Ikaambo Kupenga Koonse Ncokuya Kumanina Ino-ino
Ikaambo Kupenga Koonse Ncokuya Kumanina Ino-ino
“[Ndibbwe], amilimo yakwe yoonse ililuleme.”—DEUTERONOMO 32:4.
1, 2. (a) Nkaambo nzi ncomubukkomanina bulangizi bwakupona kukabe akutamani? (b) Ncinzi cipa kuti ibanji kabatasyomi muli Leza uusyomezya zilongezyo zitaliboteli zyakumpela?
SENA cilamukonda kuyeeyela buumi bwamu Paradaiso? Ambweni mwalibona kamuvwenta munyika iitaliboteli akwiiya zilenge zipona zyamisyobo-misyobo zitalivwulili. Ambweni muyeeyela lukkomano ndomutiikabe andulo nomubeleka abamwi kulanganya nyika akwiisandula kuba muunda mubotu. Ndiza mulakonzya kuyeeya busongo mbomukonzya kuba ambubo bwakupanga-panga zintu, kuyaka, kwiimba nyimbo naa milimo imwi yalo njomutakonzyi kujanina ciindi munyika iino iikatazyide. Nokuba boobo, mulalombozya kuba abulangizi bwakupona bwalo Bbaibbele mbolyaamba kuti “buumi bwinibwini,” ibuumi Jehova mbwaakati katupona, nkokuti buumi butamani.—1 Timoteo 6:19.
2 Cilakatalusya alimwi ncoolwe citalikomeneni kwaambila bantu bulangizi bwamu Bbaibbele, sena tabusyi? Nokuba boobo, ibanji balabukaka bulangizi oobu. Balakaka kabati ncakuyeeyela buyo, nciloto buyo cakucenga bantu bafwubafwuba. Cilakonzya kubakatazya kusyoma muli Leza uusyomezya buumi butamani mu Paradaiso. Nkaambo nzi? Ibamwi cilabakatazya kusyoma akaambo kabubi buliko. Bayeeya kuti ikuti Leza kaliko alimwi akuti kali ngusinguzu zyoonse alimwi siluyando, bubi akupenga munyika tazyeelede kuba. Bayeeya kuti, taku Leza uupona uukonzya kulekela bubi, alimwi kuti naa ulapona nkokuti tali singuzu zyoonse alimwi tatulanganyi. Bamwi kuyeeya kuli boobu bakubona kuti kuli kabotu. Masimpe Saatani walibonya kuti mucenjezu caboola kumakani aakoofwaazya bantu.—2 Ba-Korinto 4:4.
3. Mubuzyo nzi uukatazya ngotukonzya kubagwasya bantu kujana bwiinguzi, alimwi nkaambo nzi ncotujisi coolwe cilibedelede cakugwasya bantu?
3 Mbotuli Bakamboni ba Jehova tulijisi coolwe cilibedelede cakugwasya bantu bacengwa a Saatani abusongo bwanyika ino. (1 Ba-Korinto 1:20; 3:19) Twakabona kaambo ibanji ncobatasyomeni muzisyomezyo zyamu Bbaibbele. Mubwini tabamuzyi Jehova. Balakonzya kuti kabatalizyi zina lyakwe naa mboliyandika, alimwi balibonya kuti bazyi buyo aasyoonto naa kuti taku ncobazyilyo kumakani aabube bwakwe naa mbwazyibidwe kumakani aakusyomeka kuzisyomezyo zyakwe. Tulilelekedwe kuba aluzibo luli boobu. Ciindi aciindi ncibotu kuti katulanga-langa nzila mbotukonzya kubagwasya bantu bali ‘amizeezo iili mumudima’ kujana bwiinguzi kumubuzyo wiinda kukatazya bantu ngobabuzya wakuti, “Nkaambo nzi Leza ncalekela bubi akupenga?” (Baefeso 4:18, Ci) Cakutaanguna tulalanga-langa mbotukonzya kuba atwaambo tugwasya notwiingula mubuzyo. Kwamana tulalanga-langa bube bwa Jehova mbobwalibonya munzila mbwaalanga-langa makani aabubi buliko.
Kujana Nzila Mbotu Yakwiingula Mubuzyo
4, 5. Ncinzi ncotweelede kutaanguna kucita ikuti muntu wabuzya mubuzyo wakuti nkaambo nzi Leza ncalekela kupenga? Amupandulule.
4 Ikuti muntu wabuzya icipa kuti Leza kalekela kupenga, ino inga mwaingula buti? Inga twalombozya kwiingula mpamunya aawo akutalika kupandulula ikutalikila kuli ceeco icakacitika mumuunda wa Edeni. Aabona kwiingula kuli boobo inga kuli buyo kabotu. Pele kuyandika kubelesya bupampu. Kweelede kuba ntalisyo mbotu. (Tusimpi 25:11; Ba-Kolose 4:6) Atulange-lange twaambo totatwe twamu Magwalo ntotunga twayanda kusalazya mubufwiifwi katutana ingula mubuzyo.
5 Kakutaanguna, ikuti muntu kalibonya kuti uli katazyidwe abubi buvwulide munyika, kulibonya kuti bubi mbobumukopede kapati walo abamukwasyi wakwe. Inga caba camaano ikutalika kwiinda mukweetezyegwa. Imwaapostolo Paulo wakalaya Banakristo kuti: ‘Amulile abantu balila.’ (Ba-Roma 12:15) ‘Kumweetelela’ kulakonzya kumunjila mumoyo. (1 Petro 3:8) Ikuti wabona kuti tulamubikkila maano, ulalangilwa kuswiilila kuli zyeezyo nzyotulaambe.
6, 7. Nkaambo nzi ncotunga twamulumba muntu uubuzya mubuzyo cakusinizya uumukatazya wamu Bbaibbele?
6 Cabili, tulakonzya kumulumba muntu wabuzya mubuzyo ooyu cakusinizya. Bamwi bantu bayeeya kuti akaambo kakuti balakatazyigwa amibuzyo eeyi nkokuti tabajisi lusyomo naa bulemu kuli Leza. Ambweni bakaambilwa abasololi bazikombelo kuti tabajisi lusyomo abulemu kuli Leza. Kubuzya mibuzyo eeyi tacaambi kuti nkubula lusyomo abulemu. Alimwi buya bantu basyomeka ibakali kupona lyakali kulembwa Bbaibbele bakabuzya mibuzyo iikonzyenyi ayeeyi. Mucikozyanyo, sintembauzyo Davida wakati: “Ulaiminanzi kule, O Jehova? Ulayubilanzi kuziindi zyamapenzi?” (Intembauzyo 10:1) Ncimwi buyo amusinsimi Habakuku wakabuzya kuti: “O Jehova, njooleka lili kukukwiilila notamvwi? Ndakulilila nkaambo kakupyopyongana kwabantu, pele toswiilili. Ino nkaambonzi wandibonya zibi akundilanzya bupilingene? Kusaala akuvupuula, zyoonse nkuzili kumeso aangu. Kwabuka inkondo akukazyanya.”—Habakuku 1:2, 3.
7 Aaba bakali balombwana bakali kusyomeka ibakali kumulemeka kapati Leza. Sena bakabwentelwa akaambo kakubuzya mibuzyo yakali kubakatazya? Peepe, Jehova wakabona kuti cilagwasya kwiilemba mibuzyo yabo mu Jwi lyakwe njobakabuzya cakusinizya. Sunu muntu uukatazyidwe kumakani aabubi bwavwula kapati inga ufwide nzala yakumuuya, aboobo uyanda kujana bwiinguzi bwalo bukonzya buyo kujanwa mu Bbaibbele. Amuyeeya kuti Jesu wakabalumbaizya aabo bafwide nzala yakumuuya naa “bacete mumuuya.” (Matayo 5:3) Eeci ncoolwe cipati nobantu cakugwasya bantu bali boobo kuti babe alukkomano Jesu ndwaakasyomezya!
8. Nkuyiisya kuli buti kunyongenyi kwapa kuti bantu basyome kuti ngu Leza uuleta kupenga, alimwi ino mbuti mbomukonzya kubagwasya?
8 Catatu, tweelede kumugwasya muntu kubona kuti tali Leza uuleta bubi buvwulide munyika. Bantu banji bayiisyigwa kuti ngu Leza uulela nyika eeyi, cakuti kuzwa kaindi Leza wakabikkilalyo zintu zyoonse zitupenzya alimwi ulijisi twaambo tutazyibidwe tumupa kuti kaleta mapenzi kubantu. Kuyiisya ooku takuluzi. Balamusampaula Leza akwaamba kuti nguujisi mulandu kububi akupenga kuli munyika. Aboobo tweelede kubelesya Jwi lya Leza kusalazya makani aaya. (2 Timoteo 3:16) Jehova tali ngomuleli wanyika eeyi iipilingenyi, pele Saatani Diabolosi nguulela. (1 Johane 5:19) Jehova tabikkililyo ciya kucitika kuzilenge zyakwe zyamaano; aumwi ulimupede lwaanguluko aciindi cakusala cibotu acibi, ciluzi acitaluzi. (Deuteronomo 30:19) Jehova tali ngonguwe uuleta bubi; uli busulide bubi alimwi ulabalanganya aabo bapenzyegwa calunya.—Jobu 34:10; Tusimpi 6:16-19; 1 Petro 5:7.
9. Nzibelesyo nzi “muzike musyomesi uucenjede” nzyaapa kutegwa tugwasye bantu kumvwisya kaambo Jehova Leza ncalekela kupenga?
9 Ikuti mwaba antalisyo iili boobu, mulakonzya kubona kuti uumuswiilila ulilibambide kwiiya Leza ncalekela kupenga kuti kuzumanane. Kutegwa mugwasyigwe, “muzike musyomesi uucenjede” wabamba zibelesyo zinji. (Matayo 24:45-47) Mucikozyanyo, ku Muswaangano Wacooko wamu 2005/06 wakuti “Atumumvwide Leza,” kwakamwaigwa katulakiti kamutwe wakuti Kupenga Koonse Kuyoomana Ino-Ino! Ikuti katulakiti aaka kakaliko mumulaka wanu, sena tamukonzyi kukabala kutegwa muzyibe makani ngokajisi? Mbweena buyo, bbuku lyakuti Ino Ncinzi Cini Bbaibbele Ncoliyiisya? ililiko ino mumilaka iili 157, lilijisi cibalo cibandika mubuzyo ooyu uuyandika kapati. Amuzibelesye kapati zibelesyo eezyi. Zilasalazya twaambo kumakani aazintu mbozyakacitika izyaambwa mu Bbaibbele cakapa kuti kubuke kaambo kubulelo bwakoonse-koonse kakabuka mu Edeni, alimwi akubona Jehova ncaacitila boobu kukaambo aaka. Alimwi kamuyeeyede kuti nomulanga-langa kaambo aaka, mupa kuti azibe twaambo tuyandika kapati ooyo ngomubandika limwi. Oolu nduzibo lwa Jehova abube bwakwe butaliboteli.
Amubikkile Maano Kubube bwa Jehova
10. Nkaambo nzi bantu banji ncocibakatazya kumvwisya Leza ncalekela kupenga, alimwi nduzibo nzi lukonzya kubagwasya?
10 Nomugwasya bantu kumvwisya kaambo Jehova ncaalekela bantu kulilela kabali mumaanza aa Saatani, amwaambe bube bwa Jehova butaliboteli. Bantu banji balizyi kuti Leza ulaanguzu kapati; balamvwa bantu nobamwaamba kuti ngu Leza Singuzu zyoonse. Nokuba boobo, cilakonzya kubakatazya kumvwisya cipa kuti katabelesyi nguzu zyakwe zitalivwulili kumana kutalulama akupenga. Ambweni tabamvwisyi bube bumwi bwa Jehova, mbuli kusalala kwakwe, bululami, busongo, aluyando. Jehova ulabutondezya bube oobu munzila mbotu. Ibbaibbele lyaamba kuti: “Milimo yakwe yoonse ililuleme.” (Deuteronomo 32:4) Mbuti mbomukonzya kukankaizya bube oobu nomwiingula mibuzyo iibuzyigwa kanji-kanji kukaambo aaka? Atulange-lange zikozyanyo zili mbozibede.
11, 12. (a) Nkaambo nzi kulekelela nceetakali njenzila yakali kuyandika Adamu a Eva nibakabisya? (b) Nkaambo nzi Jehova ncatakalekeli cibi kukabe akutamani?
11 Sena Jehova wakeelede kwiile kubalekelela buyo ba Adamu a Eva? Kulekelela tiiyakali njenzila yakali kuyandika aawa. Adamu a Eva mbwaanga bakali bantu bakalondokede, bakalizyi ncobakali kucita, bakacita caali kukaka bulelo bwa Jehova bwakoonse-koonse akuzumina busolozi bwa Saatani. Alimwi buya taku kweempwa nkobakatondezya. Nokuba boobo, bantu nobabuzya Jehova ncaatakabalekeleda, inga balakopona kuyeeya cakapa kuti ataubyi-ubyi buyo mulawo akulekela bubi akuzanga kuti kazyiliko. Bwiinguzi bulajatikizya abube buyandika butondezya mbwabede Jehova, ikusalala kwakwe.—Kulonga 28:36; 39:30.
12 Ibbaibbele lilakankaizya kusalala kwa Jehova ziindi zinji. Nokuba boobo, cuusisya ncakuti mbantu buyo basyoonto munyika ino yalweeno ibabumvwisya bube oobu. Jehova ulasalala, alimwi taku bubi buli boonse bujanika mulinguwe. (Isaya 6:3; 59:2) Caboola kumakani aacibi, wakabikka bubambe bakucimanya, alimwi takacilekeli kabili cibi. Nokwali kutegwa Jehova wacilekela cibi kukabe akutamani, nitwatalijisi bulangizi kumpela. (Tusimpi 14:12) Muciindi cakwe ncabikkide, Jehova uya kuzisalazya zyoonse zilenge. Eeci ciya kucitika ncobeni nkaambo ngamakanze aa Musalali.
13, 14. Nkaambo nzi Jehova ncaatakabajaya bazangi bamu Edeni?
13 Sena Jehova wakeelede kubajaya buyo bazangi bamu Edeni akubumba bambi? Masimpe wakalijisi nguzu zyakucita boobo; ino-ino uya kubelesya nguzu eezyo kusinya babi boonse. Bamwi balakatazyigwa, ‘ino inga caba buti boobu, nkaambo nzi nkwaatakacita oobo nokwakali buyo basizibi botatwe munyika? Sena kuvwula kwabubi amapenzi oonse ngotubona munyika, nizyakaba? Nkaambo nzi Jehova nkwaatakabelesya nzila eeyi? Ibbuku lya Deuteronomo 32:4 lyaamba kuti: “Milimo yakwe yoonse ililuleme.” Jehova takuyandi amokwiinda kutalulama. Bwini mbwakuti “Jehova ulayandisya bululami.” (Intembauzyo 37:28) Akaambo kakuti ulabuyanda bululami, Jehova tanaakayanda kubanyonyoona bazangi mu Edeni. Nkaambo nzi?
14 Kuzanga kwa Saatani kwakaleta kudooneka bulelo bwa Leza bwakoonse-koonse. Mbwaanga Jehova mululami wakacibona kuti ncibotu kwiingula bubeji bwa Saatani cabululami. Ikulonda kubajaya bazangi nokuba kuti cisubulo cili boobu cakali beelede, nikwatakaba kucita cabululami. Inzya nicakatondezya kuti Jehova ulijisi nguzu kapati, pele kuyanda kuzyiba kuti Jehova ujisi nguzu zili buti, takali nkakakali kaambo. Kunze lyaboobo, Jehova wakaambide makanze aakwe kuli Adamu a Eva. Wakati bakeelede kuba abana akuvwuzya nyika akwiibombya, akweendelezya zilenge zyoonse zyaansi. (Matalikilo 1:28) Ikuti Jehova naakalonda kubajaya ba Adamu a Eva, naniinga makanze aakwe ngaakabaambilide naakaba aabuyo. Kululama kwa Jehova takukonzyi kumupa kubweza nzila iili boobo, nkaambo makanze aakwe lyoonse alazwidilila.—Isaya 55:10, 11.
15, 16. Ibantu nibaamba “nzila” mbwaakeelede kweendelezyegwa makani aabuzangi bwamu Edeni, ino mbuti mbotukonzya kubagwasya?
15 Sena kuli muntu kujulu aansi uukonzya kwaayendelezya makani aakuzanga aaya cabusongo kwiinda Jehova? Bamwi bantu balakonzya kujana “nzila” mbwakeelede kweendelezyegwa makani aabuzangi bwamu Edeni. Pele kucita boobu, sena tacikonzyi kwaamba kuti balakonzya kujana nzila iinda kubota yakumana kaambo aaka? Ambweni balacita oobo kabatajisi makanze mabi, pele tabazyi buyo Jehova mpeendela alimwi abusongo bwakwe bunji mbwajisi. Kalembela Banakristo baku Roma, imwaapostolo Paulo tanaakacita buyo caatala-tala naakali kulanga busongo bwa Leza kubikkilizya a “makani aasisidwe” kujatikizya makanze aa Jehova aakubelesya Bwami bwa Mesiya kunununa bantu basyomeka akusalazyigwa kwazina lyakwe lisalala. Ino mbuti Paulo mbwaakalimvwa kubusongo bwa Leza iwakajisi makanze aaya? Imwaapostolo wakamanizya lugwalo lwakwe amajwi aaya aakuti: “Kuli-Leza musongo alike akube bulemu bwamuli-Jesu Kristo lyoonse alyoonse. Ameni.”—Ba-Roma 11:25; 16:25-27.
16 Paulo wakazyiba kuti Jehova “[ngo]musongo alike”—ngowiinda busongo kujulu aansi. Nguni muntu uutalondokede uukonzya kujana nzila yakumana penzi lili loonse? Ooyu mmukuli wa Leza sibusongo wakumana penzi eeli likatazya ilyakabuka lyabulelo bwa Leza bwakoonse-koonse. Aboobo tweelede kubagwasya bantu kuti bamubone mbuli mbotumubona Leza “sibusongo.” (Jobu 9:4) Ikuti twabumvwisya busongo bwa Jehova tuya kubona kuti nzila mbwabamba twaambo nenzila iinda kubota.—Tusimpi 3:5, 6.
Ikubikkila Maano Kubube bwa Jehova Buyandika Kapati
17. Ino mbuti kumvwisya luyando lwa Jehova mbokukonzya kubagwasya aabo bakopenyi akaambo kamapenzi Leza ngaalekela?
17 “Leza nduluyando.” (1 Johane 4:8) Kweelana amajwi aaya aanjila mumoyo, Ibbaibbele litondezya bube bwa Jehova buyandika kapati, ibube bwiinda kubota kubube boonse alimwi buumbulizya kuli baabo bakopenyi abubi buvwulide munyika. Jehova watondezya luyando munzila zyoonse mbuli mbwalanga-langa cibi mbocaleta mapenzi aatalikomeneni kuzilenge zyakwe. Luyando lwakamupa kuti Jehova abikke bulangizi kubana bakazyalwa mucibi ca Adamu a Eva ikubeepela mugwagwa kutegwa kabamusikila akukonzya kuba acilongwe Anguwe. Luyando lwakamupa kuti Leza ape cinunuzyo calo cakali kukonzya kuti kube kulekelelwa kwazibi akukonzya kulondoka akuba abuumi butamani. (Johane 3:16) Alimwi luyando lwakamupa kuti abakkazyikile moyo bantu akubapa ciindi cakumukaka Saatani akusala Jehova kuba Mwami wabo.—2 Petro 3:9.
18. Ino nkuzyiba nzi nkotulelekedwe, alimwi ncinzi ciya kulangwa-langwa mucibalo ciccilila?
18 Umwi mufwundisi naakali kwaambila bantu bakabungenyi kuyeeya buzuba bwamapenzi aakaletwa azigwebenga, wakati: “Tatuzyi kaambo Leza ncalekela bubi amapenzi kuzumanana.” Cilausisya kaka! Sena nobantu muyeeya kuti tatulelekedwe kumakani aakuti swebo tulizyi zintu ncozili boobu? (Deuteronomo 29:29) Alimwi mbwaanga Jehova musongo, mululami, alimwi ulaaluyando, tulizyi kuti ino-ino uya kukumana kupenga koonse. Alimwi buya wasyomezya kuti uya kucita oobo. (Ciyubunuzyo 21:3, 4) Pele ino mbuti aabo bakafwa kwamyaka minji-minji yainda, sena balijisi bulangizi? Sena Jehova mbwaakalanga-langa makani aayo aakabuka mu Edeni caamba kuti tacibayeeyi kabili? Peepe. Luyando lwamupa kuti ababikkile bulangizi abalo kwiinda mukubabusya. Aaka nkakaambo kaya kulangwa-langwa mucibalo ciccilila.
Mbuti Mbomukonzya Kwiingula?
• Ncinzi ncotukonzya kwaamba kumuntu uubuzya kaambo Leza ncalekela kupenga?
• Mbuti kusalala kwa Jehova alimwi abululami bwakwe mbokutondezyegwa munzila mbwaakalanga-langa kuzanga kwamu Edeni?
• Nkaambo nzi ncotweelede kubagwasya bantu kumvwisya luyando lwa Jehova?
[Mibuzyo yaciiyo]
[Cifwanikiso icili apeeji 15]
Amubagwasye aabo bakopenyi akaambo kakupenga kuliko munyika
[Cifwanikiso icili apeeji 17]
Davida a Habakuku basyomeka bakamubuzya Leza mibuzyo cakusinizya