Mbomukonzya Kuzwidilila
Mbomukonzya Kuzwidilila
MBUBONYA bazyali mbobabikkila maano kubana babo ambobayanda kuti bazwidilile, awalo Taateesu wakujulu ulatubikkila maano alimwi uyanda kuti tuzwidilile. Ikutondezya mbwabikkila maano caluyando, ulatupa makani manji kujatikizya kuzwidilila alimwi akwaalilwa. Mubwini, Ibbaibbele nolyaamba kujatikizya muntu uubikkila maano kuli ncaamba Leza, lyaamba kuti: “Zyoonse nzyacita [zilazwidilila, BT].”—Intembauzyo 1:3.
Ikuti kacili boobo, ino nkaambo nzi ibanji ncobatazwidilili, ncobatakkomene alimwi ncobatakkutili mubuumi bwabo? Ikulangisya ntembauzyo eeyi kulatugwasya kujana bwiinguzi alimwi akubona mbotukonzya kuzwidilila andiswe.
‘Lulayo Lwababi’
Sitembauzyo ulacenjezya kujatikizya ntenda yakweenda “mululayo lwababi.” (Intembauzyo 1:1) Saatani Diabolosi ‘ngomubi’ mupati. (Matayo 6:13) Imagwalo atwaambila kuti ‘ngomwami wanyika eyi’ akuti ‘nyika yoonse ikkede mumubi.’ (Johane 16:11; 1 Johane 5:19) Aboobo, tacigambyi pe kuti lulayo lunji lumvwugwa munyika lutondezya mizeezo yamubi ooyo.
Ndulayo nzi ndobapa basizibi? Kanji-kanji basizibi balamusampaula Leza. (Intembauzyo 10:13) Lulayo lwabo ilwakunyansya naa kusampaula Leza lulajanika koonse-koonse. Mazuba aano bantu bakulwaizya ‘zisusi zyanyama azisusi zyameso alimwi akulisumpula kwabuumi.’ (1 Johane 2:16) Muli sikapepele amumiteende tujana makani manji aatukulwaizya kulijanina zintu zinji zyakumubili. Nyika yoonse mboizulwa, amwaka makkampani alabelesya mali aayinda ku 500,000,000,000 aaku Amelika mukwaambilizya kutegwa bakulwaizye bantu kuula zintu—kunyina makani zilayandika kuli basikuula naa pe. Ikwaambilizya ooku tiikwacinca buyo mbobaula zintu bantu, pele kwanyonganya mbobakubona kuzwidilila.
Akaambo kaceeci, nokuba kuti ibanji balijisi zintu nzyobatali kuyeeyela kuba anzizyo musule, kunyina nobaleka kuyandaula zintu azimbi. Imuzeezo uuliko ngwakuti ccita kojisi zintu eezi kunyina nokonzya kukkomana naa kuzwidilila. Ooyu muzeezo ngwakubeja alimwi ‘tauzwi kuli Taata pe, ngwanyika.’—1 Johane 2:16.
Mulengi wesu ulizi cikonzya kutupa kuzwidilila ncobeni. Lulayo lwakwe luliindene ‘alulayo lwababi.’ Aboobo, ikusola kujana cilongezyo ca Leza kumwi katuyanda kutobela nzila zyanyika kutegwa tuzwidilile kulikozyenye akusola kweenda munzila zyobile ziindene aciindi comwe. Eeci tacikonzyeki pe. Nkakaambo kaako Bbaibbele ncolicenjezya kuti: “Mutakozyanizigwi aziyanza zyaciindi ecino.”—Ba-Roma 12:2.
Mutalekeli Nyika Kumweendelezya
Nyika yeendelezyegwa a Saatani isoleka kulitondezya mbuli kuti ilabikkila maano kubukkale bwesu. Pele, tweelede kucenjela. Amuyeeye kuti cakuliyanda Saatani wakeena mwanakazi wakusaanguna Eva, kutegwa azuzikizye makanze aakwe. Mpoona wakabelesya Eva kupa kuti Adamu abisye. Mazuba aano Saatani alimwi ulabelesya bantu kumwaya lulayo lwakwe lubyaabi.
Mucikozyanyo, ba David baambwa mucibalo camana bakali kuyandika kuzumanana kubeleka kwamaoola manji alimwi akweenda nyeendo zinji kuyoocita makwebo. Ba David baamba kuti: “Ndakali kuzwa aŋanda mafwumofwumo mu Muhulo akujoka kumangolezya muli Bwane.” Akaambo kakuyeeya kuti kulyaaba kuli boobo kwakali kuyandika kutegwa bazwidilile munyika, balongwe babikkila maano, banamukwasyi ababelesinyina bakali kukulwaizya ba David kuti: “Kamuzumanana buyo kubeleka akaambo kamukwasyi wanu.” Bakabaambila kuti bakali kunoobeleka munzila eeyi kwamyaka buyo misyoonto kabatanakkalikila. Ba David baamba kuti: “Bakali kundaambila kuti mukwasyi wangu wakali kuyoogwasyigwa kapati akaambo kakuti ndakali kujana mali manji alimwi akuzwidilila kapati. Nokuba kuti tiindakali kukkala amukwasyi wangu, beenzuma bakandipa kusyoma kuti mubwini ndakali kuugwasya kapati.” Mbubonya mbuli ba David, ibanji balabeleka canguzu kutegwa bape mukwasyi wabo zintu zyoonse nzyobayeeya kuti zilayandika kubayandwa babo. Pele, sena kutobela lulayo luli boobu kulapa kuzwidilila? Ncinzi cini ncouyandika mukwasyi?
Kabali kumakwebo ba David bakaziba ncowakali kuyandika mukwasyi wabo. Ba David bakati: “Ndakali kubandika amwanaangu musimbi Angelica aluwaile ciindi naakandibuzya kuti, ‘Taata, nkaambo nzi ncomutayandi kukkala andiswe aŋanda?’ Aka kaambo kakandinjila mumoyo.” Ncaakaamba mwana cakabakulwaizya kucileka kubeleka. Ba David bakasala kupa mukwasyi wabo ncowakali kuyandika ncobeni, ikwiizya ambabo.
Kubelesya Lulayo lwa Leza Kupa Kuzwidilila
Mbuti mbomukonzya kukazya twaambo twakubeja tudumide munyika eeyi? Sitembauzyo utwaambila kuti muntu uzwidilila alimwi uukkomene nguyooyo “[u]kondelelwa Mulao wa-Jehova, amulao wakwe ulauyeeya lyoonse masiku asikati.”—Intembauzyo 1:2.
Ciindi Leza naakasala Joshua kuba musololi wacisi ca Israyeli, wakaambilwa kuti: “Weelede kunoolibala [Jwi lya Leza] sikati amasiku.” Inzya, ikubala alimwi akuzinzibala kuyeeya Jwi lya Leza kwakali kuyandika, pele alimwi Joshua wakeelede ‘kubamba zyoonse zilembedwe mulindilyo.’ Ncobeni, ikwiile kubala Bbaibbele kunyina nokunga kwamupa kuzwidilila munzila yamaleele. Mweelede kubelesya nzyomubala. Joshua wakaambilwa kuti: “Ndendilyo noyoosumpuka akuzwidilila kabotu-kabotu.”—Josyuwa 1:8, BT.
Amweezeezye mwana uukkede amaulu aamuzyali wakwe kakkomene kumwi kababala cibalo ncobayandisya. Nokuba kuti bali kubala cibalo eeco ziindi zinji, balakkomana lyoonse nobacita boobo. Mbubonya buyo, kumuntu uuyanda Leza ikubala Bbaibbele abuzuba kulakkomanisya mbokunga kumupa coolwe cakubandika aba Usyi bakujulu. Kwiinda mukutobela lulayo alimwi abusolozi bwa Jehova, muntu uuli boobo ulaba “mbuli musamu uuzikidwe kumbali atulonga twamaanzi, uuzyala micelo yawo kuciindi ceelede, uujisi matu aatayumi; zyoonse nzyacita [zilazwidilila, BT].”—Intembauzyo 1:3.
Cisamu ncaamba sintembauzyo tacilimeneni buyo. Cakasyangwa buya kumbali aakasensa kamaanzi alimwi cilalanganyizigwa amulimi. Munzila njiyonya, Taateesu wakujulu ulacinca alimwi akweendelezya mizeezo yesu kwiinda mululayo lujanika mu Magwalo. Aboobo, tulazwidilila alimwi tulaba abukkale mbwayanda Leza.
Pele “basizibi tabali obo pe.” Masimpe, balakonzya kulibonya mbuli kuti balazwidilila kwaciindi cili mbocibede, pele kumamanino kunyina nkobaya pe. “Tabakooyooima ciindi calubeta.” Muciindi caboobo, “inzila yabasizibi iyooloba.”—Intembauzyo 1:4-6.
Aboobo mutalekeli nyika kweendelezya mbaakani zyanu azyeelelo nzyomutobela. Nokuba kuti muli aluzibo alimwi mulakonzya kuzwidilila munyika eeyi, amucenjele mbomubelesya luzibo lwanu naa mboimubelesya nyika. Ikuyandaula zintu zyakumubili zitagwasyi kulakonzya kupa kuti muntu ‘ayuminine.’ Kulubazu lumwi, ikuba acilongwe cibotu a Leza nkokupa lukkomano lwini-lwini akuzwidilila.
Mbomukonzya Kuzwidilila
Ino nkaambo nzi ciindi muntu natobela lulayo lwa Leza, zyoonse nzyacita zilazwidilila? Sintembauzyo kunyina naakali kwaamba kuzwidilila munyika ino. Ikuzwidilila kwamuntu wa Leza kuliswaangene akucita kuyanda kwa Leza—alimwi kuyanda kwa Leza lyoonse kulazwidilila. Atubone kutobela njiisyo zyamu Bbaibbele mbokukonzya kupa kuti muzwidilile.
Mukwasyi: Magwalo akulwaizya balumi “kuyanda banakazi babo mbuli mibili yabo beni,” alimwi mukaintu Munakristo ulaililwa kuti “alemye mulumi wakwe.” (Ba-Efeso 5:28, 33) Bazyali bakulwaizyigwa kwiizya abana babo, kuseka ambabo akubayiisya zintu ziyandika kapati mubuumi. (Deuteronomo 6:6, 7; Mukambausi 3:4) Alimwi Ijwi lya Leza lilailila bazyali kuti: “Mutanookalalili akunyemya bana banu cabuyo.” Ciindi nolubelesyegwa lulayo oolu, cilabaubila bana ‘kuswiilila bazyali babo’ alimwi ‘akulemeka bausyi abanyina.’ (Baefeso 6:1-4, Ci) Ikutobela lulayo oolu lwa Leza kulakonzya kupa kuti mukwasyi uzwidilile.
Balongwe: Bantu banji balayanda kuba abalongwe. Tuli acilengwa cakuyanda kutondezya luyando alimwi akuyandwa. Jesu wakaambila basikumutobela kuti beelede ‘kuyandana umwi amweenzinyina.’ (Johane 13:34, 35) Akati kabo, tujana balongwe mbotukonzya kuyanda alimwi akusyoma cakumaniina cakunga tulakonzya kubaambila cili kumoyo. (Tusimpi 18:24) Ikapati, kwiinda mukubelesya njiisyo zyamu Bbaibbele tulakonzya ‘kuswenenena kuli Leza’ alimwi mbuli Abrahamu tulakonzya kwiitwa kuti “mulongwaakwe Leza.”—Jakobo 2:23; 4:8.
Makanze Mubuumi: Muciindi cakwiile kupona kakunyina amakanze mubuumi, aabo ibazwidilila ncobeni balizi ncobaponena. Buumi bwabo tabuyeeme abukkale bwamazuba aano butasyomeki. Imbaakani zyabo zibasololela kukuzwidilila kwini-kwini alimwi kutamani, mbwaanga ziyeeme amulimo wabuumi. Ncinzi cipa muntu kuba amakanze mubuumi? “Lemeka Leza akubamba milazyo yakwe, nkaambo kucita obo nceelelo coonse camuntu.”—Mukambausi 12:13.
Bulangizi: Ikuba balongwe ba Leza alimwi kulatupa bulangizi. Imwaapostolo Paulo wakalailila Banakristo ‘kutasyoma buvwubi butasyomeki, pele kusyoma Leza.’ Munzila eeyi, bakali kukonzya ‘kuliyobweda intalisyo imbotu yaciindi ciza, kuti bajatisye buumi bwinibwini.’ (1 Timoteo 6:17-19) Oobu buumi bwini-bwini bulaboola ino-ino ciindi Bwami bwa Leza ibwakujulu nobuyoopilusya Paradaiso anyika eeyi.—Luka 23:43.
Ikuti kamubelesya njiisyo zyamu Bbaibbele tacaambi kuti kunyina nomuyoosikilwa mapenzi, pele tamukonzyi kunjila mumapenzi ngobaliletela basizibi. Ba David baambidwe kumatalikilo alimwi atuulunzuma twabantu bambi babona kuti cilagwasya kubelesya njiisyo zyamu Bbaibbele mubuumi bwabo. Nobakajana mulimo wakali kubapa ciindi, ba David bakati: “Ndilalumba akaambo kacilongwe ncondijisi amukaintu wangu alimwi abana kubikkilizya acoolwe cakubelekela Jehova Leza kandili mwaalu mumbungano.” Anu nkakaambo kaako ntembauzyo ncoyaamba kuti muntu uubikkila maano kululayo lwa Leza: “Zyoonse nzyacita [zilazwidilila]”!
Ccaati iili apeeji 6]
ZINTU ZYOSANWE ZIPA KUZWIDILILA
1 Mutazumini kweendelezyegwa azyeelelo zyanyika eeyi.
2 Amubale akuzinzibala kuyeeya Jwi lya Leza abuzuba.
3 Amubelesye lulayo lwamu Bbaibbele mubuumi bwanu.
4 Amube balongwe ba Leza.
5 Amuyoowe Leza mwini-mwini akubamba milawo yakwe.
[Zifwanikiso izili apeeji 7]
Sena mulimukucita zintu zipa kuzwidilila?