Amulindile Jehova Kamuli Alusyomo Alimwi Basicamba

“Lindila Jehova! Koyuma, amoyo wako ujate inguzu. Lindila Jehova.”—INTEMBAUZYO 27:14.

1. Ino mbuti mbobuyandika bulangizi, alimwi ino bbala eeli libelesyegwa buti mu Magwalo?

BULANGIZI bwini-bwini buli mbuli mumuni uumweka. Bulatugwasya kubona zyakumbele kuleka buyo masukusyo alimwi akulangila kumbele katuli basicamba alimwi katukkomene. Alikke Jehova nguukonzya kutupa bulangizi bwini-bwini, oobo mbwatupa kwiinda mu Jwi lyakwe lyakasololelwa amuuya. (2 Timoteo 3:16) Bwini mbwakuti, imabala aakuti “bulangizi,” “kulangila” alimwi a “kulindila” alajanika ziindi zinji mu Bbaibbele alimwi aamba kulangila calukkomano cintu cimwi cibotu akubikkila maano kucintu eeco cilangilwa. * Bulangizi buli boobu takuli kwiile kulombozya buyo, kwalo kunyina ampokuyeeme naa bulangizi bwakuti inga kwazuzikizyigwa.

2. Ino bulangizi bwakamugwasya buti mubuumi bwakwe Jesu?

² Naakali mumasukusyo amumapenzi, Jesu tanaakagama buyo kulanga ali zyeezyo zyakali kucitika ciindi eeco pele wakalangila Jehova. “Nkaambo  kalukondo ndwaakabikkilwa kunembo, wakaliyumya acisamu cakupenzezya, wakaubaula buusu, eno sunu ulikkede kululyo lwacuuno ca Leza.” (Ba-Hebrayo 12:2, NW) Akaambo kakuti wakabikkilide maano abulangizi bwakusalazya makani abweendelezi bwa Jehova akusalazya zina Lyakwe, Jesu kunyina naakaleya mukumvwida Leza kunyina makani azyakali kuyoomucitikila.

3. Ino mulimo nzi bulangizi mbobujisi mubuumi bwababelesi ba Leza?

³ Mwami Davida waamba kweendelana kuliko akati kabulangizi abusicamba naamba kuti: “Lindila Jehova! Koyuma, amoyo wako ujate inguzu. Lindila Jehova!” (Intembauzyo 27:14) Ikuti katuyanda kuba amoyo muyumu, tatweelede kulekela bulangizi bwesu kuyabaila pele lyoonse katubuyeeya. Ikucita boobo kuyootugwasya kwiiya Jesu mukutondezya busicamba abusungu notutola lubazu mumulimo ngwaakapa basikwiiya bakwe kucita. (Matayo 24:14; 28:19, 20) Masimpe, bulangizi bulaambwa antoomwe alusyomo aluyando kuti bulayandika, ibube mbobatondezya kapati mubuumi babelesi ba Leza.—1 Ba-Korinto 13:13.

Sena ‘Mulainda Kuba Abulangizi’?

4. Mbulangizi nzi Banakristo bananike abeenzinyina ‘bambelele zimwi’ mbobajisi?

⁴ Bantu ba Leza bajisi bulangizi bubotu kumbele. Banakristo bananike balindila kuyoobeleka a Kristo kujulu kakuli ‘bambelele zimwi’ bajisi bulangizi ‘bwakulubulwa kubuzike bwabubozi, akuba abulubulo bulemu bwabana ba Leza baanyika.’ (Johane 10:16; Ba-Roma 8:19-21; Ba-Filipi 3:20) “Bulubulo bulemu” oobo bubikkilizya kunununwa kuzwa kucibi azintu zibi ziboola akaambo kancico. Masimpe, Jehova—Sikupa “zipego zibotu zyoonse azyoolwe zyoonse zilondokede”—uyoobapa cipego cibotu bamusyoma.—Jakobo 1:17; Isaya 25:8.

5. Ino mbuti ‘mbotwiinda kuba abulangizi’?

⁵ Ino bulangizi bwa Bunakristo bweelede kutugwasya buti mubuumi bwesu? Ku Ba-Roma 15:13 tubala kuti: “Lino Leza wabulangizi amuzuzye bukondwi boonse aluumuno mukusyoma kwanu, kuti mwiinde kuba abulangizi kunguzu zya-Muuya Uusalala.” * Inzya bulangizi bulakonzya kukozyanisyigwa, ikutali ankandela iili mumudima pele amitungazuba yamafwumofwumo, iipa muntu kupona muluumuno, cakukondwa, kajisi makanze alimwi kali sicamba. Amubone kuti ‘tulainda kuba abulangizi’ notusyoma Jwi lya Leza lilembedwe akutambula muuya wakwe uusalala. Lugwalo lwa Ba-Roma 15:4 lwaamba kuti: “Nkaambo makani aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” Aboobo amulibuzye kuti: ‘Sena ndilazumanana kuba abulangizi kwiinda mukuba sikwiiya mubotu wa Bbaibbele, kulibala abuzuba? Sena ndilapaila lyoonse kulomba muuya wa Leza’?—Luka 11:13.

6. Kutegwa tuzumanane abulangizi mbotujisi, ncinzi ncotweelede kucenjelela?

⁶ Jesu, Cikozyanyo ncotutobela wakayumizyigwa a Jwi lya Leza. Kwiinda mukumutobela, tatukonzyi ‘kubombabomba nokuba kulengaana mumyoyo yesu.’ (Ba-Hebrayo 12:3) Aboobo, ikuti bulangizi mbotwakapegwa a Leza bwazwa mumizeezo amumyoyo yesu naa ikuti twanyonganizyigwa azintu zimbi—ambweni zintu zyakumubili naa mbaakani zyakunyika—tulakonzya kutalika kuuzila kumuuya, mukuya kwaciindi akutusololela kukubula nguzu abusicamba bwakupona kweelana anjiisyo zyakulilemeka. Mubukkale buli boobu, tulakonzya ‘kusweeka kulusyomo mbuli bwato bwaloba.’ (1 Timoteo 1:19) Kunze lyaboobo, bulangizi bwini-bwini bulatuyumya kuba alusyomo.

Bulangizi—Bulayandika Kukuba Alusyomo

7. Muunzila nzi bulangizi mbobuyandika kukuba alusyomo?

⁷ Ibbaibbele lyaamba kuti: “Kusyoma nkutadonaika azintu nzyotulangila akusinizya kuti zintu nzyotutaboni nkozili ncobeni.” (Bahibulu 11:1, Ci) Aboobo, bulangizi tabuli buyo bube buyungizyigwa kulusyomo; ncibeela ciyandika calusyomo. Amulange-lange Abrahamu. Kweelana akubona kwamuntu, walo amukaintu wakwe Sara, bakali indide aciimo cakuba abana Jehova naakabasyomezya simulyazina. (Matalikilo 17:15-17) Ino Abrahamu wakacita buti? “Nibwakamana bulangizi wakacili kulangila cakusyoma kuti abe wisaabo bazisi zinji.” (Ba-Roma  4:18) Inzya bulangizi mbwaakapegwa Abrahamu kuli Leza bwakayumya lusyomo lwakwe lwakuti wakali kuyooba alunyungu. Akaambo kaceeco lusyomo lwakwe lwakayumya bulangizi mbwaakajisi akusyoma kuti buyoozuzikizyigwa ncobeni. Mane Abrahamu a Sara bakaba basicamba akusiya ŋanda abasazinyina akuyookkala mumatente mucisi ceenzu!

8. Ino mbuti kukakatila cakusyomeka mbokuyumya bulangizi?

⁸ Abrahamu wakazumanana kajisi bulangizi kwiinda mukumvwida Jehova cakumaninina nokuba kuti kucita boobo kwakali kukatazya. (Matalikilo 22:2, 12) Mbubwenya buyo, kwiinda mukumvwida akukakatila kumulimo wa Jehova, tulakonzya kuba alusyomo lwakuti tuyoopegwa bulumbu. Paulo wakalemba kuti, “lukakatilo” ndolupa “bukkale butambulika kuli Leza,” bwalo butupa lulangilo, nkabela “lulangilo oolu lulatuyumya.” (Baloma 5:4, 5, Ci) Paulo ncaakalembela kuti: “Tuyandisya kuti umwi aumwi wanu ajatisye kusungwaala nkukonya, kukulindila kumaninide mane do kumamanino.” (Ba-Hebrayo 6:11) Kuzilanga munzila imbotu zintu kwalo kuyeeme acilongwe cini-cini a Jehova kulakonzya kutugwasya kulanganya penzi lili loonse cabusicamba alukkomano.

“Amube Abulangizi Cakukondwa”

9. Ncinzi ncotukonzya kucita lyoonse cikonzya kutugwasya ‘kuba abulangizi cakukondwa’?

⁹ Bulangizi mbwatupede Leza bulainda cintu cili coonse nyika eeyi ncoikonzya kutupa. Intembauzyo 37:34 yaamba kuti: “Lindila kuli-Jehova akubamba inzila yakwe, lino ulakusumpula kuti ukone nyika, nkabela uyoobona lunyonyooko lwabasizibi.” Izya tulijisi twaambo tutupa ‘kuba abulangizi cakukondwa.’ (Ba-Roma 12:12) Pele ikutegwa tucite oobo, lyoonse tweelede kuyeeya kujatikizya bulangizi mbotujisi. Sena lyoonse mulabuyeeya bulangizi mbomupedwe a Leza? Sena mulalibona mu Paradaiso kamuli bazumi, kakunyina kulibilika, kamuzungulukidwe abantu mbomuyanda alimwi akutola lubazu mumulimo uukkomanisya? Sena mulazinzibala kuyeeya azifwanikiso zitondezya Paradaiso zili mumabbuku eesu? Ikulilingula kuli boobu kulakonzya kukozyanisyigwa akusalazya mpulungwido aawo muntu mpakonzya kubona kabotu anze. Ikuti katutasalazyi mpulungwido, tombe liyootupa kutabona kabotu. Tuyootalika kubikkila maano zintu zimbi. Tutacilekeli eeco kutucitikila!

10. Nkaambo nzi kulangila bulumbu mbokutondezya cilongwe cibotu ncotujisi a Jehova?

¹⁰ Masimpe, kaambo keni katupa kubelekela Jehova nduyando ndotujisi kuli nguwe. (Marko 12:30) Nokuba boobo, tweelede kulangila bulumbu. Masimpe Jehova utulangila kucita boobo! Lugwalo lwa Ba-Hebrayo 11:6 lwaamba kuti: “Kuti kakwiina lusyomo tacikonzeki kukonda Leza, nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” Nkaambo nzi Jehova ncayanda kuti tumuzibe  kuti Nguupa cilumbo? Nkaambo kakuti ikuti twacita oobo, tutondezya kuti tulimuzyi kabotu Taateesu wakujulu. Mwaabi alimwi ulabayanda bana bakwe. Amuyeeye buyo mbotukonzya kucimwa akutyompwa ikuti nitwaatalijisi “lulangilo kumazuba aaboola”—Jelemiya 29:11, BT.

11. Ino mbuti bulangizi mbwaakapedwe a Leza mbobwakamugwasya Musa kusala camaano?

¹¹ Cikozyanyo cibotu camuntu wakabikkila maano abulangizi mbwaakapedwe a Leza wakali Musa. Mbwaakali “mwana wamwana wa-Farao,” Musa wakalijisi nguzu, mpuwo alubono lwamu Egepita ndwaakali kukonzya kubelesya. Sena wakali kuyooyandisya kapati zintu eezyo, naa wakali kuyoobelekela Jehova? Musa cabusicamba wakasala kubelekela Jehova. Nkaambo nzi? Nkaambo kakuti “wakali kucilangila bulumbu ibwakacili kuza.” (Ba-Hebrayo 11:24-26) Inzya, Musa tanaakali muntu uutabikkili maano kujatikizya bulangizi Jehova mbwaakamubikkilide.

12. Nkaambo nzi bulangizi bwa Bunakristo ncobuli mbuli ngowani?

¹² Mwaapostolo Paulo wakakozyanisya bulangizi kungowani. Ngowani yesu yacikozyanyo ikwabilila miyeeyo yesu akutupa kusala camaano, kubikka ziyandika mubusena bwakusaanguna alimwi akuzumanana kusyomeka. (1 Ba-Tesalonika 5:8) Sena mulasama ngowani yacikozyanyo lyoonse? Ikuti kamucita oobo, nkokuti mbuli Musa a Paulo, muyoobikka bulangizi bwanu ikutali ‘mubuvwubi butasyomeki, pele kusyoma Leza uutufonkweda zintu zyoonse kuti katunga katuligwasya nzizyo.’ Masimpe, ikutazumina zintu zidumide kwiinda mukukaka zintu zitagwasyi kuyandika kuba sicamba, pele twacita boobo tulagwasyigwa kapati. Mubwini, ino nkaambo nzi kakonzya kumupa kuzumina cili coonse citaindi “buumi bwinibwini,” mbobayoopegwa aabo bamusyoma akumuyanda Jehova?—1 Timoteo 6:17, 19.

“Nsikwe Nenti Kamulekelezye”

13. Ncisyomezyo nzi Jehova ncapa babelesi bakwe basyomeka?

¹³ Ibantu basyoma ibukkale bwaciindi cino beelede kuyeeya kujatikizya zintu zibyaabi ziyoobacitikila ‘mapenzi’ nayaabuyaambele munyika. (Matayo 24:8) Pele aabo basyoma Jehova kunyina ncobayoowa. Bayoozumanana ‘kukkala kabotu, bayooba aluumuno cakutayoowa bubi.’ (Tusimpi 1:33) Akaambo kakuti tabasyomi bukkale bwaciindi cino, calukkomano balatobela lulayo lwa Paulo lwakuti: “Buumi bwanu butabi bwakuyanda mali, pe, mutabi basyaacivulemwangu, nkaambo Leza wakati, Nsikwe nenti kamulekelezye nokuba kuyoomuleka buyo pe, pe.”—Ba-Hebrayo 13:5.

14. Nkaambo nzi Banakristo ncobateelede kulibilika kapati kujatikizya nzyobayandika kumubili?

¹⁴ “Nsikwe nenti kamulekelezye,”— majwi aaya ncobeni atondezya kuti Leza uyootulanganya. Jesu awalo wakatusyomezya Leza mbwabikkila maano caluyando naakati: “Amusaangune kuyandaula Bwami bwa-Leza abululami bwakwe, elyo zintu ezi zyoonse [zintu zyakumubili ziyandika mubuumi] mulaziyungizizigwa azyalo. Nkaambo kaako mutalibilikili zyajunza, nkaambo bwajunza bulalibilikila bwini.” (Matayo 6:33, 34) Jehova ulizyi kuti cilakatazya kusungwaalila Bwami bwakwe alimwi aciindi nciconya kuzuzikizya mukuli wakujana zintu zyakumubili. Aboobo atusyome munguzu zyakwe amakanze aakwe aakuti uyootupa nzyotuyandika.—Matayo 6:25-32; 11:28-30.

15. Ino mbuti Banakristo mbobaba ‘aliso lyabuuya’?

¹⁵ Tulatondezya kuti tulamusyoma Jehova ‘notuba aliso lyabuuya.’ (Matayo 6:22, 23) Liso lyabuuya ndyamasimpe, lijisi makanze aasalade alimwi talili lyabulyato amizeezo mibi. Ikuba aliso lyabuuya takwaambi kuti tweelede kuba bapenzi naa kutabikkila maano kumikuli yesu ya Bunakristo. Muciindi caboobo, caamba kutondezya ‘kulibamba’ notuzumanana kubikka mulimo wa Jehova mubusena bwakusaanguna.—2 Timoteo 1:7.

16. Nkaambo nzi lusyomo abusicamba ncoziyandika ikutegwa tube aliso lyabuuya?

¹⁶ Ikuba aliso lyabuuya kuyandika lusyomo abusicamba. Mucikozyanyo, ikuti sikumulemba mulimo uzumanana kuti kamubeleka lyoonse aciindi nokuli miswaangano ya Bunakristo, sena cabusicamba muyoosaanguna kubikkila maano kuzintu zyakumuuya? Ikuti umwi kadooneka naa Jehova uyoozuzikizya ncobeni cisyomezyo cakwe cakulanganya babelesi bakwe, Saatani  walo uyoozumanana akoongelezya kwakwe alimwi muntu uuli boobo ulakonzya kucileka akujanika kumiswaangano. Inzya, ikubula lusyomo kwesu kulakonzya kupa Saatani coolwe cakutweendelezya kucita kuti walo, ikutali Jehova, abe nguwe utwaambila nzyotweelede kubikka mubusena bwakusaanguna. Eeco inga caba cintu ciletela mapenzi!—2 Ba-Korinto 13:5.

“Lindila Kuli-Jehova”

17. Ino mbuti aabo basyoma muli Jehova mbobalongezyedwe noliba lino?

¹⁷ Imagwalo cakwiinduluka-induluka atondezya kuti aabo ibalangila akusyoma muli Jehova kunyina nobatazwidilili. (Tusimpi 3:5, 6; Jeremiya 17:7) Inzya, zimwi ziindi inga bayandika kuba azintu zyakumubili zisyoonto, pele eeci bacibona kuba kuliimya kusyoonto bakweelanya azilongezyo nzyobalangila kumbele. Kwiinda mukucita boobo batondezya kuti ‘balangila kuli Jehova’ alimwi bajisi lusyomo lwakuti kumamanino uyoopa bantu bakwe basyomeka zintu ziluleme zyoonse nzyuuyanda moyo wabo. (Intembauzyo 37:4, 34) Aboobo, balikkomene noliba lino. “Kusyoma kwabalulami kulaleta kukondwa, pele bulangizi bwabasizibi buyoofwidilila.”—Tusimpi 10:28.

18, 19. (a) Ncisyomezyo cili buti caluyando Jehova ncaatupa? (b) Ino mbuti mbotubikka Jehova kujanza lyesu lya “kululyo”?

¹⁸ Mwana muniini nayenda kabamujatilide kujanza bausyi, inga uliliibide. Ncimwi buyo andiswe notweenda a Taateesu wakujulu. Jehova wakati kuli Israyeli: “Utayoowi, nkaambo ndili ayebo. . . . Njookugwasya. . . . Nkaambo mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”—Isaya 41:10, 13.

¹⁹ Elo bupanduluzi oobu butondezya luyando—Jehova ikujata janza lyamuntu! “Ndibikide Jehova kubusyu bwangu lyoonse,” mbwaakalemba oobu Davida. “Uli kululyo lwangu kuti entazunganizigwa.” (Intembauzyo 16:8) Ino mbuti mbotumubikka Jehova kujanza lyesu lya “kululyo”? Tulacita oobo munzila zyobilo. Yakusaanguna, notutobela Jwi lyakwe mumbazu zyoonse zyabuumi bwesu; alimwi yabili, notubikkila maano kubulumbu bubotu kapati oobo Jehova mbwatubikkilide. Sintembauzyo Asafu wakaimba kuti: “Tuli ayebo lyoonse, ulindijisi kujanza lyangu lyalulyo. Unoondeenzya alulayo lwako, lino kumamanino uyoonditambula mubulemu.” (Intembauzyo 73:23, 24) Akaambo kacisyomezyo eeci, masimpe tulakonzya kulangila kumbele katuli basicamba.

“Kunununwa Kwanu Kuli Afwaafwi”

20, 21. Ino mbulangizi nzi bwakumbele mbobajisi aabo ibasyoma Jehova?

²⁰ Abuzuba, cilayandika kapati ikubikka Jehova kujanza lyesu lyakululyo. Ino-ino, kutalikila akunyonyoonwa kwabukombi bwakubeja, nyika ya Saatani iyoobona mapenzi mapati ngolitana buzuba yabona. (Matayo 24:21) Bantu batasyomi bayooba bakandu. Pele, kuciindi eeco camanyongwe, babelesi ba Jehova basicamba bayookondwa mubulangizi bwabo. “Zyatalika kucitika ezi zintu,” Jesu wakati, “amulange mujulu, mulungumike mitwe yanu, nkaambo kunununwa kwanu kuli afwaafwi.”—Luka 21:28.

²¹ Aboobo, atukkomane abulangizi mbotupedwe a Leza akutacengwa naa kucegwa abucenjezu bwa Saatani. Alimwi atusoleke canguzu kuba alusyomo, luyando alimwi akuyoowa Leza. Twacita boobo, tuyooba basicamba mukumvwida Jehova mubukkale buli boonse akukazya Diabolosi. (Jakobo 4:7, 8) Inzya, “amube aacamba, muyume, nyoonse nywebo nomulangila Mwami Leza.”—Intembauzyo 31:24, BT.

Bupanduluzi buyungizidwe

Sena Inga Mwaingula?

• Muunzila nzi bulangizi mbwaakajisi Jesu mbobwakamugwasya kuba sicamba?

• Ino lusyomo abulangizi zijatene buti?

• Ino mbuti bulangizi alimwi alusyomo mbozikonzya kupa Munakristo kuba sicamba kukubikka zintu ziyandika mubusena bwakusaanguna mubuumi?

• Nkaambo nzi aabo ‘balangila Jehova’ ncobakonzya kulangila kumbele kabali basicamba?

[Mibuzyo yaciiyo]

[Cifwanikiso icili apeeji 26]

Mube bana naa bapati, sena mulalibona kuba mu Paradaiso?