Twaambo Tupati-Pati Kuzwa Mubbuku lya Jeremiya
Ijwi lya Jehova Lili Abuumi
Twaambo Tupati-Pati Kuzwa Mubbuku lya Jeremiya
ELO KAKA mapenzi ngaakaamba Jeremiya ayelede kuti akabayumya mate bantu mbaakali kukkala limwi! Wakati tempele yeebeka iyakali busena bwakukombela kwamyaanda yamyaka iinda kuli yotatwe yakali kuyooumpwa yoonse. Munzi wa Jerusalemu anyika ya Juda yakali kuyooba tongo alimwi bantu bakkala mumo bakali kuyootolwa buzike. Makani aamba twaambo ootu alimwi ambeta zimwi zyakaambwa alajanika mubbuku lyamu Bbaibbele ilyabili kukukomena, nkokuti bbuku lya Jeremiya. Alimwi lilaamba zyakacitikila Jeremiya naakali kubeleka mulimo wakwe cakusyomeka kwamyaka iili 67. Makani aali mumo taalembedwe kweelana azintu mbozyakali kutobelana kucitika pe, pele kweelana amutwe.
Nkaambo nzi ncotweelede kuyandisya bbuku lyamu Bbaibbele lya Jeremiya? Businsimi buli mulindilyo ibwakazuzikizyigwa bulayumya lusyomo lwesu muli Jehova mbwaanga ngusikuzuzikizya nzyasyomezya. (Isaya 55:10, 11) Kuli kukozyanya mazuba aano kumulimo ngwaakabeleka Jeremiya kali musinsimi alimwi abantu mbobakacita kumulumbe ngwaakali kubaambila. (1 Ba-Korinto 10:11) Kunze lyaboobo, makani aamba mbwaakabeendelezya bantu bakwe Jehova alatondezya bube bwakwe alimwi alatujatikizya kapati.—Ba-Hebrayo 4:12.
“BANTU BANGU BALIJISI ZIBI ZYOBILE NZIBACITIDE”
Jeremiya wakapegwa mulimo wabusinsimi mumwaka wa 13 wabulelo bwa Josiya, imwami wa Juda. Kwakaliceede myaka iili 40 kuti Jerusalemu unyonyoonwe mu 607 B.C.E. (Jeremiya 1:1, 2) Ikwaambilizya lubeta kwacitwa ikapati mumyaka yakumamanino iili 18 yabulelo bwa Josiya kwayubununa bubi bwa Juda alimwi akwaamba lubeta Jehova ndwayanda kucita kucisi eeci. Jehova wati: “Njoosandula Jerusalemu ube zitantaala, . . . ayalo minzi yoonse ya-Juda njooisandula ibe matongo aabula bantu bakala muno.” (Jeremiya 9:11) Nkaambo nzi? Jehova waamba kuti: “Nkaambo bantu bangu balijisi zibi zyobile nzibacitide.”—Jeremiya 2:13.
Makani aambi aamba kupilusyigwa kwabaceede iibeempwa. (Jeremiya 3:14-18; 12:14, 15; 16:14-21) Pele mutumwa kunyina naatambulwa pe. “Silutwe iwakabikidwe mumilimo yaŋanda ya-Jehova” wauma Jeremiya akumubika mucitolokesi masiku woonse.—Jeremiya 20:1-3.
Mibuzyo Yamu Magwalo Iingulwa:
1:11, 12—Nkaambo nzi kulangilila kwa Jehova kutegwa azuzikizye majwi aakwe ncokuswaangene a “musako waalmondi”? Cisamu caalmondi ncicisamu cimwi cifwambaana kusyuuka kumwaka. Mucikozyanyo Jehova wali “kufuma kubatuma [basinsimi bakwe]” kutegwa bacenjezye bantu bakwe makani aalubeta alimwi wali ‘kulangila’ mane luzuzikizyigwe.—Jeremiya 7:25.
2:10, 11—Ino ncinzi cakapa kuti micito yabana Israyeli batasyomeki igambye? Zisi zitakombi Leza zyakumbo kusikila ku Kitimu alimwi azili kujwe kusikila ku Kedara nozyakali kuleta baleza bazisi zimbi kutegwa bayungizye kubaleza babo, imuzeezo ooyu wakubikka baleza beenzu abusena bwabaleza babo wakagambya kapati. Pele bana Israyeli bakaleka kutobela Jehova, bakatalika kulemeka baleza bataponi muciindi cakulemeka Leza uupona.
3:11-22; 11:10-12, 17—Nkaambo nzi Jeremiya ncaakabikkilizya abwami bwamisyobo iili kkumi yakunyika mumulumbe wakwe walubeta, nokuba kuti Samaria wakaliwide kale mu 740 B.C.E.? Cili boobu nkaambo kunyonyoonwa kwa Jerusalemu mu 607 B.C.E. lwakali lubeta lwakacitwa a Jehova kumusyobo woonse wa Israyeli, ikutali Juda alikke. (Ezekiele 9:9, 10) Kunze lyaboobo, nobwakawa bwami bwamisyobo iili kkumi, ibulangizi bwakupilukila bwakazumanana kwiimininwa mu Jerusalemu, kayi milumbe yabasinsimi ba Leza lyoonse yakali kubikkilizya abana Israyeli.
4:3, 4—Ino malailile aaya apandulula nzi? Iba Juda batasyomeki bakeelede kubamba, akulima kabotu alimwi akusalazya bulongo bwamyoyo yabo. Bakeelede kugusya “lulomo” lwamyoyo yabo, nkokuti kugusya mizeezo mibyaabi, ikulimvwa alimwi amakanze aataluzi. (Jeremiya 9:25, 26; Incito 7:51) Kwakali kuyandika kucinca bukkale. Bakeelede kuleka kucita zintu zibyaabi akutalika kucita zintu zikonzya kupa kuti Leza abaleleke.
4:10; 15:18—Ino mbuti Jehova mbwaakabeena bantu bakwe bazangide? Mumazuba ngaakali kupona Jeremiya, kwakali basinsimi ‘bakali kusinsima zyakubeja.’ (Jeremiya 5:31; 20:6; 23:16, 17, 25-28, 32) Jehova kunyina naakabakasya kwaambilizya mulumbe wakubeja.
16:16—Ino ncinzi cipandululwa amajwi aakuti Jehova “Ndaita basikuzuba banji” alimwi a “bavwimi banji”? Majwi aaya alakonzya kwaamba kutuma basinkondo kuti bayandaule ba Juda batasyomeki balo Jehova mbayanda kuti abeteke. Kweelana abwaamba bbuku lya Jeremiya 16:15, kapango aaka inga kakaamba ikuyandaula bana Israyeli beempwa.
20:7—Ino mbuti Jehova ‘mbwaakazunda’ Jeremiya alimwi akumufwubaazya? Akaambo kakusulaikwa akupenzyegwa naakali kwaambilizya lubeta lwa Jehova, Jeremiya ambweni wakalimvwa kuti tanaakajisi nguzu zyakuzumanana. Pele Jehova wakabelesya nguzu zyakwe ikukazya mizeezo ya Jeremiya, eelyo akumupa nguzu zyakuti azumanane. Aboobo Jehova wakamufubaazya Jeremiya kwiinda mukumupa kucita zintu nzyaakali kuyeeya kuti takonzyi kuzicita.
Ziiyo Kulindiswe:
1:8. Ziindi zimwi Jehova ulabavuna bantu bakwe kukupenzyegwa, ambweni kwiinda mukuleta mubetesi uutasalululi, mukugusya mubelesi silunya acuuno akubikka muntu mubombe antela kwiinda mukupa nguzu kubabelesi bakwe kuti baliyumye.—1 Ba-Korinto 10:13.
2:13, 18. Bana Israyeli batasyomeki bakacita zintu zibi zyobilo. Bakaleka kutobela Jehova sikupa kupona buumi bubotu, busolozi alimwi alukwabililo. Mumaambilambali inga twati bakasya migoti yameenda kwiinda mukuyandaula basikalumamba bacisi ca Egepita alimwi aa Asuri. Mumazuba aano, ikuleka kutobela Leza wakasimpe akutalika kutobela busongo bwabantu, nzyobaamba naa twaambo twacisi nkugusya “kasensa kamaanzi aabuumi” akubikka “mikalo iiandaukide.”
6:16. Jehova ukulwaizya bantu bakwe bazangide kuti baime, balilingule alimwi akupilukila mu “nzila” njobakali kwiinda bamausyi basyomeka. Sena tatweelede kulilingula ciindi aciindi ikutegwa tubone kuti naa tuli munzila mwini Jehova mwayanda kuti twiinde?
7:1-15. Ikusyoma tempele, kabaibwene mbuli kuti ncintu cimwi ciyeeyelwa kuti cilakwabilila tiikwakabafwutula ba Juda pe. Tuleelede kweenda mulusyomo kutali mukubona.—2 Ba-Korinto 5:7.
15:16, 17. Tulakonzya kulilwana penzi lyakutyompwa mbuli bwakacita Jeremiya. Tulakonzya kucita oobo kwiinda mukuba aciiyo cesu ca Bbaibbele, mukusumpula Jehova mumulimo alimwi akwiinda mukutayanzana abantu babyaabi.
17:1, 2. Zibi zyakali kucita bama Juda zyakapa kuti zipaizyo zyabo zitamukkomanisyi Jehova. Ikutalilemeka kupa kuti zipaizyo zyesu zyakutembaula atazizumini Leza.
17:5-8. Tulakonzya kubasyoma bantu alimwi ambunga zilanganya bantu ikuti kazicita zintu kweelana akuyanda kwa Leza anjiisyo zili mu Bbaibbele. Pele caboola kumakani aalufwutuko, luumuno alimwi alukwabililo lwini-lwini, Jehova alikke ngotweelede kusyoma.—Intembauzyo 146:3.
20:8-11. Kusulaikwa, kukazyigwa antela kupenzyegwa takweelede kututyompya mumulimo wesu wakukambauka Bwami.—Jakobo 5:10, 11.
“AMULETE INSINGO YANU MUNSI LYAJOKO LYAMWAMI WA-BABULONI”
Jeremiya waamba makani aalubeta kubami bamamanino bone bamusyobo wa Juda alimwi akubasinsimi babeji, beembezi babyaabi alimwi akubapaizi basilweeno. Jehova wakaamba boobu naakali kukozyanisya baabo bakazumanana kusyomeka kunkuyu zibotu: “[Njoobalanga a] Meso aangu kukubapa coolwe.” (Jeremiya 24:5, 6) Businsimi buli mumbazu zyotatwe mucaandaano 25 bulafwiinsya lubeta lwakapandululwa kapati muzyaandaano zitobela.
Bapaizi alimwi abasinsimi bakanza kujaya Jeremiya. Mulumbe ngwabaambila ngwakuti beelede kubelekela mwami waku Babuloni. Jeremiya waambila Mwami Zedekiya kuti: “Amulete insingo yanu munsi lyajoko lyamwami wa-Babuloni.” (Jeremiya 27:12) Nokuba boobo, “Oyo iwakamwaisya ba-Israyeli ngonguwe uuyoobaboozya.” (Jeremiya 31:10) Kuli kaambo kabotu kakapa kuti ba Rekabu basyomezyegwe zintu zibotu. Jeremiya wabikkwa muntolongo iili “mulubuwa lwabalindizi.” (Jeremiya 37:21) Jerusalemu wanyonyoonwa, eelyo bunji bwabantu bamumo batolwa buzike. Jeremiya amulembi wakwe Balaki abamwi tiibatolwa mubuzike pe. Nokuba kuti Jeremiya wabacenjezya bantu bayoowede kuti bataccijili ku Egepita, tiibamumvwida pe. Zyaandaano 46 kusikila ku 51, zyaamba mulumbe Jeremiya ngwaakamba kumasi.
Mibuzyo Yamu Magwalo Iingulwa:
22:30—Sena Mulawo ooyu wakamanizya bubambe bwakuti Jesu Kristo akkale acuuno ca Davida? (Matayo 1:1, 11) Peepe. Mulawo ooyu wakakasya baluzubo lwa Jehoyakimu boonse “kukala acuuno cabwami bwa-Davida . . . mucisi ca Juda.” Jesu wakali kuyoolelela kujulu kutali acuuno cabwami caku Juda pe.
23:33—Ino ‘mukuli wa Jehova’ ncinzi? Mumazuba aakali kupona Jeremiya, makani mapati aakaambwa amusinsimi kwaamba lunyonyooko lwamunzi wa Jerusalemu wakali mukuli kubantu mbaakali kukkala limwi. Bantu batakali kumvwa wakali mukuli kuli Jehova cakunga wakali kuyoobakaka. Mbubwenya buyo, mulumbe uuli mu Magwalo uujatikizya kunyonyoonwa kwa Bunakristo Bwanyika mukuli kuli mbubo, alimwi ibantu bataswiilili mulumbe baminya Leza.
31:33—Ino mbuti mulawo wa Leza mbuulembedwe mumyoyo? Ikuti muntu uuyandisya mulawo wa Leza kapati cakuti watalika kulombozya kucita kuyanda kwa Jehova, tulakonzya kwaamba kuti mulawo wa Leza ulilembedwe mumoyo wakwe.
32:10-15—Ino kulemba magwalo obile aajisi makani aakozyene kwakajisi mulimo nzi? Lugwalo lutanamatikidwe lwakali lwakubelesya mukuvwuntauzya. Olo lunamatikidwe lwakali kugwasyilizya kusinizya kululama kwamakani aakali muli loolo lutamatikidwe kuti kwayandika. Kwiinda mukutobela mbokucitwa mumulawo nociba ciindi notubamba cizuminano amuntu wamumukowa antela musyomima, Jeremiya wakapa cikozyanyo cibotu kulindiswe.
33:23, 24—Ino “nzubo zyobile” zyaambwa aawa ninzubo nzi? Luzubo lumwi nduzubo lwabwami lwa Mwami Davida, eelyo oolu lumbi nduzubo lwabapaizi bana Aroni. Munzi wa Jerusalemu atempele ya Jehova nozyakanyonyoonwa, cakaboneka kuti Jehova wakazikaka nzubo eezi zyobilo alimwi kunyina naakali kuyooba abwami anyika naa kutalisya bukombi bwakwe alimwi.
46:22—Nkaambo nzi jwi lyaku Egepita ncolikozyanyisigwa kukusokosya kwanzoka? Eeci cilakonzya kukozyanyisyigwa akusokosya kwanzoka ipilukila nkoyazwa antela kubula majwi kwa Egepita akaambo kakunyonyoonwa. Mukozyanyo ooyu alimwi utondezya mbocitakonzyi kubagwasya baleli bamu Egepita kusama cikozyanyo canzoka iisetekene antela citambala ciyeeyelwa kuti inga capa kuti leza mukaintu uuli muciimo canzoka uutegwa Uatchit inga wabakwabilila.
Ziiyo Kulindiswe:
21:8, 9; 38:19. Kakuciceede buyo ciindi ciniini kuti Jerusalemu anyonyoonwe, Jehova wakabapa ciindi cakuti bantu bakkala mu Jerusalemu bateempwi ibakeelede kujayigwa balisalile cakucita. Masimpe buya, “luzyalo lwakwe ndupati.”—2 Samuele 24:14; Intembauzyo 119:156.
31:34. Elo kaka cilakkazyika moyo ikuziba kuti Jehova tabusyi zibi nzyaakalekelela kale akuyoomusubula muntu kumbele!
38:7-13; 39:15-18. Jehova talubi mulimo ngotwakabeleka cakusyomeka, walo uubikkilizya ‘kubelekela basalali.’—Ba-Hebrayo 6:10.
45:4, 5. Kweelana ambocakabede nokwakaceede mazuba masyoonto kuti Juda anyonyoonwe, ikupona ‘kumazuba aamamanino’ abweende bwazintu buli sunu tacili ciindi cakuyandaula “zintu zipati” mbuli buvwubi, mpuwo alimwi akusyoma lubono.—2 Timoteo 3:1; 1 Johane 2:17.
JERUSALEMU WAUMPWA
Mmumwaka wa 607 B.C.E., Zedekiya ujisi myaka yakulela iili 11. Mwami Nebukadinezara waku Babuloni waulwana munzi wa Jerusalemu kwamyezi iili 18. Mubuzuba bwaciloba bwamwezi wasanu wamwaka wa 19 wabulelo bwa Nebukadinezara, Nebuzaradana imupati wabasikutabilila ‘wasika’ ku Jerusalemu. (2 Bami 25:8) Ambweni kali mucilabba cakwe cili anze lyamunzi, Nebuzaradana walanga-langa mbobubede bukkale akuyeeya nzila mbwanga walwana. Nokwainda mazuba otatwe mubuzuba bwakkumi bwamwezi, ‘wanjila’ mu Jerusalemu. Eelyo waumpa munzi.—Jeremiya 52:12, 13.
Jeremiya ulatwaambila twaambo toonse twaamba zyakuwa kwa Jerusalemu. Mbwazipandulula zintu cilapa kweema. Ikweema ooku kulajanika mubbuku lyamu Bbaibbele ilya Malilo.
[Cifwanikiso icili apeeji 8]
Mulumbe ngwaakali kwaambilizya Jeremiya wakali kubikkilizya lubeta lwa Jehova kuli Jerusalemu
[Cifwanikiso icili apeeji 9]
Ino mbuti Jehova ‘mbwaakazunda’ Jeremiya?
[Cifwanikiso icili apeeji 10]
“Mbubonya mbuli inkuyu ezi imbotu, mbubonya obo mbubabede mumeso aangu bantu ba-Juda batolwa mubuzike.”—Jeremiya 24:5.