Jehova Ulapa “Muuya Uusalala Abakumbila Kulinguwe”

“Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?”—LUKA 11:13.

1. Ndilili notuyandika kapati lugwasyo lwa muuya uusalala?

‘NSEKONZYI kulimana penzi eeli ndelikke. Lelikke kwiinda mulugwasyo lwa muuya uusalala neyookonzya kuliyumya musukusyo eeli!’ Sena kuli nomwakaambide boobu kuzwa ansi amoyo? Oobo mbobacita Banakristo banji. Ambweni oobo mbomwakacita nomwakaziba kuti muli abulwazi bupati. Naa ambweni cakali ciindi nobakazimina mbomwakakwetene limwi kwaciindi cilamfwu. Naa cilakonzya kuba ciindi nomwakatyompwa kapati. Kuciindi camapenzi, ambweni mwakalimvwa kuti mwakali kupona akaambo buyo kakuti muuya uusalala wa Jehova wakamupa “inguzu zigambya.”—2 Ba-Korinto 4:7-9; Intembauzyo 40:1, 2.

2. (a) Makatazyo nzi ngobasikilwa Banakristo bakasimpe? (b) Mibuzyo nzi njotutiilange-lange mucibalo eeci?

² Mbotuli Banakristo bakasimpe, tuyandika kuliyumya mumakatazyo alimwi akukazigwa kuyaabuvwula ikuzwa munyika iitakombi Leza yamazuba aano. (1 Johane 5:19) Kunze lyaboobo, basikumutobela Kristo balalwanwa kapati a Saatani Diabolosi lwakwe walo uli mukulwana baabo “babamba milazyo ya-Leza akujata bumboni bwa-Jesu.” (Ciyubunuzyo 12:12, 17) Aboobo, kalalimvwisya ikaambo ncotuyandika lugwasyo lwa muuya wa Leza lino kwiinda lyoonse. Ncinzi ncotukonzya kucita kutegwa tubone kuti twazumanana kutambula muuya uusalala wa Leza cabuuya? Alimwi nkaambo nzi ncotukonzya kuba alusyomo lwakuti Jehova ulilisungude kapati kutupa nguzu nzyotuyandika notuli mumasukusyo? Tujana bwiinguzi kumibuzyo eeyi muzikozyanyo zya Jesu zyobile.

Amupaile Cakukakatila

3, 4. Ncikozyanyo nzi ncaakaluula Jesu, alimwi mbuti mbwaakacibelesya caboola kumupailo?

³ Umwi wabasikwiiya ba Jesu wakalomba  kuti: “Omwami, utwiisye kukomba.” (Luka 11:1) Mukwiingula, Jesu wakapa basikwiiya bakwe zikozyanyo zyobile zikozyenye. Icakusaanguna cijatikizya mwaalumi simeenzu, alimwi cabili cijatikizya wisi mwana uuswiilila mwana wakwe. Atulange-lange zikozyanyo eezi acimwi kucigama.

⁴ Jesu wakati: “Anooli umwi wanu uujisi mweenzinyina, eno wainka kulinguwe akati kamasiku wati, Mweenzuma, ndyaabila mikamu yotatwe, nkaambo mweenzuma umwi uwali mulweendo wasika kulindime, pele nsijisi cakumusomba, nkokuya uuli muŋanda avuwe kuti, Utandikataazyi, mulyango wajalwa kale, tuli abulo abana bangu, nsikonzya kubuka kukupa, ndamwaambila kuti, Naakaka kubuka kumupa mbwali mweenzinyina, nekubaboobo nkaambo kakukakatila kwakwe ulabuka amupe zyoonse nzyabula.” Mpoonya Jesu wakapandulula mbuli cikozyanyo eeci mbocibeleka caboola kucilengwa cakupaila, wakati: “Aboobo ndamwaambila kuti, Amukumbile muzoopegwa, amuyandaule muzoojana, amukonkomone muzoojulilwa. Nkaambo umwi umwi uukumbila ulatambula, uuyandaula ulajana, uukonkomona ulajulilwa.”—Luka 11:5-10.

5. Ino cikozyanyo camwaalumi silukakatilo cituyiisya nzi kujatikizya ciimo ncotuyandika notupaila?

⁵ Cikozyanyo eeci cikondelezya camwaalumi silukakatilo citondezya ciimo ciyandika notupaila. Amubone kuti Jesu waamba kuti imwaalumi ooyo wakapegwa ncaakali kuyanda “nkaambo kakukakatila kwakwe.” (Luka 11:8) Ibbala lya Cigiliki lisanduludwe kuti “kukakatila” lijanika buyo ciindi comwe mu Bbaibbele. Lisanduludwe kuzwa kubbala lyaamba “kutalisenda.” Kanji-kanji kutalisenda kutondezya bube butali kabotu. Pele ikuti kutalisenda naa kukakatila kwatondezyegwa akaambo kakaambo kabotu, kulakonzya kuba bube bulumbaizyigwa. Oobo mbocibede akuli simeenzu wamucikozyanyo. Kunyina naalisenda mukukakatila kulomba ceeco ncabulide. Mbwaanga Jesu waamba kuti tuyandika kutobela cikozyanyo casimeenzu ooyu, mbubonya buyo mipailo yesu yeelede kucitwa calukakatilo. Jehova uyanda kuti ‘tuzumanane kukumbila, tuzumanane kuyandaula, tuzumanane kukonkomona.’ Mpoonya walo, ‘uyoopa muuya uusalala kuli baabo bakumbila kulinguwe.’

6. Ciindi Jesu naakali anyika, ino cilengwa cakusamausya beenzu cakali kubonwa buti?

⁶ Jesu tatutondezyi buyo mbotweelede kupaila—nkokuti calukakatilo—pele alimwi ulatutondezya ancotweelede kucitila boobo. Kutegwa tukamvwisye kaambo aaka, tweelede kulanga-langa mbuli baabo ibakaswiilila cikozyanyo ca Jesu casimeenzu silukakatilo mbobakali kubona cilengwa cakusamausya beenzu. Zibalo zinji zyamu Magwalo zitondezya kuti lyansiku, ikulanganya beenzu cakali cilengwa icakali kubikkilwa maano kapati, ikapati ababelesi ba Leza. (Matalikilo 18:2-5; Ba-Hebrayo 13:2) Ikukakilwa kusamausya beenzu akali masampu. (Luka 7:36-38, 44-46) Katutuyeeyede twaambo ootu, atulange-lange caano ca Jesu alimwi.

7. Nkaambo nzi simeenzu wamucikozyanyo ca Jesu ncaatalisenda kubusya mweenzinyina?

⁷ Simeenzu wamucikozyanyo watambula mweenzu akati kamasiku. Simeenzu walimvwa kuti uli amukuli wakusanina mweenzu wakwe pele ‘tajisi cakumusomba.’ Wabona kuti weelede kucita cimwi cintu cakufwambaana! Uyandika kujana cinkwa, kunyina makani abuyumuyumu bujatikizyidwe mukucita oobo. Aboobo wainka kumweenzinyina alimwi cakutalisenda wamubusya. Simeenzu wati: “Mweenzuma, ndyaabila mikamu yotatwe.” Wazumanana kulomba kusikila limwi wapegwa ncabulide. Mbwaanga lino ujisi mikamu, ulakonzya kuba simeenzu mubotu.

Cintu Ciyandika Kapati —Cilalombwa Lyoonse

8. Ncinzi ciyootukulwaizya kupailila muuya uusalala calukakatilo?

⁸ Ino cikozyanyo eeci citondezya nzi kujatikizya kaambo katupa kupaila calukakatilo? Imwaalumi ooyo wakazumanana kulomba cinkwa nkaambo wakalizi kuti ikuba acinkwa  kwakali kuyandika kapati kutegwa azuzikizye mukuli wakwe wakuba simeenzu. (Isaya 58:5-7) Buyo-buyo, kunyina naakali kukonzya kuuzuzikizya mukuli wakwe. Mbubonya buyo, mbokunga tulizi kuti ikuba amuuya wa Leza kulayandika kapati kutegwa tucite mulimo wesu mbotuli Banakristo bakasimpe, tulazumanana kupaila kuli Leza, kulomba muuya ooyo. (Zekariya 4:6) Ikuti katutaujisi muuya ooyo, tatukonzyi kuzwidilila. (Matayo 26:41) Sena mwakabona kaambo kapati nkotukonzya kuzubula mucikozyanyo eeci? Ikuti muuya wa Leza katuubona kuba cintu ncotuyandika kapati, tuyoozumanana kuulomba calukakatilo.

9, 10. (a) Amupandulule ikaambo ncotuyandika kukakatila kulomba Leza kuti atupe muuya wakwe. (b) Mmubuzyo nzi ngotweelede kulibuzya, alimwi nkaambo nzi?

⁹ Ikweelanya ciiyo eeci kumazuba aano, amweezyeezye kuti umwi mumukwasyi wanu waciswa akati kamasiku. Sena inga mwamubusya dokotela kutegwa amugwasye? Inga tiimwacita oobo ikuti bulwazi kabutali bupati. Pele ikuti kabuli bulwazi bwamoyo, kunyina nomunga mwalisenda kwiita dokotela. Nkaambo nzi? Nkaambo mulizyi kuti bulakonzya kuleta ntenda. Mulizi kuti lugwasyo lwamuntu uli aluzibo lulayandika kapati. Ikutalomba lugwasyo inga kwaleta lufwu. Mbubwenya buyo, inga twaamba kuti Banakristo bakasimpe bali muntenda iitamani. Kayi Saatani uya bweendeenda mbuli “syuumbwa wabutambo,” uyandisya kutulya. (1 Petro 5:8) Kutegwa tuzumanane kupona kumuuya, ilugwasyo lwamuuya wa Leza lulayandika kapati. Ikutalomba lugwasyo lwa Leza kulakonzya kuleta lufwu. Aboobo, calukakatilo tulomba Leza kuti atupe muuya wakwe uusalala. (Ba-Efeso 3:14-16) Lelikke twacita boobo notukonzya kuzumanana kuba anguzu ziyandika kutegwa ‘tuliyumye kusikila kumamanino.’—Matayo 10:22; 24:13.

¹⁰ Aboobo cilayandika kapati kuti ciindi aciindi katukkala ansi kuyeeya akulibuzya kuti, ‘Sena ncobeni ndilakakatila kupaila?’ Amuyeeye kuti, ikuti katuzi ncobeni kuti tuyandika lugwasyo lwa Leza, mipailo yesu njotupailila muuya uusalala inooli yeeyo icitwa calukakatilo.

Ncinzi Citukulwaizya Kupaila Calusyomo?

11. Ino Jesu wakacibelesya buti cikozyanyo cawisi amwana wakwe kujatikizya mupailo?

¹¹ Cikozyanyo ca Jesu casimeenzu silukakatilo cikankaizya iciimo cayooyo uupaila—sikusyoma. Cikozyanyo citobela cikankaizya iciimo cayooyo uuswiilila mipailo—Jehova Leza. Jesu wakabuzya kuti: “Alimwi nguuli wisi mwana akati kanu kuti mwanaakwe wakumbila . . . inswi, sena ulamupa nzoka, iitali nswi njiyonya na? Kuti wakumbila iji, sena ulamupa kabanze?” Mpoonya Jesu wakapandulula ncaakali kwaamba, kati: “Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?”—Luka 11:11-13.

12. Ino mbuti cikozyanyo cawisi mwana uuswiilila kulomba kwa mwana wakwe mbocitondezya mbwalisungude Jehova kwiingula mipailo yesu?

¹² Kwiinda mucikozyanyo eeci cawisi uupa mwana wakwe ncakumbila, Jesu waamba mbwalimvwa Jehova kujatikizya baabo  bamusikila mumupailo. (Luka 10:22) Kusaanguna, amubone kwiindana kuliko. Mukwiimpana amwaalumi wamucikozyanyo cakusaanguna iwakali kuwaya-waya kupa lugwasyo, Jehova uli mbuli muzyali uubikkila maano, ulaaluyandisisyo lwakupa mwana wakwe eeco ncakumbila. (Intembauzyo 50:15) Kuyungizya waawo, Jesu waamba mbwalisungude Jehova kutugwasya kwiinda mukweelanya taateesu wakujulu ambwacita wisi mwana muntunsi. Waamba kuti, ikuti wisi mwana muntunsi nokuba kuti ‘mubi’ akaambo kacibi cakakonwa, ulapa cipego cibotu kumwana wakwe, sena inga tiitwalangila Taateesu wakujulu, mbwali mwaabi, kuti uyoopa muuya uusalala kumukwasyi wakwe wabakombi?—Jakobo 1:17.

13. Ncinzi ncotukonzya kusinizya notupaila kuli Jehova?

¹³ Ino ncinzi ncotwiiya kumakani aaya? Tulakonzya kuba alusyomo lwakuti eelyo notulomba muuya uusalala kuli Taateesu wakujulu, walo ulilisungude kapati kutupa ncotukumbila. (1 Johane 5:14) Notumusikila mumupailo cakwiinduluka-induluka, Jehova kunyina nayootwaambila kuti: “Utandikataazyi, mulyango wajalwa kale.” (Luka 11:7) Mukwiimpana aceeci, Jesu wakati: “Amukumbile muzoopegwa, amuyandaule muzoojana, amukonkomone muzoojulilwa.” (Luka 11:9, 10) Ncobeni, Jehova ‘uyootuvwiila mubuzuba bwakukwiila kwesu.’—Intembauzyo 20:9; 145:18.

14. (a) Nkuyeeya nzi kulubide ikubakatazya bamwi nobali mumasukusyo? (b) Notuli mumasukusyo, nkaambo nzi ncotukonzya kupaila kuli Jehova calusyomo?

¹⁴ Cikozyanyo ca Jesu cawisi mwana uubikkila maano alimwi cikankaizya kuti bubotu bwa Jehova mbupati kapati kwiinda bubotu mbwakonzya kutondezya muzyali muntunsi uuli woonse. Aboobo, tatweelede kuyeeya kuti masukusyo ngotujisi atondezya kuti Leza tatukkomanini. Ngusinkondoma mupati, Saatani, uuyanda kuti katuyeeya boobo. (Jobu 4:1, 7, 8; Johane 8:44) Mizeezo iili boobo yakulipa mulandu tiili yamu Magwalo. Jehova tatusunki ‘acibi.’ (Jakobo 1:13) Kunyina natupa sukusyo lili mbuli nzoka naa sunko lili mbuli kabanze. Taateesu wakujulu ulapa ‘zintu zibotu kulibaabo bamukumbila.’ (Matayo 7:11; Luka 11:13) Masimpe, tuyookulwaizigwa kapati kupaila calusyomo mbotuyaabumvwisya bubotu bwa Jehova alimwi akuti ulilisungude kutugwasya. Munzila eeyo, andiswe tuyookonzya kwaamba bwakaamba sintembauzyo iwakalemba kuti: “Ncobeni Leza wakaswiilila, wamvwa majwi aacikombyo cangu.”—Intembauzyo 10:17; 66:19.

Muuya Uusalala Mbouli Mugwasyi Wesu

15. (a) Ncisyomezyo nzi ncaakapa Jesu kujatikizya muuya uusalala? (b) Muunzila nzi imwi muuya uusalala moutugwasya?

¹⁵ Kali afwaafwi kufwa, Jesu wakaindulula cisyomezyo ncaakapede muzikozyanyo zyakwe. Kaamba kujatikizya muuya uusalala, wakaambila baapostolo bakwe kuti: “Ndiyookumbila Taata, uyoomupa Mugwasyi umbi kuti akale anywebo lyoonse.” (Johane 14:16)  Aboobo, Jesu wakasyomezya kuti mugwasyi naa muuya uusalala wakali kuyooba abasikumutobela kumbele, kubikkilizya akumazuba eesu. Ninzila nzi imwi iiyandika motupegwa lugwasyo oolo mazuba aano? Imuuya uusalala ulatugwasya kuliyumya mumasukusyo aasiyene-siyene. Munzila nzi? Imwaapostolo Paulo mbwali umwi wabaabo ibakasikilwa masunko wakapandulula mulugwalo ndwaakalembela Banakristo baku Korinto mbuli mbwaakagwasyigwa amuuya wa Leza. Mubufwaafwi atulange-lange ncaakalemba.

16. Ino bukkale bwesu inga bwakozyanya buti abwa Paulo?

¹⁶ Kusaanguna, cakutainda mumbali Paulo wakaambila basyominyina kuti wakali aa “bumvwa mumubili,” naa sukusyo limwi. Mpoona wakati: “Kwaziindi zyotatwe ndakamukumbila Mwami [Jehova] akaambo kacintu eeci kuti cindizwe.” (2 Bakolinti 12:7, 8, Ci) Nokuba kuti Paulo wakakumbila Leza kuti amugwisyizye penzi lyakwe, tiilyakamana. Ambweni andinywe muli mubukkale buli boobo. Mbuli Paulo, ambweni mwali kupaila calukakatilo alimwi calusyomo, kulomba Jehova kuti amugwisyizye sukusyo limwi. Pele nokuba kuti mwali kulomba cakwiinduluka-induluka, penzi eelyo licimukatazya. Sena eeco caamba kuti Jehova kunyina naakaingula mipailo yanu alimwi akuti muuya wakwe tuumugwasyi? Peepe! (Intembauzyo 10:1, 17) Amulange-lange ncaakaamba Paulo.

17. Ino mbuti Jehova mbwaakaingula mipailo ya Paulo?

¹⁷ Ikwiingula mipailo ya Paulo, Leza wakamwaambila kuti: “Luse lwangu lulikkwene, nkaambo nguzu zyangu zilalondoka mubuteteete.” Paulo wakati: “Aboobo, ndalikankaizya abuteteete bwangu cakukondwa, kuti nguzu zya Kilisito zibe alindime [mbuli itente, NW].” (2 Bakolinti 12:9, Ci; Intembauzyo 147:5) Aboobo, Paulo wakabona kuti kwiinda muli Kristo, inguzu zya Leza zyakali muvwumbilide mbuli itente. Mazuba aano, Jehova ulaingula mipailo yesu munzila njiyonya. Mbuli citabilizyo, Jehova ulakwabilila babelesi bakwe.

18. Nkaambo nzi ncotukonzya kuliyumya mumasukusyo?

¹⁸ Masimpe, itente talilesyi mvwula kuwa naa myuuwo kuunga, pele lilapa bukwabilizi kuzintu eezi. Mbubonya buyo, citabilizyo cipegwa kwiinda mu “nguzu zya Kilisito” tacilesyi masukusyo kutusikila naa kupa kuti tutasikilwi makatazyo. Nokuba boobo, cilaakutupa lukwabililo lwakumuuya kuzintu zibyaabi zyanyinka eeyi alimwi anotulwanwa amuleli wanjiyo, Saatani. (Ciyubunuzyo 7:9, 15, 16) Aboobo, nokuba kuti mulanganya sukusyo limwi ‘litazwi,’ mulakonzya kusyoma kuti Jehova ulibwene kuliyumya kwanu alimwi akuti waingula “ijwi lyakukwiila kwanu.” (Isaya 30:19; 2 Ba-Korinto 1:3, 4) Paulo wakalemba kuti: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13; Ba-Filipi 4:6, 7.

19. Ncinzi ncomukanzide kunoocita, alimwi ino nkaambo nzi?

¹⁹ Masimpe, aaya ‘mazuba aakumamanino’ aanyika eeyi iitakombi Leza azwide “ziindi zikataazya.” (2 Timoteo 3:1) Nokuba boobo, kubabelesi ba Leza, eezi ziindi tazikatazyi kapati. Nkaambo nzi? Akaambo kalugwasyo alimwi alukwabililo lwa muuya uusalala wa Leza ngwapa Jehova cakulisungula alimwi cabuuya kuli baabo boonse bamukumbila calukakatilo alusyomo. Aboobo, atuzumanane kupailila muuya uusalala abuzuba.—Intembauzyo 34:6; 1 Johane 5:14, 15.

Ino Inga Mwaingula Buti?

• Ncinzi ncotweelede kucita kutegwa tutambule muuya uusalala wa Leza?

• Nkaambo nzi ncotukonzya kuba alusyomo lwakuti Jehova uyooingula mipailo njotupailila muuya uusalala?

• Ino mbuti muuya uusalala mboutugwasya kuliyumya mumasukusyo?

[Mibuzyo yaciiyo]

[Cifwanikiso icili apeeji 13]

Ncinzi ncotukonzya kwiiya kucikozyanyo ca Jesu casimeenzu silukakatilo?

[Cifwanikiso icili apeeji 15]

Sena mulakakatila kupailila muuya uusalala wa Leza?

[Cifwanikiso icili apeeji 16]

Ncinzi ncotwiiya kujatikizya Jehova kuzwa kucikozyanyo cawisi mwana uubikkila maano?