Mibuzyo Yabasikubala

Ino tuzyi buti kuti mbobupanduludwe busongo ku Tusimpi 8:22-31 bwaamba Jesu Kristo katanaba muntunsi?

Bupanduluzi ibwakasololelwa amuuya bwa busongo buli mubbuku lya Tusimpi bulembedwe kuti: “Jehova wakandibumba kumatalikilo aanzila yakwe; ndakali mulenge wakwe mutaanzi. . . . Zilundu kazitana kusimpikwa, atulundulundu katutawo, ndakazyalwa . . . Naakasimpika ijulu ndakaliwo, . . . ndakali ambali lyakwe mbuli mwana wakwe, ndakali muyandwi wakwe mazuba oonse, ndakali kusekelela lyoonse kubusyu bwakwe, . . . akuyandisya bana ba-Adamu.”

Cibalo eci tacaambi busongo bwa Leza naa maano. Nkaambo nzi? Nkaambo kakuti busongo bupanduludwe aawa ‘bwakabumbwa’ naa kulengwa kabuli ngamatalikilo aakulenga kwa Jehova. Jehova Leza waliko lyoonse alimwi lyoonse musongo. (Intembauzyo 90:1, 2) Busongo bwakwe tabuko matalikilo; tiibwakabumbwa naa kulengwa. Taaku ‘nobwakazyalwa.’ Kunze lyaboobo, busongo oobu bwaambwa kuti bulaambaula alimwi akucita zintu, ikwiiminina muntu.—Tusimpi 8:1.

Ibbuku lya Tusimpi lyaamba kuti kaindi busongo bwakali ambali lya Jehova, Imulengi, kabuli [“mufuzi,” BT]. Oobo mbupanduluzi bweelede Jesu. Kaindi katanaboola anyika, Jesu wakabeleka antoomwe a Jehova, aboobo Ijwi lya Leza lyaamba kuti: “Ngumutaanzi wazintu zyoonse, nkabela mulinguwe zintu zyoonse muzijatene.”—Ba-Kolose 1:17; Ciyubunuzyo 3:14.

Cileelela ikwaamba Mwana wa Leza kuti mbusongo, mbwaanga Walo ngowakayubununa makanze alimwi amalailile aayeeme abusongo bwa Jehova. Katanaba muntunsi, Jesu wakali Jwi lya Leza naa Mwaambilizi. (Johane 1:1) Upanduludwe kuti “ninguzu zya-Leza, alimwi mbusongo bwa-Leza.” (1 Ba-Korinto 1:24, 30) Masimpe, oobu mbupanduluzi bubotu bwa Mwana wa Leza, iwakakulwaizyigwa aluyando ndwaakajisi kubantu ikwaaba buumi bwakwe kacili cinunuzyo cabo.—Johane 3:16.