Bantu Mbobayandaula Buumi Butamani

KUZWA kaindi, bantu balikuyandisya kupona kukabe kutamani. Pele muzeezo ooyo tuunazuzikizyigwa—kunyina wajana nzila yakumana lufwu. Pele kuvwuntauzya kwakacitwa caino-ino, muzyabusilisi kwapa bantu bulangizi bupya bwakuti bantu balakonzya kupona kwaciindi cilamfwu. Amubone nzyobacita basayaansi mumbazu zisiyene-siyene.

Basikwiiya zintu zipona basoleka kubona musamu uujanika mumaseelo uutegwa telomerase kutegwa bayungizye ziindi maseelo nzyaalibambulula. Basayaansi balizi kuti maseelo aakaindi aanyina mulimo alazwisigwa akunjililwa busena aambi mapya. Mubwini, mubili woonse ulalibambulula ziindi zinji muntu nali muzumi. Ikuti naa kulibambulula ooku kwazumanana, basikuvwuntauzya bayeeya kuti, “mubili ulakonzya kulibambulula kwaciindi cilamfwu—mane kukabe kutamani.”

Kupanga cintu cipona kuzwa kucintunyina, mbazu imwi yabuvwuntauzyi iikazigwa abantu banji, kuyeyeelwa kuti kulakonzya kugwasya kupa balwazi muni, insa naa moyo mupya kakunyina penzi lili lyoonse. Zizo eezi zilakonzya kupangwa kwiinda mukubelesya maseelo aamulwazi.

Basikuvwuntauzya mutuntu tuniini tutakonzyi kubonwa aliso, baamba kuti kuyooba ciindi bamadokotela nobayootalika kubikka tuncini tuniini mbuli maseelo mubulowa bwamuntu kutegwa katuyandaula alimwi akunyonyoona maseelo aajisi kkansa alimwi atuzunda tumwi tutayandiki. Bamwi bayeeya kuti mbazu eeyi yasayaansi antoomwe aciyanza cakusilika bulwazi kwiinda mukubikka zibeela zyamaseelo izyeendelezya mbwakomena muntu mumaseelo aamulwazi, ziyoopa kuti mubili wamuntu kuucikonzya kulwana malwazi mane kukabe kutamani.

Aabo basyoma ciyanza citegwa cryonics balayobola mitumba yabantu mumasena aatontola kapati. Bajisi muzeezo wakuyobola mitumba kusikila leelyo bamadokotela baakujana musamu wakusilika bulwazi, uukasya muntu kucembaala alimwi uukonzya kubagwasya kupona alimwi aabo bafwide. Magazini iitegwa American Journal of Geriatric Psychiatry ciyanza eeci icaamba kuti mmuzeezo “wamazuba ano wakuyobola mitumba yabantu kwiinda mukwiinanika musamu mbuli cilengwa cakali kucitwa mu Egepita yansiku.”

Ikuyandaula nzila yakupona buumi butakonzyi kunyonyooka kwabantu cakutaleka kutondezya mbolutayandiki lufwu. Sena ncobeni cilakonzyeka kubantu kujana buumi butamani? Ino Bbaibbele lyaamba nzi kumakani aaya? Cibalo citobela cilayiingula mibuzyo eeyi.