“Akaambo Kamulombe Uli Amyaka Iili Fwuka Yakuzyalwa”

KUFWUMBWA Bakamboni ba Jehova nobakali kumuswaya kuŋanda yakwe, Wiesława uukkala ku Poland nkoili kumusanza, wakali kubalumba pele tanaakali kuzumina kubandika ambabo. Ibuzuba bumwi, Samuel uli amyaka yakuzyalwa iili fwuka wakamuswaya kuŋanda yakwe kali abanyina. Oobu buzuba Wiesława wakazumina kuswiilila mulumbe wamu Bbaibbele alimwi wakatambula magazini yakali kwaamba zyaparadaiso yaanyika.

Akaambo kakuti Ciibalusyo calufwu lwa Jesu Kristo cakali afwaafwi, Samuel wakayanda kutamba Wiesława kucilengwa eci caalubazu. Aboobo, kali abanyina Samuel wakamuswaya alimwi, eci ciindi wakali akapepa kakutamba bantu kasimbidwe. Naakabona kuti imulombe ooyu wakasamide kabotu, Wiesława wakalomba kuti apegwe ciindi kutegwa akasame zisani zili kabotu. Naakapiluka, wakamuswiilila Samuel, wakazumina kutambwa alimwi wakabuzya kuti: “Sena ndeelede kuboola endikke naa abalumi bangu?” Mpoona wakayungizya kuti: “Nokuba kuti balumi bangu tabakabooli, mebo ndiyooboola. Ndiyoocita oobo akaambo kanduwe, Samuel.” Samuel wakakkomana akaambo kakuti mutumbu ooyu wakazuzikizya cisyomezyo cakwe.

Lyamakani aa Ciibalusyo, Samuel wakakkala antoomwe a Wiesława alimwi wakali kumutondezya magwalo aakali kubalwa. Eci cakamukkomanisya. Wakacikkomanina Ciibalusyo alimwi wakalumba kutwaambo tuyandika kapati twakali kubandikwa munzila ngubauba. Alimwi wakakulwaizyigwa akaambo kakutambulwa kabotu alimwi abuuya mbwaakatondezyegwa ambungano. Kuzwa ciindi eco, Wiesława wakazumanana kuyandisya zintu zyakumuuya alimwi wakatalika kuyanzana a Bakamboni ba Jehova lyoonse. Caino-ino wakaamba kuti: “Ndiluuside kuti kaindi tiindakali kumuswiilila nomwakali kundiswaya kuŋanda. Alimwi ndeelede kumuzibya kuti ndakaswiilila mulumbe wanu akaambo kamulombe uli amyaka yakuzyalwa iili fwuka, Samuel.”

Mbubwenya mbuli Samuel waku Poland, ibunji bwa Bakamboni ba Jehova bacili bana balamutembaula Leza kwiinda muŋambawido alimwi amukulilemeka kwabo. Ikuti kamuli bana, andinywe mulakonzya kugwasya bantu bajisi myoyo mibotu kuyandisya njiisyo zyakumuuya zigwasya.