Bulemu Bumweelede Muntu—Bulakonzyeka Kubantu Boonse

“Tweelede kubamba nyika mpya—nyika mbotu kwiinda—mwalo mocinookonzyeka kulemeka bantu lyoonse.”—MULELI WAKU U.S. HARRY TRUMAN, KU SAN FRANCISCO, CALIFORNIA, U.S.A., APRIL 25, 1945.

MBUBWENYA mbocakabede kubanabunji noyakamana Nkondo Yanyika Yabili, Muleli Truman wakali kusyoma kuti bantu balakonzya kwiiya kuzintu zyakabacitikila musule alimwi akubamba “nyika mpya” mwalo mobani kulemekwa bantu boonse. Mukubula coolwe oobo tabusyi mbozibede zintu mazubaano. Tiicakonzyeka “kulemeka bantu lyoonse” akaambo kakuti bantu tabasyi baleta penzi pe, pele ngusinkondonyina bantu mupati.

Ikuzwa Penzi

Ibbaibbele litondezya kuti sinkondo ngu Saatani Diabolosi, cilenge camuuya cibyaabi icali kukazya kweelela kwabweendelezi bwa Leza kuzwa kumatalikilo aabukkale bwabantu. Kuzwa ciindi Saatani naakaambaula a Eva, makanze aakwe ali akupa kuti bantu baleke kubelekela Mulengi wabo. (Matalikilo 3:1-5) Amuyeeye buyo mapenzi ngobakajana ba Adamu a Eva ciindi nobakatobela koongelezya kwa Diabolosi. Icakatobela akaambo kakutamvwida  mulawo wa Leza kujatikizya mucelo wakakasyidwe ncakuti “bakayuba akati kamisamu yamumuunda kuti bataboneki kumeso aa-Jehova Leza.” Nkaambo nzi? Adamu wakaamba kuti: “Ndafwa bweeme nkaambo kakuti ndisicinswe, aboobo ndayuba.” (Matalikilo 3:8-10) Icilongwe ca Adamu a Bausyi bakujulu alimwi ambwaakali kulibona zyakacinca. Wakafwa nsoni alimwi kunyina nakalilikwaide kubandika a Jehova.

Nkaambo nzi Diabolosi ncaakayanda kuti Adamu asampuke? Nkaambo kakuti muntu wakalengwa mucinkozya ca Leza, alimwi Saatani ulakkomana kubona muntu kacita zintu munzila ipa kuti atatondezyi bulemu bwa Leza. (Matalikilo 1:27; Ba-Roma 3:23) Eci citugwasya kumvwisya ikaambo ncokwali milimo yakusampaula mubukkale bwa bantu. Mbwali “ngoleza waansi aano,” Saatani wasumpula muuya ooyu ciindi “muntu naendelezya muntunyina kukumubisizya.” (2 Bakolinti 4:4, Ci; Mukambausi 8:9; 1 Johane 5:19) Sena eci caamba kuti bantu kunyina nobaya kupegwa bulemu bwini-bwini?

Jehova Ulazilemeka Zilenge Zyakwe

Amuyeeye bukkale bwakali mumuunda wa Edeni kabatanabisya ba Adamu a Eva. Bakajisi zyakulya zinji, mulimo uukkomanisya alimwi bakali kulangila kupona kabotu lyoonse antoomwe abana babo. (Matalikilo 1:28) Ibuumi bwabo boonse bwakali kutondezya kuti Leza wakajisi makanze mabotu kujatikizya bantu.

Sena Jehova wakacinca mizeezo kujatikizya kulemeka bantu ciindi ba Adamu a Eva nobakabisya? Peepe. Wakabikkila maano kunsoni nzyobakajisi akaambo kakuba acinswe. Caluyando, Leza wakabapa “zibaki zyazikanda” kuti balivwumbe muciindi cakulivwumbya matu aamukuyu ngobakasumide. (Matalikilo 3:7, 21) Muciindi cakubalekela muciimo cakulimvwa kusampuka, Leza wakabapa bulemu.

Kumbele, naakali kweendelezya musyobo wa Israyeli, Jehova wakabafwida lubomba bamucaala, bamukabafwu alimwi abeenzu—kanji-kanji ibapenzyegwa muciinga cabantu. (Intembauzyo 72:13) Mucikozyano, ciindi nobakali kutebula maila, maolifa alimwi amasaansa, bana Israyeli bakaambilwa kutapilukilila zeezyo zyakasyeede. Pele, Leza wakabalailila kuti eezyo zyakasyeede zyakeelede kuba ‘zyamweenzu, mucaala amukamufwu.’ (Deuteronomo 24:19-21) Noyakali kutobelwa milawo eeyi yakali kupa kuti kacikonzyeka kubantu bapengede kujana mulimo mubotu alimwi akuti kabatalombeleli.

Jesu Wakali Kubalemeka Bantu

Naakali anyika, Mwana wa Leza, Jesu Kristo wakali kubalemeka bantu. Mucikozyanyo, naakali ku Galilaya wakasikilwa mwaalumi iwakali kuciswa cinsenda. Kweelana a Mulawo wa Musa, kutegwa atayambukizi bamwi,  sicinsenda wakeelede koompolola kuti: “Kusofwaala! Kusofwaala!” (Levitiko 13:45) Pele imwaalumi ooyu tanaakoompolola ciindi naakaunka kuli Jesu. Muciindi cakucita boobo, wakafugama akulomba Jesu kuti: “Omwami, na wayanda ulakonzya kundisalazya.” (Luka 5:12) Ino Jesu wakacita buti? Jesu tanaakamukalalila akaambo kakutyola Mulawo antela kutamubikkila maano naa kumutanda. Muciindi cakucita boobo, wakamulemeka kwiinda mukumwaampa akwaamba kuti: “Ndayanda, usalale.”—Luka 5:13.

Ziindi zimwi, Jesu wakali kuponya bantu kakunyina akubaampa—ziindi zimwi kali kule. Pele ciindi eeci, wakasala kumwaampa imwaalumi ooyo. (Matayo 15:21-28; Marko 10:51, 52; Luka 7:1-10) Mbokunga wakali “ecinsenda mubili woonse,” kweelede kuti kwakaliindide ciindi cilamfwu kuzwa leelyo naakaampwa amuntu uumwi. Elo kaka wakaumbulizyigwa ikumvwa muntu umwi kamuguma! Ncaakali kuyanda walo nkuponesegwa cinsenda cakwe. Pele nzila njaakabelesya Jesu kumuponya yakapa kuti abone kuti ulalemekwa. Sena cileelela kusyoma kuti mubukkale bwamazubaano cilakonzyeka kubikkila maano kukulemeka bantu? Ikuti kakuli boobo, mbuti mbokunga kwatondezyegwa?

Mulawo Uupa Kulemekwa

Jesu wakaamba malailile banabunji ngobabona kuti alidumide kapati kujatikizya zilongwe akati kabantu aakuti: “Zintu zyoonse zili buti nzimuyanda kuti bantu bamucitile, anywebo amubacitile nzizyonya.” (Matayo 7:12) Ooyu Mulawo Wabukkale Bubotu ukulwaizya kulemekana.

Kweelana azyali kucitika, ikutobela mulawo ooyu tacili cuubauba—cilakatazya. “Ndakali kukkomana kufwubaazya bamwi,” mbwaamba  imwaalumi ngotulaambe kuti Harold. “Kwiinda mukubelesya buyo majwi masyoonto, ndakali kunyonganya, kufwubaazya alimwi ziindi zimwi kulizya bantu.” Pele, kuli cakacitika calo cakapa kuti Harold acince mbwaakali kubeendelezya bamwi. “Bakamboni ba Jehova bali mbobabede bakatalika kundiswaya. Ndayeeya zyamusule, ndilaakufwa nsoni ikuyeeya zintu zimwi nzyondakali kwaamba alimwi ambondakali kubacita zimwi ziindi. Pele tiibakajoka munsi, bucebuce, twaambo twamu Bbaibbele twakandinjila mumoyo calo cakapa kuti ndicince.” Mazubaano, Harold mmwaalu mumbungano ya Bunakristo.

Cakamucitikila Harold cipa bumboni bwakuti “ijwi lya-Leza lili abuumi, lili anguzu, lilabosya kwiinda iceba ilijisi mabemba obile, lilayasa mane kukwaanzaanya buumi amuuya, aalo maswaanganino aazifuwa amooma, alimwi lilabeteka kuyeeya akuyanda kwamoyo.” (Ba-Hebrayo 4:12) Ijwi lya Leza lili anguzu zyakunjila mumoyo wamuntu akucinca miyeeyo yakwe ambwalilemeka. Eeci ncecipa kulemeka bamwi—ikuyandisya kugwasya alimwi akupa bulemu muciindi cakupenzya alimwi akusampaula.—Incito 20:35; Ba-Roma 12:10.

Bulemu Bwini-Bwini Bwapilusyigwa

Iluyandisisyo oolu ndolukulwaizya Bakamboni ba Jehova kwaambila bamwi zyabulangizi bubotu kapati bwamu Bbaibbele. (Incito 5:42) Ikwaambila bamwi “makani mabotu loko” nenzila mbotu kapati yakubalemeka. (Isaya 52:7) Aya makani mabotu “loko” abikkilizya kusama “buntu bupya” ibupa kujaya “zisusi zibi” zyakusampaula bamwi. (Ba-Kolose 3:5-10) Alabikkilizya amakanze ngajisi Jehova aakuti ino-ino uyoogwisya bukkale alimwi aziyanza zipa kuti bantu kabatalemekwi antoomwe asikukutalisya, Saatani Diabolosi. (Daniele 2:44; Matayo 6:9, 10; Ciyubunuzyo 20:1, 2, 10) Caakusika ciindi eeco, nyika ‘yaakuzula luzibo lwa Jehova’ ndendilyo bantu boonse nobaya kulemekwa ncobeni.—Isaya 11:9.

Tumukulwaizya kwiiya kujatikizya bulangizi oobu butaliboteli. Kwiinda mukuyanzana a Bakamboni ba Jehova, muyoobona kuti ikutobela njiisyo zyamu Bbaibbele kupa kulemeka bamwi. Alimwi muyooiya mbuli Bwami bwa Leza ino-ino mbobuyooleta ‘nyika mpya alimwi mbotu kwiinda,’ inyika mocinookonzyeka “kulemeka bantu lyoonse.”

 Kabbokesi/[Cifwanikiso icili apeeji 4]

Kusyomeka Kwakapa Kuti Balemekwe

Lyankondo Yanyika Yabili, Bakamboni ba Jehova bainda ku 2,000 bakatolwa kuzilabba zya Nazi akaambo kalusyomo lwabo. Kayeeya mbobakatondezya lusyomo lwabo munzila iilibedelede, iwakali mwaange muntolongo ya Ravensbrück, Gemma La Guardia Gluck mubbuku lyakwe litegwa My Story uluula kuti: “Aciindi cimwi bamapulisa ba Nazi bakaambilizya kuti kufwumbwa Sikwiiya Bbaibbele wakali kuyooleka kusyoma alimwi akusaina cipepa citondezya boobo wakali kuyooangululwa akutapenzyegwa limbi.” Kujatikizya baabo bakakaka kusaina cipepa eeco, waamba kuti: “Bakasala kunoopenzyegwa akulindila cakukkazika moyo ibuzuba bwakunununwa.” Nkaambo nzi ncobakasalila boobo? Lino kali amyaka yakuzyalwa iili kuma 80, Magdalena waambidwe kumatalikilo aacibalo camana waamba kuti: “Ikusyomeka kuli Jehova kwakali kuyandika kapati kwiinda kucita kufwumbwa cintu kutegwa tupone. Kutegwa tulemekwe twakeelede kuzumanana kusyomeka.” *

Bupanduluzi buyungizidwe

[Cifwanikiso icili apeeji 5]

Jesu wakali kubalemeka aabo mbaakaponya

[Cifwanikiso icili apeeji 7]

Bakamboni ba Jehova balalemeka bantu kwiinda mukubaambila “makani mabotu loko”