Ikuyandaula Bwiinguzi Buluzi

Ino inga ndalikwabilila buti kumalwazi?

Ino ncinzi ncondikonzya kucita kutegwa mukwasyi wangu kuukkomana?

Ino mbuti mbondikonzya kuzumanana kubeleka amulimo ngondakanjila?

SENA kuli nomwakali buzyide kale umwi wamibuzyo eeyi? Sena mwakajana bwiinguzi bwakamugwasya? Amwaka, mabbuku aindene-indene abalilwa ku 2,000 alamwaigwa. Mabbuku aaya alapa lulayo mumakani ngotwaamba alimwi amumakani aambi aayandika kapati. Kucisi ca Britain cilikke, basikubala balabelesya mweelwe wamali aaku America uubalilwa ku $150,000,000 amwaka kuula mabbuku aapa lulayo lwaamba muntu mbwakonzya kulwana mapenzi. Mucisi ca United States, balajana mali aasika ku $600,000,000 amwaka kwiinda mukusambala mabbuku aapa lulayo lwakucesya mapenzi. Tamuli molikke nomuyandaula lulayo lugwasya ilwaamba mbomukonzya kupona abuzuba.

Naakali kwaamba lulayo lujanwa mumabbuku aaya aatalivwulili, mulembi umwi wakati: “Bunji bwamabbuku mapya aide kwiinduluka zintu zyakalembwa kale.” Ee, ilulayo lujanika mumabbuku aaya lwiinduluka buyo busongo bulembedwe mubbuku limwi lyakaindi munyika. Eeli bbuku ndebbuku limwaigwa kapati munyika. Lilisanduludwe muzibeela zimwi naa lyoonse mumilaka iili 2,400. Mweelwe wakusimbwa kwandilyo ulainda ku 4,600,000,000 munyika yoonse. Ibbuku nditwaamba aawa ndi Bbaibbele.

Ibbaibbele lyaamba boobu cakusalazya: “Magwalo aya oonse akazwa kuli-Leza, alikondede kukufundisya akukulaya, akukuolola akukupandulula makani aabululami.” (2 Timoteo 3:16) Masimpe ngakuti Bbaibbele talili bbuku lyakalembelwa kuti kalipa lulayo lwambokulwanwa mapenzi. Mulimo wandilyo mupati ngwakuyubununa makanze ngajisi Leza kubantu. Nokuba boobo, Ibbaibbele lilijisi makani manji apandulula mbotukonzya kuliyumya mumapenzi aacitikila bantu alimwi lisyomezya kuti aabo batobela malailile aali mulindilyo bayoogwasyigwa. (Isaya 48:17, 18) Ilulayo luli mulindilyo lulagwasya lyoonse ikuti lwatobelwa kufwumbwa naa muntu musyobo nzi, utobela zilengwa nzi antela ujisi lwiiyo nzi lwakumubili.