Sikulwanya Kristo Wazyibwa

MBUTI mbomukonzya kulikwabilila ikuti kamuzyi kuti kuli bulwazi bujaya mubusena momukkala? Mulakonzya kukwabilila nguzu zyamubili wanu zilwana tuzunda kwiinda mukutakkala afwaafwi abantu bajisi bulwazi oobu buyambukila. Tweelede kucita mbubwenya oobo caboola kumakani aakumuuya. Imagwalo atwaambila kuti sikulwanya Kristo “uli kale munyika.” (1 Johane 4:3) Ikuti katutayandi “kuyambukilwa,” tweelede kuzyiba cipa “kuyambukilwa” akuceeleba. Tulalumba kuti Ibbaibbele lilatumunikila mukaambo aaka.

“Sikulwanya-Kristo” caamba “sikukazya Kristo.” Aboobo, ibbala eeli lyaamba boonse bakazya naa cakubeja balyaamba kuti mba Kristo naa baiminizi bakwe. Jesu mwini wakati: “Oyu ngotutali awe ulandilwanya, ayooyo ngotutabungi awe ulamwaya.”—Luka 11:23.

Masimpe, Johane wakalemba kujatikizya sikulwanya Kristo kakwiindide myaka iili 60 Jesu kafwide kale akubusyigwa akuya kujulu. Aboobo, milimo yasikulwanya Kristo ilakonzya kumvwugwa munzila mbobajatikizyigwa batobeli ba Jesu basyomeka anyika.—Matayo 25:40, 45.

Basikulwanya Kristo Balibasulide Batobeli ba Kristo

Jesu wakacenjezya basikumutobela bakwe kuti inyika iyoobasula. Wakati: “Bazoomwaabila mapenzi akumujaya. Nkabela muzoosulwa kumisyobo yoonse nkaambo kazina lyangu. Alimwi kuzooba basinsimi babeji banji, bazooena banji.”—Matayo 24:9, 11.

Akaambo kakuti basikwiiya ba Jesu balapenzyegwa “nkaambo kazina [lya Jesu],” cakutadooneka basikubapenzya balategwa mbaasikulwanya Kristo. “Basinsimi babeji,” bamwi babo ibakali Banakristo abalo mbaasikulwanya  Kristo. (2 Johane 7) Johane wakalemba kuti: Aabo “basikulwanya-Kristo banjibanji” “bakazwa kulindiswe, pele teebakali besu. Nibakali besu, nibakakalilila aswe, pele bakazwa kulindiswe kuti kuyubununwe kuti boonse teebakali besu.”—1 Johane 2:18, 19.

Majwi aa Jesu a Johane cakusalazya atondezya kuti sikulwanya Kristo tali muntu omwe, pele mbantu banji baindene-indene basikumulwana. Kuyungizya waawo, akaambo kakuti mbasinsimi bakubeja, makanze amwi ngobajisi ndweeno lwabukombi. Ino ninzila nzi zimwi nzyobabelesya?

Kumwaya Bubeji Bwabukombi

Mwaapostolo Paulo wakacenjezya mubelesinyina Timoteo kucenjela akuyiisya kwabuzangi mbuli kwa Humenayo a Fileto “majwi aabo alavwemauka mbuli cuute.” Paulo wakayungizya kuti: “Aba mbantu baleede kubwini, nkaambo balaamba kuti bubuke bwabafu bwakaba kale, aboobo balanyonyonganya lusyomo lwabamwi.” (2 Timoteo 2:16-18) Cilibonya kuti Humenayo a Fileto bakali kuyiisya kuti bubuke tiibwakali bwini-bwini alimwi akuti Banakristo bakabuka kale kumuuya. Cikkomanisya ncakuti, mumeso aa Leza, muntu ulaba abuumi ciindi naba sikwiiya mwini-mwini wa Jesu, calo Paulo ncaakaamba cakusalazya. (Ba-Efeso 2:1-5) Nokuba boobo, kuyiisya kwa Humenayo a Fileto kwakatondezya kuti tiibakali kubikkila maano kucisyomezyo ca Jesu cakubuka kubafwu mubulelo bwa Bwami bwa Leza.—Johane 5:28, 29.

Imizeezo yabubuke bwacikozyanyo yakazyi kutalisyigwa akabunga kaitwa kuti ba Gnostic. Kabasyoma kuti luzibo (gnoʹsis muci Giliki) lulakonzya kujanwa munzila yakulengelela, ba Gnostic bakabikkilizya a Bunakristo bwabuzangi abusyaabusongo bwabana Giliki alimwi anzila mbi yakulangaula Leza yabantu bakkala kumasi aa Kujwe. Mucikozyanyo, bakali kusyoma kuti cintu cili coonse cilibonya ncibi alimwi akaambo kakaambo aako, Jesu  tanaakaboola munyama pele wakali kulibonya kuba amubili wanyama. Mbuli mbotwabona kale, eeci ncencico mwaapostolo Johane ncaakacenjezya.—1 Johane 4:2, 3; 2 Johane 7.

Bubeji abumwi bwakatalika myaanda yamyaka, ninjiisyo iitwa kuti Butatu busalala ibwaamba kuti Jesu ngu Leza Singuzu Zyoonse alimwi kulubazu lumwi Mwana wa Leza. Dr. Alava Lamson mubbuku lyakwe lyakuti, The Church of the First Three Centuries (Icikombelo Mumyaanda Yotatwe Yakusaanguna), lyaamba kuti njiisyo ya Butatu “yakatalika kuzwa kucintu citazyibidwe abana Juda a Magwalo aa Bunakristo; pele yakakomena alimwi yakabikkilizyigwa ku Bunakristo kwiinda mumuzeezo wa Bapati ba Cikombelo.” Ino bakali baani aaba “Bapati ba Cikombelo”? Bakali bapaizi bazangi bakayandisya njiisyo yasyaabusongo muna Giliki Plato.

Ikutalika kwa Butatu cakali cintu citayeyeelwi cakagwasya sikulwanya Kristo, nkaambo njiisyo eeyi yakapa kuti Leza abonwe kuti tazibidwe alimwi akupa kuti kutabi cilongwe akati kakwe a Mwana wakwe. (John 14:28; 15:10; Ba-Kolose 1:15) Magwalo akulwaizya kuti, ‘amuswenene kuli Leza,’ ino mbuti mbotukonzya kuswena kuli Leza ikuti katazibidwe?—Jakobo 4:8.

Kuyungizya kunyongana ooku, basikusandulula Bbaibbele banji baligusya izina lya Leza lyakuti Jehova mubusanduluzi bwabo nokuba kuti lilajanika ziindi zili 7,000 mubusanduluzi bwakusaanguna. Aboobo, ikusola kucinca Singuzuzyoonse kuba cintu citazibidwe alimwi citajisi zina nkubula bulemu ku Mulengi wesu a Jwi lyakwe lyakasololelwa amuuya. (Ciyubunuzyo 22:18,19) Kuyungizya waawo, ikugusya zina lya Leza akubikka mazina aabulemu aakuti, Mwami a Leza nkulubizya kumupailo wa Jesu wakuti: “Alilemekwe izina lyako.”—Matayo 6:9.

Basikulwanya Kristo Balabukaka Bwami bwa Leza

Basikulwanya Kristo baba anguzu ikapati “kumazuba aakumamanino,” ciindi ecino ncotupona. (2 Timoteo 3:1) Makanze mapati ngobajisi aaba basilweeno bamazuba aano, ngakunyonganya bantu kujatikizya lubazu ndwajisi Jesu kali Mwami wa Bwami bwa Leza, imfwulumende yakujulu iyooyendelezya nyika yoonse ino-ino.—Daniele 7:13, 14; Ciyubunuzyo 11:15.

Mucikozyanyo, basololi bamwi bazikombelo bayiisya kuti Bwami bwa Leza mbube bwamyoyo buli mubantu, makani aatako mu Magwalo. (Daniele 2:44) Bamwi baamba kuti Kristo ulabeleka kwiinda mumfwulumende zyabantu amutubunga. Pele Jesu wakaamba kuti: “Bwami bwangu tabuli bwaansi ano.” (Johane 18:36) Masimpe, Saatani ikutali Kristo ngo “mwami wenyika” alimwi ngo “[leza] waansi ano.” (Johane 14:30; 2 Korinto 4:4) Eeci cipandulula kaambo Jesu ino-ino ncayoonyonyona mfwulumende zyoonse zyabantu akuba Mweendelezi alikke wanyika. (Intembauzyo 2:2, 6-9; Ciyubunuzyo 19:11-21) Bantu ncobapailila eeci nobapaila Mupailo wa Mwami kuti: “Abuze Bwami bwako, alucitwe luyando lwako, ansi ano.”—Matayo 6:10.

Akaambo kakuti basyoma nyika eeyi, basololi bazikombelo banji balakazya nokuba kupenzya baabo bakambauka kasimpe kajatikizya Bwami bwa Leza. Cikkomanisya ncakuti, ibbuku lyamu Bbaibbele lya Ciyubunuzyo lyaamba muvwuule wacikozyanyo—“Babuloni Mupati”—“ulikoledwe abulowa bwabasalali abulowa bwabaabo ibakajayigwa nkaambo ka-Jesu.” (Ciyubunuzyo 17:4-6) Alimwi ulacita bwaamu bwakumuuya kwiinda mukubavwuninina “bami” banyika naa beendelezi bamunyika kutegwa kabamucitila zibotu. Mukaintu ooyu wacikozyanyo kunyina umbi pele mbukombi bwakubeja bwamunyika. Ulijisi lubazu lupati caboola kumakani aakulwanya Kristo.—Ciyubunuzyo 18:2, 3; Jakobo 4:4.

Basikulwanya Kristo ‘Balabotelwa Kubamvwa’

Kunze buyo aakukaka kasimpe kamu Bbaibbele, banji baitwa kuti Mbanakristo baleka zyeelelo zyakulilemeka akutobela mbobalilemeka  banji. Ijwi lya Leza lyakasinsima makani aaya, kuti: “Nkaambo ciindi cilasika ncobati kaleke kuzumina kufundisya kwinikwini, eno bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa.” (2 Timoteo 4:3) Aaba basizikombelo babeji alimwi balapandululwa kuti “mbaapostolo babeji, mbasimilimo basilweeno, mbibalisandula mbuli baapostolo ba-Kristo.” Ibbaibbele lilazumanana kwaamba kuti: “Mamanino aabaaba azooba mbuli milimo yabo.”—2 Ba-Korinto 11:13-15.

Milimo yabo ilabikkilizya a “zisusi zyabo zibi,” tababikkili maano kuzyeelelo zisumpukide zyakulilemeka. (2 Petro 2:1-3, 12-14) Sena tatubwenyi kuti mweelwe mupati wabasololi bazikombelo abatobeli babo balatobela naa kulekelela micito iitali ya Bunakristo mbuli koonana kwabantu beelene zizo akwabantu batakwetene? Mwalombwa kuti mulange-lange kuyeeya banji nkobajisi ambobapona akweelanya Ibbaibbele ncolyaamba ku Levitiko 18:22; Ba-Roma 1:26, 27; 1 Ba-Korinto 6:9, 10; Ba-Hebrayo 13:4; a Juda 7.

“Amusoleke Myuuya”

Kweelana azyaambwa kale, tweelede kutobela majwi aamwaapostolo Johane akutaubya-ubya nzyotusyoma. Wakacenjezya kuti: “Nobayandwa, mutazuminini myuuya yoonse, pele amusoleke myuuya na njiya-Leza, nkaambo basinsimi banji babeji mobali kale munyika.”—1 Johane 4:1.

Amulange-lange cikozyanyo cibotu cabantu bamwi “ibakajisi miyeeyo mibotu” ibakali kukkala mumunzi wa Bereya mumwaanda wamyaka wakusaanguna. “Bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi mbozibede [zyakaambwa a Paulo a Sila].” (Incito 17:10, 11) Nokuba kuti bakali kuyandisya kwiiya, bana Bereya bakabona kuti zintu nzyobakamvwa akuzumina zyakali kuzwa mu Magwalo.

Mazuba aano, Banakristo bakasimpe tabaile kuunkilila akucinca-cinca kuyeeya kwabantu pe, pele balajatisya canguzu kukasimpe kamu Bbaibbele. Mwaapostolo Paulo wakalemba kuti: “Cintu ncenkomba nceeci cakuti luyando lwanu kaluciya buvula, antoomwe aluzibo alumvwisyo.”—Ba-Filipi 1:9.

Ikuti naa tamunacita oobo, aabe makanze aanu aakujana “luzibo alumvwisyo” kwiinda mukwiiya cini Bbaibbele ncoliyiisya. Aabo batobela bana Bereya tabacengwi “amajwi aalukukubiko” aabasikulwanya Kristo. (2 Petro 2:3) Muciindi caboobo, kasimpe kakumuuya kabaangulula akuziba Kristo wini-wini alimwi abatobeli bakwe bakasimpe.—Johane 8:32, 36.

Kabbokesi/[Cifwanikiso icili apeeji 4]

IBBAIBBELE NCOLYAAMBA KUJATIKIZYA SIKULWANYA KRISTO

“Nobana bangu, nceciindi cakumamanino [kuboneka kuti mmamanino aaciindi cabaapostolo]. Mulimvwide kale kuti ulasika Sikulwanya-Kristo, nkabela kuciindi ecino nkubali basikulwanya-Kristo banjibanji. Mbubonya obo mbutuzi kuti nceciindi cakumamanino.”—1 Johane 2:18.

“Ngwani mubeji cita oyu uutazumini kuti Jesu ngu-Kristo? Ngooyo Sikulwanya-Kristo, oyo uutama Taata a-Mwanaakwe.”—1 Johane 2:22.

“Muuya woonse uutazumina kuti Jesu Kristo wakaboola munyama tuuli wa-Leza, oyu ngomuuya wa-Sikulwanya-Kristo, nkaambo mwakamvwa kuti ulaboola, lino kuciindi ecino muuli kale munyika.”—1 Johane 4:3.

“Basilweeno banji mobali munyika, abo batazumini kuti Jesu Kristo ulisikide munyama. Oyu ngusilweeno, ngo-Sikulwanya-Kristo.”—2 Johane 7.

Kabbokesi/[Zifwanikiso izili apeeji 5]

SILWEENO UUJISI BUSYU BUNJI

Ibbala lyakuti “sikulwanya-Kristo libeleka kuli baabo boonse bakaka ncolyaamba Bbaibbele kujatikizya Jesu Kristo, boonse bakazya Bwami bwakwe alimwi aboonse bapenzya batobeli bakwe. Lilabikkilizya abantu, mbunga alimwi amasi aamba kuti baiminina Kristo naa ibalyaamba kuti mba Mesiya kwiinda mukusyomezya cakulisumpula kuti balakonzya kucita zintu zyalo zikonzya buyo kucitwa a Kristo alikke, nkokuti kuleta luumuno lwini-lwini alukwabililo.

[Kulumba]

Augustine: ©SuperStock/age fotostock

[Cifwanikiso icili apeeji 7]

Mbuli bana Bereya, tweelede ‘kulingaula Magwalo lyoonse’