Kulitesya Kubeembezi Basiluyando

“Kamubaswiililisya baalu banu, mulitesye kulimbabo.”—BA-HEBRAYO 13:17.

1, 2. Ino Magwalo nzi atondezya kuti Jehova alimwi a Jesu Mbeembezi basiluyando?

JEHOVA LEZA a Mwanaakwe Jesu Kristo Mbeembezi basiluyando. Isaya wakasinsima kuti: “Amubone! Mwami Jehova uleza anguzu. Kuboko kwakwe nkokumweendelezezya. . . . Ulalela butanga bakwe mbuli mweembeli. Ulabunganya twana akuboko kwakwe, ulatukumbatila akaango kakwe, azyalo zinyonsya ulazyeenzya kabotu.”—Isaya 40:10, 11.

² Businsimi oobu bwaamba zyakupilusyigwa bwakazuzikizyigwa ciindi cakusaanguna iba Juda bakaceede nobakapilusyigwa ku Juda mu 537 B.C.E. (2 Makani 36:22, 23) Bwakazuzikizyigwa ciindi acimbi mu 1919, bananike baceede nobakagusyigwa mu “Babuloni Mupati” a Koresi Mupati Jesu Kristo. (Ciyubunuzyo 18:2; Isaya 44:28) ‘Nkokuboko’ kwa Jehova kweendelezya, kubunganya mbelele akuzyeembela calubomba. Jesu lwakwe wakati: “Ndime sikweembela mubotu, ndilizizi [mbelele] zyangu, azyalo zyangu zilindizi.”—Johane 10:14.

3. Ino mbuti Jehova mbwatondezya kuti ulabikkila maano kunzila mbozilanganyizyigwa mbelele zyakwe?

³ Businsimi ibuli kubbuku lya Isaya 40:10, 11 bukankaizya mbuli Jehova mbweembela bantu bakwe calubomba. (Intembauzyo 23:1-6) Awalo Jesu wakatondezya lubomba kuli basikwiiya bakwe akubantu bambi buyo naakali kubeleka mulimo wakwe anyika. (Matayo 11:28-30; Marko 6:34) Jehova alimwi a Jesu bakabasulaika beembezi naa basololi bamu Israyeli ibakalekelezya alimwi akudyaaminina butanga bwabo. (Ezekiele 34:2-10; Matayo 23:3, 4, 15) Jehova wakasyomezya kuti: “Njoofutula imbelele zyangu, kuti zitabi limbi cisaalo, nkabela njoobeteka makani aambelele ambelelenyina. Lino njoozibusizya mweembeli omwe, mulanda wangu Davida. Ngonguwe uyoozyeembela. Uyoozisanina akuba mweembeli wazyo.” (Ezekiele 34:22, 23) Muciindi eeci camamanino, Jesu Kristo, Davida Mupati ngo “mweembeli omwe” Jehova ngwaakasala kulanganya babelesi bakwe boonse aanyika, ibananike a “mbelele zimwi.”—Johane 10:16.

 Zipego Kumbungano Izizwa Kuli Jehova

4, 5. (a) Ino ncipego nzi citaambiki Jehova ncaakapa kubantu bakwe anyika? (b) Ino ncipego nzi Jesu ncaakapa kumbungano?

⁴ Jehova wakapa cipego citaambiki kumbungano ya Banakristo kwiinda mukubikka “mweembeli omwe” Jesu Kristo kuti alanganye babelesi bakwe anyika. Ikupa Musololi wakujulu kwakasinsimwa kubbuku lya Isaya 55:4 kuti: “Ngonguwe ngundabika kuti abe kamboni kumisyobo yabantu, musolozi asilutwe kubantu.” Banakristo bananike alimwi a “inkamu impati” bazwida kumisyobo, myaambo, bantu alimwi amilaka yoonse. (Ciyubunuzyo 5:9, 10; 7:9) Babamba mbungano yanyika yoonse, nkokuti “tanga lyomwe,” ilisololelwa a “mweembeli omwe” Jesu Kristo.

⁵ Jesu awalo wakapa cipego citaambiki kumbungano yakwe anyika. Wakapa beembezi mbasololela ibasyomeka balo kwiinda mukwiiya Jehova alimwi Jesu ibeembela butanga calubomba. Mwaapostolo Paulo wakacaamba cipego eeci cibotu mulugwalo ndwaakalembela Banakristo ku Efeso. Wakalemba kuti: “Ciindi ncaakatanta kujulu wakasaala busaali, alimwi wakaabila bantu zipego. . . . Bamwi wakabapa kuti babe baapostolo, bamwi kuti babe basinsimi, bamwi kuti babe bakambausi, abamwi kuti babe beembeli nanka baiyi, kuti basitikizye bazumini, akoonda milimo ya-Leza, akuyaka mubili wa-Kristo.”—Ba-Efeso 4:8, 11, 12.

6. Ino balangizi bananike ibakali mutubunga twabaalu bakatondezyegwa mbuli nzi kubbuku lya Ciyubunuzyo 1:16, 20, alimwi ino ncinzi cikonzya kwaambwa kujatikizya baalu basalidwe akati kambelele zimwi?

⁶ Eezi ‘zipego kubantu’ mbalangizi naa baalu ibasalwa a Jehova a Mwanaakwe kwiinda mumuuya uusalala ikutegwa beembele mbelele calubomba. (Incito 20:28, 29) Kumatalikilo, balangizi aaba boonse bakali baalumi Banakristo bananike. Kubbuku lya Ciyubunuzyo 1:16, 20, aabo ibakali mutubunga twabaalu mumbungano yabananike bakali kwiimininwa a “nyenyezi” naa “baangelo” ibali mujanza lya Kristo lyalulyo, nkokuti beendelezyegwa anguwe. Nokuba boobo, kuciindi cino cakumamanino imweelwe wabalangizi bananike bacili anyika nouyaabuceya, baalu Banakristo banji mumbungano nimbelele zimwi. Mbwaanga balangizi aaba balasalwa abaabo baiminina Kabunga Keendelezya kwiinda mukusololelwa amuuya uusalala, abalo balakonzya kwaambwa kuti bali mujanza lyalulyo (naa kusololelwa) lya Mweembezi Mubotu Jesu Kristo. (Isaya 61:5, 6) Mbwaanga baalu ibali mumbungano zyesu balalitesya kuli Kristo Imutwe wambungano, tuleelede kubamvwida.—Ba-Kolose 1:18.

Kuswiilila a Kulitesya

7. Ino ndulayo nzi mwaapostolo Paulo ndwaakapa kumakani ajatikizya mbotweelede kubabona balangizi Banakristo?

⁷ Mweembezi wakujulu Jehova Leza alimwi a Jesu Kristo bayanda kuti katubaswiilila akulitesya kubeembezi mbeendelezya Jesu balo mbaakapa mikuli mumbungano. (1 Petro 5:5) Kasololelwa amuuya uusalala, mwaapostolo Paulo wakalemba kuti: “Kamubayeeya basolozi banu abakamuletela makani aa-Leza. Kamuyeeya mbobakali kukala balo, elyo kamwiilizya lusyomo lwabo. Kamubaswiililisya baalu banu, mulitesye kulimbabo, nkaambo mbabalangilila myuuya yanu, alimwi babaanga basikuyoolyaambilila lwabo beni. Amusungwaale kuti kabacita boobo cakubotelwa, citali cakuusa, nkaambo eco tacimuleteli kululama pe.”—Ba-Hebrayo 13:7, 17.

8. Ino ncinzi Paulo ncatwaambila kuti ‘tuyeeye,’ alimwi ino mbuti mbotukonzya kuba bantu ‘baswiilila’?

⁸ Amubone kuti Paulo uli mukutwaambila kuti ‘tuyeeye’ naa kulangisya zintu zicitika akaambo kakulilemeka kabotu kwabaalu alimwi akutobela cikozyanyo cakusyomeka kwabo. Ulazumanana kutulaya kuti tubaswiilile alimwi akulitesya kubusolozi bwabaalumi aaba basalidwe. Sikwiiya Bbaibbele  R. T. France upandulula kuti mumulaka wini-wini wa Chigiliki, aawa ibbala lisanduludwe kuti “kamubaswiilila” talili “bbala libelesyegwa lyoonse kwaamba kumvwida, pele lyalo lipandulula ‘kuzulwa,’ icaamba kuzumina kusololelwa ambabo cakulisungula buya.” Tulabaswiilila baalu kutali buyo akaambo kakuti tulaililwa kucita boobo mu Jwi lya Leza, pele nkaambo kakuti tulazumina kuti balabuyandisya Bwami alimwi andiswe balatuyanda. Ikuti twazumina amoyo wesu kusololelwa ambabo tunookkomene.

9. Ino nkaambo nzi ncotweelede ‘kulitesya’ kunze lyakuswiilila?

⁹ Pele ino tweelede kucita buti ikuti naa tuladooneka kuti nzila njobasala baalu njenzila iiluzi yakucita zintu? Muciindi cili boobu kulitesya kulayandika. Kuswiilila kulakonzya kuuba-uba ikuti twaambo toonse twatumvwisya, pele tuyootondezya kuti tulalitesya nociba ciindi swebo kutugama notutatumvwisyi twaambo itwapa kuti kube malailile aali boobo. Aciindi cimwi Petro wakazooba mwaapostolo wakalitesya.—Luka 5:4, 5.

Twaambo Tone Itweelede Kutupa Kutobela Balangizi Banakristo

10, 11. Ino muunzila nzi balangizi mbobakaamba “makani aa-Leza” ku Banakristonyina mumwaanda wamyaka wakusaanguna amazuba aano?

¹⁰ Kulugwalo lwa Ba-Hebrayo 13:7, 17, iluzubuludwe atala aawa, mwaapostolo Paulo wakapa twaambo tone itutondezya ncotweelede kuswiilila akulitesya kubalangizi Banakristo. Kaambo kakusaanguna nkakuti balatwaambila “makani aa-Leza.” Kamuyeeya kuti ‘zipego kubantu’ Jesu nzyapa mbungano zijisi mulimo wakuti “basitikizye [basalali].” (Ba-Efeso 4:11, 12) Jesu wakalulamika kuyeeya alimwi abukkale bwa Banakristo bamumwaanda wamyaka wakusaanguna kwiinda mukubelesya beembezi basyomeka, ibamwi akati kabo bakasololelwa amuuya kutegwa balembe magwalo kumbungano. Wakabelesya balangizi basalidwe amuuya ikutegwa bayumye Banakristo bakusaanguna.—1 Ba-Korinto 16:15-18; 2 Timoteo 2:2; Tito 1:5.

¹¹ Mazuba aano, Jesu ulatusololela kwiinda ‘mumuzike musyomesi uucenjede’ wiimininwa a Kabunga Keendelezya alimwi abaalu basalidwe. (Matayo 24:45) Akaambo kakulemeka Jesu Kristo “Mweembezi Simutwe,” tulalutobela lulayo lwa Paulo lwakuti: “Mulemeke abo abamana milimo akati kanu, abasolozi banu bamu-Mwami, abaabo abamucenjezya.”—1 Petro 5:4; 1 Ba-Tesalonika 5:12; 1 Timoteo 5:17.

12. Ino mbuti balangizi ‘mbobalangilila myuuya yesu’?

¹² Ikaambo kabili ncotweelede kutobela nzyobaamba balangizi Banakristo nkakuti “mbabalangilila myuuya [yesu].” Ikuti babona kuti bukkale bwesu butusololela  kumapenzi kumuuya, balafwambaana kutupa lulayo kabajisi makanze aakutoolola. (Ba-Galatiya 6:1) Ibbala lyamu Chigiliki lyakasandululwa kuti “kulangilila” lyaamba “kutawona.” Kweelana ambwaakaamba sikwiiya Bbaibbele umwi, wakati “lipandulula kuzumanana kupakamana kucitwa amweembezi.” Kunze lyakupakamana kumuuya, ziindi zimwi baalu balaba acilabila masiku ikuyeeya buumi bwesu bwakumuuya. Sena tatukonzyi kulisungula kutobela beembezi aaba basiluyando, ibasoleka canguzu kwiiya mbwabikkila maano Jesu Kristo “mweembezi mupati wambelele”?—Ba-Hebrayo 13:20.

13. Ino nkuuli ni alimwi muunzila nzi balangizi alimwi a Banakristo boonse nkoobayoolyaambilila?

¹³ Ikaambo katatu keelede kutupa kulisungula kutobela nzyobaamba balangizi nkakuti mbabatulangilila kabali baabo ‘bayoolyaambilila beni.’ Balangizi balizi kuti mbeembezi bakutauka kwiinda mukusololelwa a Jehova Leza alimwi a Jesu Kristo Ibeembezi bakujulu. (Ezekiele 34:22-24) Jehova ngomwini mbelele, zyalo nzyaakaula “abulowa [bwa Mwanaakwe],” aboobo ulabikkila maano kunzila balangizi mbobalanganya butanga bwakwe, bwalo mbobeelede kulanganya calubomba. (Incito 20:28, 29) Aboobo, toonse tuyoolyaambilila kuli Jehova ikuti katutatobeli malailile aakwe. (Ba-Roma 14:10-12) Ikubaswiilila baalu basalidwe ncitondezyo cakuti tulalitesya kuli Kristo, Mutwe wambungano.—Ba-Kolose 2:19.

14. Ino ncinzi cikonzya kupa kuti balangizi Banakristo kabalyaambilila “cakuusa,” alimwi ino ncinzi cikonzya kutucitikila?

¹⁴ Paulo wakapa kaambo kane ncotweelede kulitesya kubalangizi Banakristo. Wakalemba kuti: “Kuti kabacita boobo cakubotelwa, citali cakuusa, nkaambo eco tacimuleteli kululama pe.” (Ba-Hebrayo 13:17) Akaambo kamukuli wakuyiisya, kweembela, kusolweda mumulimo wakukambauka, kulela bana babo alimwi akulanganya mapenzi aacitika mumbungano, baalu Banakristo balijisi mukuli mulemu. (2 Ba-Korinto 11:28, 29) Ikuti naa tatutobeli nzyobaamba, nkokuti mukuli wabo ulaindilila kulema. Eeci inga cabapa “kuusa.” Ikutatobela nzyobaamba tacimukondi Jehova alimwi cilakonzya kupa kuti tunyongane. Pele ikuti katubalemeka alimwi akubelekelaamwi, ibaalu balakonzya kubeleka milimo yabo cakukkomana, calo cikonzya kupa kuti kube luumuno alimwi akuubeleka cakukkomana mulimo wakukambauka makani aa Bwami.—Ba-Roma 15:5, 6.

Kutondezya Kulitesya

15. Ino mbuti mbotukonzya kutondezya kuti tulaswiilila alimwi akulitesya?

¹⁵ Kuli nzila zinji mbotukonzya kutobela nzyobaamba balangizi basalidwe. Ikutegwa tuzuzikizye ziyandika mucilawo, sena baalu bakasala kuba amuswaangano wamumulimo wamumuunda mumazuba alimwi aciindi iciyandika kuti tucince zintu nzyotucita lyoonse? Atusolekesye kutobela bubambe bupya. Tulakonzya kujana zilongezyo nzyotutayeeyeli. Ikuti mulangizi wamulimo uswaya kabunga kesu ka Ciiyo Cabbuku Cambungano, atusolekesye kutola lubazu mumulimo wakukambauka munsondo eeyo. Ikuti twapegwa makani mu Cikolo Camulimo Weendelezyegwa a Leza, tuleelede kujanika alimwi akukanana makani eesu. Mulangizi wa Ciiyo Cabbuku Cambungano kuti waambilizya kuti ndiswe tusalazya Ŋanda ya Bwami, tuleelede kuunka kukusalazya kweelana ambotukonzya mubuumi bwesu alimwi anguzu nzyotujisi. Kwiinda munzila eezi azimbi buyo zinji, tulakonzya kutondezya kuti tulalitesya kubaalumi Jehova a Mwanaakwe mbasalide kulanganya butanga.

16. Ikuti mwaalu kataciti zintu kweelana amalailile, nkaambo nzi eeci ncociteelede kutupa kuba bazangi?

¹⁶ Ziindi zimwi, mwaalu ulakonzya kucita zintu munzila iindene ambocilailila ciinga camuzike musyomesi a Kabunga Keendelezya kaciiminina. Ikuti wazumanana kucita boobu, ciyoomupa kuti akajane mulandu kuli  Jehova, “kumweembezi [wesu], sikulingula myuuya [yesu].” (1 Petro 2:25) Pele kwaalilwa kucita zintu bweelede naa kulubizya kwabaalu takeelede kuba kaambo kakulekela kulitesya kulimbabo. Jehova tabagwasyi bantu bataswiilili naa bazangi pe.—Myeelwe 12:1, 2, 9-11.

Jehova Ulabalongezya Balisungula Kutobela Zyaambwa

17. Ino balangizi besu tweelede kubabona buti?

¹⁷ Jehova Leza ulizi kuti baalumi mbasalide kuti babe balangizi tabalondokede. Pele ulababelesya, alimwi akwiinda mukubelesya muuya wakwe, ulabeembela bantu bakwe anyika. Mbubonya mbocibede kubaalu akulindiswe toonse—“inguzu zigambya zilazwa kuli-Leza, tazizwi kulindiswe tubeni pe.” (2 Ba-Korinto 4:7) Aboobo tuleelede kumulumba Jehova akaambo kamilimo njali mukucita kwiinda mubalangizi besu basyomeka, alimwi tuleelede kutondezya kuti tulatobela nzyobaamba.

18. Notulitesya kubalangizi, ino ncinzi cini ncotuli mukucita?

¹⁸ Balangizi balasoleka ikuba mbuli beembezi aabo Jehova mbapandulula kuti mbasalide kulanganya butanga mumazuba aamamanino, kweelana amajwi aali kubbuku lya Jeremiya 3:15 aakuti: “Njoomupa beembeli mbubonya mbuuyanda moyo wangu, nkabela bayoomusanina luzibo abusongo.” Masimpe, baalu mbotujisi balabeleka mulimo mupati wakuyiisya akukwabilila mbelele zya Jehova. Atuzumanane kutondezya kuti tulabalumba kapati akaambo kakubeleka canguzu kwiinda mukulisungula kutobela nzyobaamba, kuswiilila alimwi akulitesya. Kwiinda mukucita boobo, tuyootondezya kuti tulabalumba Beembezi besu bakujulu, nkokuti Jehova Leza alimwi a Jesu Kristo.

Kwiinduluka

• Ino mbuti Jehova alimwi a Jesu Kristo mbobatondezya kuti Mbeembezi basiluyando?

• Kunze lyakuswiilila, nkaambo nzi kulitesya ncokuyandika?

• Ino muunzila nzi zigwasya mbotukonzya kutondezya kuti tulalitesya?

[Mibuzyo yaciiyo]

[Cifwanikiso icili apeeji 29]

Baalu Banakristo balalitesya kubusolozi bwa Kristo

[Zifwanikiso izili apeeji 31]

Kuli nzila zinji mbotukonzya kulitesya kubeembezi mbasalide Jehova