamucisi mwazwa oomo mucitilwa nkosaadi. Uluula kuti: “Inkosaadi njindakacita kwaciindi cakusaanguna njiiyakali yamamanino.” Kristina wakakwatwa kumwaalu Munakristo. Boonse bobilo lino babelekela kuofesi yamutabi wa Bakamboni ba Jehova. Ulikkomene kuti Jehova wakamupa nguzu zyakusala kabotu akuti lino ulakonzya kubelesya ciindi anguzu zyakwe mumulimo wakwe.
Cikono Ciyandika Kapati
15. Ncinzi Davida ncaakali kuyanda kupa kubana bakwe alimwi ino wakacita buti oobo?
15 Davida wakalemba kuti: “Amuboole, nobana, mundiswiilile, mwiiye kulemeka naa kuyoowa Jehova mbukubede.” (Intembauzyo 34:11) Kali muzyali, Davida wakaliyandide kupa bana bakwe cikono ciyandika kapati—kuyoowa Jehova kwini-kwini alimwi kuli kabotu. Kwiinda mumajwi amilimo, Davida wakatondezya kuti Jehova tali Leza uuyandisya zintu alimwi uukonga, uulangila buyo baabo ibatyola milawo yakwe, pele kali Usyi bana baanyika siluyando, uubikkila maano alimwi uulekelela. “Ngwani uumvwisya indubyo zyakwe?” wakabuzya Davida. Mpoona, katondezya lusyomo ndwaakajisi lwakuti Jehova takkalilide kutuyandauda milandu, wakayungizya ategwa: “Undisalazye kuzibi zitabonwi.” Davida wakali masimpe kuti, ikuti naa wasoleka kapati, majwi amiyeeyo yakwe zyakali kuyootambulika kuli Jehova.—Intembauzyo 19:12, 14.
16, 17. Ino mbuti bazyali mbobakonzya kuyiisya bana babo kuyoowa Jehova?
16 Davida ncikozyanyo cibotu kubazyali sunu. “Bazyali besu bakatukomezya munzila yakatugwasya kukkomana kuba mukasimpe,” mbwaamba Ralph uubeleka kuofesi yamutabi wa Bakamboni ba Jehova antoomwe amuce wakwe. “Notwakali bana, bakali kubandika andiswe kujatikizya milimo yambungano, aboobo twakakayandisya kasimpe mbuli mbubakali kukayandisya balo. Bakatukomezya katujisi lusyomo lwakuti tulakonzya kucita zintu zigwasya mumulimo wa Jehova. Kayi, kwamyaka minji twakali kukkala mucisi mwakali kuyandika kapati basikumwaya ba Bwami akugwasyilizya kutalisya mbungano zipya.”
17 “Cakatupa kuzumanana kweenda munzila iiluzi tiiyakali milawo miyumu, pele kakali kaambo kakuti bazyali besu Jehova bakali kumubona kuti mmuntu mwini-wini, siluzyalo alimwi mubotu. Bakali kuyandisya kumuziba kabotu Jehova akumukkomanisya alimwi twakaiya mbobakali kumuyoowa kapati Leza aluyando ndobakajisi kulinguwe. Noliba leelyo notwalubizya, bazyali besu kunyina nobakali kutupa kulimvwa kuti Jehova tacituyandi; alimwi kunyina nobakali kutubikkila milawo miyumu cabukali. Ziindi zinji, bakali kutukkazika ansi akukanana andiswe, Bamaama zimwi ziindi bakali kubandika kumwi misozi kayeenda, kusoleka kutugwasya kumvwisya ncobakali kwaamba. Bakazwidilila. Twakaiya kwiinda mumajwi amilimo yabazyali besu kuti kuyoowa Jehova ncintu cibotu akuti kuba umwi wa Bakamboni bakwe cilakkomanisya ikutali kuminya.”—1 Johane 5:3.
18. Ncinzi ncotuyoojana twayoowa Leza mwini-mwini?
18 Akati ka “majwi masyaalizi ngaakaamba Davida,” tubala kuti: “Oyo uuendelezya bantu cabululami, uuendelezya cakuyoowa Leza, uyooba mbuli mumuni cifumofumo nilyapasa izuba.” (2 Samuele 23:1, 3, 4) Solomoni mwana wa Davida alimwi simulyazina, kuboneka kuti wakakamvwisya kaambo aaka, nkaambo wakalomba kuti Jehova amupe “moyo wakumvwa” alimwi amaano “akwaandaanya bubotu abubi.” (1 Bami 3:9) Solomoni wakaziba kuti kuyoowa Jehova nkokuleta busongo alukkomano. Kumbele wakamanizya bbuku lya Mukambausi amajwi aakuti: “Ngaaya mamanino aamakani. Oonse amvwigwa. Lemeka naa yoowa Leza akubamba milazyo yakwe, nkaambo kucita obo nceelelo coonse camuntu. Nkaambo Leza uyoobeteka milimo yoonse, amakani oonse aasisidwe, naaba mabotu naaba mabi.” (Mukambausi 12:13, 14) Ikuti twalutobela lulayo oolo, masimpe tuyoojana kuti “kulibombya akuyoowa Jehova kulaleta” busongo alukkomano alimwi a “buvubi abulemu abuumi.”—Tusimpi 22:4.
19. Ncinzi ciyootugwasya kumvwisya “kuyoowa Jehova”?
19 Kuzwa kuzikozyanyo zyamu Bbaibbele alimwi azyali kucitika mazuba aano, twabona kuti ikuyoowa Leza kulagwasya kapati mubuumi bwababelesi ba Jehova beni-beni. Ikuyoowa kuli boobu takutulesyi buyo kucita citamukkomanisyi Tateesu wakujulu pele alimwi kulakonzya kutupa kuba acamba cakutabayoowa aabo batukazya alimwi anguzu zyakuliyumya mumasukusyo amapenzi aatusikila. Aboobo, toonse, bapati abana atulitakate kukwiiya Jwi lya Leza, kuzinzibala kuyeeya nzyotwiiya akuyumya cilongwe ncotujisi a Jehova kwiinda mukupaila lyoonse. Twacita boobo, tuyoojana “luzibo lwa-Leza” alimwi akumvwisya “kuyoowa Jehova.”—Tusimpi 2:1-5.
Bupanduluzi buyungizidwe
^ munc. 4 Mazina acincwa.
^ munc. 5 Ambweni eeci cakacitika ncecakapa Davida kuti alembe Intembauzyo 57 alimwi a 142.
Sena Inga Mwapandulula?
Ino mbuti kuyoowa Leza mbokukonzya
• kugwasya muntu kubukuluka nacita cibi cipati?
• kuleta lukkomano mumasukusyo alimwi amukupenzyegwa?
• kutuyumya kucita kuyanda kwa Leza?
• kuba cikono ciyandika kapati kubana besu?
[Mibuzyo yaciiyo]
[Cifwanikiso icili apeeji 28]
Kuyoowa Jehova kwakamugwasya Davida ikutamujaya Mwami Saulo
[Zifwanikiso izili apeeji 31]
Kuyoowa Leza ncikono ciyandika kapati eeco bazyali ncobakonzya kupa bana babo