Ijwi lya Jehova Lili Abuumi

Twaambo Tupati-Pati Kuzwa Mubbuku lya Isaya—II

ISAYA cakusyomeka ulabeleka mulimo wakwe kali musinsimi. Imulumbe ngwaakaamba wakukalalila bwami bwamisyobo iili kkumi bwa Israyeli wakacitika kale kweelana ambwaakasinsima. Lino ulijisi makani aambi aamba Jerusalemu mbwaya kuba kumpela.

Munzi wa Jerusalemu uya kunyonyoonwa, eelyo bantu bamumunzi baya kutolwa mubuzike. Pele lunyonyooko oolu taakabi ngamamanino aamunzi. Kwaakwiinda ciindi, bukombi bwakasimpe buya kutalisyigwa. Ooyu ngomulumbe wa Isaya 36:1–66:24. * Tulakonzya kugwasyigwa kwiinda mukulanga-langa zilembedwe muzyaandaano eezyi akaambo kakuti bunji bwabusinsimi mucibalo eeci kuli twaambo tupati kapati twazuzikizyigwa muciindi cino naa tuya kuzuzikizyigwa ampela aawa. Eeli bbuku lya Isaya alimwi lilijisi abusinsimi bukondelezya bwaamba Mesiya.

“BONA, MAZUBA AYOOSIKA”

(Isaya 36:1–39:8)

Mumwaka wakkumi aine wabulelo bwa Mwami Hezekiya (732 B.C.E.), bana Asuri bamusaala Juda. Jehova wasyomezya kuti ulamuvwuna Jerusalemu. Kusaala ooku kwakamana mungelo wa Jehova omwe luzutu naajaya basikalumamba babana Asuri bali 185,000.

Hezekiya waciswa. Jehova wawiingula mupailo wakwe eelyo wapona, wamuyungizyila amyaka yakupona iili 15. Mwami wa Babuloni naatuma bantu bakwe kuti bakamulumbe, cakutayeeya Hezekiya wabatondezya loonse lubono lwakwe. Isaya waamba mulumbe wa Jehova kuli Hezekiya kuti: “Bona, mazuba ayoosika zintu zyoonse basikale bako nzibakayobwede kusikila sunu ziyootolwa ku Babuloni.” (Izaya 39:5, 6, BT) Kwiinde buyo myaka iinda aaniini kumwaanda wamyaka, businsimi bwazuzikizyigwa.

Mibuzyo Yamu Magwalo Iingulwa:

38:8—Ino ni “ntaamu” zili aawo cimvwiide mpocakeelede kuzwa? Mbwaanga zipimyo zyakubona ciindi mpocataana zyakali kubelesyegwa mu Egepita amu Babuloni mumwaanda wamyaka walusele B.C.E., ntaamu eezyi zilakonzya kwaamba cipimyo caciindi, nkokuti myaka njaakapona Ahazi swaabo Hezekiya. Ambweni kwakali amanela naa mutaantilo muŋanda yamwami. Cintu cakabikkidwe munsi aamanela ambweni mukuya kwaciindi cakali kucita cimvwiide amanela aawo alo aakali kubelesyegwa kupimya ciindi kubona mpocataana.

Ziiyo Kulindiswe:

36:2, 3, 22. Nekuba kuti wakagusyigwa amulimo wakuyobola mali, Sebina wakalekelwa  kuti azumanane kubeleka kumwami kali mulembi wayooyo wakamulida busena. (Isaya 22:15, 19) Ikuti twagusyigwa amulimo mumbungano ya Jehova akaambo kakaambo kamwi, sena tatukonzyi kutolelela kumubelekela Leza munzila iili yoonse njanga wati tubeleke?

37:1, 14, 15; 38:1, 2. Muziindi zyamapenzi, ncamaano kulanga kuli Jehova mumupailo akuba alusyomo luyumu muli nguwe.

37:15-20; 38:2, 3. Hezekiya wakakatazyigwa kapati Jerusalemu naakali kuyanda kunyonyoonwa abana Asuri, nkaambo kunyonyoonwa kwa Jerusalemu, lyakali kuyooba sampu kuzina lya Jehova. Naakabona kuti bulwazi bwakamujisi bulakonzya kumujaya, Hezekiya wakaba atwaambo tunji mumizeezo ikutali buyo kuti ulafwa. Cakamukatazyide kapati mumizeezo cakali cakuti ikuti wafwa katajisi mwana, taku wakali kukonzya kuba mwami muzyalani lya Davida. Alimwi wakali katazyidwe nkaambo kwakali kuyoobula wakali kukonzya kusololela munkondo yakulwana bana Asuri. Mbweena mbuli Hezekiya, tubona kuti kusalazyigwa kwazina lya Jehova alimwi akuzuzikizyigwa kwamakanze aakwe nzyeziinda kuyandika kwiinda lufwutuko lwesu.

38:9-20. Oolu lwiimbo lwa Hezekiya lutuyiisya kuti taku cintu ciinda kuyandika kapati mubuumi ikwiinda kutembaula Jehova.

“UYOOYAKULULWA”

(Isaya 40:1–59:21)

Naakamana buyo kwaamba lunyonyooko lwa Jerusalemu akupa kuti bantu batolwe mubuzike mu Babuloni, Isaya wakasinsima kuyakululwa kwa Jerusalemu. (Isaya 40:1, 2) Bbuku lya Isaya 44:28, lilati: “[Jerusalemu] uyooyakululwa.” Mituni yabana Babuloni iya kusoogwa mbuli “zibbutu buyo.” (Isaya 46:1, NW) Babuloni uya kunyonyoonwa. Zyoonse eezyi zyazuzikizyigwa nokwainda myanda yamyaka yobilo.

Jehova uya kupa kuti babelesi bakwe babe mbuli “mumuni wabamasi.” (Isaya 49:6) Babuloni wa “kujulu” naa beendelezi, ba “yoomwaika mbuli busi,” eelyo balelwa bakwe “bayoofwa mbuli [nzinini],” pele ‘mwana musimbi wa Zioni uuli mubuzike uya kwaangununa zyaanzyo zili munsingo yakwe.’ (Isaya 51:6; 52:2) Kuli baabo baboola kuli nguwe alimwi ibamvwa, Jehova waamba kuti: “Njootanga anywe cizuminano citamani, nkukuti luzyalo lusyomeka ndundafwida Davida.” (Isaya 55:3) Ikupona kweelana akuyanda kwa Leza kululeme kuletela “busekelezi muli-Jehova.” (Isaya 58:14) Pele zibi zyabantu ‘zyabaandaanya kuli Leza.’—Isaya 59:2.

Mibuzyo Yamu Magwalo Iingulwa:

40:27, 28—Nkaambo nzi Israyeli ncaakaamba kuti: “Inzila yangu tiiboneki kumeso aa-Jehova, alubeta lwangu lwaindilila kuzwa kuli-Leza wangu”? Bama Juda mu Babuloni kulibonya kuti bakali kuyeeya kuti kupenga nkobakali kupenga kwakaboola akaambo kakuti Jehova tanaakali kubwenyi. Bakayeekezyegwa kuti Babuloni tiibwakali busena Mulengi wanyika mbwaakali kukonzya kutabona. Kayi, walo taku nalema naa kunetuka.

43:18-21—Nkaambo nzi bakajoka mubuzike ncobakaambilwa kuti “[ba]tayeeyi makani aakale”? Eeci tiicakali kwaamba kuti bakeelede kuluba milimo yakunununa Jehova njaakacita. Pele Jehova wakali kuyanda kuti bamutembaule nkaambo wacita “inkani impya” yalo yakali kukonzya kubagwasya, ikuba alweendo lubotu lwakuya kwabo ku Jerusalemu, ikapati kuti bainda nzila iidabula iinda mucimpayuma. Ba “nkamu impati” ibazwa “mumapenzi ayo mapati” abalo baya kuba azintu zipya alimwi atwaambo twakutembauda Jehova.—Ciyubunuzyo 7:9, 14.

49:6—Mbuti Mesiya mbwali “mumuni wabamasi,” nekuba kuti mulimo wakwe waanyika wakali kuubelekela buyo bana Israyeli? Cili boobu akaambo kaceeco cakacitika Jesu naakafwa. Ibbaibbele ku Isaya 49:6 lyaamba basiciiya bakwe. (Incito 13:46, 47) Mazuba aano, Banakristo bananike  kabagwasyigwa abakombi bankamu mpati balabeleka kabali “mumuni wabamasi” ikugwasya bantu “[kusikila] kumagolelo aanyika.”—Matayo 24:14; 28:19, 20.

53:10—Muunzila nzi Jehova mwaakakondwa kwiinda mukulekela Mwana wakwe kuti afwe? Kulibonya kuti cakamucisa Jehova mbwaanga ngu Leza siluzyalo alimwi silweetelelo ikubona Mwana wakwe ngwayanda kapenga. Nekuba boobo, wakakondwa akaambo kakulisungula kumvwida ikwa Jesu alimwi akubona kupenga kwakwe alufwu ncozyakali kukonzya kuleta.—Tusimpi 27:11; Isaya 63:9.

53:11—Nduzibo nzi lwalo ‘lululeme ndwayoolulamikila bantu banji’ Mesiya? Oolu nduzibo Jesu ndwaakaba andulo naakaboola anyika akuba muntu wanyama, akupenga citaambiki kusikila kulufwu. (Ba-Hebrayo 4:15) Aboobo wakapa cituuzyo cacinunuzyo calo cakali kuyandika kugwasya Banakristo bananike abankamu mpati kutegwa babe acilongwe a Leza.—Ba-Roma 5:19; Jakobo 2:23, 25.

56:6—Mbabaani “bazwakule,” alimwi muunzila nzi mbobakakonzya “kujatisya cizuminano ca [Jehova]”? “Bazwakule” ni “mbelele zimwi” zya Jesu. (Johane 10:16) Balajatisya kucizuminano cipya mukuti balaccilila milawo yacizuminano eeco, kababeleka antoomwe kwiinda mububambe bubikkidwe, balya cakulya comwe cilya Banakristo bananike, alimwi balabagwasya bananike mumulimo wakukambauka Bwami awakugwasya bantu kuba basiciiya.

Ziiyo Kulindiswe:

40:10-14, 26, 28. Jehova ulaanguzu alimwi ulijisi moyo mubotu, ngusinguzu zyoonse alimwi nguuinda busongo, alimwi ulatwiinda kwabene kumvwisya zintu.

40:17, 23; 41:29; 44:9; 59:4. Kubamba cilongwe abamasi alimwi amituni “zyabuyo.” Kusyoma muli zyeezyi nkusowa ciindi.

42:18, 19; 43:8. Ikutabikkila maano ku Jwi lya Leza lilembedwe akutayanda kuswiilila milawo yakwe kwiinda mu “muzike musyomesi uucenjede” nkokuti kumuuya nkofwaala alimwi nkuba basinke matwi.—Matayo 24:45.

43:25. Jehova ulamanya milandu akaambo kakwe mwini. Kwaangululwa kwesu kucibi akulufwu akujana buumi tazili zintu ziyandika kapati kwiinda mbokuyandika kusalazyigwa kwazina lya Jehova.

44:8. Tulagwasyigwa a Jehova walo uukkalikenyi alimwi uutazungaani mbuli bbwe liyale. Tatweelede kuyoowa kukambauka kwaamba kuti ngu Leza mwini-mwini wakasimpe.—2 Samuele 22:31, 32.

44:18-20. Kusyoma mituni ncitondezyo cakuti tuli nyongene mumoyo. Taku cimbi ceelede kulida Jehova busena mumoyo wesu.

46:10, 11. Ikukonzya ‘kuzuzikizya lulayo lwakwe’ nkokuti kuzuzikizya makanze aakwe, ncisyomezyo cakuti Jehova Leza ngu Leza mwini-mwini wakasimpe.

48:17, 18; 57:19-21. Ikuti katusyoma kuti Jehova uya kutufwutula, akuti twaba acilongwe anguwe, twaiccilila milawo yakwe, luumuno lwesu luya kuvwula mbuli meenda mumulonga, eelyo milimo yesu yabululami iya kuvwula mbuli mayuwe aalwizi. Aabo bataccilili Jwi lya Leza bali mbuli “maanzi aalwizi aayuwana.” Tabajisi luumuno.

52:5, 6. Bana Babuloni cakutayeeyesya bakati Leza wakasimpe tanaakajisi nguzu. Tiibakabona kuti ikutabakkomanina bantu bakwe Jehova nkakaambo kakapa kuti bana Israyeli banjile mubuzike. Ikuti bamwi bacitikilwa ntenda, ncibotu kutabinda kwaamba kuti eeci naa eciya ncecapa kuti kube ntenda.

52:7-9; 55:12, 13. Tulijisi twaambo tutaleli kuli totatwe tutupa kutola lubazu cakukondwa mumulimo wakukambauka Bwami akugwasya bantu kuba basiciiya. Maulu eesu alatambulwa kubabombe myoyo bafwide nzala kumuuya. Tulabonana a Jehova “kumeso” naa kuba acilongwe cini-cini anguwe. Alimwi tulaya ampela kumuuya.

52:11, 12. Kutegwa tweelele kubweza “zibelesyo zya-Jehova,” nkokuti mulimo wakwe uusetekene,  tweelede kuti katusalala kumuuya akumubili.

58:1-14. Kulyaaba akululama kwakuupaupa ameso nkwabuyo. Zizwa kumulomo wabakombi ba Leza beni-beni zyeelede kuba zyamasimpe alimwi milimo yabo yeelede kutondezya luyando kuli babunyina.—Johane 13:35; 2 Petro 3:11.

59:15b-19. Jehova ulabona zicitika kubantu alimwi ulabweza ntaamu casika ciindi cakwe.

UYA KUBA “MUSINI WABWEEBESI”

(Isaya 60:1–66:24)

Kaamba kujosyegwa kwabukombi bwakasimpe lyansiku alimwi asunu, bbuku lya Isaya 60:1 lilati: “Buka, [Jerusalemu] umunike, nkaambo mumuni wako wasika, abulemu bwa-Jehova bwakupasukila.” Zioni “uyooba musini wabweebesi mujanza lya-Jehova.”—Isaya 62:3.

Isaya wapaila kuli Jehova kwiiminina basicisinyina ibaya kweempwa kabali mubuzike mu Babuloni. (Isaya 63:15–64:12) Naabona mbobaindenyi babelesi bakasimpe ababelesi bakubeja, musinsimi waamba mbuli mbwaya kubalongezya Jehova aabo bamubelekela.—Isaya 65:1–66:24.

Mibuzyo Yamu Magwalo Iingulwa:

61:8, 9—Ino “cizuminano citamani” ncinzi alimwi ino “lunyungu”mbabaani? Eeci ncizuminano cipya Jehova ncaazuminana a Banakristo bananike. “Lunyungu” ni “mbelele zimwi,” ituulunzuma tuzumina mulumbe wabo.—Johane 10:16.

63:5—Ino mbuti bukali bwa Jehova mbobumugwasya mwini? Bukali bwa Leza ncintu cikonzya kunyonwa kweelana ancayanda kucita aciindi aawo, nkokuti bukali bwakwe mbwabululami. Bukali bwakwe bulamugwasya akumupa kulwana nkondo yabululami.

Ziiyo kulindiswe:

64:6. Bantu batalondokede tabakonzyi kulifwutula. Cipaililo cakumanya milandu, kweelanizyigwa amilimo yabo iiluleme, ibonwa kuti ncintu buyo cabuyo.—Ba-Roma 3:23, 24.

65:13, 14. Jehova ulabalongezya babelesi bakwe basyomeka, ulabapa cakulya cakumuuya cinji.

66:3-5. Jehova uli kusulide kuupaupa ameso.

“Amukondwe”

Ibusinsimi bwakali kwaamba kuyakulula bwakali kukkomanisya kuba Juda basyomeka ibakali mubuzike ku Babuloni. Jehova wakati: “Amukondwe akusekelela lyoonse nkaambo kaceeci ncinsi lenge, nkaambo ndalenga Jerusalemu, ube cikondelezyo, abantu bawo, babe cibotezyo.”—Isaya 65:18.

Andiswe mbweena tupona muziindi mudima nowavwumba nyika alimwi bamasi bali mumudima uusiya mbi. (Isaya 60:2) Tupona mu “ziindi zikataazya.” (2 Timoteo 3:1) Aboobo, mulumbe wa Jehova walufwutuko uuli mubbuku lya Isaya ulayandika kapati kuli ndiswe.—Ba-Hebrayo 4:12.

Bupanduluzi buyungizidwe

[Cifwanikiso icili apeeji 4]

Sena mulikazyi kaambo kapati kakapa kuti Hezekiya apaile kuti avwunwe kuli bana Asuri?

[Cifwanikiso icili apeeji 7]

“Ma! Abota atala lyamalundu maulu aayooyo uuleta makani mabotu”