Jobu—Imwaalumi Silukakatilo Alimwi Uusyomeka

”Sena wakabona kuti taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi?”—JOBU 1:8.

1, 2. (a) Mmapenzi nzi aakasikila Jobu cakutayeeyelwa? (b) Amupandulule buumi bwa Jobu mbobwakabede katanasikilwa mapenzi.

KWAKALI muntu wakajisi zintu zinji zibotu—lubono, bulemu, buumi bubotu amukwasyi uukkomene. Mpoonya muciindi cisyoonto buyo, wakacitikilwa mapenzi mapati-pati otatwe. Mukaindi kasyoonto buyo, lubono lwakwe lwakanyonyooka. Kuzwa waawo, imvula yaguwo iigambya yakajaya bana bakwe boonse. Mpoonya walo wakaba azyuute mubili woonse. Mulakonzya kumuziba kuti muntu ooyu ngu Jobu, imuntu waambwa kapati mubbuku lyamu Bbaibbele lijisi zina lyakwe.—Jobu, caandaano 1 a 2.

² Katongela Jobu wakati: “Necali cibotu nokwali mbuli myezi yamana.” (Jobu 3:3; 29:2) Iciindi notwasikilwa mapenzi, nguni uutalombozyi mazuba mabotu aakainda? Jobu wakali kupona buumi bubotu, wakali kulibonya kuti ulikwabilidwe kumapenzi oonse. Balupati-pati bakali kumulemeka alimwi bakali kulomba lulayo kulinguwe. (Jobu 29:5-11) Wakali muvwubi, pele mali wakali kwaabona munzila yeelede. (Jobu 31:24, 25, 28) Naakali kujana bamukabafwu abamucaala bapengede, wakali kubagwasya. (Jobu 29:12-16) Alimwi wakazumanana kusyomeka kumukaintu wakwe.—Jobu 31:1, 9, 11.

3. Ino Jehova wakali kumubona buti Jobu?

³ Jobu wakali muntu mululami akaambo kakuti wakali kukomba Leza. Jehova wakaamba kuti: “Taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi.” (Jobu 1:1, 8) Pele nokuba kuti Jobu wakali kusyomeka, mapenzi aakamusikila akanyonyoona bukkale bubotu mbwaakajisi. Zyoonse nzyaakajisi zyakamana, alimwi wakasunkwa kujatikizya bwini mbwabede amacise, kupenga mumoyo akutyompwa.

4. Ino nkaambo nzi ikulanga-langa cakacitikila Jobu ncokuyootugwasya?

⁴ Mmasimpe kuti tali Jobu alikke akati kababelesi ba Leza iwakaba amapenzi. Banakristo banji mazuba aano balizi kabotu kuti mapenzi aabo alikozyenye aakasikila Jobu. Akaambo kaceeci kuli mibuzyo yobile njotweelede kulanga-langa: Ino kulanga-langa cakacitikila Jobu inga kwatugwasya buti notuli amapenzi? Alimwi ino  mbuti eeci mbocikonzya kutuyiisya kubafwida luse kapati ibapenga?

Ikaambo Kajatikizya Kusyomeka Akusunkwa kwa Lusyomo

5. Ino Saatani wakati nkaambo nzi Jobu ncaakali kubelekela Leza?

⁵ Cakacitikila Jobu cakalilibedelede. Jobu katazi, Diabolosi wakazumbauzya ikaambo Jobu ncaakali kubelekela Leza. Lyamuswaangano wazilenge zyamuuya kujulu Jehova naakaamba kujatikizya bube bubotu bwa Jobu, Saatani wakaingula ategwa: “Teewakamuyakilide kabotu, walo abaŋanda bakwe azyoonse nzyajisi?” Aboobo, Saatani wakali kwaamba kuti Jobu wakali kubelekela Leza akaambo kakuliyanda—ikaambo kajatikizya babelesi ba Leza boonse. Saatani wakaambila Jehova kuti: “Kotambika janza lyako akuguma ncajisi [eelyo] uzookusinga kubusyu bwako!”—Jobu 1:8-11.

6. Ino nkaambo nzi ikayandika kapati nkaakatalisya Saatani?

⁶ Ikaambo aaka kakali kuyandika kapati. Saatani wakatongooka bweendelezi bwa Jehova. Sena mmasimpe Leza inga wacikonzya kweendelezya bubumbo boonse munzila yaluyando? Naa sena kuliyanda nkokunoozwidilila lyoonse kweelana abwakaamba Saatani? Jehova wakazumizya Diabolosi kusunka Jobu, kasyomede lukakatilo akusyomeka kwamubelesi wakwe. Aboobo Saatani wakacita kuti Jobu abe amapenzi aciindi comwe. Saatani naakaalilwa mukulwana kwakwe kwakutaanguna, wakapa kuti Jobu aciswe kapati. Diabolosi wakati: “Wakalivuna lukanda lwakwe mwini! Muntu uyakupa zyoonse kuti akabe abuumi bwakwe mwini.”—Jobu 2:4.

7. Muunzila zili buti babalesi ba Leza mazuba aano mobapenga bwakapenga Jobu?

⁷ Nokuba kuti Banakristo mazuba aano tabapengi bwakapenga Jobu, balasikilwa mapenzi aandeene-andeene. Banji balapenzyegwa naa kukazigwa abanamukwasyi. Mapenzi aamali naa kuciswa zilanyonganya kapati. Bamwi bafwa akaambo kakusyomeka. Pele tatweelede kuyeeya kuti Saatani nguuleta mapenzi oonse ngotujisi. Mubwini, mapenzi amwi alakonzya kuboola akaambo kakulubizya kwesu naa akaambo kabube bumwi mbotwakazyalwa aabo. (Ba-Galatiya 6:7) Alimwi toonse tulajatikizigwa amapenzi aaboola akaambo kabucembele naa ntenda zilicitikila. Ibbaibbele lilasalazya kwaamba kuti aciindi cino, Jehova takwabilili babelesi bakwe munzila yamaleele kumapenzi aaya.—Mukambausi 9:11.

8. Mbuti Saatani mbwakonzya kusola kubelesya mapenzi ngotujisi?

⁸ Pele Saatani ulakonzya kubelesya mapenzi ngotujisi ikulwana lusyomo lwesu. Mwaapostolo Paulo wakaamba penzi ndyaakajisi ‘lyacisongozyo cakuyasa mubili wakwe, mutumwa wa Saatani wakali kumudinkaula.’ (2 Ba-Korinto 12:7) Ccita naa lyakali penzi lyakumubili mbuli kutabona kabotu naa penzi limwi buyo, Paulo wakalizi kuti Saatani ulakonzya kulibelesya penzi eelyo akutyompwa kuboola nkaambo kandilyo kumupa kubula lukkomano akutasyomeka. (Tusimpi 24:10) Mazuba aano, Saatani ulakonzya kuyunga banamukwasyi, basicikoloma noziba mfwulumende zyalunya ikupenzya babelesi ba Leza munzila imwi.

9. Ino nkaambo nzi mapenzi naa kupenzyegwa ncoziteelede kutugambya kapati?

⁹ Ino mbuti mbotukonzya kwaalanganya mapenzi aaya akuzwidilila? Nkwiinda mukwaabona kuba coolwe cakutondezya kuti luyando ndotujisi kuli Jehova akulibombya kwesu kubweendelezi bwakwe nzyaciindi coonse. (Jakobo 1:2-4) Noliba buti penzi ndyotujisi, ikuziba mbociyandika kusyomeka kuli Leza kuyootugwasya kuzumanana kukkalikana kumuuya. Mwaapostolo Petro wakalembela Banakristo kuti: “Nomuyandwa mutagambi aamasukusyo aayaka mbuli mulilo aamusikila kuti musukusigwe ngao. Mutayeeyi kuti mwasikilwa cintu ceenzu.” (1 Petro 4:12) Awalo Paulo wakapandulula kuti: “Boonse abo bayanda kupona cakululama muli-Kristo Jesu mbobayoopenzegwa.” (2 Timoteo 3:12) Saatani ucikudooneka kusyomeka kwa Bakamboni ba Jehova, mbubwenya mbwaakacita kuli Jobu. Alimwi Bbaibbele litondezya kuti Saatani wayaambele mukulwana babelesi ba Leza mumazuba aano aakumamanino.—Ciyubunuzyo 12:9, 17.

 Kutakamvwisya Kaambo, Alulayo Lubyaabi

10. Ino Jobu wakajisi buyumuyumu nzi?

¹⁰ Jobu wakajisi buyumuyumu mbotuteelede kuba ambubo. Tanaakazi ncaakali kupengela. Mukuyeeya kulubide, Jobu wakayeeya kuti munzila imwi “Jehova wakapa, Jehova wa[ka]nyanga.” (Jobu 1:21) Ndiza Saatani wakali kusola kupa Jobu kuyeeya kuti Leza nguwapa kuti abe mumapenzi.

11. Amupandulule mbwaakalimvwa Jobu kujatikizya mapenzi aakwe.

¹¹ Jobu wakatyompwa kapati nokuba kuti wakakaka kutukila Leza kweelana abwakamukulwaizyide mukaintu wakwe. (Jobu 2:9, 10) Jobu wakaamba kuti ‘basizibi bapona kabotu kwiinda ndime.’ (Jobu 21:7-9) Weelede kuti wakazingwa akuyeeya kuti, ‘Ino nkaambo nzi Leza ncandipenzyezya?’ Kuli ziindi naakali kulombozya kufwa buyo. Wakoongolola kuti: “Necakali cibotu kuti wandisisa munyika yabafwide, kondibamba kumbali mane kunyema kwako kumane.”—Jobu 14:13.

12, 13. Ino kubandika kwabeenzinyina botatwe ba Jobu kwakamupa kulimvwa buti?

¹² Jobu wakajisi beenzinyina botatwe bakali kulibonya kuti bakamuswaya ‘kuzyoomulizya akumuumbulizya.’ (Jobu 2:11) Pele, bakalitondezya kuba “baumbulizi bakatezi biyo.” (Jobu 16:2) Jobu naakayumizigwa abeenzinyina aabo mbaakali kunga waambila mbwalimvwa kujatikizya mapenzi aakwe, pele beenzinyina botatwe aaba bakaindizya kunyongana akutyompwa kwakwe.—Jobu 19:2; 26:2.

¹³ Ncamaano kuyeeya kuti Jobu wakalibuzya kuti: ‘Ino nkaambo nzi ncindaba ndime? Ino ndacitanzi ncindeelela kupenga boobu?’ Beenzinyina bakamupa bupanduluzi butali bwamasimpe. Bakayeeya kuti Jobu wakaliletela mapenzi kwiinda mukucita cinyonyoono cipati. Elifazi wakabuzya ategwa: “Muntunzi uutakwe mulandu wakafwidilila? . . . Mbondibona ime, bantu balatebula bubi mbubalima, alimwi amapenzi ngebasyanga.”—Jobu 4:7, 8.

14. Ino nkaambo nzi ncotuteelede kuyeeya kuti mapenzi aswaangene akutalilemeka kabotu?

¹⁴ Mmasimpe tulakonzya kujana mapenzi ikuti twabyala kunyama kutali kumuuya. (Ba-Galatiya 6:7, 8) Pele, mubukkale oobu bwasunu, mapenzi aatajatikizyi bukkale bwesu alakonzya kutucitikila. Alimwi tatukonzyi kwaamba kuti balulami balikwabilidwe kumapenzi oonse. Jesu Kristo, ‘iwakanyina kampenda, iwakapambukide kuli basizibi’ wakafwa lufwu lubyaabi kapati acisamu cakupenzyezya, awalo mwaapostolo Jakobo wakajayigwa akaambo kakusyomeka. (Ba-Hebrayo 7:26; Incito 12:1, 2) Mizeezo mibi ya Elifazi abeenzinyina bobile yakapa kuti Jobu aambe zyampuwo yakwe imbotu akuzumanana kwaamba kuti wakanyina mulandu. Pele, kumutamikizya kuti mapenzi aakwe akaboola akaambo kakulubizya kulakonzya kuti kwakanyonganya mbwaakali kububona bululami bwa Leza.—Jobu 34:5; 35:2.

Ikujana Lugwasyo Notuli Amapenzi

15. Ino nkuyeeya kuli buti kuyootugwasya notuli amapenzi?

¹⁵ Sena kuli ncotukonzya kwiiya kuli Jobu? Ntenda, kuciswa naa kupenzyegwa zilakonzya kutunyonganya kapati. Bantu bamwi balibonya kuti tabacitikilwi bunji bwamapenzi ngamunya aaya. (Intembauzyo 73:3-12) Ziindi zimwi, tweelede kulibuzya mibuzyo eeyi iiyandika kapati: ‘Sena luyando lwangu kuli Leza lundipa kuyanda kumubelekela noziba buti zintu? Sena ndilombozya kupa Jehova kucikonzya kwiingula ‘yooyo uumusampula?’’ (Tusimpi 27:11; Matayo 22:37) Tatweelede kulekela twaambo twabantu tubyaabi kutupa kuzumbauzya Taatesu wakujulu. Mucizi umwi Munakristo uusyomeka  iwakaciswa bulwazi butasilikiki kwamyaka minji wakaamba kuti: “Ndilizi kuti kufwumbwa eeco Jehova ncazumizya, ndilakonzya kuliyumya. Ndilizi kuti uyoondipa nguzu nzyeyandika. Alimwi lyoonse wali kundipa nguzu eezi.”

16. Ino Jwi lya Leza libagwasya buti kuliyumya ibapenga?

¹⁶ Tulijisi luzibo ndwaatakajisi Jobu kujatikizya nzila nzyabelesya Saatani. “Tatuli bafubafuba batezi makanze aakwe mbwaabede,” naa bucenjezu bwakwe bubyaabi. (2 Ba-Korinto 2:11) Alimwi tulijisi lulayo lwabusongo lunji ndotukonzya kubelesya. Mu Bbaibbele, tujana makani aabaalumi abanakazi ibakaliyumya mumapenzi aandeene-andeene. Mwaapostolo Paulo iwakapenga kapati kwiinda bunji bwa Banakristo wakalemba kuti: “Makani aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” (Ba-Roma 15:4) Umwi Kamboni waku Europe iwakali muntolongo akaambo kalusyomo lwakwe lya Nkondo Yanyika Yabili, wakasala kutalya kwamazuba otatwe kutegwa apegwe Bbaibbele. Mukwesu ooyu waamba kuti, “Tabulikomeneni kaka bulumbu mbundakajana mukupana maanza asokwe ooko! Nokuba kuti ndakalifwide nzala, ndakatambula cakulya cakumuuya icakandigwasya mebo abamwi kuliyumya mumasunko eesu aamuziindi eezyo zikatazya. Ndaliyobola Bbaibbele eelyo kusikila sunu.”

17. Nzipego nzi zizwa kuli Leza izikonzya kutugwasya kuliyumya?

¹⁷ Kuyungizya aluumbulizyo lwamu Magwalo, tulijisi zibelesyo zinji zitugwasya kulimvwisya Bbaibbele izitupa lulayo lubotu lwakuliyumya mumapenzi. Ikuti mwavwuntauzya mu Watch Tower Publications Index, mulalangilwa kujana cakuluula ca Munakristoma  iwakajisi sunko likozyenye alyanu. (1 Petro 5:9) Alimwi inga camugwasya ikubandika mapenzi aanu abaalu babikkila maano naa Banakristo basimide bamwi. Kwiinda zyoonse, mulakonzya kusyoma lugwasyo lwa Jehova amuuya wakwe uusalala kwiinda mumupailo. Ino Paulo wakaliyumya buti ‘kukudinkaulwa’ a Saatani? Nkwiinda mukwiiya kusyoma nguzu zya Leza. (2 Ba-Korinto 12:9, 10) Wakalemba kuti: “Zintu zyoonse buyo ndazikonzya nkaambo kanguzu nzimpedwe kuli-Kristo.”—Ba-Filipi. 4:13.

18. Mmuunzila nzi Banakristoma mobakonzya kutukulwaizya kapati?

¹⁸ Aboobo ilugwasyo mpoluli, eelyo tamweelede kuwayawaya kuluyandaula. Kasimpi kamu Bbaibbele kaamba kuti: “Na wawizuka mubuzuba bwamapenzi, inguzu zyako zyaceya.” (Tusimpi 24:10) Mbubonya bamacenya mbobakonzya kuwisya ŋanda yazisamu, kutyompwa kulakonzya kulwana kusyomeka kwa Munakristo. Kutegwa tulwane penzi eeli, Jehova utupa lugwasyo kwiinda mubabelesi ba Leza beenzuma. Mungelo wakasikila Jesu akumuyumya imasiku naakaangwa. (Luka 22:43) Naakali kuya ku Roma kali mwaange, Paulo ‘wakalumba Leza, akukkalika moyo’ naakaswaangana abakwesu ku Bbuwa lya Apiyo aku Maanda Otatwe. (Incito 28:15) Kamboni umwi waku Germany uciluyeeya lugwasyo ndwaakatambula naakasika kucilabba cakupenzyezya ca Ravensbrück kali mukubusi uuyoowede kapati. Uciyeeya cakacitika ategwa: “Munakristoma umwi wakandijana ndilyonya akunditambula camoyo woonse. Aumwi mucizi uusyomeka wakandibamba kabotu cakuti wakaba mbuli bamaama bakumuuya.”

“Kosyomeka”

19. Ino ncinzi cakagwasya Jobu kucikonzya kuliyumya kukulwanwa a Saatani?

¹⁹ Jehova wakaamba Jobu kuti mmuntu ‘uuzumanana kusyomeka.’ (Jobu 2:3) Nokuba kuti wakalityompedwe alimwi tanaakazi kaambo ncaakali kupengela, Jobu kunyina naakazungaana mumakani aakusyomeka ikuyandika kapati. Kunyina naakaleka kukakatila kuzintu zyoonse nzyaakali kusyoma. Wakaamba cakusinizya ategwa: ‘Kusikila nkafwe, taakwe neyooleka kusyomeka.’—Jobu 27:5.

20. Nkaambo nzi lukakatilo ncoluyandika?

²⁰ Kuba amakanze aali boobu kuyootugwasya kuzumanana kusyomeka mubukkale buli boonse—mumasunko, mukukazigwa naa mumapenzi. Jesu wakaambila mbungano yaku Smurna kuti: “Mutayoowi zintu ezyo nzimuti penzegwe. Amubone, Diabolosi ulawaala bamwi banu muntolongo, kuti mukasunkwe, elyo muyooba mumapenzi [manyongwe, macise naa kudyaamininwa] mazuba aali ikumi. Kosyomeka mane do kusikila kulufu, lino njookupa musini wabuumi.”—Ciyubunuzyo 2:10.

21, 22. Notuliyumya mumapenzi, nkuziba nzi kunga kwatuumbulizya?

²¹ Mubukkale obuno bweendelezyegwa a Saatani, lukakatilo alusyomo lwesu ziyoosunkwa. Pele Jesu utusyomezya kuti notulindila mazuba aakumbele, tatweelede kuyoowa pe. Icintu ciyandika kapati nkuti katusyomeka. Paulo wakaamba kuti: “Mapenzi esu maubauba aakaindi kaniini” pele “bulemu” naa bulumbu Jehova mbwatusyomezyede “[m]bupati loko butamani.” (2 Ba-Korinto 4:17, 18) Naaba mapenzi aa Jobu akali aakaindi kasyoonto buyo ikuti akozyanisyigwa amyaka minji yalukkomano njaakajisi, mapenzi kaatanasika anaakainda.—Jobu 42:16.

²² Pele kuli ziindi zinji mubuumi masunko naalibonya kuti taamani alimwi anotulimvwa kuti tatucicikonzyi kuliyumya mumapenzi. Mucibalo citobela, tulalanga-langa cakacitikila Jobu mbocikonzya kutuyiisya ziiyo zimbi mukuliyumya. Alimwi tulalanga-langa nzila mbotunga twayumya bamwi bajisi mapenzi.

Ino Inga Mwaingula Buti?

• Ino nkaambo kali ikayandika kapati kakali kujatikizya kusyomeka kwa Jobu nkaakatalisya Saatani?

• Nkaambo nzi mapenzi ncaateelede kutugambya kapati?

• Ino Jehova utugwasya buti kuliyumya?

[Mibuzyo yaciiyo]

[Cifwanikiso icili apeeji 15]

Kuvwuntauzya, kubuzya Banakristo basimide akupaila camoyo woonse zilakonzya kutugwasya kuliyumya