Twaambo Tupati-Pati Kuzwa Mubbuku Lyatatu a Lyane lya Intembauzyo
Ijwi lya Jehova Lili Abuumi
Twaambo Tupati-Pati Kuzwa Mubbuku Lyatatu a Lyane lya Intembauzyo
MUMUPAILO kuli Leza, sintembauzyo wabuzya kuti: “Sa luzyalo lwako lulaambwa mukabanda? Alusyomo lwako sa lulaambwa mukati kalunyonyooko?” (Intembauzyo 88:11) Ibwiinguzi mbwakuti, peepe. Ikuti katufwide, tatukonzyi kumutembaula Jehova. Ikutembaula Jehova nkakaambo kapati katupa kuzumanana kupona alimwi kuba abuumi kuleelede kutukulwaizya kumutembaula.
Ibbuku Lyatatu a Lyane lya Intembauzyo, kutalikila ku Intembauzyo 73 kusikila ku 106, atupa twaambo tunji itweelede kutukulwaizya kutembaula Mulengi akulemeka zina lyakwe. Ikuzinzibala kuyeeya antembauzyo eezi kweelede kutupa kulumba kapati ku “jwi lya-Leza” alimwi akutukulwaizya kumutembaula kapati. (Ba-Hebrayo 4:12) Caluyandisisyo, atusaangune kulanga-langa Ibbuku Lyatatu lya Intembauzyo.
“KULANDIBOTELA KUSWENA KULI-LEZA”
Intembauzyo zyakusaanguna zili 11 zyacibeela catatu zyakalembwa a Asafu naa abamukwasyi wakwe. Lwiimbo lwakusaanguna lupandulula capa kuti Asafu atoongelezyegwi amizeezo iitaluzi. Watalika kuzibona kabotu zintu. Waimba kuti, “Pele mebo, kulandibotela kuswena kuli-Leza.” (Intembauzyo 73:28) Mpoona kwatobela kulila akaambo kakunyonyoonwa kwa Jerusalemu mu Intembauzyo 74. Intembauzyo 75, 76 alimwi a 77 zitondezya kuti Jehova Mubetesi uululeme, Mufwutuli wabapengede, alimwi Sikuswiilila mupailo. Intembauzyo 78 iinduluka zyakacitikila bana Israyeli kuzwa kumazuba aa Musa kusikila kumazuba aa Davida. Intembauzyo 79 nkulila akaambo kakunyonyoonwa kwatempele. Mpoona kwatobela mupailo wakuti bantu ba Leza babukulusyigwe. Intembauzyo 81 ikulwaizya kumvwida Jehova. Intembauzyo 82 alimwi a 83 mipailo yakulomba kuti Leza abeteke babetesi bampelenge kubikkilizya abasinkondonyina Leza.
“Moyo wangu ulisukeme, ulayandisya kunjila mucikalilo ca-Jehova,” mboyaamba ntembauzyo yabana ba Kora. (Intembauzyo 84:2) Intembauzyo 85 nkulomba kwakuti Leza alongezye bantu bakazwa mubuzike. Intembauzyo eeyi itondezya kuti zilongezyo zyakumuuya zilayandika kapati kwiinda zyakumubili. Mu Intembauzyo 86, Davida ulomba Leza kuti amubambe alimwi akumuyiisya. Intembauzyo 87 nintembauzyo iijatikizya Zioni alimwi abaabo bakazyalilwa mumo mpoona kutobela mupailo kuli Jehova mu Intembauzyo 88. Luzyalo lwa Jehova mbuli mbolutondezyedwe mucizuminano ca Davida lulakankaizyigwa mu Intembauzyo 89, yakalembwa a Etani, ambweni umwi wabaalumi bone basongo bakumazuba aa Solomoni.—1 Bami 4:31.
Mibuzyo Yamu Magwalo Iingulwa:
73:9—Muunzila nzi basizibi ‘mobalanzya milomo yabo kujulu andimi zyabo mbozyeendeenda munyika’? Mbwaanga basizibi kunyina ngobalemeka kujulu naa anyika, tabeenkeli kusampaula Leza amilomo yabo. Alimwi balabejelezya bantu andimi zyabo.
74:13, 14—Ndilili Jehova ‘naakapwayaula mitwe yazyuuka akupwayaula mutwe wa Leviyatani’? “Farao mwami wa-Egepita,” wiitwa kuti ‘intale iilede akati katulonga twanjiyo.’ (Ezekieli 29:3) Leviyatani ulakonzya kwiiminina basinguzu ba Farao. Ikupwayaulwa kwamitwe yabo kulakonzya kupandulula kuzundwa cakumaninina kwa Farao abasikalumamba bakwe ciindi Jehova naakafwutula bana Israyeli kuzwa mubuzike ku Egepita.
75:4, 5, 10—Ino “meja” ayiminina nzi? Meja aamunyama ncilwanyo cikali. Aboobo, ibbala lyakuti “meja” liiminina nguzu naa kuyuma. Jehova ulabusya meja aabantu bakwe kwiinda mukubasumpula, pele ‘meja aabasizibi ulaatyolaula.’ Tucenjezyegwa ‘kutabusya meja eesu kujulu’ mukuti tatweelede kulisumpula naa kuba basilunyansyo. Mbwaanga Jehova nguusumpula, nkokuti mikuli mumbungano yeelede kubonwa kuti izwa kulinguwe.—Intembauzyo 75:7.
76:10—Mbuti “bukali bwabantu” mbobukonzya kumutembaula Jehova? Kuli mpindu zikonzya kujanwa ciindi Leza nazumizya bantu kutukalalila akaambo kakuti tuli babelesi bakwe. Kufwumbwa buyumuyumu mbotunga twajana bulakonzya kutuyiisya cintu cimwi. Jehova ulaazumizya mapenzi kutucitikila kusikila buyo waawo mpotukonzya kwiiya cintu cimwi. (1 Petro 5:10) ‘Bukali busyeede bwabantu bulamusekelela Leza.’ Ino mbuti kuti twapenzegwa mane kufwa? Acalo eeci cilakonzya kupa kuti Jehova atembaulwe nkaambo aabo batulangilila katuliyumya cakusyomeka abalo balakonzya kutalika kumulemeka Leza.
78:24, 25—Nkaambo nzi mana ncaambwa kuti “maila aakujulu” alimwi akuti “zilyo zyabaangelo”? Mabala aayo oonse taapandululi kuti bangelo bakali kulya mana. Akali “maila aakujulu” nkaambo akazwa kujulu. (Intembauzyo 105:40) Mbwaanga bangelo bakkala kujulu, mabala aakuti “zilyo zyabaangelo” alakonzya kupandululula kuti akali kupegwa a Leza uukkala kujulu. (Intembauzyo 11:4) Alimwi ambweni Jehova wakabelesya bangelo kwaabila mana kubana Israyeli.
82:1, 6—Mbaani baitwa kuti “baleza” akuti “bana ba-Mupatikampatila”? Mabala aaya oonse aamba babetesi bantunsi mu Israyeli. Eeci cileelela mbokunga bakali kubeleka kabali basikwaambilizya alimwi baiminizi ba Leza.—Johane 10:33-36.
83:2—Ino ‘kusongomeka mutwe’ kwaamba nzi? Kucita boobo kutondezya kulibambila kubelesya nguzu naa kubweza ntaamu, kanji-kanji yakukazya, kulwana naa kudyaaminina.
Ziiyo Kulindiswe:
73:2-5, 18-20, 25, 28. Tatweelede kunyonokela buvwubi bwabasizibi alimwi akutobela nzila zyabo zibi. Basizibi bali mubusena butezemuka. Ncobeni ‘bayoowisigwa mulunyonyooko.’ Alimwi, mbwaanga ibubi tabukonzyi kugwisyigwa kwiinda mubulelo bwabantu batalondokede, kusoleka nkotunga twacita kutegwa tubumanizye takukonzyi kuzwiidilila. Mbubwenya mbuli Asafu, tulakonzya kucita camaano ikuti twaliyumya mububi kwiinda mu “kuswena kuli-Leza” alimwi akukkomanina cilongwe ncotujisi Anguwe.
73:3, 6, 8, 27. Tatweelede kulisumpula, kuba akamikami, kusabula alimwi akubeja. Oobu mbokubede nokuba kuti ikuba abube oobu inga kwabonekaanga kulatugwasya.
73:15-17. Ikuti katuzingidwe mumizeezo, tatweelede kumwaya twaambo tutukatazide. ‘Ikukanana kuli boobo’ kulakonzya kubatyompya buyo bamwi. Tuyandika kuzinzibala kuyeeya twaambo ooto akubona mbotukonzya kutubamba kwiinda mukuyanzana abakombima.—Tusimpi 18:1.
73:21-24. Ikukalala akaambo kakuti basizibi baboneka mbuli kuti bapona kabotu kulikozyene akucita mbuli banyama batayeeyi. Ooku nkwiintila ikuyeeme akubweza ntaamu kweelana ambotulimvwa mumoyo. Mukwiimpana, tweelede kusololelwa alulayo lwa Jehova katusyomede kuti ‘uyootujatilila kujanza lyesu lyalulyo’ akutugwasya. Kunze lyaboobo, Jehova ‘uyootutambula mubulemu,’ nkokuti ikuba acilongwe cini-cini anguwe.
77:6. Ikubikkila maano kapati kumakani aakumuuya alimwi akwaalingula kuyandika kujana ciindi cakwiiya akuzinzibala kuyeeya. Elo kaka cilayandika kujana ciindi cakuba tolikke katulizinza!
79:9. Jehova ulaiswiilila mipailo yesu, ikapati noyijatikizya kusalazyigwa kwazina lyakwe.
81:13, 16. Ikuswiilila ijwi lya Jehova akweenda munzila zyakwe kuletela zilongezyo zinji.—Tusimpi 10:22.
82:2, 5. Kutalulama nkokupa kuti “intalisyo. . . zyanyika” zizungaane. Kucita zintu cakutalulama kulanyonganya luumuno lwabantu.
84:1-4, 10-12. Ikulumba kwabasintembauzyo kujatikizya busena bwabukombi bwa Jehova alimwi akukkutila nkobakajisi kujatikizya mulimo wabo waalubazu ncitondezyo kulindiswe.
86:5. Elo kaka tulalumba kuti Jehova “ulafwamba kujatila”! Ulayandaula bumboni buli boonse bukonzya kupa kuti atondezye luzyalo kuli sikubisya weempwa.
87:5, 6. Sena aabo bayoopona mu Paradaiso anyika kuli nobayooziba mazina abaabo babusyilwa kupona kujulu? Tupango ootu tutondezya kuti balalangilwa kuyooziba.
88:13, 14. Iciindi Jehova natafwambaani kwiingula mipailo yesu kujatikizya penzi limwi, ambweni cilakonzya kuba boobo akaambo kakuti uyanda kuti tutondezye mbotusinizide mukulyaaba kulinguwe.
“AMUMULUMBE AKULONGEZYA IZINA LYAKWE”
Amulange-lange twaambo ncayelede kutembaulwa Jehova itulembedwe mucibeela cane cantembauzyo. Mu Intembauzyo 90, Musa waindanya ikubako kwa “Mwami mupati . . . walyoonse” abuumi bwamuntu bufwaafwi. (1 Timoteo 1:17) Kweelana a Intembauzyo 91:2, Musa waamba Jehova kuti ‘mayubilo aakwe alimwi ndilinga lyakwe’—Sikumucingilila. Intembauzyo zitobela zyaamba bube bwa Leza butaliboteli, miyeeyo yakwe iisumpukide alimwi amilimo yakwe iigambya. Intembauzyo zyotatwe zitalika amajwi aakuti “Jehova ngu-Mwami [mweendelezi].” (Intembauzyo 93:1; 97:1; 99:1) Kaamba Jehova kuti ngo Mulengi wesu, sintembauzyo utukulwaizya kuti “amumulumbe akulongezya izina lyakwe.”—Intembauzyo 100:4.
Ino mbuti muleli uyoowa Jehova mbwayelede kweendelezya zintu? Ibwiinguzi bujanwa mu Intembauzyo 101 yakalembwa a Mwami Davida. Intembauzyo itobela itwaambila kuti Jehova ‘uyooswiilila kukomba kwabaswekede akuti tasampauli kukomba kwabo.’ (Intembauzyo 102:17) Intembauzyo 103 igamika mizeezo kuluzyalo alimwi aluse lwa Jehova. Kaamba kujatikizya zintu zinji nzyaakalenga Leza anyika, sintembauzyo ulakankamuka ategwa: “O Jehova, milimo yako yavula! Zyoonse wakazicita mubusongo bwako!” (Intembauzyo 104:24) Munyimbo zyobile zyamamanino zya Bbuku Lyane muli ntembauzyo zyakulumba Jehova akaambo kamilimo yakwe iigambya.—Intembauzyo 105:2, 5; 106:7, 22.
Mibuzyo Yamu Magwalo Iingulwa:
91:1, 2—Ino “ciyubilo ca-Mupatikampatila” ninzi, alimwi mbuti mbotunga ‘twakkala’ mumo? Oobu mbusena bwacikozyanyo bwakucingililwa kumuuya—iciimo cakukwabililwa kuntenda zyakumuuya. Oobu mbusena bwakuyubila akaambo kakuti tabuzibidwe kuli baabo batasyomi Leza. Jehova ulaba makkalilo eesu kwiinda mukumusyoma kuti ngamayubilo alimwi ndilinga lyesu, kwiinda mukumutembaula mbwali Muleli Mupati wabubumbo boonse alimwi akwiinda mukukambauka makani mabotu aa Bwami. Tulizi kuti tulikwabilidwe kumuuya akaambo kakuti lyoonse Jehova ulilibambide kutugwasya.—Intembauzyo 90:1.
92:12—Munzila nzi balulami ‘mobasyuuka mbuli mukunka’? Mukunka ulizibidwe akaambo kakuzyala micelo. Mululami uli mbuli mukunka akaambo kakuti uliluleme mumeso aa Jehova alimwi ulazumanana kuzyala “micelo mibotu,” yalo iibikkilizya milimo mibotu.—Matayo 7:17-20.
Ziiyo Kulindiswe:
90:7, 8, 13, 14. Lyoonse izibi zyesu zilanyonganya cilongwe cesu a Leza wakasimpe. Alimwi zibi kunyina nozikonzya kusiswa kulinguwe. Pele ikuti naa ncobeni tweempwa akuleka nzila yesu mbyaabi, Jehova ulakonzya kutukkomanina alimwi, ‘akutukutya luzyalo lwakwe.’
90:10, 12. Mbwaanga buumi mbufwaafwi, tuleelede “kubala mazuba esu.” Munzila nzi? Kwiinda ‘mukujana moyo wabusongo,’ naa kwiinda mukubelesya busongo kutegwa mazuba eesu aacisyeede atanyonyooki pe, pele abelesyegwe munzila iikomanisya Jehova. Eeci ciyandika kubikka zintu zyakumuuya kumbele alimwi akucibelesya camaano ciindi cesu.—Ba-Efeso 5:15, 16; Ba-Filipi 1:10.
90:17. Cili kabotu kupailila kuti Jehova ‘alondole milimo yamaanza esu’ alimwi akulongezya kusoleka nkotucita mumulimo.
92:14, 15. Kwiinda mukuba basikwiiya Jwi lya Leza basungu alimwi akuyanzana lyoonse abantu ba Jehova, bacembeede balazumanana ‘kuneneya akufwefwema’—kuyuma kumuuya—alimwi balayandika kapati mumbungano.
94:19. Kufwumbwa naa ncinzi ‘citukatazya mumiyeeyo,’ ikubala alimwi akuzinzibala kuyeeya “kuumbulizya” kujanika mu Bbaibbele kulakonzya kutuumbulizya.
95:7, 8. Kuswiilila lulayo lwamu Magwalo, kulubikkila maano alimwi akulutobela kakunyina akusowa ciindi, kuyoopa kuti tutayumyi myoyo.—Ba-Hebrayo 3:7, 8.
106:36, 37. Tupango ootu tweelanya kukomba mituni kukupaizya kumadaimona. Eeci citondezya kuti muntu uubelesya mituni ulakonzya kweendelezyegwa amadaimona. Ibbaibbele litwaambila kuti: “Amucenjele kuti mutavwelani amituni.”—1 Johane 5:21.
“Amutembaule Jehova!”
Inyimbo zyotatwe zyamamanino zya Bbuku Lyane lya Intembauzyo zimana amajwi aakulwaizya aakuti: “Amutembaule Jehova!” Alimwi oobo mboitalika ntembauzyo yamamanino. (Intembauzyo 104:35; 105:45; 106:1, 48) Mubwini, mabala aakuti “Amutembaule Jehova!” alajanika cakwiinduluka-induluka mu Bbuku Lyane lyantembauzyo.
Masimpe tulijisi twaambo tunji ncotweelede kumutembaula Jehova. Intembauzyo 73 kusikila ku 106 zilijisi twaambo tunji itweelede kutupa kuzinzibala kuyeeya, akutukulwaizya kulumba Taateesu wakujulu. Notuyeeya zintu nzyaatucitila kale alimwi anzyayakutucitila kumbele, sena tacitupi kuyanda ‘kumutembaula Jehova’ anguzu zyesu zyoonse?
[Cifwanikiso icili apeeji 8]
Mbubonya mbuli Asafu, tulakonzya kuliyumya mububi kwiinda mu “kuswena kuli-Leza”
[Cifwanikiso icili apeeji 9]
Farao wazundwa mu Lwizi Lusalala
[Cifwanikiso icili apeeji 9]
Sena mulikazi kaambo mana ncaambwa kuti “zilyo zyabaangelo”?
[Cifwanikiso icili apeeji 11]
Ncinzi citugwasya kugusya ‘miyeeyo iitukatazya’?