Mbotukonzya Kubuzyiba Bukombi Bwakasimpe

ZIKOMBELO zinji zyaamba kuti nzyobayiisya zizwa kuli Leza. Pele tweelede kuccilila majwi aamwaapostolo wa Jesu uutegwa Johane iwakalemba kuti: “Nobayandwa, mutazuminini myuuya yoonse, pele amusoleke myuuya na njiya-Leza, nkaambo basinsimi banji babeji mobali kale munyika.” (1 Johane 4:1) Ino mbuti mbotukonzya kusoleka cintu kutegwa tuzyibe kuti cakazwa kuli Leza?

Cintu coonse cizwa kuli Leza cilatondezya bube bwakwe, ikapati bube bwakwe bulibonya kapati, iluyando. Mucikozyanyo, kununkizya, kwalo ikutupa kuti katukkomana akununkila kwamaluba naa kwansima, coonse eeci ncitondezyo caluyando lwa Leza. Kukonzya kubona zuba mbolibbila, kubona syimukkookkolizyo, naa kumweta-mweta kwamwana citondezya luyando Leza ndwajisi kuli ndiswe. Alimwi ncimwi buyo anotuswiilila nyimbo zikondelezya, kulila kwakayuni naa jwi lyamulongwe wesu. Nokuba kuti tatulondokede, tulatondezya luyando lwa Leza. Nkakaambo kaako kanji tulaabona majwi aa Jesu kaabeleka aakuti: “Kupa kuli coolwe kwiinda kupegwa.” (Incito 20:35) Tulakkomana kutondezya luyando nkaambo twakalengwa “mucinkozya cakwe.” (Matalikilo 1:27) Nokuba kuti Jehova ulijisi bube bunji, ibube bwaluyando mbobwiinda.

Makani aalembedwe aazwa kuli Leza atondezya luyando lwakwe. Zikombelo zilijisi makani manji aalembedwe aakaindi. Ino makani aaya azwidilila buti mukutondezya luyando lwa Leza?

Masimpe ngakuti, bunji bwamabbuku aazikombelo aakaindi taapandululi kapati mbuli Leza mbwatuyanda naa mbotukonzya kumuyanda. Akaambo kaceeci, tuulunzuma twabantu tabajani bwiinguzi kumubuzyo nobabuzya kuti, “Nkaambo nzi tulabona luyando lwa Leza muzintu nzyaakalenga kakuli kupenga abubi zilazumanana?” Ibbaibbele ndebbuku lelikke lyakalembwa kaindi ilyabukombi ilipandulula bwini luyando lwa Leza mbolubede. Alimwi lilatuyiisya mbotweelede kutondezya luyando.

Ibbuku Lyaamba Luyando

Ijwi lya Leza Ibbaibbele, lilamupandulula Jehova kuti ngu “Leza siluyando.” (2 Ba-Korinto 13:11) Ibbaibbele lilapandulula luyando Jehova mbolwakamupa kubapa buumi bantu bakutaanguna butako macise alufwu. Pele kuzangila bulelo bwa Leza kwakaleta mapenzi kubantu. (Deuteronomo 32:4, 5; Ba-Roma 5:12) Jehova wakabweza ntaamu kujola bukkale bwakanyonganyizyigwa. Ijwi lya Leza lyaamba kuti: “Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Magwalo Aasalala alapandulula luyando lwa Leza mbolwakamupa kubweza ntaamu aimwi naapandulula Leza  mbwaakabikka mfwulumende mbotu mumaanza aa Jesu ikutegwa ilete luumuno kubantu babombe myoyo.—Daniele 7:13, 14; 2 Petro 3:13.

Ibbaibbele mubufwaafwi licaamba boobu muntu nceelede kucita: “Yanda Leza Jehova wako amoyo wako woone, amoya wako woonse, amumiyeeyo yako yoonse. Ngooyu mulazyo mutaanzi mupati. Awabili ulikozyene awalo, ngooyu, Yanda mweenzinyoko mbuli mboliyanda omwini. Milazyo eyi yobile mpaanzikidwe Mulao woonse abasinsimi.” (Matayo 22:37-40) Ibbaibbele lyakasololelwa amuuya wa Leza. Mbwaanga lilatondezya bube bwakwe, tulakozya kuba masimpe kuti lyakazwa kuli “Leza siluyando.”—2 Timoteo 3:16.

Ikwiinda mukubelesya nzila eeyi, tulakonzya kuzyiba malembe aakaindi aakazwa ncobeni kuli Leza. Luyando lulapa kuti bazyibwe bakombi bakasimpe, nkaambo baiya mbwatondezya luyando Leza.

Mbomukonzya Kubazyiba Bantu Bamuyanda Leza

Aabo bamuyanda ncobeni Leza balalibonya, ikapati ciindi cino ncotupona Ibbaibbele ncoliti “mazuba aakumamanino.” Bantu baindilila kuba “basikuliyanda, basimuyanda mali, . . . bayandisya misalo yaansi kwiinda Leza.”—2 Timoteo 3:1-4.

Mbuti mbomukonzya kubazyiba bantu bamuyanda Leza? Ibbaibbele lyaamba kuti: “Oku nkokuyanda Leza, kuti twabamba milazyo yakwe.” (1 Johane 5:3) Luyando ndobajisi kuli Leza lubapa kuti kabaccilila zyeelelo zya Bbaibbele zyakulilemeka. Mucikozyanyo, Ijwi lya Leza lilijisi milawo kumakani aakoonana akukwatana. Koonana kuzumizyidwe buyo kubanabukwetenyi, alimwi lukwatano lweelede koongola. (Matayo 19:9; Ba-Hebrayo 13:4) Mukaintu umwi haabupampu mutwaambo twabukombi wakucisi ca Spain naakajanika kumuswaangano wa Bakamboni ba Jehova nkobakajisi bubi kwiiya zyeelelo zyamu Bbaibbele, wakati: “Muswaangano wandikulwaizya ikutali buyo akaambo kakusalazyigwa kwa Magwalo, pele alimwi akukamantana kwabo, zyeelelo zyabo zisumpukide alimwi akulilemeka kwabo.”

Kunze lyakuyanda Leza, Banakristo beni-beni tabakatazyi kuzyiba akaambo kaluyando ndobatondezya kuli basimukobonyina. Mulimo wabo mupati ngwakwaambila bantu bulangizi ibuya kuzuzikizya nzyobayanda bantu, Ibwami bwa Leza. (Matayo 24:14) Taku cikonzya kubaletela mpindu mpati iitamani basimukwabonyina ikuleka yakubagwasya kuba aluzibo lwa Leza. (Johane 17:3) Banakristo beni-beni alimwi balatondezya luyando lwabo munzila azimbi. Balabagwasya aabo bali mumapenzi. Mucikozyanyo, muzuzumo wanyika nowakadilisya mayake mu Italy, muteende wamucisi momunya wakaamba kuti Bakamboni ba Jehova “balabeleka munzila mbotu kugwasya baabo bali mumapenzi kakutako akulanga kuti ooyu ngwacikombelo cili.”

Kunze lyakuyanda Leza abasimukobonyina, Banakristo beni-beni balayandana. Jesu wakati: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Johane 13:34, 35.

Sena luyando ndobajisi Banakristo beni-beni kuli umwi aumwi lulaindana alwabambi? Mbwaakayeeya oobo mubelesi mukaintu wamuŋanda wazina lya Ema. Ubeleka mudolopo lya La Paz mu Bolivia mwalo kanji bantu bavwubi mobatalyatani abacete. Wakati: “Ciindi cakusoka nindakaunka kumuswaangano wa Bakamboni ba Jehova, ndakabona musankwa wakasamide kabotu kakkede kabandika amukaintu muna India. Oolu lwakali lweendo lwakutaanguna kubona cili boobu. Muciindi nceena eeco ndakazyiba kuti aaba mbantu ba Leza.” Aumwi musimbi waku Brazil wazina lya Miriam wakati: “Tiindakazyi mbondakali kukonzya kukkomana, nomuba buya mumukwasyi. Ciindi cakutaanguna nkondakabona luyando nkolutondezyegwa kwakali  kuli Bakamboni ba Jehova.” Mucisi ca United States, mupati umwi uulanganya makani aamucipekupeku wakalemba kuti: “Nokwali kutegwa bantu banji bapona mbuli mbomupona mucikombelo canu, cisi eeci nicatali boobu. Ndili mubelesi wamakani aamumuteende uuzyi kuti cikombelo canu cizyatide aluyando alimwi cilijisi lusyomo luyumu mu Mulengi.”

Amulangaule Bukombi Bwakasimpe

Luyando ncecintu citondezya kuti oobu mbukombi bwakasimpe. Jesu wakakozyanyisya kujana bukombi bwakasimpe kukujana nzila mbotu akusala kweenda mulinjiyo. Nenzila buyo elikke iitola kubuumi butamani. Jesu wakati: “Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanjibanji. Mulyango uumanikide anzila iipatide njiitola kubuumi, nkabela abo biijana mbace.” (Matayo 7:13, 14) Ninkamu buyo yomwe ya Banakristo beni-beni yeenda cakukamantana a Leza munzila yabukombi bwakasimpe. Aboobo cilayandika kusala cikombelo cakunjila. Ikuti mwaijana nzila eeyo alimwi akuti mwasala kweenda mulinjiyo, nkokuti mwaijana nzila iinda kubota mubuumi nkaambo njenzila yakutondezyela luyando.—Ba-Efeso 4:1-4.

Amuyeeye buyo mbomukonzya kukkomana kweenda munzila yabukombi bwakasimpe! Cili mbuli kweenda a Leza. Kuli Leza mulakonzya kwiiya busongo aluyando calo cikonzya kumupa cilongwe cibotu abamwi. Kuli nguwe mulakonzya kuzyiba buumi ncobuliko alimwi akumvwisya zisyomezyo zya Leza akuba alulindililo. Takukabi kusowa ciindi kulangaula bukombi bwakasimpe.

[Cifwanikiso icili apeeji 3]

Akati kamakani aalembedwe aabukombi aakaindi, Ibbaibbele lelikke ndelipandulula luyando lwa Leza

[Zifwanikiso izili apeeji 5]

Banakristo beni-beni balazyibwa nkaambo balatondezya luyando