Mulakonzya Kupona Kukabe Kutamani

IBUNJI bwabasyomi muzikombelo zyamunyika balangila buumi butamani munzila imwi. Izijatikizyidwe mubulangizi oobu inga ziliindene kweelana acikombelo, pele boonse bajisi bulangizi bukozyenye—ikupona calukkomano mubukkale bubotu mutako lufwu. Sena eco tacili ncomulombozya andinywe? Ino lusyomo oolu ludumide kapati inga lwapandululwa buti? Alimwi sena bulangizi bwabuumi butamani kuli nobuya kuzuzikizyigwa?

Magwalo atondezya kuti kuzwa kumatalikilo naakalenga banabubili bakusaanguna, Mulengi wakabikka mumyoyo yabantu imuzeezo wakulombozya buumi butamani. Ibbaibbele lyaamba kuti: “[Leza] wabika bulangizi bwabuumi buteeli mumyoyo yabo.”—Mukambausi 3:11.

Pele kutegwa bazuzikizye luyandisisyo oolo lwakupona kukabe kutamani, banabubili bakusaanguna bakeelede kutobela bweendelezi bwa Leza mukusala cibotu acibi. Ikuti nobakacita oobo, Jehova naakababona kuba bantu beelede kupona “kukabe kutamani” mumunzi ngwakababambila, imuunda wa Edeni.—Matalikilo 2:8; 3:22.

Buumi Butamani Bwasweeka

Makani aamu Bbaibbele atondezya kuti Leza wakasyanga “musamu wakuziba bubotu abubi” mumuunda alimwi ba Adamu a Eva wakabakasya kulya micelo yacisamu eeco, buyo-buyo bakali kuyoofwa. (Matalikilo 2:9, 17) Kwiinda mukutalya micelo eeyo, ba Adamu a Eva bakali kukonzya kutondezya kuti bakali kubuyanda bulelo bwa Leza. Kulubazu lumwi, ikulya micelo kwakali kuyootondezya kutabuyanda bulelo bwakwe. Ba Adamu a Eva tiibakatobela malailile a Jehova alimwi bakaba kulubazu lwa Saatani, icilenge camuuya icakazangila bulelo bwa Leza. Aboobo, cakweelela Leza wakabona kuti ba Adamu a Eva kunyina nobakali kweelela kupona kukabe kutamani.—Matalikilo 3:1-6.

Leza wakapa kuti basale buumi naa lufwu, kubako naa kutabako. Icakali kuyootobela akaambo kakutaswiilila ndufwu alimwi akutabako. Tiicakali kukonzyeka kuli Adamu a Eva naa kubana babo kuzumanana kupona akaambo kamusamu umwi naa kwiinda mucibeela cimwi camuntu cizumanana kupona afwa muntu. *

Bana ba Adamu boonse bakapenga akaambo kubuzangi bwakwe. Izyakatobela zilapandululwa amwaapostolo Paulo. Wakalemba kuti: “Cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.”—Ba-Roma 5:12.

Buumi Butamani Bwapilusyigwa

Imwaapostolo Paulo wakapandulula bukkale bwabana ba Adamu kwiinda mukubukozyanisya amuzike wamumwaanda wamyaka wakusaanguna. Akaambo kacibi ncobakakona, bana ba Adamu a Eva bakazyalwa kabali “bazike bazibi,” ibalangilwa kufwa. (Ba-Roma 5:12; 6:16, 17) Bakanyina nzila yakuzwa mubuzike oobu kuleka buyo eelyo Jehova naakabbadela mulungo kutegwa baangululwe. Paulo wakapandulula kuti: “Mbuli kulusotoko lwamuntu omwe [lwa Adamu] kwakazida bantu boonse mulandu, mbubonya obo kubululami bwamuntu omwe kulazida bantu boonse lululamiko lwabuumi.” Oobo “bululami” bwakapa kuti Jesu atuule buumi bwakwe bwabuntunsi bulondokede kacili ‘cinunuzyo ceelene cabantu boonse.’ Jehova wakacizumina cinunuzyo mukufwutula bantu ku “lubeteko” lwa “mulandu.”—Ba-Roma 5:16, 18, 19; 1 Timoteo 2:5, 6, NW.

 Nkakaambo kaako basayaansi ncobatakonzyi kujana nzila ine ipa buumi butamani kwiinda mukulanga-langa mboubambidwe mubili wamuntu. Nzila eeyo ijanwa kumbi. Kweelana ancolyaamba Bbaibbele, icipa kuti bantu kabafwa cijatikizya twaambo twabukkale abululami, kutali bupange bwamubili. Ayalo nzila yakupilusya buumi butamani—icituuzyo cacinunuzyo ca Jesu—iyeeme abululami. Alimwi cinunuzyo ncitondezyo cabululami alimwi aluzyalo lwa Leza. Aboobo, ino mbaani bayoogwasyigwa acinunuzyo akutambula buumi butamani?

Cipego Cakutafwa

Jehova Leza waliko “kuzwa lili alili.” Tafwi. (Intembauzyo 90:2, BT) Imuntu wakusaanguna Jehova ngwaakapede cipego cakutafwa ngu Jesu Kristo. Imwaapostolo Paulo upandulula kuti: “Kristo mbuli mbwabukide kuzwa kubafu tacifwi limbi pe. Lufu talucili abwami bwanguwe pe.” (Ba-Roma 6:9) Masimpe, keelanya Jesu iwakabusyigwa abaleli baanyika, Paulo wakapandulula kuti Jesu alikke nguutafwi. Jesu unooli muumi “lyoonse.” Buumi bwakwe taaku “nobumana.”—Ba-Hebrayo 7:15-17, 23-25; 1 Timoteo 6:15, 16.

Jesu tali nguwe alikke upedwe cipego eeci. Banakristo bananike ibasalidwe kuyoolela kabali bami kujulu balabusyigwa mbubonya mbwaakabusyigwa Jesu. (Ba-Roma 6:5) Imwaapostolo Johane utondezya kuti cipego eeci cipegwa kubantu bali 144,000. (Ciyubunuzyo 14:1) Abalo tabafwi pe. Kujatikizya bubuke bwabo, Paulo waamba kuti: “Bantunsi tabakonzyi kuvuba Bwami bwa-Leza. . . Mweembo uyoolila, elyo bafu bayoobuka mbuli batafwiki, aswebo nituyoosanduka. Nkaambo eci ciboleka cileelede kusamikwa butaboli, acalo eci cifwika cileelede kusamikwa butafwiki.” Lufwu taluko nguzu kubantu aaba babusyigwa munzila eeyi.—1 Ba-Korinto 15:50-53; Ciyubunuzyo 20:6.

Masimpe, ciyubunuzyo eeci ca Leza cilagambya. Nokuba kuti nzilenge zyamuuya, bangelo tiibakalengwa amibili iitafwi. Eci cilitondezyedwe mukuti zilenge zyamuuya izyakatobela buzangi bwa Saatani ziyoonyonyoonwa. (Matayo 25:41) Kulubazu lumwi, basikulelanyina Jesu balapegwa cipego cakutafwa, icitondezya lusyomo luyumu ndwajisi Jehova lwakuti balasyomeka.

Sena eci caamba kuti iba 144,000 balikke, imweelwe musyoonto weelanyisyigwa amabbiliyoni aabantu ibakaponede mbebayoopona kukabe kutamani? Peepe. Atubone kaambo keni.

Buumi Butamani mu Paradaiso Anyika

Ibbuku lyamu Bbaibbele lya Ciyubunuzyo lipandulula bukkale bubotu kapati bwankamu yabantu batabaliki ibapedwe buumi butamani muparadaiso anyika. Bali antoomwe abaabo bakafwide pele ibabusyigwa kabali bazumi alimwi bajisi nguzu zyabukubusi. (Ciyubunuzyo 7:9; 20:12, 13; 21:3, 4) Balasololelwa ku “mulonga wamaanzi aabuumi aabalangala mbuli krustalo, uleenda kuzwa kucuuno ca-Leza.” Kumabazu aamulonga ooyu kuli “isamu lyabuumi. . . . Nkabela matu aasamu elyo ngaakuponya bantu.” Ibwiite bwa Jehova Leza mbwakuti: “Ooyo uufwide nyota aboole. Amuntu woonse uuyanda anywe cabuyo maanzi aabuumi.”—Ciyubunuzyo 22:1, 2, 17.

Isamu alimwi amaanzi aaya teensyi musamu wamasalamuzi uupa koongola naa kasensa kapa kuba mukubusi eezyo nzyobakali kuyandaula basayaansi kaindi alimwi abasikuvwuntauzya. Pele, ziiminina bubambe bwa Leza kwiinda muli Jesu Kristo bwakupilusya bantu muciimo cakulondoka icakali kumatalikilo.

Imakanze aa Leza aakupa buumi butamani kubantu ibamumvwida anyika taacincide pe. Imakanze aayo ayoozuzikizyigwa, nkaambo Jehova ulasyomeka. Intembauzyo 37:29 yaamba kuti: “Balulami bayookona nyika, bayookala alinjiyo lyoonse.” Icisyomezyo eeci citupa kuti swebo antoomwe abaabo ibayoopegwa buumi bwakujulu bwakutafwa twaambilizye kuti: “Milimo yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako? Nkaambo nduwe olike uusalala.”—Ciyubunuzyo 15:3, 4.

Sena mulayanda cipego citaliboteli cabuumi butamani? Ikuti kamuyanda, amutondezye kuti mulasyomeka alimwi mulamumvwida “Mwami waciindi coonse.” Muyandika kwiiya kujatikizya Jehova alimwi ayooyo upa kuti cikonzyeke kujana buumi oobo, Jesu Kristo. Aabo boonse ibalisungude kutobela zyeelelo zya Leza kujatikizya cibotu acibi bayoopegwa cipego ca “buumi ubutamani.”—Johane 17:3.

Bupanduluzi buyungizidwe