“Baandaanizyidwe Amusyobo, Pele Bakamantanizyidwe Aluyando”

Kunununwa. Kulubulwa. Lufwutuko. Kwamyaka minji, bantu bayanda kukatalukwa kumapenzi aabaminya. Mbuti mbotunga twaliyumya kumapenzi? Sena kuli nokuyakuba kunununwa? Naa kuya kuba, muunzila nzi?

AAYA ngaakali ngamakani aakali kubandikwa kumuswaangano wacooko wamazuba otatwe wakabambwa a Bakamboni ba Jehova iwakatalika mu May 2006. Mutwe wali wakuti “Lufwutuko Luli Afwaafwi!”

Kumiswaangano eeyi iili fwuka kwakajanika zyuulu-zyuulu zyabeenzu bakazwa kuzisi zisiyene-siyene. Yakali mu July alimwi a August 2006, ku Prague, dolopo mpati ya Czech Republic; ku Bratislava, dolopo mpati ya Slovakia; ku Chorzow aku Poznan, Poland; * amumadolopo mapati osanwe aaku German—Dortmund, Frankfurt, Hamburg, Leipzig, alimwi a Munich. Kuubikka aantoomwe mweelwe wabantu bakajanika kumiswaangano eeyi ngu 313,000.

Ino muuya uuli buti wakaliko kumiswaangano eeyi? Ino basimubweza twaambo bakaamba nzi? Ino aabo ibakaunkide kumuswaangano bakalimvwa buti nowakamana?

Kulibambila

Ibeenzu alimwi a Bakamboni bamumasena aayo bakali kwiilangila miswaangano mbwaanga bakalizyi kuti cina kuli ciindi cakucita zintu zyakumuuya citalubiki. Ikubajanina aakoona beenzu wakali mulimo uutali wakusobanina. Mucikozyanyo, muswaangano wakacitikila ku Chorzow, Bakamboni baku Poland bakalyaaba kutambula beenzu bakasika ku 13,000 kuzwa ku Eastern Europe. Ibeenzu bakaboola kumuswaangano bakazyila ku Armenia, Belarus, Estonia Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, United States, alimwi a Uzbekistan.

Bunji bwabeenzu bakatalikizya kulibambila kakucili myezi iili mbwiibede. Mukaintu umwi wazina lya Tatiana imukambausi waciindi coonse ukkala akasumbu kamwi kacisi ca Russia ikali kunyika lwaajwe kwacisi ca Japan, wakatalika kuyobola mali aakubelesya mulweendo kakucili mwaka. Wakeelede kweenda makkilomita aali 10,500. Kusaanguna, wakeenda andeke kwamawoola aali 5; citima kwamazuba aatandila kuli otatwe; eelyo abbaasi kwamawoola aali 30, nkokuya asike ku Chorzow.

Bantu bali zyuulu zili mbozibede bakalyaaba kucita milimo yakali kuyandika kautanatalika muswaangano. Bakacita ziyandika kutegwa bbuwa  lyazisobano lyeelele kuba busena bubotu bwakukombela. (Deuteronomo 23:14) Kumwaambila buyo cikozyanyo comwe, Bakamboni ku Leipzig bakabeleka kusikila mpoceela mukusalazya bbuwa lyazisobano alimwi bakasyomezya kuti bayoolisalazya waakumana muswaangano. Akaambo kaboobo, nkumekume zilanganya bbuwa zyakazwisya cibeela cimwi mucizuminano icakeelede kubbadalilwa mali manji, ikutegwa mali aaya abelesyegwe kumulimo wakusalazya.

Ikutamba

Mbungano munyika yoonse zyakabeleka canguzu kwaambilizya Muswaangano wamutwe wakuti “Lufwutuko Luli Afwaafwi.” Bantu aabo ibakeelede kujanika kumuswaangano bakatola lubazu mukwaambilizya ooku cabusungu. Bakazumanana kwaambilizya muswaangano mane kulubundubundu buya buzuba bwakuti muswaangano ulatalika juunza. Sena kuli cakazwa mukubeleka kwabo canguzu?

Kamboni umwi waku Poland wazina lya Bogdan wakaswaangana amudaala umwi iwakaliyandide kapati kujanika kumuswaangano, walo iwakapandulula kuti mali ngaakajisi tanaakali kukonzya kumusisya ku Chorzow ikulampa makkilomita aali 120. Mucoolwe kwakali busena bwamuntu omwe mubbasi lyakabbadalilwa ambungano yakubusena ooko. Bogdan wakaluula kuti: “Mudaala ooyu twakamwaambila kuti tulakonzya kuunka limwi kakunyina kubbadala. Aboobo wakeelede kusika nkoiyoonyamukila bbasi aciindi ca 5:30 mafwumofwumo.” Mudaala ooyu wakati kunyina penzi, aboobo wakajanika kumuswaangano. Mboobu mbwaakazyi kubalembela bakwesu, ategwa: “Mbwaanga ndakajanika kumuswaangano, ndiyanda kuti ndibe muntu uujisi bukkale buli kabotu.”

Ku Prague, mwaalumi umwi iwakali kukkala ku hotela kwakali kukkala basimuswaangano bakazwide ku Britain buzuba bumwi mangolezya wakaambila basimuswaangano kuti awalo wakajanika kumuswaangano buzuba boonse. Ino ncinzi cakamupa kuti ajanike? Mwaalumi ooyu wakaamba kuti wajanika akaambo kabasikumwaya bali kkumi baindene-indene mbwaakaswaanganya mumigwagwa yamu dolopo ibakamutamba. Wakakkomana kapati alimwi wakalilibambide kwiiya makani aambi.—1 Timoteo 2:3, 4.

Pulogilamu ya Malailile Aamu Bbaibbele

Ipulogilamu yakaamba mbuli mapenzi aaindene-indene mbwaakonzya kumanizyigwa. Ilulayo lwakali kuzwa mu Magwalo lwakapandulula mbuli muntu mbwakonzya kwaamana mapenzi naa mbwakonzya kuliyumya.

Ibantu bapenga akaambo kakucembala, kutapona kabotu, kufwidwa antela mapenzi buyo aambi amugeme aumwi bakakulwaizyigwa amulumbe uuli mu Bbaibbele kutegwa babe abulangizi bubotu. (Intembauzyo 72:12-14) Banabukwetene alimwi abazyali bakalaigwa mbuli mbobakonzya kuba alukwatano lubotu alimwi ambobakonzya kukomezya kabotu bana babo. (Mukambausi 4:12; Ba-Efeso 5:22, 25; Ba-Kolose 3:21) Banakristo bana-bana—ibakonzya kuyungwa kapati kucikolo, pele ibakonzya kugwasyigwa a Jwi lya Leza kuŋanda amumbungano, bakalaigwa mbuli mbobakonzya kukaka kuyungwa abeenzinyina alimwi ambobakonzya kuzileya “zisusi zyabwanike.”—2 Timoteo 2:22.

Bunyina Bwanyika Yoonse Ibutali Bwakudooneka

Lyoonse Bakamboni ba Jehova balapegwa malailile mabotu kuzwa  mu Magwalo kumiswaangano yabo. (2 Timoteo 3:16) Pele cakapa kuti miswaangano eeyi iindane, nkaambo kakuti yakajisi bantu bwazwa muzisi zimbi. Miswaangano yaalubazu yoonse yakajisi buyo makani aakumuuya aakozyene mumilaka minji. Makani ngobakali kwaamba abuzuba ibali mu Kabunga Keendelezya ka Bakamboni ba Jehova alimwi amakani ngobakali kuluula zyakapa kuti miswaangano yiininizye kapati. Makani aaya akali kupandululwa kutegwa bantu baambaula milaka iindene-indene bamvwe.

Basimuswaangano bakaliyandide kuswaangana abanyina alimwi abacizi bazwa muzisi zimbi. Mukwesu umwi wakati: “Kwiindana kwamilaka tiikwakaleta penzi lili loonse pe. Muciindi caboobo kwakapati kuti muswaangano ubote buya. Nokuba kuti beenzu bakajisi zilengwa ziindene-indene, bakakamantanisyigwa alusyomo lomwe.” Aabo bakaswaanganina ku Munich bakaamba kuti: “Baandaanizyidwe amusyobo, pele bakamantanizyidwe aluyando.” Kufwumbwa naa bakazwida nkwiili kuli nyika alimwi kufwumbwa naa baamba musyobo nzi, aabo bakajanika bakalimvwa kuti bakali akati kabalongwe beni-beni—banyina abacizi bakumuuya.—Zekariya 8:23.

Ikulumba

Ikutontola kumuswaangano wakacitikila ku Poland kwakaleta buyumuyumu kubukkale akuliyumya kwabasimuswaangano. Takuli kuti mvwula yakali kwiide kuwa ciindi coonse pe, pele alimwi kwakali kutontola kusikila ku 14°C. Mukwesu wakazwa ku United States wakati: “Tandininga bona mvwula alimwi akutontola kuli bobuya ciindi camuswaangano wacooko, alimwi pulogilamu ndakaiswiilila buyo asyoonto. Pele ikuba akati kabantu bazwa muzisi zimbi, muuya mubotu alimwi abwaabi bugambya zyakapa kuti zintu zyuube-ube. Muswaangano ooyu taulubiki!”

Cintu citalubiki kubantu baambaula mulaka waku Poland ibakajanika kumuswaangano, nkwaambilizya kuzwa kwabbuku lya Insight on the Scriptures mumulaka waku Poland—icintu cakabakkomanisya nokuba kuti kwakali mpeyo amvwula. Kuzwa kwabbuku lyakuti Live With Jehovah’s Day in Mind kwakaleta lukkomano ku Miswaangano yacooko yoonse yamutwe wakuti “Lufwutuko Luli Afwaafwi!”

Bunji bwabaabo ibakaliko kumuswaangano bana kuuyeeya akaambo katwaambo atumbi. Kristina imucizi wakucisi ca Czech iwakalisungula kuunka ankamu yabeenzu bazwa muzisi zimbi, ulaamba: “Notwakali kulayana, mucizi umwi wakanditola ambali, wandikumbata amane ulaamba; ndalumba kuti mwakatusamausya! Mwakatuletela cakulya ameenda mpotwakakkede. Ndalumba akaambo kamoyo wanu mubotu.” Ncaakali kupandulula ncakulya camasyikati ncobakali kubambila beenzu bazwamasi. Mukwesu umwi wakapandulula kuti: “Wakali mulimo ngotutana belekede mubuumi bwesu. Kwakali kuyandika kutola cakulya camasyikati cabantu bali 6,500 abuzuba. Cakali kukkomanisya kubona bantu bakalyaabide mumulimo ooyu, kubikkilizya abana-bana.”

Mucizi uuzwa ku Ukraine wakaunka ku Chorzow kumuswaangano wakaamba kuti: “Cakali kukkomanisya cakuti boola ubone ikubona luyando alimwi abuuya bwakacitwa abasyomima. Tunyina amajwi pe.” Musimbi uujisi myaka iili lusele utegwa Annika iwakazwida ku Finland wakalembela ofesi yamutabi ya Bakamboni ba Jehova ku Poland kuti: “Muswaangano wakali mubotu kwiinda mbundakali kuuyeeyela. Ncintu cibotu kuba mumbunga ya Jehova, nkaambo muntu ulakonzya kuba abalongwe nyika yoonse!”—Intembauzyo 133:1.

Nzyobakaamba Bakali Kulangilila

Muswaangano kautanatalika, kwakacitwa bubambe bwakuti beenzu bamwi baswaye masena  amwi. Kubusena butegwa Bavaria buli kule amadolopo, beenzu bakaima mu Maanda aa Bwami, kwalo Bakamboni bakooko nkobakabatambula camaanza obilo. Iwakali kusololela beenzu nobakali kuswaya uutali Kamboni wakabotelwa kapati ikubona muuya wabunyina ngobakajisi. Umwi wabeenzu wakaamba kuti: “Katuli mubbaasi kupilukila ku hotela, iwakali kututola mumasena aayo wakaamba kuti twakaliindene kapati abasikuswaya bambi. Twakalisamide kabotu alimwi twakali kubaswiilila aabo ibakali kusololela. Kwakanyina basinganya beenzinyina naa manyongwe pe. Mukaintu ooyu wakagambwa kubona kuti beenzu bakali kukonzya kuba balongwe bali kabotu mukaindi buyo kasyoonto.”

Imukwesu wakali kubelekela kucibeela Cakumwaila Makani kumuswaangano wakacitikila ku Prague uluula kuti: “Mu Nsondo mafwumina, mupati wamasilikani iwakatumwa kuzikubelekela kumuswaangano, wakatuswaya. Wakajana kuti luumuno lwakali mbuli meenda aamumukala, eelyo wakati kunyina mulimo ngwaakeelede kucita. Alimwi wakaamba kuti abalo bantu bakkala mubusena buli afwaafwi abbuwa lyazisobano bakali kubuzya naa mbabani bakali kuswaangana. Naakaamba kuti Mbaakamboni ba Jehova, bakagambwa kapati, cakunga musilikani ooyu wakabaambila kuti: ‘Ikuti bantu nibali kulilemeka mbuli bulilemeka Bakamboni ba Jehova, basilikani nobatali kuyandika pe.’”

Banji Bakafwutulwa Kale!

Ijwi lya Leza Bbaibbele ngomusamu uusilika zilengwa zyabantu, uupa kuti Banakristo bakkale muluumuno akukamantana. (Ba-Roma 14:19; Ba-Efeso 4:22-24; Ba-Filipi 4:7) Eeci ncicakajanika kumuswaangano waalubazu wakuti “Lufwutuko Luli Afwaafwi!” Bakamboni ba Jehova bakafwutuka kale kumapenzi amwi aapenzya bantu munyika eeyi. Ikutajatila bamwi, lunya alimwi akusalaulana mubala, ikwaamba buyo amwi amapenzi aali muciinga, eezi tazicili penzi kulimbabo alimwi balanga kumbele ciindi nyika yoonse noitanoojisi mapenzi aali boobo.

Aabo bakajanika kumiswaangano eeyi bakalibonena kukamantana kwa Bakamboni ibazwa muzisi ziindene-indene alimwi ibaindene zilengwa. Eeci cakalibonya kumamanino aamuswaangano. Boonse bakali kwiide kukamba, kukumbata balongwe bapya akufwotolana kamamanino. (1 Ba-Korinto 1:10; 1 Petro 2:17) Kabakkomene akaambo kakuzyiba kuti lufwutuko kuzwa kumapenzi alimwi azintu zilibilisya luli afwaafwi, basimuswaangano bakapilukila mwabomwabo akumbungano zyabo kabajisi makanze aakukakatila ku “majwi aabuumi” aazwa kuli Leza.—Bafilipi 2:15, 16, Ci.

Bupanduluzi buyungizidwe

Kabbokesi/[Cifwanikiso icili apeeji 10]

Milaka iili 26 Iimvwika Mbuli Mulaka Omwe

Kumiswaangano yoonse iili fwuka, pulogilamu yakacitwa mumulaka wakubusena ooko. Kumuswaangano wakacitikila ku Germany, makani akaambwa amumilaka iimbi iili 18. Ku Dortmund akwalo kwakaambwa makani muci Arabic, muci Farsi, ci Portuguese, ci Spanish, ci Russian; ku Frankfurt mu Chingisi, ci French, alimwi aci Serbian naa ci Croatian; ku Hamburg muci Danish, ci Dutch, ci Swedish, alimwi aci Tamil; ku Leipzig muci Chinese, ci Polish, alimwi aci Turkish; eelyo ku Munich muci Greek, ci Italian, alimwi Amucisyobo Cakutambaika icaku Germany. Muswaangano wakacitikila ku Prague makani woonse akaambwa muci Czech, Chingisi amuci Russia. Ku Bratislava, pulogilamu yakali muci Chingisi aci Hungaria, ci Slovak alimwi a Mwaambo Wakutambaika wamuci Slovakian. Ku Chorzow, milaka yakabelesya kuli ci Polish, ci Russia, ci Ukraine alimwi a Mumwaambo Wakutambaika buya waku Poland. Eelyo ku Poznan kwakabelesyegwa ci Polish alimwi aci Finnish.

Milaka yoonse yakali 26! Masimpe basimuswaangano bakalaandaanizyidwe amulaka, pele bakali kamantanizyidwe aluyando.

[Cifwanikiso icili apeeji 9]

Basimuswaangano baku Croatia bakajanika ku Frankfurt bakakondwa kutambula Bbaibbele lya “New World Translation” mumulaka wabo