“Inkumbizyo Zyanu Zizibisigwe Kuli Leza”
“Inkumbizyo Zyanu Zizibisigwe Kuli Leza”
“Muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.”—BA-FILIPI 4:6.
1. Nkuuli ni nkotujisi coolwe cakubandika alimwi nkaambo nzi eeci ncocikondelezya?
IKUTI naa mwalomba kuti mubonane amuleli wamucisi canu, ino mbwiinguzi nzi mbomunga mwapegwa? Babelesi bakwe balakonzya kumwiingula kabotu pele tamulangilwi kuti inga mwazumizigwa kubandika anguwe mulomo mpande. Pele kujatikizya Muleli mupati kuli boonse, Jehova Leza, Mweendelezi wabubumbo boonse, tabusyi mbozibede zintu. Tulakonzya kumusikila kufwumbwa nkotubede alimwi aciindi cili coonse ncotuyanda. Mipailo iitambulika unooitambula lyoonse. (Tusimpi 15:29) Kalakondelezya kaambo aaka! Sena kulumba kwesu kumakani aaya takweelede kutukulwaizya kunoopaila lyoonse kuli Yooyo waambwa kuti ‘Uswiilila zikombyo’?—Intembauzyo 65:2.
2. Ncinzi ciyandika kutegwa mipailo itambulwe a Leza?
2 Pele umwi ulakonzya kubuzya kuti, ‘Ino mipailo iili buti Leza njatambula?’ Ibbaibbele lipandulula cintu comwe ciyandika kapati kutegwa mipailo kiitambulwa noliti: “Kuti kakwiina lusyomo tacikonzeki kukonda Leza, nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” (Ba-Hebrayo 11:6) Masimpe, kweelana ambokwaambwa mucibalo camusyule, iciyandika kapati mukusikila Leza ndusyomo. Leza ulilibambilide kutambula mipailo yabaabo ibamusikila, pele beelede kucita oobo kabajisi lusyomo akucita milimo mibotu camoyo woonse alimwi amoyo mubotu.
3. (a) Kweelana amboitondezya mipailo yababelesi bakaindi basyomeka, ntwaambo tuli buti tukonzya kubikkilizyigwa mumipailo? (b) Ino mipailo yesu ilakonzya kubikkilizya nzi?
3 Imwaapostolo Paulo wakakulwaizya Banakristo kuciindi naakali kupona kati: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.” (Ba-Filipi 4:6, 7) Ibbaibbele lilijisi zikozyanyo zinji zyabaabo ibakapaila kuli Leza kujatikizya zyakali kubakatazya. Akati kabo kuli Hana, Eliya, Hezekiya a Daniele. (1 Samuele 2:1-10; 1 Bami 18:36, 37; 2 Bami 19:15-19; Daniele 9:3-21) Tweelede kutobela cikozyanyo cabo. Alimwi amubone kwaamba kuti majwi aa Paulo atondezya kuti mipailo yesu ilakonzya kusiyana-siyana. Wakaamba kulumba, nkokuti, mupailo oomo motutondezya kulumba kuzintu nzyatucitila Leza. Mupailo ooyu ulakonzya kubikkilizya akutembaula. Kukombelezya kupandulula kulomba cakulibombya. Alimwi tulakonzya kwaamba nkumbizyo, naa kulomba cintu cimwi cigaminide. (Luka 11:2, 3) Taateesu uuli kujulu ulikkomene kututambula munzila zyoonse eezyi motumusikila.
4. Nokuba kuti Jehova ulizizi nzyotuyandika, ino nkaambo nzi ncotuyandika kumulomba buya?
4 Bamwi balakonzya kubuzya kuti, ‘Ino tee Jehova ulizizi kale nzyotuyandika?’ Inzya, ulizizi. (Matayo 6:8, 32) Ino lino nkaambo nzi ncayandila kuti katumusikila ankumbizyo zyesu? Amubone cikozyanyo eeci: Sicintoolo ulakonzya kupa cipego kuli basikumuula. Pele ikutegwa bapegwa cipego eeci, basikuula bayandika kuboola kuli sicintoolo akubweza cipego eeco. Aabo batayandi kucita oobo bayoobonwa kuti kunyina nobacibikkila maano cipego eeco. Mbubwenya buyo, ikutabikkila maano kumuzibya Jehova nzyotuyanda mumupailo kulakonzya kutondezya kuti tatulumbi pe kuzintu nzyaatupa. Jesu wakati: “Amukumbile, muyoopegwa.” (Johane 16:24) Munzila eeyi, tutondezya kuti tulamusyoma Leza.
Ino Tweelede Kumusikila Buti Leza?
5. Nkaambo nzi ncotuyandika kupaila kwiinda muzina lya Jesu?
5 Jehova kunyina nabikka milawo minji miyumu kujatikizya mbotweelede kupaila. Nokuba boobo, tuyandika kuciziba mbotweelede kumusikila Leza munzila iili kabotu, yalo yaambwa mu Bbaibbele. Mucikozyanyo, Jesu wakayiisya basikumutobela kuti: “Kufumbwa cintu ncomuyookumbila kuli-Taata muzina lyangu uyoomupa.” (Johane 16:23) Aboobo, tuyandika kupaila kwiinda muzina lya Jesu, kuzumina kuti Jesu nenzila ilikke bantu boonse mobalongezyegwa a Leza.
6. Notupaila, ino tweelede kuba muciimo cili buti?
6 Ino tweelede kuba muciimo cili buti notupaila? Mu Bbaibbele, kunyina ciimo cigaminide caambwa kutegwa mipailo yesu imvugwe. (1 Bami 8:22; Nehemiya 8:6; Marko 11:25; Luke 22:41) Iciyandika kapati nkupaila kuli Leza camoyo woonse alimwi amoyo mubotu.—Joeli 2:12, 13.
7. (a) Ino bbala lyakuti “ameni” lipandulula nzi? (b) Ino muunzila nzi molibelesyegwa kabotu mumipailo?
7 Ino mbuti kujatikizya bbala lyakuti “ameni”? Imagwalo atondezya kuti aaya mamanino aali kabotu kumipailo yesu, ikapati eelyo notupaila mubuleya. (1 Makani 16:36; Intembauzyo 72:19; 89:52) Ibbala lya Cihebrayo lyakuti ʼa·menʹ lyaamba kuti “akube boobo.” McClintock and Strong’s Cyclopedia yaamba kuti ncocipandulula kwaamba kuti “Ameni” kumamanino aamupailo “nkuzumina majwi aambwa kale, akulomba kuti azuzikizyigwe.” Aboobo, kwiinda mukumanizya abbala lyakuti “Ameni,” ooyo uupaila utondezya bwini mbwalimvwa kujatikizya nzyaamba. Munakristo namanizya mupailo wakwe amajwi aaya mukwiiminina mbungano, aabo baswiilila abalo balakonzya kuyungizya kuti “Ameni” mumyoyo yabo naa cakupozya kutondezya kuti bazuminizya zyali kwaambwa.—1 Ba-Korinto 14:16.
8. Ino mbuti imwi yamipailo yesu mboikonzya kweelana amupailo wa Jakobo naa Abrahamu alimwi ino eeci inga catondezya nzi kujatikizya ndiswe?
8 Ziindi zimwi Leza inga wayanda kuti tutondezye mbotulimvwa kumakani ngotupailila. Inga twayandika kuba mbuli Jakobo wansiku, walo wakalwana amungelo masiku oonse ikutegwa ajane cilongezyo. (Matalikilo 32:24-26) Ambweni inga twajanika mubukkale bukonzya kuyanda kuti tube mbuli Abrahamu, walo cakwiinduluka-induluka wakakombelezya Jehova kwiiminina Loti abantu bamwi baluleme ibakali kulangilwa kujanika mu Sodoma. (Matalikilo 18:22-33) Tulakonzya kumukombelezya mbubwenya Jehova kujatikizya zintu nzyotuyandisya, kumulomba mbwaanga mmululami, ngusiluse alimwi siluzyalo.
Ino Ncinzi Ncotukonzya Kulomba?
9. Nzinzi nzyotweelede kubikkila maano kapati notupaila?
9 Kamuyeeya kuti Paulo wakati: “Muzintu zyoonse . . . inkumbizyo zyanu zizibisigwe kuli-Leza.” (Ba-Filipi 4:6) Aboobo, mipailo yakulipailila ilakonzya kubikkilizya kufwumbwa citukatazya mubuumi. Pele cakusaanguna mumipailo yesu ceelede kuba zintu zijatikizya Jehova. Daniele wakasiya cikozyanyo cibotu kumakani aaya. Israyeli naakasubulwa akaambo kazibi zyakwe, Daniele wakalomba Jehova kubamvwida luzyalo kati: “Utamuki pe, nkaambo kazina lyako omwini, O Leza wangu.” (Daniele 9:15-19) Sena mipailo yesu ayalo ilatondezya kuti tulabikkila maano kukusalazyigwa kwazina lya Jehova akuzuzikizyigwa kwamakanze akwe?
10. Ino tuzyi buti kuti cili buyo kabotu kupailila zintu zitugeme tobeni?
10 Pele cili buyo kabotu ikulomba zintu nzyotuyandika tobeni. Mucikozyanyo, mbuli sintembauzyo, tulakonzya kupailila kugwasyigwa kumvwisya zintu zyakumuuya zikatazya. Wakapaila kuti: “Undipe busongo bwakubamba mulao wako akuujatisya camoyo woonse.” (Intembauzyo 119:33, 34; Ba-Kolose 1:9, 10) Jesu “wakaalaala akukumbila kulooyo uukonzya kumufutula kulufu.” (Ba-Hebrayo 5:7) Kwiinda mukucita boobo, wakatondezya mbociyandika kulangaula lugwasyo muntu nali muntenda naa masukusyo. Naakabaambila mupailo wacikozyanyo basikwiiya bakwe, Jesu wakabikkilizya atwaambo tumugeme muntu, mbuli kulekelelana nzyotulubizya akujana cakulya ciyandika abuzuba.
11. Ino mbuti mupailo mboukonzya kutugwasya kutazundwa notusunkwa?
11 Mumupailo wacikozyanyo ooyo, Jesu wakabikkilizya kulomba kwakuti: “Utatweenzyi mukutepaulwa, utuvune kumubi.” (Matayo 6:9-13) Kumbele wakapa lulayo lwakuti: “Amulangile akukomba, kuti mutanjili mukusunkwa.” (Matayo 26:41) Mupailo ulayandika notuli mukusunkwa. Tulakonzya kusunkwa kutazibikkila maano njiisyo zyamu Bbaibbele notuli kumulimo naa kucikolo. Aabo batali Bakamboni balakonzya kututamba kubasangana mumilimo iitali kabotu. Tulakonzya kwaambilwa kucita cimwi cintu citeendelani anjiisyo zyabukkale bubotu. Aziindi zili boobu, inga twacita kabotu kutobela lulayo lwa Jesu lwakupaila—notutananjila mumusunko alimwi aleelyo notusunkwa—kulomba Leza kuti atatulekeli kuwa mumusunko.
12. Nzinzi zipa kulibilika zikonzya kutupa kupaila alimwi ncinzi ncotukonzya kulangila kuli Jehova?
12 Mapenzi amakatazyo manji alabasikila babelesi ba Leza mazuba aano. Malwazi akupengana mumizeezo nzezintu zipati ziletela kulibilika kubantu banji. Inkondo zicitika nkotubede zitupa kupengana mumizeezo. Ipenzi lyamali lipa kuti cikatazye kujana ziyandika mubuumi. Cilakkazyika moyo kaka kuziba kuti Jehova ulabaswiilila babelesi bakwe ibamwaambila makani aaya! Intembauzyo 102:17 yaamba boobu kujatikizya Jehova: “Waswiilila cikombyo cabaswekede, tasampauli cikombyo cabo.”
13. (a) Ntwaambo nzi twanu nobeni ntomukonzya kubikkilizya mumupailo? (b) Amuluule cikozyanyo camupailo uuli boobo.
13 Mubwini, kufwumbwa cinyonganya mulimo ngotubelekela Jehova naa cilongwe ncotujisi anguwe tulakonzya kucibikka mumupailo. (1 Johane 5:14) Ikuti kamujisi zyakusala kujatikizya cikwati naa mulimo wakumubili antela kuyungizya mulimo wanu, mulaangulukide kumwaambila Leza, kulomba busolozi bwakwe. Mucikozyanyo, musimbi umwi ku Philippines wakali kuyanda kutola lubazu mumulimo waciindi coonse. Pele tanaakajisi mulimo wakuti inga kaligwasya. Waamba kuti: “Mumujibelo, ndakapaila kuli Jehova kujatikizya mulimo wabupainiya. Nokwakainda ciindi buzuba mbubwenya oobo, nindakali mumulimo wakukambauka, ndakaabila bbuku kumukubusi umwi. Cakutayeeyela, musimbi wakati: ‘Weelede kuunka kucikolo nkondiiya mafwumofwumo mu Muhulo.’ Ndakamubuzya kuti, ‘Nkaambo nzi?’ Wakandaambila kuti kwakali mulimo umwi ngobakali kuyanda muntu cakutasowa ciindi. Ndakaunka, bakandipa mulimo uulya mpoonya aawo. Zyakacitika mbondatakali kuziyeeyela.” Mbanji Bakamboni nyika yoonse bakacitikilwa mbubwenya oobu. Aboobo mutawayiwayi ikwaamba mbomulimvwa nomupaila kuli Leza.
Ino Mbuti Kuti Twabisya?
14, 15. (a) Nkaambo nzi muntu ncateelede kuyoowa kupaila noliba leelyo nabisya? (b) Kunze lyakulipailila, ncinzi cimbi cikonzya kumugwasya muntu kubukuluka kuzwa kucibi?
14 Ino mbuti mupailo mboukonzya kugwasya ikuti umwi wabisya? Akaambo kansoni, bamwi ibakabisya bacileka akupaila. Pele eeyo tiili nzila mbotu pe. Mucikozyanyo: Basikweenzya ndeke balizi kuti ikuti naa basweeka, balakonzya kutambikizyanya majwi ababona zyabweende bwandeke kutegwa babagwasye. Ino mbuti ikuti sikweenzya ndeke kayoowa kwaambila babona zyabweende bwandeke akaambo kakuti ufwa nsoni kuti wasweeka? Eeco cilakonzya kuleta ntenda mpati! Mbubwenya buyo, imuntu walubizya uuli ansoni kupaila kuli Leza ulakonzya kunjila muntenda. Kufwa nsoni akaambo kakubisya takweelede kulesya muntu kubandika a Jehova. Ibwini mbwakuti, Leza utamba baabo ibabisyide kapati kuti bapaile kulinguwe. Imusinsimi Isaya naakacili kupona wakakulwaizya basikubisya kubandika a Jehova, “nkaambo nguuinda kulekelela.” (Isaya 55:6, 7) Masimpe, muntu inga wayandika “kutontozya busyu bwa-Jehova” kwiinda mukusaanguna kulibombya mwini, kucileka kutobela nzila imbi alimwi akweempwa cini-cini.—Intembauzyo 119:58; Daniele 9:13.
15 Ikuti umwi wabisya, aako nkaambo akambi mupailo ncouyandika kapati. Kujatikizya muntu uuyandika lugwasyo lwakumuuya, sikwiiya Jakobo waamba kuti: “Aite baalu bambungano, kuti bamukombele, . . . Mwami ulamubusya.” (Jakobo 5:14, 15) Inzya, muntu weelede kulyaambilila cibi cakwe kuli Jehova mumupailo, pele alimwi ulakonzya kwaambila baalu kuti bamupailile. Eeco ciyoomugwasya kubukulusya cilongwe cakwe a Leza.
Bwiinguzi Kumipailo
16, 17. (a) Ino Jehova wiingula buti mipailo? (b) Nzyakucitika zili buti zitondezya kuti mupailo amulimo wakukambauka kuli mbozyeendelana?
16 Ino mipailo iingulwa buti? Imwi ilakonzya kwiingulwa cakufwambaana alimwi munzila iiboneka. (2 Bami 20:1-6) Imwi ilakonzya kutola ciindi alimwi bwiinguzi inga kabutaboneki. Kweelana ambokutondezyedwe mucikozyanyo ca Jesu camukamufwu wakazumanana kuboola kumubetesi, inga kwayandika kwiinduluka-induluka kumusikila Leza. (Luka 18:1-8) Nokuba boobo, tulakonzya kuba alusyomo lwakuti notupaila kweelana akuyanda kwa Leza, Jehova kunyina nayootwaambila kuti: “Utandikataazyi.”—Luka 11:5-9.
17 Bantu ba Jehova ziindi zinji babona kuti mipailo yabo ilaingulwa. Eeci calibonya kapati mumulimo ngotucita kubuleya. Mucikozyanyo, bacizi Banakristo bobilo ku Philippines bakali kwaabila mabbuku aamba zya Bbaibbele kubusena buli kule kapati adolopo. Nobakapa mukaintu umwi katulakiti, wakatalika kweenda misozi. Wakati: “Masiku ndali kupaila kuli Leza kuti anditumine muntu kutegwa andiisye Bbaibbele, ndiyeeya kuti oobu mbobwiinguzi bwamupailo wangu.” Tiilyakalampa, mukaintu ooyu wakatalika kujanika kumiswaangano ku Ŋanda ya Bwami. Kubusena buli Kumusanza lwaajwe lwa Asia, mukwesu Munakristo wakali kulibilika kukambauka mumasena aagadelwa kapati. Nokuba boobo, wakapaila kuli Jehova, wakaba acamba akunjila mukati. Wakakonkomona acijazyo caŋanda imwi, mpoonya kwakazwa musimbi umwi. Mukwesu naakapandulula ncaakamuswaila, wakatalika kulila. Wakaamba kuti walikuyandaula Bakamboni ba Jehova mane akupaila kutegwa abajane. Imukwesu wakamugwasya musimbi ooyo kuziba aakali mbungano ya Bakamboni ba Jehova.
18. (a) Mipailo yesu yaingulwa, ino tweelede kucita nzi? (b) Ino ncinzi ncotusyomezyedwe ikuti katupaila kufwumbwa ciindi?
18 Masimpe mupailo ncintu ciyandika kapati. Jehova ulilibambilide kuswiilila alimwi akwiingula. (Isaya 30:18, 19) Pele tuyandika kubikkila maano kujatikizya Jehova mbwaingula mipailo yesu. Talili lyoonse naingula munzila njotulangila. Pele, notubona busolozi bwakwe, tatweelede kuluba kumulumba akumutembaula. (1 Ba-Tesalonika 5:18) Kuyungizya waawo, lyoonse kamuyeeya majwi aamwaapostolo Paulo aakuti: “Muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.” Inzya, amubandike a Leza kufwumbwa ciindi. Mwacita boobo, muyoozumanana kubona mbwaali amasimpe majwi ngaakaamba Paulo kujatikizya baabo baingulwa mipailo yabo naakati: “Luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo.”—Ba-Filipi 4:6, 7.
Sena Inga Mwaingula?
• Ino ncinzi ncoikonzya kubikkilizya mipailo yesu?
• Ino mbuti mbotweelede kupaila?
• Ntwaambo nzi ntotukonzya kubikkilizya mumipailo yesu?
• Ino mupailo ugwasya nzi ikuti naa muntu wabisya?
[Mibuzyo yaciiyo]
[Zifwanikiso izili apeeji 29]
Mupailo uupailwa camoyo woonse ulatugwasya kutacegwa mumasunko
[Zifwanikiso izili apeeji 31]
Kwiinda mumupailo, twaambila Leza kulumba nkotujisi, zitulibilisya anzyotulomba