Ino Mbuti Mbotukonzya Kwaalwana Madaimona?
Ino Mbuti Mbotukonzya Kwaalwana Madaimona?
“Baangelo abatakajatisya bwami bwabo bwakusaanguna pele bakabusia busena bwabo, [Leza] wakabaanga azyaanzyo zitamani mumudima uusia mbi, kuti bakalindile mane kusikila kulubeteko lwabuzuba bupati.”—JUDA 6.
1, 2. Ino mibuzyo nzi iibuzyigwa kumakani aa Diabolosi Saatani alimwi amadaimona?
MWAAPOSTOLO Petro wakacenjezya kuti: “Amulibatamike akucenjela, nkaambo sinkondonyoko Saatani uleendeenda mbuli syuumbwa wabutambo akuya buyandaula ngwati lume.” (1 Petro 5:8) Naakali kwaamba zyamadaimona, mwaapostolo Paulo wakati: “Nsiyandi kuti mube basiluswaano babadaimona. Tamukonzyi kunywida cinywido ca-Mwami antoomwe acinywido cabadaimona. Alimwi, tamukonzyi kwaabilwa kuntafule ya-Mwami akuntafule yabadaimona abalo.”—1 Ba-Korinto 10:20, 21.
2 Pele ino Saatani Diabolosi alimwi amadaimona mbaani? Mbuti mbubakaboola alimwi ndilili? Sena Leza wakabalenga buya? Ino bajisi nguzu zili buti kubantu? Ino tukwabilidwe buti kuli mbabo ikuti naa tulikwabilidwe?
Ino Saatani a Madaimona Bakazwa Kuli?
3. Ino mbuti mungelo wa Leza mbwaakaba Diabolosi Saatani?
3 Kumatalikilo ibantu nobakali kukkala mumuunda wa Edeni, mungelo wa Leza umwi wakazanga. Ino wakazangila nzi? Wakazanga nkaambo tanaakakkutila kumulimo ngwaakapedwe mumbunga ya Jehova yakujulu. Ba Adamu a Eva nobakalengwa, wakacibona kuba coolwe cakuti kumvwida akukomba Leza nkobakali kucita kube kwakwe. Ikuzangila Leza alimwi akucenga banabukwetene kuti babisye, nkokwakapa kuti mungelo ooyu abe Saatani Diabolosi. Mukuya kwaciindi, bangelo abambi bakamutobela. Ino bakamutobela buti?—Matalikilo 3:1-6; Ba-Roma 5:12; Ciyubunuzyo 12:9.
4. Ino ncinzi bangelo bakazanga ncobakacita, Izambangulwe lyamumazuba aakali kupona Nowa kalitanacitika?
4 Magwalo aakasololelwa amuuya Uusalala atwaambila kuti kwaciindi cili mbucibede Zambangulwe lyakumazuba aakali kupona Nowa kalitanacitika, bangelo bamwi bakatalika kubamenena bumbi mate bamakaintu ibali anyika. Kabajisi makanze aataluzi, Ibbaibbele lyaamba kuti: “Bana ba-Leza [bakujulu] bakabona bana basimbi babantu kuti mbabotu, nkabela bakakwata kufumbwa mbobakali kuyanda akati kabo.” Ikukwatana ooku tiikwakeelede pe, aboobo bakazyala bana ibakazi kwiitwa kuti Babbabbani. (Matalikilo 6:2-4) Aboobo zilenge zyamuuya eezi zyatakamvwida Leza zyakakamantana a Saatani mukuzangila Jehova.
5. Ino ncinzi cakacitika kubazangi ciindi Jehova naakanyonyoona bantu kwiinda mukubelesya Zambangulwe?
5 Jehova naakaleta Zambangulwe, Babbabbani alimwi abamanyina bakafwa. Bangelo bazangi bakalicinca mibili yabuntu akuba ayamuuya akupilukila kubusena bukkala zilenge zyamuuya. Pele kunyina nobakazumanana a “bwami bwabo bwakusaanguna” kuli Leza. Muciindi caboobo, wakabasowela mu “mudima [wakumuuya] uusia mbi” wiitwa kuti tulambwe.—Juda 6; 2 Petro 2:4.
6. Ino madaimona abeena buti bantu?
6 Kuzwa ciindi bangelo babyaabi nobakanyangwa “bwami bwabo bwakusaanguna,” bakaba madaimona ibalongwe ba Saatani alimwi bali kumugwasya kucita zintu zibi. Kuzwa ciindi eeco kusikila sunu, madaimona kunyina naakonzya kulisandula akuba amibili yabuntu pe. Nokuba boobo, balakonzya kukulwaizya baalumi abamakaintu kucita milimo yamamfwunze iindene-indene. Madaimona alimwi alabeena bantu kwiinda mumizimo, kubikkilizya amicito mbuli kulowa, kubelesya masalamuzi mucikombelo alimwi akusola kwaambaula abantu bafwide. (Deuteronomo 18:10-13; 2 Makani 33:6) Ncobalindila bangelo babyaabi cilikozyene aceeco cilindila Diabolosi—ikujailwa limwi. (Matayo 25:41; Ciyubunuzyo 20:10) Pele kwaciindi cino, tuleelede kwiima cakutazungaana akubalwana. Cilayandika kulanga-langa mbuli Saatani mbwajisi nguzu alimwi akubona mbotukonzya kumulwana walo amadaimona aakwe akuzwidilila.
Ino Saatani Ujisi Nguzu Zili Buti?
7. Ino Saatani ujisi nguzu nzi munyika?
7 Saatani wali kumubejelezya Jehova kwaciindi cilamfwu. (Tusimpi 27:11) Alimwi wabayunga bantu banji kapati. Lugwalo lwa 1 Johane 5:19 lwaamba kuti: ‘Nyika yoonse yeendelezyegwa amubi.’ Nkakaambo kaako Diabolosi ncaakasunkila Jesu kwiinda mukumwaambila kuti ulamupa bweendelezi abulemu bwa “zisi zyoonse zyaansi.” (Luka 4:5-7) Mwaapostolo Paulo wakaamba boobu kwaamba Saatani: “Kuti Makani Mabotu ngitukambauka alivumbidwe, kumeso aabaabo bali mukusweeka nkwaavumbidwe, nkaambo kulimbabo muzimu waansi ano waofwaazya meso aabaabo batazumina, kuti batapaswidwi mumuni wa-Makani Mabotu aabulemu bwa-Kristo, nguwe cinkozya ca-Leza.” (2 Ba-Korinto 4:3, 4) Saatani “nguubeja, ngowisi wababeja” pele ulitondezya mbuli “mungelo wamumuni.” (Johane 8:44; 2 Ba-Korinto 11:14) Ulijisi nguzu alimwi anzila zikonzya kubelesyegwa kunyonganya mizeezo yabeendelezi bamunyika alimwi abantu mbobeendelezya. Kwiinda mukwaamba makani aakutamikizya alimwi atwaano twabukombi kubikkilizya abubeji, wabeena bantu.
8. Ino ncinzi Bbaibbele ncolitondezya kujatikizya nguzu zya Saatani?
8 Nguzu zya Saatani alimwi ambwayunga zyakalibonya mumazuba ngaakali kupona musinsimi Daniele, nkokuti myaanda yamyaka iili musanu katana boola Jesu. Jehova naakatuma mungelo kuti akamuyumye Daniele, mungelo wakasinkilwa a “Mwami [wamumuuya] wacisi ca-Persia.” Mungelo ooyu uusyomeka wakasinkilwa kwamazuba aali 21 mane limwi “Mikayeli umwi wabasilutwe bapati” nkokuunka kuyoomugwasya. Cibalo ncimunya eeci alimwi caamba “[idaimona] mwami waba-Helene.” (Daniele 10:12, 13, 20) Alimwi kubbuku lya Ciyubunuzyo 13:1, 2 Saatani utondezyedwe mbuli “Simwaaba” uupa cinyama catwaambo twacisi “inguzu zyakwe acuuno cakwe abwami bunji.”
9. Ino Banakristo balwana abani?
9 Nkakaambo kaako mwaapostolo Paulo wakalemba kuti: “Inkondo njitulwa tiiensi yakulwana abantu balya maila, pe, njakulwana abeendelezi abami abasinguzu bamumudima waansi ano, tulalwana amyuuya yabubi iili mumyeenya yakujulu.” (Ba-Efeso 6:12) Naaba mazuba aano, madaimona ayendelezyegwa a Diabolosi Saatani atalibonyi ngaasungilizya alimwi akuyunga beendelezi bantunsi abantu buyo mukutola ambele micito yakwiide kujaya bantu bamubala naa musyobo umwi, milimo yazigwebenga alimwi akujaya bantu. Lino atulange-lange mbuli mbotukonzya kuzwidilila mukulwana myuuya eeyi iijisi nguzu.
Ino Tukwabilidwe Buti Kumadaimona?
10, 11. Ino mbuti mbotukonzya kumulwana Saatani abangelo bakwe babyaabi?
10 Kunyina notukonzya kumuzunda Saatani abangelo bakwe babyaabi kwiinda munguzu zyesu naa mumaano eesu pe. Paulo wakapa lulayo oolu: “Amuyume mu-Mwami amunguzu zyakwe impati.” Tweelede kulangila kuli Leza kutegwa atukwabilile. Paulo wakayungizya kuti: “Amusame zilwanyo zyoonse zya-Leza, kuti mukonzye kwiima mumeneeno aa-Diabolosi. . . . Amuzwate zilwanyo zyoonse zya-Leza, kuti mukakonzye kulwisya mubuzuba bubi, elyo yamana buyo inkondo yoonse muzooima nji.”—Ba-Efeso 6:10, 11, 13.
11 Paulo wakakulwaizya Banakristonyina ziindi zyobilo kuti amusame “zilwanyo zyoonse zya-Leza.” Ibbala lyakuti “zyoonse” lipandulula kuti takuyandiki kuba amyoyo yobilo kutegwa muzunde munkondo yakulwana amadaimona. Aboobo ino nzibeela nzi zyazikwabilizyo zyakumuuya zyalo Banakristo nzyobeelede kusama cakufwambaana ikutegwa balwane madaimona?
Ino Mbuti Mbomukonzya “Kwiima nji”?
12. Ino Banakristo inga bacisamika buti cibuno cabo akasimpe?
12 Paulo upandulula kuti: “Mbuboobo mbumweelede kwiima. Amulyaange kuzikungu lutambo lwalusinizyo akulisamika kucamba cikwabilizyo cabululami.” (Ba-Efeso 6:14) Zibeela zyobilo izyaambwa aawa ndutambo lusamwa mucibuno alimwi acilikwabilizyo cakucamba. Sikalumamba wakeelede kulyaanga kabotu lutambo ikutegwa akwabilile cibuno (tusolo abbumbu) alimwi akuti anyamune kabotu icceba. Mbubwenya buyo, kasimpe kamu Bbaibbele keelede kuti katukasamide kabotu munzila yacikonzyanyo, ikutegwa tukatobele kabotu. Sena tulijisi mulongo wakubala Bbaibbele abuzuba? Sena mukwasyi woonse ulibikkilizyidwe? Sena tulijisi cilengwa cakulingula lugwalo lwabuzuba amukwasyi? Kuyungizya waawo, sena tulibuzi bupanduluzi bupya bujanika mumabbuku aazwa “[ku]muzike musyomesi uucenjede”? (Matayo 24:45) Kuti naa tulacita oobo, tuli mukusoleka kutobela cakaamba Paulo. Alimwi tulijisi mavidiyo alimwi ama DVD aakonzya kutugwasya kutobela Magwalo. Kukajatisya kasimpe kulakonzya kutugwasya kusala kabotu akutupa kuti tutatoli nzila iitali kabotu.
13. Ino inga twalikwabilila buti mumoyo?
13 Cikwabilizyo cakucamba cini cakali kukwabilila camba casikalumamba, moyo alimwi azibeela zimwi ziyandika kapati. Munakristo ulakonzya kulikwabilila mumoyo—kwiinda mukuyandisya bululami bwa Leza alimwi akutobela zyeelelo zya Jehova ziluleme. Cikwabilizyo cakucamba cacikozyanyo cilakonzya kutugwasya kutegwa tutayalampyi Jwi lya Leza. Ikuti twatalika “[kusula] bubi akuyandisya bubotu,” tuyoolesya maulu eesu “kunzila [zibi] zyoonse.”—Amosi 5:15; Intembauzyo 119:101.
14. Ino cipandulula nzi ikuba ‘azituta zisamikidwe amakani mabotu aaluumuno’?
14 Matende aabasikalumamba bana Roma akalisamikidwe mabbusu aayelede ikutegwa akonzye kweenda misinzo milamfwu mumigwagwa yabana Roma yakaliingene iinda munyika yabwami. Ino mabala aakuti “zituta zyanu zibambwe kukusamikwa a-Makani Mabotu aaluumuno,” apandulula nzi ku Munakristo? (Ba-Efeso 6:15) Eeci cipandulula kuti tulilibambide kubweza ntaamu. Tulilibambilide kukambauka makani mabotu aa Bwami bwa Leza kufwumbwa ciindi ceelede. (Ba-Roma 10:13-15) Ikuba basungu mumulimo wa Bunakristo ncikwabilizyo ku “meneeno” aa Saatani.—Ba-Efeso 6:11.
15. (a) Ino ncinzi citondezya kuti ntobo yalusyomo ilayandika kapati? (b) Ino “mivwi” nzi iikonzya kunyonyoona lusyomo lwesu?
15 Paulo ulazumanana kwaamba kuti, “Kwiinda zyoonse amubweze intobo yalusyomo, njiyonya njimukonzya kuzimya mimvwi yoonse iipya iifuswa kumubi.” (Ba-Efeso 6:16) Imalailile aamba kubweza ntobo yalusyomo alatalika amajwi aakuti “kwiinda zyoonse,” ikutondezya kuti cibelesyo eeci cilayandika kapati. Lusyomo lwesu talweelede kuba lwakuwayawaya pe. Mbubwenya mbuli ntobo yakulikwabilizya, lusyomo lwesu lulakonzya kutukwabilila ‘kumivwi mikali’ izwa kuli Saatani. Ino mivwi eeyi ncinzi nciikonzya kwiiminina mazuba aano? Ilakonzya kwiiminina matusi aacisizya moyo, kubejelezyegwa abasinkondoma alimwi abasiluleyo ibasola kunyonganya lusyomo lwesu. “Mivwi” eeyi ilakonzya kuba kusunkwa kuyandisya zintu zyakumubili, calo cikonzya kutupa kubikkila buyo maano kukuula zintu zinji alimwi akutupa kutalika kuzundana abaabo ibayandisya kulitondezya azintu nzyobajisi. Ambweni basyoma maanda aabo alimwi amyootokala mipati alimwi mibotu naa kulitondezya azintu nzyobajisi izidula antela zisani zyabo zyakasumwa munzila mpya. Kufwumbwa naa ncinzi bantu bamwi ncobakonzya kucita, tuleelede kuba alusyomo luyumu kutegwa lukwabe “mivwi” eeyi. Ino mbuti mbotukonzya kuba alusyomo luyumu?—1 Petro 3:3-5; 1 Johane 2:15-17.
16. Ino ncinzi cikonzya kutugwasya kuba alusyomo luyumu?
16 Tulakonzya kuswena kuli Leza kwiinda mukuliyiisya Bbaibbele ciindi coonse alimwi amumipailo iipailwa camoyo woonse. Tulakonzya kulomba Jehova kutegwa lusyomo lwesu luyume alimwi akubeleka canguzu kweelana anzyotupailila. Mucikozyanyo, sena tulalibambila Ciiyo ca Ngazi Yamulindizi katujisi makanze akuyooyingula? Ilusyomo lwesu luyooyuma ikuti katwiiya Bbaibbele alimwi amabbuku aamba zyamu Bbaibbele.—Ba-Hebrayo 10:38, 39; 11:6.
17. Ino mbuti mbotukonzya ‘kubweza ngowani yalufwutuko’?
17 Paulo wamanizya kupandulula zilwanyo zyakumuuya kwiinda mululayo oolu: “Amubweze ingoani yalufutuko, apanga lya-Muuya, nkukuti ijwi lya-Leza.” (Ba-Efeso 6:13-17) Ngowani yakali kukwabilila mutwe alimwi abongo bwasikalumamba, icibeela muzwa twaambo. Mbubwenya buyo, bulangizi bwesu bwa Bunakristo bulaikwabilila mizeezo yesu. (1 Ba-Tesalonika 5:8) Muciindi cakwiide kuyeeya mbaakani zyakunyika lyoonse alimwi akuyandisya buvwubi, tuleelede kubikkila maano kukuyeeya bulangizi mbwatupede Leza, mbubwenya mbuli bwakacita Jesu.—Ba-Hebrayo 12:2.
18. Ino nkaambo nzi ncotuteelede kuubya-buya bubambe bwakubala Bbaibbele lyoonse?
18 Icikwabilizyo cesu camamanino kukweena kwa Saatani alimwi amadaimona aakwe, ndijwi lya Leza naa mulumbe uulembedwe mu Bbaibbele. Aaka nkaambo akambi ncotuteelede kuubya-ubya bubambe bwakubala Bbaibbele cakutaleka. Ikuba aluzibo lukkwene lwa Jwi lya Leza kulatukwabilila kutegwa tutacengwi a Saatani alimwi akumakani aakubeja aamadaimona kubikkilizya amajwi mabyaabi aazwa kubazangi.
“Amukombe Lyoonse”
19, 20. (a) Ino Saatani amadaimona aakwe balindila nzi? (b) Ino ncinzi cikonzya kutuyumya kumuuya?
19 Saatani amadaimona aakwe alimwi anyika mbyaabi zilaafwaafwi kugusyigwa. Saatani ulizi kuti “ciindi ncacijisi nciniini buyo.” Ulinyemede alimwi ulabalwana aabo “babamba milazyo ya-Leza akujata bumboni bwa-Jesu Kristo.” (Ciyubunuzyo 12:12, 17) Cilayandika kapati kumulwana Saatani amadaimona aakwe.
20 Elo kaka tulalumba kululayo lwakusama zilwanyo zyoonse zizwa kuli Leza! Paulo wakamanizya kwaamba zilwanyo zyakumuuya alulayo oolu: “Amukombe lyoonse azikombyo ankumbizyo zyoonse zyamu-Muuya. Ee, amupangike myoyo yanu kumakani aya, mukombele basalali boonse.” (Ba-Efeso 6:18) Mupailo ulakonzya kutuyumya akutugwasya kuba bantu bapakamene. Atwaabikkile maano majwi aa Paulo akuba bantu bakomba lyoonse, nkaambo eeci ciyootugwasya kulwana Saatani amadaimona aakwe.
Ino Ncinzi Ncomwaiya?
• Ino Saatani amadaimona aakwe bakazwa kuli?
• Ino Diabolosi ujisi nguzu zinji buti?
• Ino tukwabilidwe buti kuli Saatani akumadaimona aakwe?
• Ino mbuti mbotukonzya kusama zilwanyo zyoonse zizwa kuli Leza?
[Mibuzyo yaciiyo]
[Zifwanikiso izili apeeji 17]
“Bana ba-Leza bakabona bana basimbi babantu”
[Cifwanikiso icili apeeji 19]
Sena inga mwazibandauka akuzipandulula zibeela zyazilwanyo zyesu zyakumuuya zili cisambomwe?
[Zifwanikiso izili apeeji 21]
Ino mbuti kutola lubazu muzintu eezi mbokukonzya kuba cikwabilizyo kuli Saatani amadaimona aakwe?