Ino Muyeeya Kuti Ncinzi Cipa Muntu Kuzwidilila?

BA JESSE Livermore, bamwi mbobayeeyela kuti bakali basimakwebo ibakazwidilila kapati mudolopo lya New York, bakalizizilwe akaambo kakusala camaano mumakwebo. Akaambo kaceeci, bakajana lubono lunji. Bakali kusama nsuti zibotu kapati zyakasuminwa mbabo kubagama, bakali kukkala muŋanda mpati yakajisi maanda aali 29 mukati alimwi bakali kweenzegwa buya mumootokala utegwa Rolls-Royce.

Ba David * abalo bakajisi makanze aakuzwidilila. Mbwaanga bakali basololi alimwi beendelezi bapati bakkampani yakuzekaula zifwanikiso, bakali kulangilwa kuba basololi bacibeela cimwi cakkampani. Bakali kuyanda kuba alubono alimwi ampuwo. Nokuba boobo, ba David bakasala kucileka kubeleka. Ba David bakati, “Ndilizi kuti kunyina nondiyooba amulimo umbi waatala uuli mbuli yooyu uuvwolwa mali manji.” Sena muyeeya kuti ba David bakalubizya?

Bantu banji bayeeya kuti kuzwidilila kulajanwa kwiinda mukuba alubono naa mpuwo. Pele, aabo bakupukide bajanika kuti tabazi cini ncobaponena alimwi balityompedwe. Kuboneka kuti oobo mbobakali kulimvwa ba Livermore. Nokuba kuti bakajisi lubono, ziindi zinji bakali kupenga mumoyo alimwi akuusa. Kunze lyaboobo, bakali kutyompwa, kunyina nobakali kuzwidilila mulukwatano lwabo alimwi tiibakali kumvwana abana babo. Nobakasweekelwa  lubono lunji, buzuba bumwi ba Livermore bakakkala muhotela kucibeela ncobasambalila bukoko elyo bakalila akaambo kakusweekelwa ooku. Bakaula bukoko busanganizidwe azyakunywa zimbi bamane bakabweza kabbuku akulemba kagwalo kakulaya bakaintu babo. Nobakamanizya kunywa, bakanjila mukaanda mwakali kusiya-siya mpoona bakalijaya.

Nokuba kuti kuli twaambo tunji tupa bantu kulijaya, icakacitika eeci citondezya mbokali kamasimpe kaambo aaka kamu Bbaibbele ikakuti: “Aabo bayandisisya kuvuba . . . macise manji abajaya.”—1 Timoti 6:9, 10, Ci.

Sena nkokuti aabo bayeeya kuti kuzwidilila kwamuntu ndubono, cuuno naa mpuwo njajisi, babelesya ceelelo citaluzi? Sena mulibona kuzwidilila? Nkaambo nzi? Ncinzi cimupa kuyeeya boobo? Ncinzi cimupa kuyeeyela kuzwidilila mbokweelede kuba? Cibalo citobela cilalanga-langa lulayo lusyomeka ilwapa kuti tuulunzuma twabantu bazwidilile. Atubone mbomukonzya kuzwidilila andinywe.

Bupanduluzi buyungizidwe