Tupati-Pati Kuzwa Mubbuku Lyasanu lya Intembauzyo
Ijwi lya Jehova Lili Abuumi Twaambo
Tupati-Pati Kuzwa Mubbuku Lyasanu lya Intembauzyo
BAVWUBI balakonzya kwaamba kuti: “Bana besu balombe babe mbuli misamu iikula kubucece, abana besu basimbi mbuli mabwe mabeze aamuzyooko zyaŋanda yabwami. Matala esu azule . . . Imbelele zyesu zizyale zyuulu.” Alimwi balakonzya koongolola kuti: “Bali acoolwe bantu bali obo!” Pele mukwiimpana, sintembauzyo waamba kuti: “Bali acoolwe bantu bajisi Jehova kuba Leza wabo!” (Intembauzyo 144:12-15) Ino eco cilakonzyeka buti? Jehova ngu Leza uukkomene alimwi lukkomano ncecaabilo cabakombi bakwe. (1 Timoteo 1:11) Kaambo aaka kalitondezyedwe mucibeela camamanino canyimbo zyakasololelwa a Leza, kutalikila ku Intembauzyo 107 kusikila ku 150.
Kunze lyaboobo, Ibbuku Lyasanu lya Intembauzyo likankaizya ibube bwa Jehova butaliboteli, kubikkilizya aluzyalo lwakwe, kusyomeka alimwi abubotu. Mbotuyaabumvwisya bube bwa Leza, tuyoomuyanda alimwi akumuyoowa kapati. Acalo eci citupa kukkomana. Elo kaka tauliboteli mulumbe ujanika Mubbuku Lyasanu lya Intembauzyo!—Ba-Hebrayo 4:12.
KUKKOMANA AKAAMBO KALUZYALO LWA JEHOVA
“Balumbe Jehova nkaambo kaluzyalo lwakwe, amilimo yakwe iigambya njacitila bana ba-Adamu,” mbobaimba bama Juda ibazwa mubuzike ku Babuloni. (Intembauzyo 107:8, 15, 21, 31) Katembaula Leza, Davida wiimba kuti: “Busyomeki bwako bulasika akumayoba.” (Intembauzyo 108:4) Muntembauzyo itobela, wapaila kuti: “Undigwasye, O Jehova Leza wangu; undifutule muluzyalo lwako.” (Intembauzyo 109:18, 19, 26) Intembauzyo 110 mbusinsimi bwaamba zyabulelo bwa Mesiya. “Kulemeka [kuyoowa, BT] Jehova matalikilo aabusongo,” mboyaamba Intembauzyo 111:10. Kweelana antembauzyo iitobela, yaamba kuti: “Uli acoolwe muntu uulemeka Jehova.”—Intembauzyo 112:1.
Intembauzyo 113 kusikila ku 118 zyaambwa kuti nintembauzyo zya Hallel akaambo kakuti cakwiinduluka-induluka mubelesyedwe majwi aakuti “Haleluya,” naa “Amutembaule Jehova!” Kweelana a Mishnah—Ibbuku lyamumwaanda wamyaka watatu mulembedwe zilengwa zyabasikale—inyimbo eezi zyakali kwiimbwa lya Pobwe Lyakwiindilila alimwi amapobwe ambi otatwe aaba Juda acitwa amwaka. Intembauzyo 119 yalo iili nentembauzyo alimwi acandaano ciinda kulampa mu Bbaibbele isumpula ijwi naa mulumbe wa Jehova.
Mibuzyo Yamu Magwalo Iingulwa:
109:23—Ino Davida wakali kupandulula nzi naakaamba kuti: “Nja bumana mbuli cenzule cagoko”? Mukweema ooku Davida wakali kutondezya kuti wakalibwene kuti wakali afwaafwi kufwa.—Intembauzyo 102:11.
110:1, 2—Ncinzi “mwami [wa Davida],” Jesu Kristo, ncaakali kucita naakalikkede kujanza lyalulyo lya Leza? Naakabusyigwa, Jesu wakaunka kujulu akulindila kujanza lyalulyo lya Leza kusikila mu 1914 naakatalika kulela kali Mwami. Kuciindi eco, Jesu wakali kweendelezya batobeli bakwe bananike, kubasololela mumulimo wabo wakukambauka akugwasya bantu kuba basikwiiya alimwi akupa kuti balibambile kuyoolela anguwe mu Bwami.—Matayo 24:14; 28:18-20; Luka 22:28-30.
110:4—Ncinzi Jehova ‘ncaakonkezya cakutaleka’? Eci ncikonke cacizuminano Jehova a Jesu Kristo ncobakapangana kuti Jesu abeleke kali Mwami a Mupaizi Mupati.—Luka 22:29.
113:3—Munzila nzi izina lya Jehova molyeelede kutembaulwa “kuzwa kubuzwezuba akusikila kumabbililo”? Eci cijatikizya zinji, kutali buyo nkamu yabantu bakomba Leza buzuba abuzuba. Kuzwa nolipola zuba kujwe kusikila kumabbililo kumbo, mumuni wazuba ulamunikila nyika yoonse. Mbubwenya buyo, Jehova uleelede kutembaulwa nyika yoonse mboizulwa. Eci tacikonzyi kucitwa ikuti kakutako lukkamantano. Mbotuli Bakamboni ba Jehova, tulijisi coolwe cilibedelede cakutembaula Leza alimwi akutola lubazu cabusungu mumulimo wakwaambilizya Bwami.
116:15—Mbuti ‘kufwa kwabasalali ba Jehova mbokuli cintu cipati mumeso aakwe’? Bakombi ba Jehova balayandika kapati kulinguwe cakunga ubona kuti lufwu lwabo kabali nkamu ncintu cipati ncatakonzyi kuzumizya. Ikuti Jehova wacizumizya eco kucitika, cilakonzya kutondezya kuti basinkondonyina balamwiinda nguzu. Kunze lyaboobo, kunyina ukonzya kujanika anyika kali ntalisyo yanyika mpya.
119:71—Ino cigwasya buti kuba mumapenzi? Mapenzi alakonzya kutuyiisya kusyoma kapati muli Jehova, kupaila camoyo woonse kulinguwe alimwi akusungwaala mukwiiya Bbaibbele akucita ncolyaamba. Alimwi mbotucita notuli mumapenzi kulakonzya kuyubununa tumpenda tuyandika kumanizyigwa. Ikupenga takukatupi kucimwa ikuti twakulekela kuti kutubambulule.
119:96—Ino majwi aakuti “zintu zyoonse zilondokede zilamana” aamba nzi? Sintembauzyo waamba mbobakubona bantu ikulondoka. Kuboneka kuti wakali kuyeeya kuti luzibo lwabantu lwakulondoka kuli mpolugolela. Mukwiimpana, mulawo wa Leza unyina magolelo ali boobo. Busolozi bwanguwo bulabeleka mumbazu zyoonse zyabuumi. “Ndabona kuti zintu zyoonse zibotu zilaamagolelo,” mboyaamba The Bible in Tonga yamu 1996, “milawo yako inyina magolelo pe.”
119:164—Ino kutembaula Leza “ziindi zili musanu azibili abuzuba” kwiiminina nzi? Kanji-kanji mweelwe wazintu zili ciloba wiiminina kumaniina. Aboobo, sintembauzyo waamba kuti Jehova uleelede kutembaulwa cakumaniina.
Ziiyo Kulindiswe:
107:27-31. Busongo bwamunyika ‘buyoofwa’ yaakusika Armagedoni. (Ciyubunuzyo 16:14, 16) Taaku ngobukonzya kufwutula kulunyonyooko. Balikke aabo ibasyoma mulufwutuko lwa Jehova mbabayoopona ‘akumulumba akaambo kaluzyalo lwakwe.’
109:30, 31; 110:5. Kanji-kanji ijanza lyalulyo lya sikalumamba ilijata ipanga talikwabililwi antobo, yalo yakali kujatilwa kulumwensyi. Mumaambilambali, Jehova uli “kujanza lyalulyo” lyababelesi bakwe kutegwa abalwanine. Aboobo ubapa lukwabililo alimwi alugwasyo—ikaambo kabotu katupa ‘kumulumba.’
113:4-9. Jehova ulisumpukide kapati cakunga uyandika kulibombya kutegwa “abone zintu zyakujulu.” Pele ulamufwida luzyalo mutengwana, mucete alimwi amukaintu uutazyali. Mwami Mupati Jehova ulalicesya alimwi uyanda kuti bakombi bakwe kababeendelezya munzila njoonya eeyi bantu aaba.—Jakobo 4:6.
114:3-7. Ikwiiya milimo iigambya ya Jehova njaakacitila bantu bakwe ku Lwizi Lusalala, ku Mulonga wa Jordano alimwi aku Mulundu wa Sinai kweelede kutunjila kapati mumoyo. Ibantu ibaimininwa a “nyika,” beelede ‘kukankama’ naa kumupa bulemu Mwami.
119:97-101. Ikujana busongo, luzibo alimwi akumvwisya kuzwa mu Jwi lya Leza kulatukwabilila kuntenda zyakumuuya.
119:105. Ijwi lya Leza ndilampi kuzituta zyesu mukuti lilakonzya kutugwasya kweendelezya mapenzi aliko lino. Alimwi munzila yacikozyanyo lilamunikila inzila yesu, mbwaanga lilaamba zyamakanze aa Leza kujatikizya bukkale bwakumbele.
KUKKOMANA NOMUBA MUMAPENZI
Mbuti mbotunga tweendelezya masukusyo alimwi akuliyumya mumapenzi? Intembauzyo 120 kusikila ku 134 zilapa bwiinguzi bulimvwisya kumubuzyo ooyu. Tulaliyumya mumapenzi alimwi akuzumanana katukkomene kwiinda mukusyoma lugwasyo lwa Jehova. Intembauzyo ezi, iziitwa kuti Nyimbo Zyakutansya, kuboneka kuti zyakali kwiimbwa abana Israyeli nobakali kuunka ku Jerusalemu kukucita mapobwe aabo aamwaka.
Intembauzyo 135 a 136 zitondezya Jehova kuti Ngusikucita kufwumbwa ncayanda, mukwiimpana kapati amituni iitagwasyi. Intembauzyo 136 yakalembwa kutegwa kayiimbwa cakuvwiilizya, kabeela kabili kakapango akamwi kakaimbwa kamana kwiimbwa kabeela kakusanguna. Intembauzyo iitobela iluula ibuumba mbobakajisi bama Juda mu Babuloni ibakali kuyanda kukomba Jehova mu Zioni. Intembauzyo 138 kusikila ku 145 zyakaimbwa a Davida. Uyanda ‘kulumba Jehova amoyo wakwe woonse.’ Nkaambo nzi? “Nkaambo kakugambya kwakulengwa kwangu,” mbwaamba oobo. (Intembauzyo 138:1; 139:14) Muntembauzyo zili musanu zitobela, Davida wapailila kukwabililwa kubantu basizibi, kusinswa, kuvwunwa kuli basikupenzya alimwi akusololelwa mukulilemeka. Waamba kujatikizya ilukkomano lwabantu ba Jehova. (Intembauzyo 144:15) Naayinduluka ibupati alimwi abubotu bwa Leza, Davida waamba kuti: “Mulomo wangu ulaamba intembauzyo zya-Jehova; bantu boonse balumbe izina lyakwe lisalala lyoonse alyoonse.”—Intembauzyo 145:21.
Mibuzyo Yamu Magwalo Iingulwa:
122:3—Ino Jerusalemu wakali buti munzi “uujatene koonse koonse”? Mbuli mbocakabede kuminzi minji yansiku, maanda aamu Jerusalemu akalibambene kapati. Imunzi ooyu wakalijatene aboobo tiiwakali kukatazya kukwabilila. Alimwi ikubambana kwamaanda kwakali kupa kuti balaamunzi kabakonzya kugwasyigwa akukwabililwa abeenzinyina. Eci citondezya lukkamantano lwakumuuya lwa misyobo iili 12 yabana Israyeli nobakali kuswaangana mubukombi.
123:2—Ino cikozyanyo cameso aababelesi caamba nzi? Babelesi alimwi ababelesi basimbi balalangilila janza lyasimalelo naa namalelo akaambo katwaambo tobile: kutegwa bazibe ncobayanda, bakwabililwe alimwi akupegwa ziyandika mubuumi. Mbubwenya buyo, tulalangila Jehova kutegwa tuzibe ncayanda alimwi akugwasyigwa anguwe.
131:1-3—Mbuti Davida ‘mbwaakaumuzya akutontozya moyo wakwe mbuli mwana iwakalesegwa kulibanyina’? Mbuli mwana mulesi mbwajana luumbulizyo akukatalukwa nali mumaanza aabanyina, Davida wakaumuzya alimwi akutontozya moyo wakwe “mbuli mwana iwakalesegwa kulibanyina.” Munzila nzi? Kwiinda mukutaba amoyo uulisumpula, meso aalisongwaazya alimwi akutayandaula makani mapati. Muciindi cakuliyandauda mpuwo, ziindi zinji Davida wakalizi kulezya kwakwe alimwi wakali kulicesya. Tulakonzya kucita camaano ikuti twatobela cikozyanyo cakwe, ikapati notuyanda kuti tupegwe mikuli mumbungano.
Ziiyo Kulindiswe:
120:1, 2, 6, 7. Kubeja alimwi akufwubaazya kulakonzya kubatyompya bamwi. Kulijata muŋambaudo nenzila imwi yakutondezya kuti ‘tulayandisya luumuno.’
120:3, 4. Kutegwa tuliyumye akaambo kamuntu ujisi “lulimi lwalweeno,” tulakonzya kuumbulizyigwa mukuziba kuti Jehova uyootubamba twaambo muciindi ceelede. Babeji bayoosubulwa “asilumamba.” Ncobeni bayoosikilwa lubeta lwa Jehova lwiimininwa “amakala aanyefuma mulilo, BT.”
127:1, 2. Muzintu zyoonse nzyotucita, tweelede kusyoma busolozi bwa Jehova.
133:1-3. Lukkamantano lwabantu ba Jehova lulakatalusya, ndubotu alimwi lulakondelezya. Tatweelede kulunyonganya kwiinda mukujanina bamwi milandu, kuzwangana naa kutongooka.
137:1, 5, 6. Bakombi ba Jehova ibakali mubuzike bakali kuyandisya Zioni, yakali kwiiminina mbunga ya Leza. Ino mbuti swebo? Sena tulasyomeka kumbunga njali mukubelesya Jehova mazubaano?
138:2. Jehova ‘ulakomezya ijwi lyakwe kwiinda zintu zyoonse naa [zina lyakwe, NW]’ mukuti ikuzuzikizyigwa kwazintu zyoonse nzyaasyomezya muzina lyakwe kuyooinda alizeezyo nzyotulangila. Masimpe, kuli zintu zibotu kapati nzyotukonzya kulangila kumbele.
139:1-6, 15, 16. Jehova uliizi milimo yesu, miyeeyo alimwi azili mumoyo noliba leelyo notutanazyaamba. Ulituzi kuzwa ciindi nsalalila noyakali kubambwa, kacitanabambwa cizo camubili acimwi. Iluzibo ndwajisi Leza kujatikizya umwi aumwi wandiswe ‘lulagambya’ kulumvwisya. Elo kaka cilakkazika moyo kuziba kuti Jehova taboni buyo masukusyo aatusikila pele alimwi ulamvwisya mbwaatujatikizya!
139:7-12. Kufwumbwa kubusena nkotukonzya kuunka, nokulampa buti, Leza ulakonzya kutuyumya-yumya.
139:17, 18. Sena tulaluyandisya luzibo lwa Jehova? (Tusimpi 2:10) Ikuti kakuli boobo, nkokuti twajana kasensa kalukkomano lutamani. Miyeeyo ya Jehova “minji kwiinda museye.” Lyoonse kunooli zinji zyakwiiya kujatikizya nguwe.
139:23, 24. Tweelede kuzumizya Jehova kulingula myoyo yesu kujatikizya “inzila imbi”—miyeeyo mibi alimwi anzyotulombozya—akutugwasya kuti tuzigwisye.
143:4-7. Mbuti mbotunga twaliyumya mumakatazyo? Sintembauzyo utwaambila cikonzya kutugwasya: Kuyeeyesya milimo ya Jehova, kutelaika nzyaakacita alimwi akupailila lugwasyo lwakwe.
“Amutembaule Jehova!”
Zibeela zyone zyakusaanguna zyantembauzyo zimana amajwi akutembaula Jehova. (Intembauzyo 41:13; 72:19, 20; 89:52; 106:48) Acalo cibeela camamanino mbocimana oobo. Intembauzyo 150:6 yaamba kuti: “Kufumbwa zilenge ziyooya zitembaule Jehova! Amutembaule Jehova!” Masimpe eco ciyoocitika ncobeni munyika mpya ya Leza.
Mbotulangila ciindi eco citaliboteli, tulijisi twaambo tubotu ncotweelede kumulemeka Leza wakasimpe alimwi akutembaula zina lyakwe. Notuyeeya ilukkomano ndotujisi akaambo kakuziba Jehova alimwi akuba acilongwe cibotu anguwe, sena tacitukulwaizyi kumutembaula camoyo woonse?
[Cifwanikiso icili apeeji 31]
Milimo ya Jehova ilagambya kapati
[Cifwanikiso icili apeeji 32]
Miyeeyo ya Jehova “minji kwiinda museye”