“Bubuke . . . Butaanzi” Bulacitika Lino

“Aabo bakasyoma Jesu bayoosaanguna kubuka.”—1 BATESALONIKA 4:16, Ci.

1, 2. (a) Mbulangizi nzi buliko kuli baabo bafwide? (b) Ncinzi cimupa kusyoma mububuke? (Amubone bupanduluzi buyungizidwe.)

“BAUMI balizi kuti [bayoofwa].” Kuzwa naakabisya Adamu, aaya mmasimpe. Kuzwa kaindi, kufwumbwa muntu ulizi kuti caakusika ciindi, uyoofwa alimwi banji balikulibuzya kuti: ‘Ncinzi ciyootobela? Ino bafwide bali muciimo cili buti?’ Ibbaibbele liingula kuti: “Bafwide tabezi cintu niciba comwe.”—Mukambausi 9:5.

² Aboobo, sena kuli bulangizi buliko kuli baabo bafwide? Inzya. Bweelede kuba ikutegwa makanze aa Leza aakusaanguna kujatikizya bantu azuzikizigwe. Kwamyaanda yamyaka, babelesi ba Leza basyomeka bali kusyoma cisyomezyo ca Jehova cijatikizya Lunyungu lwalo luyoonyonyoona Saatani akugusya bubi mbwaakaleta. (Matalikilo 3:15) Ibanji bakafwa. Ikutegwa bakabone kuzuzikizigwa kwacisyomezyo eeco alimwi azimbi eezyo Jehova nzyasyomezya, bayandika kuyoobusigwa kubafwu. (Ba-Hebrayo 11:13) Sena cintu camusyobo ooyo cilakonzyeka? Inzya cilakonzyeka. Imwaapostolo Paulo wakati: “[Kuyooba]  kubuka kwabafu, akwabaluleme akwabataluleme.” (Incito 24:15) Aciindi cimwi Paulo wakabuside mulombe uutegwa Utiko walo wakawide kuzwa ampulungwido yaŋanda yatatu yamujulu alimwi “wakabwezwa ulifwide.” Ooku nkubusigwa kwamamanino akati kakubusigwa kuli fwuka kulembedwe mu Bbaibbele.—Incito 20:7-12. *

3. Nduumbulizyo luli buti nywebo lwanu ndomwajana mumajwi aa Jesu aalembedwe ku Johane 5:28, 29, alimwi nkaambo nzi?

³ Ooko kubusigwa kwakacitika kuli fwuka nkokutupa kusyoma majwi ngaakaamba Paulo. Alatuyumya kuzumanana kusyoma majwi aa Jesu aakuti: “Ciindi ciyoosika ncobati kamvwe ijwi [lya Jesu] boonse abali muzyuumbwe, bayoozwa mpoonya.” * (Johane 5:28, 29) Alakulwaizya kaka majwi aaya! Alimwi alaumbulizya kutuulunzuma twabantu basweekelwa bayandwa babo mulufwu.

4, 5. Mbubuke busiyene-siyene buli buti Ibbaibbele mbolyaamba alimwi mbubuke buli butiibandikwe mucibalo ecino?

⁴ Ibunji bwabaabo babusigwa bayoopiluka kunyika yaluumuno mu Bwami bwa Leza. (Intembauzyo 37:10, 11, 29; Isaya 11:6-9; 35:5, 6; 65:21-23) Pele, kuli kubusigwa kumbi kwakeelede kucitika ooku kakutanacitika. Kusaanguna, Jesu Kristo wakeelede kubusigwa kutegwa ape mulungo wacituuzyo cakwe kuli Leza akaambo kandiswe. Jesu wakafwa alimwi wakabusigwa mu 33 C.E.

⁵ Mpoonya, bananike ba “bana ba-Israyeli ba-Leza” beelede kusangana Mwami Jesu Kristo mubulemu bwakujulu, ooko kwalo ‘nkobayookkala a Mwami lyoonse.’ (Ba-Galatiya 6:16; 1 Ba-Tesalonika 4:17) Oobu bwaambwa kuti “bubuke . . . butaanzi.” (Ciyubunuzyo 20:6) Bwaakumana bubuke oobo, tuulunzuma twabantu lino tuyoobusigwa kubuumi anyika kabajisi bulangizi bwakupona kukabe kutamani mu Paradaiso. Aboobo, kufwumbwa naa tujisi bulangizi bwakujulu naa bwaanyika, tulayandisya kumvwa zya “bubuke . . . butaanzi.” Ino mbubuke buli buti? Ndilili nobuyoocitika?

“Baleza Amibilinzi?”

6, 7. (a) Banakristo bananike kabatanaunka kujulu, ncinzi ceelede kucitika? (b) Ino bayoobusigwa amubili uuli buti?

⁶ Mulugwalo lwakwe lwakusaanguna kuba Korinto, Paulo wakabuzya mubuzyo kujatikizya bubuke bwakusaanguna kati: “Ino bafu balabuka buti? Baleza amibilinzi?” Mpoonya wakaingula mubuzyo kuti: “Kufumbwa cintu ncobyala webo, tacikooyooba abuumi catasaanguna kufwa. . . . Leza uliipa mubili mbuli mbwayanda. . . . Bulemu bwayakujulu mbumbi, abulemu bwayaansi mbumbi.”—1 Ba-Korinto 15:35-40.

⁷ Majwi aa Paulo atondezya kuti Banakristo bananikidwe amuuya uusalala beelede kufwa kabatanatambula bulumbu bwabo bwakujulu. Bafwa, mubili wabo waansi ulapiluka kubulongo. (Matalikilo 3:19) Aciindi ncasalide Leza, balabusigwa amubili weendelana abuumi bwakujulu. (1 Johane 3:2) Leza alimwi ulabapa buumi butafwi. Eeco tacisi cintu ncobazyalwa ancico, mbuli kuti bakabikkwa muuya uutafwi. “Eci cifwika cileelede kusamikwa butafwiki,” mbwaamba Paulo. Kutafwa ncipego cizwa kuli Leza, ‘cisamwa’ abaabo ibajisi lubazu mububuke butaanzi.—1 Ba-Korinto 15:50, 53; Matalikilo 2:7; 2 Ba-Korinto 5:1, 2, 8.

8. Ino tuzi buti kuti Leza tasali ba 144,000 kuzwa muzikombelo zisiyene-siyene?

⁸ Balikke bali 144,000 mbabajisi lubazu mububuke butaanzi. Jehova wakatalika kubasala lya Pentekoste 33 C.E., nokwakainda ciindi cisyoonto kuzwa naakabusya Jesu. Boonse balijisi “izina [lya Jesu] azina lyawisi lilembedwe ankumu zyabo.” (Ciyubunuzyo 14:1, 3) Aboobo, tabasalidwe kuzwa muzikombelo zisiyene-siyene. Boonse mbaasikutobela Kristo alimwi boonse balikkomene kuba azina lya Taata—Jehova. Babusigwa, balapegwa mulimo wakucita kujulu. Ibulangizi bwakubelekela Leza cacigaminina bulabakkomanisya kapati.

 Bulacitika Lino?

9. Ino mbuti Ciyubunuzyo 12:7 alimwi a 17:14 mbocitugwasya kweezeezya ciindi bubuke butaanzi nobutalika?

⁹ Ino ndilili bubuke butaanzi nobucitika? Kuli bumboni butondezya kuti bulacitika lino. Mucikozyanyo, amweezyanisye zyaandaano zyobilo zya Ciyubunuzyo. Kusaanguna amubone Ciyubunuzyo caandaano 12. Aawa tubala kuti Jesu Kristo wakabikkwa ino acuuno, antoomwe abangelo bakwe basalala, ulwana Saatani amadaimona aakwe. (Ciyubunuzyo 12:7-9) Mbubwenya magazini eeyi mboitondezya, nkondo eeyo yakatalika mu 1914. * Pele, amubone kwaamba kuti kunyina wabasikutobela Kristo waambwa kuti uli a Jesu munkondo eeyi yakujulu. Lino amubone caandaano 17 ca Ciyubunuzyo. Ooku tubala kuti aakunyonyoonwa “BABULONI MUPATI,” Mwanaambelele uyoozunda masi oonse. Mpoonya, cilazumanana ategwa: “Abalo balazunda mbali abo, baitidwe, basale, basyomi.” (Ciyubunuzyo 17:5, 14) Aabo “baitidwe, basale, basyomi” beelede kuti bakabusigwa kale ikuti kabali a Jesu mukuzundwa kwamamanino kwanyika ya Saatani. Aboobo, bananike ibafwa kaitanacitika Armageddoni balabusigwa mumyaka iili akati ka 1914 a Armageddoni.

10, 11. (a) Ino baalu bali 24 mbaani alimwi ino umwi wabo ncinzi ncamwaambila Johane? (b) Ncinzi ncotunga twaamba kumakani aaya?

¹⁰ Sena inga twaamba ciindi cini bubuke butaanzi nobutalika? Kuli kaambo kakkomanisya kapati katondezya oobo ku Ciyubunuzyo 7:9-15, ooko imwaapostolo Johane nkwapandulula cilengaano cakwe ca “nkamu impati yabantu batabaliki kumuntu naba omwe.” Inkamu mpati eeyo yakazibisigwa kuli Johane aumwi wabaalu ibali 24 aabo ibaiminina ba 144,000 basikulelanyina a Kristo mubulemu bwabo bwakujulu. * (Luka 22:28-30; Ciyubunuzyo 4:4) Johane lwakwe wakalijisi bulangizi bwakujulu; pele mbwaanga wakacili muntu anyika ciindi mwaalu naakamwaambila, Johane mucilengaano weelede kuti wakali kwiiminina bananike bacili anyika aabo batanatambula bulumbu bwabo bwakujulu.

¹¹ Aboobo, ncinzi ncotukonzya kwaamba mbwaanga umwi wabaalu ibali 24 nguupanduluda Johane kujatikizya nkamu eeyo? Kuboneka kuti aabo babusidwe bankamu yabaalu bali 24 ambweni balijisi lubazu mukwaamba kasimpe ka Leza mazuba aano. Ino nkaambo nzi eeco ncociyandika? Nkaambo kakuti ibankamu impati bakazibwa kabotu ababelesi ba Leza bananike anyika mu 1935. Ikuti naa umwi wabaalu bali 24 wakabelesyegwa kwaamba makani aaya aayandika, weelede kuti wakabusigwa buya kuunka kujulu camuma 1935. Eeco cilakonzya kwaamba kuti bubuke butaanzi bwakatalika akati kamwaka wa 1914 a 1935. Sena cilakonzyeka kupa bwiinguzi bugaminide?

12. Amupandulule kaambo mwaka wa 1918 ncoukonzya kubonwa kuti nobwakatalika bubuke butaanzi.

¹² Aciindi eecino, inga cagwasya kulanga-langa ceeco cikonzya kubonwa kuti ncikozyanyo camu Bbaibbele. Jesu Kristo wakananikwa kuyooba Mwami wa Bwami bwa Leza kumbele mu 29 C.E. Kwiinde myaka yotatwe acisela, mu 33 C.E., wakabusigwa kali muntu wamuuya singuzu. Aboobo, sena inga kwaambwa kuti mbwaanga Jesu wakabikkwa acuuno mu 1914, ikubusigwa kwabasikumutobela bananike basyomeka kwakatalika nokwakainda myaka yotatwe acisela mu 1918? Eeco cilakonzya kuba boobo. Nokuba kuti eeci cinyina bumboni bugaminide mu Bbaibbele, cileendelana amagwalo ambi aatondezya kuti bubuke butaanzi bwakatalika nokwakainda ciindi cisyoonto kuzwa nokwakatalika kubako kwa Kristo.

13. Ino mbuti 1 Ba-Tesalonika 4:15-17 mboitondezya kuti bubuke butaanzi bwakatalika kumatalikilo aakubako kwa Kristo?

¹³ Mucikozyanyo, Paulo wakalemba kuti: “Swebo tobaumi netuyoosyaalila [kukubako, NW] kwa-Mwami [ikutali, kumamanino aakubako  kwakwe] tatukooyoobasaangunina aboona [mulufwu], pe. Nkaambo Mwami mwini uyooseluka kuzwa kujulu amukunga ajwi lyaangelo simutwe amweembo wa-Leza, nkabela nobayoosaanguna kubuka abafwide muli-Kristo. Elyo swebo tobaumi tobasyaalizi tuyoobwezelwa mumakumbi antoomwe ambabo, tukacingane a-Mwami mujulu aboobo tuyookala a-Mwami lyoonse.” (1 Ba-Tesalonika 4:15-17) Aboobo, Banakristo bananike ibakafwa kacitanasika ciindi cakubako kwa Kristo mbabakabusigwa kusaanguna kuyoopona kujulu kwiinda baabo ibakacili kupona ciindi cakubako kwa Kristo. Eeci caamba kuti bubuke butaanzi bweelede kuti bwakatalika kumatalikilo aakubako kwa Kristo alimwi bulazumanana ‘kuciindi cakubako kwakwe.’ (1 Ba-Korinto 15:23) Muciindi cakuti boonse babusigwe aciindi comwe, bubuke butaanzi bulacitika kwaciindi cili mbocibede.

“Bakapegwa Umwi Aumwi Zikobela Zituba”

14. (a) Ndilili zilengaano zilembedwe mu Ciyubunuzyo caandaano 6 nozizuzikizigwa? (b) Ncinzi ciimininwa ku Ciyubunuzyo 6:9?

¹⁴ Alimwi amulange-lange bumboni buli ku Ciyubunuzyo caandaano 6. Oomu Jesu ulabonwa katantide ibbiza yane kali Mwami sikuzunda. (Ciyubunuzyo 6:2) Imasi alwana nkondo mpati kapati. (Ciyubunuzyo 6:4) Koonse-koonse kuli nzala. (Ciyubunuzyo 6:5, 6) Malwazi ajaya abapenzya bantu. (Ciyubunuzyo 6:8) Zyoonse eezi zyakasinsimwa zileendelana azintu mbozibede munyika kutalikila mu 1914. Pele kuli acimbi cicitika. Twaambilwa kubikkila maano kucipaililo cazipaizyo. Kunsi lyaco kuli “[buumi bwabaabo] ibakajayigwa nkaambo kamakani aa-Leza akaambo kabukamboni mbubakajisi.” (Ciyubunuzyo 6:9) Mbwaanga “mubulowa mobubede buumi bwanyama,” icini caambwa kuti cili kunsi aacipaililo mbulowa bwababelesi ba Jesu basyomeka ibakajaigwa akaambo kakupa bumboni kwabo cabusicamba abusungu.—Levitiko 17:11.

15, 16. Amupandulule majwi aali ku Ciyubunuzyo 6:10, 11 ncaayendelana abubuke butaanzi.

¹⁵ Mbuli bulowa bwa Abelo uululeme,  ibulowa bwa Banakristo aabo bakafwida lusyomo ndobajisi bukwiilila bululami. (Matalikilo 4:10) “Bakoongolola ajwi ipati, bati, O Mwami uusalala akusinizya, ino kusikila kuciindinzi ncoti takabeteki bantu baansi akubakoyeka nkaambo kabulowa bwesu?” Ncinzi citobela? “Bakapegwa umwi aumwi zikobela zituba, alimwi bakaambilwa kuti baleelede kucilyokezya kaindi kaniini mane bazulile bazikenyina abanabakwabo bati jayigwe mbuli mbobakajayigwa abalo.”—Ciyubunuzyo 6:10, 11.

¹⁶ Sena zikobela zituba eezi zyakapegwa kubulowa bwakali kunsi acipaizyo? Peepe! Zikobela eezi zyakapegwa kubantu bakajisi bulowa bwakatilwa cipaililo munzila yacikozyanyo. Bakaaba buumi bwabo muzina lya Jesu alimwi lino bakabusigwa kabali myuuya. Ino tuzi buti oobu? Kumatalikilo mubbuku lya Ciyubunuzyo twabalide kuti: “Oyo uuzunda uyoosamikwa zikobela zituba, nsikooyoolizimaanya izina lyakwe mubbuku lyabuumi.” Alimwi kamuyeeya kuti ibaalu bali 24 “ba[ka]lisamide masani aatuba, alimwi amitwe yabo bakalijisi misini yangolida.” (Ciyubunuzyo 3:5; 4:4) Aboobo, nkondo, nzala amalwazi nozyakatalika kunyonyoona nyika, iba 144,000 ibakafwide, ibaimininwa abulowa buli kunsi acipaililo, bakabusigwa kubuumi bwakujulu akusamikwa zisani zituba.

17. Muunzila nzi aabo ibatambula zikobela zituba mobeelede ‘kulyookezya’?

¹⁷ Aabo ibakabusigwa caino beelede ‘kulyookezya.’ Beelede kulindila cakukkazika moyo kujatikizya buzuba bwa Leza bwakubweedezya milandu. “Bazikenyina,” Banakristo bananike bacili anyika, baciyandika kutondezya kusyomeka kwabo mumasunko. Caakusika ciindi calubeta lwa Leza, ‘kulyookezya’ kuyoomana. (Ciyubunuzyo 7:3) Aabo babusigwa, aciindi eeco bayoomusangana Mwami Jesu Kristo mukunyonyoona babi, kubikkilizya abaabo ibatila bulowa bwa Banakristo banyina mulandu.—2 Ba-Tesalonika 1:7-10.

Ncocipandulula Kulindiswe

18, 19. (a) Ntwaambo nzi tukonzya kumupa kwaamba kuti bubuke butaanzi bulacitika lino? (b) Ino kumvwisya ncobwaamba bubuke butaanzi kumupa kulimvwa buti?

¹⁸ Jwi lya Leza talyaambi buzuba kubugama nobucitika bubuke butaanzi, pele lilatondezya kuti bulacitika kwaciindi cili mbocibede, kuciindi cakubako kwa Kristo. Babusigwa kusaanguna Mbanakristo bananike ibakafwa kacitanasika ciindi cakubako kwa Kristo. Kubako kwa Kristo mbokuyaabuyaambele, Banakristo bananike ibamanizya mulimo wabo waanyika cakusyomeka balasandulwa “mbuli mululabo lomwe lwaliso” akuba zilenge zyamuuya zijisi nguzu kapati. (1 Ba-Korinto 15:52) Sena bananike boonse bayootambula bulumbu bwabo bwakujulu kaitanaba nkondo ya Armageddoni? Tatuzi pe. Pele tulizi kuti kuciindi ncabikkide Leza, boonse ba 144,000 bayoojanika kabaimvwi a Cilundu ca Ziyoni cakujulu.

¹⁹ Alimwi tulizi kuti ibunji bwaba 144,000 bali kale kujulu antoomwe a Kristo. Mbasyoonto kapati bacili anyika. Elo ncitondezyo ciyandika kapati cakuti ciindi calubeta lwa Leza cili afwaafwi kusika! Ino-ino, nyika ya Saatani yoonse iyoonyonyoonwa. Saatani lwakwe uyooangwa. Mpoonya kubusigwa kwabanji kuyootalika alimwi bantu basyomeka kwiinda mucinunuzyo cacituuzyo ca Jesu balakonzya kuyoobusigwa kubulondosi mbuli mbwaakasowa Adamu. Businsimi bwa Jehova bulembedwe ku Matalikilo 3:15 bulazuzikizigwa munzila iikondelezya. Ncoolwe cipati kapati ikupona kuciindi ecino!

Bupanduluzi buyungizidwe

Sena Inga Mwapandulula?

Ino mbuti magwalo aaya aatobela mbwaatugwasya kuziba ciindi “bubuke . . . butaanzi” nobucitika?

• Ciyubunuzyo 12:7; 17:14

• Ciyubunuzyo 7:13, 14

• 1 Ba-Korinto 15:23; 1 Ba-Tesalonika 4:15-17

• Ciyubunuzyo 6:2, 9-11

[Mibuzyo yaciiyo]

[Cifwanikiso icili apeeji 31]

Mbubuke nzi bucitika bantu boonse kabatanatalika kubusigwa kubafwu?