Bubi Bwazyibwa Nkobuzwida

MUMWAANDA wamyaka wakusaanguna, ba Juda banji bakali kulindila kusika kwa Mesiya wakasyomezyedwe. (Johane 6:14) Jesu naakasika wakabaumbulizya alimwi akubapa luzibo lunji lwa Jwi lya Leza. Wakaponya bantu bakacisidwe, wakasanina bakafwide nzala alimwi akwiimika muwo. (Matayo 8:26; 14:14-21; 15:30, 31; Marko 5:38-43) Alimwi wakaamba majwi aa Jehova amakani aamba zyacisyomezyo cabuumi butamani. (Johane 3:34) Makani ngaakaamba alimwi amilimo yakwe zyakatondezya kuti Jesu wakali Mesiya, walo wakeelede kuvwuna bantu kucibi alimwi akumapenzi aboola akaambo kacibi.

Kakunyina abuyumuyumu, basololi babukombi iba Juda bakeelede kuba mbabo kumbele kutambula Jesu, kuswiilila nzyaamba alimwi akuzumina malailile aakwe. Pele tiibakacita oobo. Muciindi caboobo, bakamusula, bakamupenzya akutalika kulivwiya-vwiya kuti bamulobye.—Marko 14:1; 15:1-3, 10-15.

Jesu tanaakalubizya kubasinganya baalumi aaba babyaabi. (Matayo 23:33-35) Nokuba boobo, wakalizi kuti kuli umwi iwakali kubapa kucita boobo. Wakabaambila kuti: “Nywebo muzwa kuli uso Saatani, muyanda kucita iziyanda uso. Walo wali mujayi kuzwa kumatalikilo, alimwi takede mubwini, nkaambo takukwe bwini mulinguwe. Naamba cakubeja waamba zyakwe mwini, nkaambo nguubeja, ngowisi wababeja.” (Johane 8:44) Nokuba kuti Jesu wakazumina kuti bantu balakonzya kucita zintu zibyaabyi, wakakwaamba kwini kuzwida bubi, nkokuti kuli Saatani Diabolosi.

Jesu naakaamba kuti Saatani “takede mubwini,” wakatondezya kuti cilenge eeci camuuya ciindi cimwi cakali kumubelekela Leza cakusyomeka, pele cakazyi kuzanga buya. Nkaambo nzi Saatani ncaakazangila Jehova? Nkaambo kakuti wakali muntu uuyandisya kuba akalo kansimbi calo cakamupa kuti atalike kulombozya kukombwa ikweelede buyo Leza. *—Matayo 4:8, 9.

Kuzanga kwa Saatani kwakalibonya mumuunda wa Edeni naakeena Eva kuti alye mucelo wakakasidwe. Kwiinda mukwaamba makani aakubeja ciindi cakusaanguna alimwi akubejekezya Jehova, Saatani wakaba “ngowisi wababeja.” Kuyungizya waawo, kwiinda mukoongelezya ba Adamu a Eva kuti baleke kuswiilila Leza, wakapa kuti cibi citalike kubeendelezya akubapa kufwa balo alimwi aluzubo lwabo loonse. Aboobo, Saatani alimwi wakaba “mujayi,”—icigwebenga citalibijili kuzwa kaindi.—Matalikilo 3:1-6; Ba-Roma 5:12.

Ikuyunga kwa Saatani mane kwakasika akuzilenge zyakujulu, kwalo nkwaakayunga bangelo bamwi kuti abalo bazange. (2 Petro 2:4) Mbubwenya  mbuli bwakacita Saatani, bangelo aaba babyaabi bakatalika kulombozya bantu munzila mbi. Pele balo cakabatolezya kukuyanda koonana, calo cakaleta mapenzi aataambiki.

Nyika Izwide Bubi

Ibbaibbele litwaambila kuti: “Bantu nibakatalika kuvula . . . alimwi nibakali kuzyala bana basimbi, bana ba-Leza bakabona bana basimbi babantu kuti mbabotu, nkabela bakakwata kufumbwa mbobakali kuyanda akati kabo.” (Matalikilo 6:1, 2) Ino aaba bategwa “bana ba-Leza” bakali bani? Tiibakali bantu balya maila pe, zyakali zilenge zyamuuya. (Jobu 1:6; 2:1) Ino tuzyi buti oobo? Kaambo kamwi nkakuti, ikukwatana kwabantu kwakalijisi kale myaka iibalilwa ku 1,500 kakucitika, aboobo tiicakali cintu cigambya pe. Aboobo kwiinda mukubikkila maano kumakani aakoonana kwa “bana ba-Leza” ibakalisandula mibili akukwata “bana basimbi babantu,” cibalo citondezya cintu cimwi citondwa cakacitika.

Milimo iitondwa yakacitika ilalibonya kwiinda mubana bakazyalwa. Bana aaba bakali kwiitwa kuti Babbabbani, akali madombwana aataambiki. Alimwi bakali basilunya. Ibbala lyakuti babbabbani lyaamba “basikuusya bantu ansi kwiinda mukubauma.” Basilunya aaba bapandululwa kuti “basinguzu baciindi, bantu basimpuwo.”—Matalikilo 6:4.

Babbabbani abamausyi bakapa kuti bubi buvwule citaambiki. Bbuku lya Matalikilo 6:11 lyaamba kuti: “Nyika yakabija kumeso aa-Leza . . . yakazula luuni.” Bantu bakatobela bukkale bwalunya alimwi amicito mibi yabantu aaba.

Ino mbuti Babbabbani abamausyi mbobakayunga bantu kucita bubi butaambiki? Nkwiinda mukupa kuti bantu babe amizeezo yakuyanda kucita zibi. Ino ncinzi cakatobela? “Bantu boonse [bakabisya] inzila zyabo ansi.” Aboobo Jehova wakainyonyoona nyika a Zambangulwe akufwutula buyo Nowa mululami amukwasyi wakwe. (Matalikilo 6:5, 12-22) Pele ibangelo bakalicinca mibili akupilukila kubusena bukkala zilenge zyamuuya kabasampukide. Mbwaakaba madaimona aasulaikidwe, bakazumanana kukazya Leza alimwi amukwasyi wakwe wabangelo basyomeka. Kuboneka kuti kuzwa kuciindi eeci, zilenge eezi Leza wakazinyanga nguzu zyakukonzya kulisandula akuba amibili yanyama. (Juda 6) Pele zyazumanana kuba anguzu zyakuyunga bantu mumilimo yabo.

Imubyaabyi Wazyibwa Kabotu!

Mbokwakasakana kuyunga kwa Saatani kulitondezyedwe kubbuku lya 1 Johane 5:19 ilyaamba kuti: “Nyika yoonse” yeendelezyegwa amubi. Diabolosi uli mukubinga bantu kuya mumapenzi aayoosya aayabuvwula. Alimwi buya ulikanzide kapati kubapenzya ciyoosya bantu. Nkaambo nzi? Nkaambo kakuti walo amadaimona aakwe bakatandwa kujulu Bwami bwa Leza nobwakatalika kulela mu 1914. Ibbaibbale lyakaasinsima boobu makani aakutandwa kuti nyika ili “mumapenzi, ikuti Diabolosi [waiselukila] abukali bupati, nkaambo ulizi kuti ciindi ncacijisi nciniini buyo.” (Ciyubunuzyo 12:7-12) Pele ino mbuti Saatani mbwabeendelezya bantu mazuba aano?

Saatani ulacita oobo kwiinda mukukulwaizya muuya upa kuti bantu kabayeeya munzila iitali kabotu alimwi akucita zintu zibyaabi. Akaambo kaceeci, lugwalo lwa Ba-Efeso 2:2 lwaamba Diabolosi kuti “mweendelezi uujisi bwami bwakumuuwo, nguwenya muuya uubeleka sunu mumyoyo yabana bakasampusampu.” Muciindi  cakukulwaizya kuyoowa Leza alimwi akucita zibotu, “muuya” ooyu ukulwaizya kuzangila Leza alimwi azyeelelo zyakwe. Saatani amadaimona aakwe mbabapa kuti bantu baindilizye kubisya.

“Bamba Moyo Wako”

Nzila imwi moubonenwa “muuya” ooyu muukulangilila akubala makani aaleta muzeezo wakoonana, calo cipa kuti muntu akonzye kukulombozya munzila imbi koonana, elyo akutalika kubona zintu zitondwa kuti nzezibotu. (1 Ba-Tesalonika 4:3-5) Kujata bamakaintu, koona bamakaintu calunya, koona banyama alimwi akoona bana ngamakani amwi aajanika mukubala akweebelela zintu zitondwa. Naaba makani aacisapi aaboneka kuti taanyonganyi, kubala akweebela zintu zileta muzeezo wakoonana cilakonzya kuba ciyanza citalekeki alimwi cilakonzya kumunyonganya uuciyandisya cakunga cilakonzya kuba cilengwa buya. * Ncibi calo icikonzya kunyonganya cilongwe akati kabantu alimwi a Leza. Kweebelela alimwi akubala makani aaletela muzeezo wakoonana citondezya mizeezo njaajisi madaimona aakulwaizya kucita boobu—ibazangi balo ibakalombozya milimo iitondwa kuzwa kaindi Zambangulwe kalitanacitika mumazuba ngaakali kupona Nowa.

Solomoni wakalijisi kaambo kabotu naakaamba kuti: “Bamba moyo wako cakucenjela loko, nkaambo mulinguwo mobuzwa buumi.” (Tusimpi 4:23) Ikutegwa mucikonzye kubamba moyo wanu kukakole kakulangilila akubala zintu ziletela muzeezo wakoonana, kulakonzya kuyandika kucinca nzyomulangilila acipekupeku naa kuzima muncini wakkompyuta ikuti watalika kutondezya zifwanikiso zikonzya kubusya muzeezo wakoonana. Cilayandika kucita oobo cakufwambaana. Amulibikke muciimo casikalumamba uusola kukwaba zilwanyo ziyanda kuyasa amoyo wanu. Saatani uyandisya kapati nzyomuyeeya mumoyo wanu, aboobo uyanda kuti aunyonganye.

Alimwi mweelede kuukwabilila moyo wanu kutegwa mutayandisyi nkondo, nkaambo Diabolosi ulizyi kuti Jehova “ulisulide basikufumpa.” (Intembauzyo 11:5) Saatani mane tayandi kuti mutile buya bulowa kutegwa mube basinkondonyina a Leza pe, walo umuyunga buyo kutegwa kamuyandisya nkondo. Tabalubizyi buya nobabikkilizya mitwe yamakani yaamba zyalunya alimwi akubelesya mizimo munzila zinji zyakutambikizyanya makani. Babbabbani bakaloba, pele milimo yabo alimwi ambobakali kulilemeka zicidumide kapati. Sena zyakulikondelezya nzyomusala zitondezya kuti tamuzyiyandi nzila zya Saatani?—2 Ba-Korinto 2:11.

 Mbotukonzya Kukuleya Kuyunga kwa Saatani

Ikuleka kucita cibi cilakonzya kuba cintu cikatazya kapati. Ibbaibbele lyaamba kuti aabo ibayanda kukkomanisya Leza ‘balalwana amyuuya mibi,’ kunze lyakulwana kulombozya kwamibili yabo iitalondokede. Ikutegwa tuzunde munkondo akuyandwa a Leza, tuleelede kuzibelesya zibelesyo zizwa kuli Leza.—Ba-Efeso 6:12; Ba-Roma 7:21-25.

Zibelesyo eezi zilabikkilizya muuya uusalala wa Leza, uujisi nguzu kapati mububumbo. Mwaapostolo Paulo wakabalembela Banakristo bamumwaanda wamyaka wakusaanguna kuti: “Muuya ngututambwide teensi muuya waansi ano pe, ngu-Muuya uuzwa kuli-Leza.” (1 Ba-Korinto 2:12) Aabo ibasololelwa amuuya wa Leza balaziyanda zintu nzyayanda Leza akuzisula eezyo Leza nzyasulide. (Amosi 5:15) Ino mbuti muntu mbwakonzya kutambula muuya uusalala? Kusaanguna nkwiinda muukuupailila, kwiiya Bbaibbele—Ibbaibbele kuligama lyakalembwa kwiinda mubusolozi bwamuuya uusalala. Alimwi akuyanzana munzila iili kabotu abaabo bamuyanda kapati Leza.—Luka 11:13; 2 Timoteo 3:16; Ba-Hebrayo 10:24, 25.

Kwiinda mukuzibelesya zibelesyo eezi zizwa kuli Leza, mulakonzya kutalika kusama “zilwanyo zyoonse zya-Leza,” izilwanyo zisyomeka mukulwana “meneeno aa-Diabolosi.” (Ba-Efeso 6:11-18) Mazuba aano taali aakuwayawaya kubelesya zibelesyo eezi. Nkaambo nzi?

Ibubi Bulaafwaafwi Kumana!

Sintembauzyo wakati: “Nekuba kuti basizibi balamena mbuli bwizu, aboonse bacita bubi balasyuuka, bayoonyonyoonwa kukabe kutamani.” (Intembauzyo 92:7) Ee, mbubwenya mbuli mbocakabede mumazuba akali kupona Nowa, ibubi bwalibonya koonse-koonse ncitondezyo cakuti lubeta lwa Leza lwaswena, kutali buyo kubantu babyaabyi, pele akuli Saatani amadaimona aakwe balo bayoonyangwa nguzu kabatananyonyoodwa limwi. (2 Timoteo 3:1-5; Ciyubunuzyo 20:1-3, 7-10) Ino nguni uyakweendelezya lubeta oolu? Jesu Kristo kumugama nguuya kucita boobo, kweelana ambotubala kwaamba nguwe kuti: “Kaambo nkaakayubunwidwa Mwana a-Leza nkaaka, kuti ajaye milimo ya-Saatani.”—1 Johane 3:8.

Sena mulalombozya kuti kubota bubi bwamana? Ikuti naa mboobo, nkokuti mulakonzya kuumbulizyigwa azisyomezyo zili mu Bbaibbele. Ibbaibbele lilikke ndebbuku lyaamba kuti bubi bwakazwida kuli Saatani alimwi ndelitondezya kuti milimo yakwe iyoozita. Tumukulwaizya kuti mujane luzibo lwini-lwini lwa Bbaibbele kutegwa mutayungwi a Saatani alimwi akuba abulangizi bwakupona munyika iinyina bubi.—Intembauzyo 37:9, 10.

Bupanduluzi buyungizidwe

Kabbokesi/[Cifwanikiso icili apeeji 6]

Twaano Tujisi Makani Amwi Aakacitika Ncobeni

Twaano twaamba mituni, babbumbwabuuka alimwi azambangulwe lyakapilinganya zintu tulaambwa muzyaano zyansiku munyika yoonse. Mucikozyanyo Caano cidumide ica Gilgamesh cilaamba kujatikizya zambangulwe, bwato alimwi abantu bakafwutuka. Gilgamesh kumugama upandululwa kuti wakali muntu uunyomenena, mutuni silunya naa wakajisi mbazu zyobilo kulubazu lumwi wakali mutuni kumwi kali muntu. Cisyobo ca Aztec cilijisi caano caamba babbabbani ibakali kukkala munyika kaindi alimwi cilaamba azambaungulwe. Cisyobo ca Norse cilijisi caano cipandulula zyalani lyabantu babbabbani alimwi amwaalumi musongo wazina lya Bergelmir iwakabamba bwato bupati akulifwutula walo amukaintu wakwe. Kwaabikka antoomwe makani woonse aali mutwaano ootu asinizya makani aali mu Bbaibbele aakuti bantu boonse bakazwa kubantu bakafwutuka kuzambangulwe lyakanyonyoona bantu babyaabi bakali munyika yansiku.

[Cifwanikiso icili apeeji 6]

Mpocakalembedwe Caano cidumide ica Gilgamesh

[Kulumba]

University Museum, University of Pennsylvania (neg. #22065)

[Cifwanikiso icili apeeji 5]

Milimo ya Babbabbani icilibonya mubantu asunu

[Cifwanikiso icili apeeji 7]

Luzibo lwini-lwini lulatuyumya kulwana bubi