Ibubi—Sena Tabukonzyi Kumanizyigwa?

Mwana musankwa uuyandisya kubwezyela tuntu wabwezela kadandamiti. Nikakabboloka, kakamoofwaazya akumulemanya. Mutumbu wamusowa mwanaakwe mbwaazyalilwa mutombe lili mumbali aanzila. Mubelesi iwatandwa mulimo waunka nkwaakali kubelekela akubadubula ntobolo boonse mbaajana mubusena oobo, kumane awalo walijaya. Mulombwana uulemekwa kapati mucilawo ujata bana baniini.

CILAUSISYA kujana kuti makani mabi boobu ngaadumide mazuba aano. Iciinda kuusisya ncakuti makani aali boobu taabbwalusyi moyo nkaambo kuli makani aambi aayoosya aajatikizya kujaya musyobo umwi wabantu alimwi amilimo iicitwa azigwebenga. Cibalo cimwi mumuteende icakasimbwa mu 1995 cakati: “Mwaanda wamyaka wa 20 nguwakwe Saatani akaambo kabubi bwakacitika. Kunyina nocakacitikide kuzwa kaindi cili boobu icakuti bantu kabatondezya muuya wabujayi akulombozya kujaya tuulunzuma twabantu tuli mbotubede akaambo kamusyobo, cikombelo naa mbobavwubide.”

Acimbi cicitika ncakuti bantu baunyonganya muya, nyika, zisamu bazimana azintu zimwi ziyandika kapati munyika alimwi bajaya misyobo minji yabanyama cakuti ilalangilwa kuloba. Sena bantu balakonzya kubumanizya bubi oobu boonse akucinca nyika eeyi kuti bube busena bubotu? Antela sena kucita boobu cili mbuli kabwa kakuwa muzovwu? Haabupampu umwi iwakalemba makani manji aabubi kwiinda boonse wakati: “Ndakalijisi makanze mapati aakuti kube kucinca kapati munyika, pele kunyina kucinca kuli koonse nkundabona pe.” Ambweni andunywe mbomulimvwa oobo.

Inyika mboyeenda ili mbuli bwato bugama mulwizi muli mayuwe ayoosya akaambo kaguwo lyuunga abuzuba. Nokuba kuti kunyina uukukkomanina kuunka kooko, nzila zyoonse zibelesyegwa kutegwa bwato bunyonwe tazibeleki. Aboobo ibwato buli mukugama kooko ikuli guwo kapati.

Munzila imwi inga twaamba kuti, bukkale oobu ibuyaabubija bulaboola akaambo kakutalondoka kwabantu. (Ba-Roma 3:23) Pele, ibubi, mpobuteene alimwi akuzumanana kuya kumbele takutondezyi kuti nkaambo buyo kabukkale bwabantu pe. Sena bantu bali mukutyungililwa buya amuuya umwi uujisi nguzu alimwi mubi? Ikuti naa mbocibede oobo, ino ooyo mmuuya nzi alimwi mbuti mbotukonzya kulikwabilila? Cibalo citobela ciya kwiingula mibuzyo eeyi.

Nkotwakajana cifwanikiso icili apeeji 3]

© Heldur Netocny/Zifwanikiso zyaba Panos